BÍBLIA NIA HANORIN
Sai moos
Maromak hakarak ema hamoos an husi buat foʼer hotu ka lae?
“Mai ita hamoos ita-nia an husi buat hotu neʼebé hafoʼer isin no laran.”—2 Korinto 7:1.
SAIDA MAK BÍBLIA HANORIN?
Ita-nia Kriadór Maromak hadomi ita ema. Nia hakarak ita moris ho isin forte, laiha moras no moris naruk. Maromak dehan: “Halo tuir haʼu-nia mandamentu sira ho laran tomak, atu nuneʼe ó-nia moris sei sai naruk no ó sei hetan dame.” (Provérbios [Amsal] 3:1, 2) Neʼe duni, tanba Maromak hadomi ema, nia fó ukun-fuan sira ba ema Izraél antigu kona-ba tenkesér hariis, hamoos uma no halo ambiente moos nafatin. (Deuteronômio [Ulangan] 23:12-14) Bainhira ema Izraél halo tuir ukun-fuan hirak-neʼe, sira-nia saúde sai diʼak liu. Sira mós la kona moras aat oioin neʼebé ema Ejitu antigu ho nasaun sira seluk hetan.—Deuteronômio (Ulangan) 7:12, 15.
Nuneʼe mós ohin loron, Maromak hakarak ema ‘hamoos an husi buat hotu neʼebé hafoʼer isin no laran’. Neʼe katak labele fuma, labele hemu tua toʼo lanu no labele uza droga tanba buat hotu neʼe mak bele hafoʼer ema nia isin no neon, ikusmai mate otas nurak deʼit. Maibé se ema hadook an husi buat hirak-neʼe, sira-nia saúde sei sai diʼak liu no bele moris naruk. Buat diʼak liután mak, se ema hamoos an didiʼak, neʼe hatudu domin ba ema seluk iha uma-laran no mós viziñu sira.—Marcos 12:30, 31.
Maromak hakarak ema nia hahalok no adorasaun oinsá?
“Hamate hakarak isin nian neʼebé book imi atu halo hahalok hanesan sala-foʼer, hahalok la moos, hakarak seksuál neʼebé foʼer, hakarak aat, no kaan buat neʼebé ema seluk nian, neʼebé hanesan adora estátua. Maromak nia hirus sei tun ba ema sira neʼebé halo buat sira-neʼe.”—Koloso 3:5, 6.
SAIDA MAK BÍBLIA HANORIN?
Loos duni, Bíblia dehan ita tenke ‘hamoos an husi buat hotu neʼebé hafoʼer isin no laran’. Ema barak ho ulun-naʼin relijiaun hotu iha Jesus Kristu nia tempu, sira tau matan didiʼak sira-nia isin hodi hamoos an beibeik, maibé neʼe husi liʼur deʼit. Sira la halo tuir ukun-fuan kona-ba halo hahalok diʼak no halaʼo adorasaun neʼebé moos. (Marcos 7:1-5) Tan neʼe Jesus dehan ba sira presiza hamoos an. Nia dehan: “Buat naran deʼit husi liʼur neʼebé tama ba ema la hafoʼer ema. Tanba ida-neʼe . . . tama ba kabun, no depois neʼe hasai tiha ba liʼur.” Nia hatutan tan: “Buat neʼebé sai husi ema mak hafoʼer nia, tanba husi ema nia fuan-laran mak ema hasai hanoin neʼebé aat, hahalok sala-foʼer, naʼok, oho, sala-foʼer ho ema nia kaben, kaan-teen, hahalok aat, lohi, hahalok neʼebé la iha moe, laran-moras, . . . no ulun-toos. Buat aat sira-neʼe . . . hafoʼer ema.”—Marcos 7:18-23.
Jesus nia liafuan hanorin katak maski ema ida nia isin moos tebetebes maibé se nia la halaʼo moris ho morál, no la adora Maromak tuir Bíblia, ema neʼe hanesan kopu ida neʼebé moos iha liʼur deʼit maibé iha laran foʼer loos.—Mateus 23:25, 26.
Ukun-fuan sira iha Bíblia todan liu ba ita ka lae?
“Domin ba Maromak katak ita halo tuir ninia ukun-fuan sira; no ninia ukun-fuan sira la todan.”—1 João 5:3.
SAIDA MAK BÍBLIA HANORIN?
Hakerek ona iha Miquéias (Mikha) 6:8 dehan: “Saida mak Jeová hakarak ó atu halo? Nia hakarak deʼit ó halo hahalok loos, hafolin laran-metin, no laʼo ho ó-nia Maromak ho haraik-an!” Buat hirak-neʼe todan liu ba ita atu halo ka lae? Lae. Ita-nia Kriadór, Maromak Jeová hakarak ita halo tuir nia tanba hadomi nia. Bainhira ita halo tuir nia ho laran, neʼe halo ita haksolok tebetebes. (Salmo [Mazmur] 40:8) No mós kuandu ita halo sala, Maromak laran-sadiʼa tebes. Nia komprende ita mak ema sala-naʼin ho fraku oioin. “Hanesan aman ida hatudu laran-sadiʼa ba ninia oan sira, Aman Jeová hatudu laran-sadiʼa ba sira neʼebé taʼuk ba nia. Nia hatene loos oinsá mak nia kria ita, nia hanoin-hetan katak ita mak rai-rahun.”—Salmo (Mazmur) 103:13, 14.
Liuliu Maromak fó ukun-fuan sira kona-ba tenkesér hamoos an, hatudu hahalok moos no halaʼo adorasaun neʼebé moos tanba nia laran-diʼak no hadomi ita. Tan neʼe se ita halo tuir ukun-fuan sira-neʼe, ita mak ema matenek no hadomi Maromak ho laran tomak.
Karik Ita sei gosta
LIVRU HAKLAKEN
Maromak gosta haree ema fuma ka lae?
Bíblia nunka temi kona-ba tabaku, tan neʼe oinsá ita bele hatene?
