Bainhira diskute malu ho ita-nia kaben, dala barak ita temi fali kona-ba buat neʼebé liu tiha ona, hanesan akontesimentu sira neʼebé rezolve kleur ona. Problema mak ita la hatene fó perdua ba malu.

Ita bele aprende oinsá atu fó perdua ba malu. Maibé ulukliu, mai ita hanoin kona-ba tanbasá mak susar ba feen-laʼen atu fó perdua ba malu.

Hakarak kontrola kaben. Ema balu lakohi fó perdua tanba sira hakarak kontrola sira-nia kaben. No bainhira problema ruma mosu, sira sei temi fali kona-ba buat neʼebé liu ona atu sira-nia kaben tenke halo tuir.

Rai hirus. Dala ruma, ema nia laran-kanek presiza tempu kleur atu kura. Karik ita hatete: ‘Haʼu perdua ó’, maibé ita nafatin rai hirus hodi hanoin beibeik kona-ba buat neʼebé akontese iha tempu uluk.

Laran-tun. Kuandu kaben, ema balu mehi katak susar sei la mosu iha moris kaben nian. Tan neʼe, bainhira sira haree katak sira-nia kaben nia hanoin mak la hanesan, sira lakohi troka sira rasik nia hanoin maibé hein deʼit sira-nia kaben mak tenke halo tuir sira. Tanba sira-nia hanoin la tuir realidade, ida-neʼe halo sira buka sira-nia kaben nia sala no susar atu fó perdua.

Hanoin sala. Ema barak mós lakohi fó perdua ba sira-nia kaben tanba sira iha hanoin sala. Porezemplu:

Se haʼu fó perdua, neʼe katak haʼu taka matan ba sala neʼe.

Se haʼu fó perdua, haʼu tenke haluha kona-ba neʼe.

Se haʼu fó perdua, nia sei halo aat liután mai haʼu.

Tuir loloos, hanoin hanesan neʼe mak sala. Maibé dala ruma, ema neʼebé iha hanoin neʼebé loos mós susar atu fó perdua ba ema seluk, liuliu ba sira-nia kaben.

Hatene didiʼak “perdua” katak sá. Iha Bíblia, liafuan “perdua” dala ruma katak “husik”. Tan neʼe, fó perdua la dehan katak ita tenkesér haluha ka taka matan ba hahalok sala. Dala ruma, ita presiza fó perdua ka husik ida-neʼe atu ita rasik mak bele sente hakmatek no atu salva ita-nia moris kaben nian.

Hatene rezultadu aat husi hahalok neʼebé lakohi fó perdua. Rai hirus sei estraga laʼós deʼit ita-nia moris kaben nian. Matenek-naʼin balu hatete katak, ida-neʼe mós estraga ita-nia saúde, hanesan kona moras tensaun ka moras depresaun. Bíblia hatete: “Hatudu laran-diʼak ba malu, hanoin malu, perdua malu ho laran.”—Efeso 4:32.

Hatene rezultadu diʼak husi hahalok fó perdua. Se ita ho ita-nia kaben sai prontu atu fó perdua ba malu, ida-neʼe halo fasil ba ita atu tau fiar ba malu duké fó-sala ba malu. Ida-neʼe ajuda ita atu haburas dame no domin iha moris kaben nian.—Matadalan husi Bíblia: Koloso 3:13.

Hanoin tuir realidade. Kuandu ita simu ita-nia kaben nuʼudar sala-naʼin neʼebé iha fraku oioin, ida-neʼe halo fasil liu ba ita atu fó perdua ba malu. Livru ida (Fighting for Your Marriage) hatete: ‘Bainhira ita tau atensaun deʼit ba ita-nia kaben nia sala, fasil tebes ba ita atu haluha hahalok diʼak neʼebé ita-nia kaben hatudu. Entaun, ita hakarak hanoin liu kona-ba ita-nia kaben nia fraku, ka hahalok diʼak?’ Keta haluha katak la iha ema ida neʼebé perfeitu.—Matadalan husi Bíblia: Tiago 3:2.

Keta sai ema loos liu. Kuandu ita sai hirus tanba ita-nia kaben nia liafuan ka hahalok ruma, husu ba ita-nia an: ‘Problema neʼe boot ka lae? Haʼu tenke haruka nia atu husu deskulpa ba haʼu? Ka diʼak liu haʼu husik deʼit no la hanoin tan?’—Matadalan husi Bíblia: 1 Pedro 4:8.

Koʼalia ba malu. Se ita presiza duni atu koʼalia ho ita-nia kaben, esplika ho kalma kona-ba buat neʼebé halo ita sai hirus no tansá mak ita sente hanesan neʼe. Keta koʼalia iha dalan neʼebé duun ita-nia kaben tanba ida-neʼe halo nia atu defende an deʼit. Duké halo hanesan neʼe, fó-hatene deʼit oinsá mak ita-nia kaben nia hahalok kona ita.