IDA neʼebé mak aat liu? Moris la iha susesu ka moris ho susesu neʼebé falsu? Moris ho susesu neʼebé falsu mak aat liu. Tanbasá? Tanba se ema ida seidauk hetan susesu, nia bele hakaʼas an liután atu hetan buat neʼebé nia buka.

Maibé moris ho susesu neʼebé falsu bele lohi ema. Neʼe bele halo ema hanoin katak sira hetan ona buat hotu neʼebé sira hakarak maibé tuir loloos sira la hetan buat folin ida. Toʼo ikus mak sira foin sente katak sira presiza troka sira-nia moris atu hetan buat folin neʼe, maibé karik tarde ona.

Hanoin toʼok kona-ba ezemplu neʼe. Jesus Kristu husu hanesan neʼe: “Buat diʼak saida mak ema ida hetan se nia manán mundu tomak maibé lakon nia moris?” (Mateus 16:26) Jesus nia pergunta neʼe hatudu katak ema neʼebé buka osan no sasán deʼit iha sira-nia moris tomak mak hanesan buka susesu neʼebé falsu deʼit. Konsellu-naʼin ida naran Tom Denham dehan: “Se ema hanoin deʼit atu buka pozisaun aas liután, buka osan no sasán barak liután, sira sei la hetan kontente neʼebé loos iha laran. Se ema ida hanoin katak moris ho susesu mak tenke iha osan barak, ema neʼe nia hanoin mak badak duni tanba ikusmai neʼe sei halo nia sente mamuk iha laran.”

Tuir peskiza ida neʼebé halaʼo iha rai-Estadus Unidus hatudu, ema barak hanoin atu moris kontente, neʼe la dehan katak tenkesér iha osan barak. Iha peskiza neʼe, hakerek lista ida kona-ba buat 22 neʼebé “bele halo ema moris ho susesu”, no tuir ema barak nia hanoin “iha osan barak” mak ba iha númeru 20 husi lista neʼe. Buat neʼebé primeiru liu mak moris ho saúde diʼak, haree malu diʼak ho família no kolega, no halo serbisu neʼebé sira rasik gosta.

Sin, ema barak hatene duni moris hodi buka rikusoin deʼit mak hanesan moris ho susesu neʼebé falsu. Maibé atu halaʼo moris loroloron nian hodi buka susesu neʼebé loloos, neʼe mak susar tebes ba ita.