Dala ruma ita-nia oan sira hakarak halo buat ruma neʼebé ita dehan ona “Labele” no sira sai ulun-toos tebes. Ida-neʼe koko duni ita-nia pasiénsia tanba sira halo buat neʼebé ita la gosta. Ikusmai halo bá halo mai la diʼak, ita sente baruk ona no hanoin diʼak liu husik deʼit oan halo buat neʼebé sira hakarak. Rezultadu mak ita-nia liafuan “Labele” sempre sai fali “Bele” tanba halo tuir deʼit oan nia hakarak.

Maibé nuʼudar inan-aman, ita bele hadiʼa situasaun neʼe hodi aprende oinsá atu hatete “Labele” ba ita-nia oan sira. Mai ita haree hamutuk.

Dala ruma ita tenkesér hatete “Labele”. Inan-aman balu hanoin katak sira tenke esplika didiʼak uluklai ba oan antes atu dehan “Labele”. Sira taʼuk atu hatete kedas liafuan “Labele” tanba lakohi halo oan triste no hirus.

Loos duni, se ita dehan “Labele”, foufoun neʼe halo oan sira laran-tun tebes. Maski nuneʼe, ita tenkesér dehan “Labele” hodi sira bele aprende katak iha mundu neʼe ema hotu tenke dixiplina an. Maibé se ita rende an no halo tuir deʼit oan nia hakarak, neʼe hanesan ita hanorin oan atu manda fali ita no lalika rona ba ita. Neineik-neineik, ita-nia hahalok neʼe sei halo oan sira lakohi simu no sai hirus. Hanoin toʼok, oinsá mak oan sira bele hatudu respeitu ba inan-aman neʼebé sempre halo tuir oan nia hakarak?

Liafuan “Labele” sei treinu oan atu prepara an ba moris aban-bainrua. Husi kiʼik kedas, inan-aman presiza hanorin oan katak: “Maski iha buat balu neʼebé ó labele halo, maibé loloos ida-neʼe diʼak ba ó-nia moris.” Nuneʼe, bainhira sira sai joven, sira labele monu ba tentasaun se ema seluk obriga sira atu uza droga ka halo hahalok neʼebé la morál.

Ita-nia liafuan “Labele”, neʼe mós bele treinu oan sira atu iha hanoin neʼebé loos bainhira sira sai boot. Doutór ida naran David Walsh hatete: “Realidade mak ita ema neʼebé boot ona mós dala ruma la bele hetan buat neʼebé ita hakarak. Tan neʼe, se ita sempre halo tuir deʼit oan nia hakarak, neʼe sei la lori diʼak ba sira-nia moris.” *

Hanoin kona-ba oan nia diʼak. Ita hakarak ita-nia oan atu sai ema boot neʼebé hatene kontrola an no kaer responsabilidade ho didiʼak. Maibé ita-nia oan la bele sai hanesan neʼe se ita sempre halo tuir deʼit sira-nia hakarak. Bíblia hatete se ema ida estima liu ninia oan, oan neʼe “sei sai ema neʼebé la hatene fó-agradese”. (Provérbios [Amsal] 29:21) Tan neʼe, hatete liafuan “Labele”, neʼe atu hanorin ita-nia oan, laʼós atu hakanek oan nia laran, maibé ba oan nia diʼak.—Bíblia nia matadalan: Provérbios (Amsal) 19:18.

Hatete “Labele” ho desizaun metin. Ita-nia oan laʼós hanesan ho ita-nia otas. Tan neʼe, loloos ita la presiza hein atu oan bele konkorda ho ita-nia liafuan “Labele”. Loos duni, atu esplika didiʼak ba ita-nia oan hodi ajuda sira komprende, neʼe la sala. Tanba nuʼudar sira boot daudaun, sira tenke aprende oinsá atu uza ‘sira-nia kbiit atu hanoin atu hatene buat diʼak husi buat aat’. (Ebreu 5:14) Maski nuneʼe, ita la presiza diskute beibeik ho ita-nia oan tansá ita hatete “Labele”. Se lae, neʼe bele halo oan hanoin sala katak sira mak bele manda fali ita.—Bíblia nia matadalan: Éfeso 6:1.

Kaer metin ita-nia desizaun. Dala ruma ita-nia oan sei maña hela ka tanis. Se ida-neʼe akontese, ita bele halo saida? Livru ida (Loving Without Spoiling) dehan: “Haketak an husi ita-nia oan, hodi dehan: ‘Ó bele maña hela bá mós amá sei lakohi rona ó. Ó bá tiha iha kuartu laran. Ó nonook ona mak ó mai fali.’” Foufoun, inan-aman sente arraska atu hatete hanesan neʼe, no susar mós ba oan atu halo tuir. Maibé neineik-neineik oan sei komprende katak maski sira maña, tanis, ka sisi demais mós ita sei la troka ita-nia desizaun.—Bíblia nia matadalan: Tiago 5:12.

Tetu didiʼak. Keta hatete beibeik “Labele” tan deʼit hakarak domina oan sira, tanba ita hakarak ‘ema hotu haree ita-nia haraik-an’. (Filipe 4:5) Ita mós presiza dehan “Bele” liuliu kuandu buat neʼebé ita-nia oan husu mak la sala no buat neʼebé lori diʼak ba sira.—Bíblia nia matadalan: Koloso 3:21.