Hanoin toʼok, derrepente deʼit, Ita-nia oan-mane ho tinan neen husu: “Apá, apá mós loron ida sei mate ka?” Ita haree nia ho hakfodak no hanoin iha laran: ‘Haʼu-nia oan tinan toʼo ona atu komprende kona-ba mate ka lae? Haʼu atu koʼalia saida ba nia?’

Baibain labarik sira mós hanoin kona-ba mate. Sira mós dala ruma halo finje mate bainhira sira halimar hamutuk. Nuneʼe, koʼalia kona-ba mate, neʼe laʼós tópiku segredu ida ba labarik sira no inan-aman presiza hatán ba sira-nia pergunta. Se ita koʼalia nakloke, neʼe sei ajuda oan sira atu tahan kuandu ema ruma neʼebé sira hadomi mate.

Maski ema balu hanoin katak koʼalia kona-ba mate sei hataʼuk labarik sira, maibé tuir loloos hanorin sira kona-ba neʼe sei ajuda sira atu la taʼuk demais. Dala ruma ita mós presiza hadiʼa labarik nia hanoin sala. Porezemplu, matenek-naʼin balu hatete katak labarik barak neʼebé seidauk toʼo tinan neen ladún komprende mate katak sá. Liuliu labarik sira neʼebé toman halimar game oioin, sira haree ema ida “mate” ba tempu uitoan no tuirmai “moris fali”.

Maibé neineik-neineik, labarik komesa komprende katak mate mak lori triste boot. Nuneʼe, sira husu pergunta oioin, fó sai sira-nia hanoin, no mós sai taʼuk, liuliu bainhira família ruma ka kolega diʼak mak mate. Tan neʼe, inan-aman tenke koʼalia ho oan sira kona-ba mate. Doutora ida naran Marion Haza hatete: “Se labarik ida sente katak inan-aman bandu nia labele temi ka koʼalia kona-ba mate, ida-neʼe halo nia laran-susar liután.”

Ita la presiza hanoin demais kona-ba saida mak ita sei koʼalia. Matenek-naʼin sira hatete, labarik nia hakarak mak ita koʼalia “buat neʼebé loos ho laran-diʼak”. Diʼak atu hatene katak baibain labarik sira sei la husu pergunta se sira seidauk prontu atu rona resposta.

Uza situasaun ruma atu koʼalia kona-ba mate. Se haree manu neʼebé mate iha dalan, ka animál hakiak ruma mate, husu pergunta simples atu ajuda ita-nia oan fó sai ninia hanoin kona-ba mate. Porezemplu: “Animál neʼebé mate ona sente terus ka lae? Sente malirin ka hamlaha ka lae? Oinsá mak ó bele hatene se animál ka ema ida mate ona ka moris hela?”—Bíblia nia matadalan: Eclesiastes (Pengkhotbah) 3:1, 7.

Keta halo oan sai bilán. Bainhira família ka kolega ida mate, ita labele halo ita-nia oan sai bilán hodi uza liafuan hanesan: “Ó-nia avó bá pasiar tiha.” Ida-neʼe bele halo oan hanoin sala katak avó neʼebé mate ona lakleur sei mai fali. Tan neʼe, diʼak liu ita koʼalia loloos deʼit hodi uza liafuan simples, hanesan: “Ó-nia avó mate ona. Nia la book an ona no la bele koʼalia tan ho ita. Maibé ita sei la haluha nia.”—Bíblia nia matadalan: Éfeso 4:25.

Fó kmaan ba oan. Karik labarik ida sente sala katak ninia hahalok ka hanoin ladiʼak mak halo nia família ka kolega mate. Diʼak atu hatete ba oan katak neʼe laʼós ninia sala, no liután neʼe diʼak mós atu husu: “Tansá ó hanoin hanesan neʼe?” Rona didiʼak ba nia no keta hamnasa ka hatún nia. Labarik sira mós dala ruma hanoin katak mate bele daʼet hanesan moras ida, tan neʼe ita tenke fó-hatene mós ba oan katak se família ida mate, neʼe la dehan katak lakleur nia mós sei mate.

Ajuda oan fó sai sira-nia hanoin. Koʼalia kona-ba ita-nia família ka belun neʼebé mate ona, inklui mós família neʼebé ita-nia oan nunka hasoru. Ita bele konta istória kona-ba tempu haksolok bainhira uluk ita hamutuk ho tia, tiu, ka avó sira neʼebé mate ona. Se ita koʼalia kona-ba sira, neʼe hanorin oan katak la sala atu hanoin filafali ka koʼalia kona-ba ema neʼebé mate ona. Maibé keta obriga oan sira atu fó sai sira-nia hanoin. Se sira lakohi koʼalia, ita bele hein toʼo tempu seluk neʼebé diʼak.—Bíblia nia matadalan: Provérbios (Amsal) 20:5.