Tuir Organização Mundial da Saúde, violénsia kontra feto sira agora sai hanesan “moras aat ida neʼebé ameasa saúde públiku iha mundu tomak. Husi feto hotu, porsentu 35 sai vítima ba violénsia hasoru feto no porsentu 30 mak hetan violénsia husi namoradu ka laʼen.”

Tuir peskiza ida neʼebé entrevista ba ema naʼin-64.303, maizumenus naʼin-50.800 mak hanoin katak “relijiaun hamosu susar no konflitu iha mundu tomak”. Iha tinan 2001 iha rai-Inglaterra no rai-Gales porsentu 72 husi populasaun mak fiar ba relijiaun kristaun, maibé tuir sensus ida iha tinan 2011 hatudu katak neʼe menus ba porsentu 59. Iha tinan sanulu neʼe nia laran, ema neʼebé la iha relijiaun mós aumenta husi porsentu 15 saʼe toʼo porsentu 25.

Tuir relatóriu média sira-nian, governu foin halo lei ida dehan katak ema tenke bá vizita beibeik sira-nia inan-aman neʼebé idade ona. Tuir lei foun neʼe, oan sira mós tenke halo buat neʼebé “fó solok” ba inan-aman. Maibé kona-ba ema neʼebé la kumpre lei neʼe, “la iha kastigu ka konsekuénsia ruma”.

Grupu kriminozu sira halaʼo atividade ilegál hanesan halo hahán, produtu kozmétiku no deterjen oioin neʼebé falsu. Matenek-naʼin ida kona-ba neʼe dehan katak “besik komposisi hotu neʼebé ema uza atu halo produtu hirak-neʼe, ema bele halo falsu”. Matenek-naʼin ida seluk hatete katak porsentu 10 husi produtu ai-han hotu neʼebé sosa iha rai riku sira mak produtu falsu.