“Haʼu sai estrese tebes no haʼu-nia laran-triste halo haʼu hakruʼuk an toʼo rai; haʼu sai triste iha loron tomak.”—Salmo (Mazmur) 38:6.

BUAT NEʼEBÉ MATENEK-NAʼIN SIRA HANOIN

Ema hotu dala ruma sente laran-tun, maibé depresaun mak moras ida neʼebé halo ema laran-tun tebes toʼo sira sai fraku. Ema neʼebé iha moras neʼe bele sente laran-tun beibeik no hanetik sira atu halaʼo sira-nia atividade loroloron nian. Tuir loloos, matenek-naʼin sira ladún iha hanoin neʼebé hanesan kona-ba triste neʼebé mak “baibain deʼit” no ida neʼebé mak sira hanoin nuʼudar “moras depresaun”. Maibé, matenek-naʼin sira hatene katak kuandu ema balu sente laran-tun, dala ruma sira mós sente katak sira la iha folin no sira sente sala.

BUAT NEʼEBÉ BÍBLIA HANORIN

Bíblia konta kona-ba mane no feto barak neʼebé sente laran-tun. Porezemplu, Ana sente “laran-dodok”. Liafuan neʼe dala barak mós tradús nuʼudar “laran-kanek” no “estrese tebes”. (1 Samuel 1:10) Iha situasaun ida, profeta Elias mós sente estrese tebes toʼo nia harohan ba Maromak atu hasai ninia moris!—1 Reis (Raja-Raja) 19:4.

Ema kristaun iha apóstolu sira-nia tempu simu avizu atu “fó laran-manas ba sira neʼebé laran-tun” (1 Tesalonika 5:14, MF) Tuir livru ida, liafuan “sira neʼebé laran-tun” bele koʼalia kona-ba ema sira neʼebé “sai estrese ba tempu uitoan tanba moris loroloron nian”. Klaru katak, feto no mane sira neʼebé laran-metin iha tempu Bíblia nian dala ruma mós hetan depresaun.

“Mundu tomak hakilar tanis hanesan feto neʼebé atu tuur ahi.”—Roma 8:22.

BUAT NEʼEBÉ BÍBLIA HANORIN

Bíblia hanorin katak ita hetan moras tanba kaben-naʼin primeiru kontra Maromak. Porezemplu, Salmo (Mazmur) 51:5 hatete: “Ho susar tuur-ahi nian, haʼu moris mai ho sala. No ho sala mak haʼu-nia inan koʼus haʼu iha ninia knotak.” No Roma 5:12 dehan katak “husi ema ida deʼit [katak, Adão] mak sala tama iha mundu, no tan sala, mate; nuneʼe mate toʼo ba ema hotu, basá ema hotu sala”. Tanba ita hotu sai ema sala-naʼin liuhusi Adão, ita hotu bele hetan moras, neʼe katak moras iha isin no neon. Tan neʼe mak Bíblia dehan katak “mundu tomak hakilar tanis hanesan feto neʼebé atu tuur ahi”. (Roma 8:22) Maski nuneʼe, Bíblia mós fó sai kona-ba esperansa neʼebé doutór sira la bele fó. Maromak promete atu halo mundu foun neʼebé hakmatek, no iha neʼebá sei la iha tan moras, neʼe inklui mós moras depresaun.—Apokalipse 21:4.

“Jeová besik ba sira neʼebé sente triste iha laran, no salva sira neʼebé laran-kraik.”—Salmo (Mazmur) 34:18.

TANBASÁ MAK IDA-NEʼE IMPORTANTE?

Dala barak ita la bele kontrola situasaun, no buat aat sira neʼebé mosu bele kona ita. (Eclesiastes [Pengkhotbah] 9:11, 12) Maibé, iha buat balu neʼebé ita bele halo atu nuneʼe hanoin neʼebé la diʼak ka laran-tun la bele domina ita-nia moris.

BUAT NEʼEBÉ BÍBLIA HANORIN

Bíblia fó sai katak ema neʼebé moras presiza doutór. (Lucas 5:31) Entaun, se ita hetan depresaun neʼebé halo ita laran-tun beibeik, la sala atu buka ajuda husi doutór sira. Bíblia mós hatudu kona-ba tansá mak orasaun iha folin boot no ajuda ita. Porezemplu, Salmo (Mazmur) 55:22 dehan: “Soe ó-nia todan ba Jeová, no nia rasik sei apoia ó. Nia sei nunka husik ema loos atu monu.” Tuir loloos, orasaun laʼós deʼit dalan atu halo ita sente diʼak fali, maibé ida-neʼe mós dalan importante atu koʼalia ho Maromak Jeová, ida neʼebé “besik ba sira neʼebé sente triste iha laran, no salva sira neʼebé laran-kraik”.—Salmo (Mazmur) 34:18.

Ita mós bele sente kmaan hodi fó sai ita-nia sentimentu ba belun diʼak ida. (Provérbios [Amsal] 17:17) Testemuña ba Jeová ida naran Daniela hatete: “Haʼu-nia maluk fiar-naʼin ho laran-diʼak husu haʼu atu koʼalia kona-ba haʼu-nia moras depresaun. Maski haʼu lakohi atu koʼalia kona-ba neʼe ba tinan balu ona, maibé haʼu hakfodak kona-ba oinsá haʼu sente kmaan tebes kuandu haʼu fó sai tiha haʼu-nia sentimentu. Haʼu sente katak ida-neʼe mak buat neʼebé haʼu presiza halo husi uluk kedas.”