EMA HANOIN OINSÁ?

Ema balu hanoin katak la sala ba kaben-naʼin atu halo relasaun seksuál ho ema seluk, liuliu bainhira mane kaben-naʼin mak buka fali feto seluk. Iha mós ema balu neʼebé hanoin katak sira bele hakotu moris kaben nian iha tempu naran deʼit tuir sira-nia hakarak.

SAIDA MAK BÍBLIA HANORIN?

Tuir Bíblia, liafuan “adultériu” mak kona-ba mane ka feto kaben-naʼin neʼebé halo relasaun seksuál ho ema seluk neʼebé laʼós ninia kaben. Bíblia mós temi hahalok neʼe nuʼudar sala-foʼer. (Jó [Ayub] 24:15; Provérbios [Amsal] 30:20) Maromak odi tebes hahalok neʼe. Iha rai-Izraél antigu, ema neʼebé halo adultériu tenke hetan kastigu-mate. (Levítico [Imamat] 18:20, 22, 29) Jesus hanorin ninia dixípulu sira labele halo sala adultériu.​—Mateus 5:27, 28; Lucas 18:18-20.

TANSÁ MAK IDA-NEʼE IMPORTANTE?

Ema neʼebé halo sala adultériu hatudu katak nia la laran-metin ba juramentu neʼebé nia halo ona ho ninia kaben iha loron kazamentu. Hahalok neʼe mós “sala hasoru Maromak”. (Gênesis [Kejadian] 39:7-9) Adultériu mós bele haketak oan sira husi inan-aman. Liután neʼe, Bíblia fó avizu katak “Maromak sei tesi lia ba . . . kaben-naʼin sira neʼebé halo sala-foʼer”.​—Ebreu 13:4.

“Ema hotu tenke respeitu moris kaben nian, no keta hafoʼer relasaun kaben nian.”​—Ebreu 13:4.

SAIDA MAK BÍBLIA HANORIN?

Tuir Bíblia, ema ida bele hakotu ninia moris kaben nian se ninia kaben halo sala-foʼer. (Mateus 19:9) Neʼe katak se la’en ida halo sala adultériu, ninia feen neʼebé la halo sala iha direitu atu hili se nia hakarak soe malu ho ninia la’en, ka kontinua moris hamutuk nuʼudar feen-la’en. Neʼe mak ema ida-idak nia desizaun.​—Galásia 6:5.

Maibé tuir Maromak nia haree, moris kaben nian mak sagradu tebes, katak feen-la’en ida sei moris hamutuk toʼo mate mak haketak sira. (1 Korinto 7:39) Maromak hakribi tebes se feen-la’en ida soe malu ho razaun neʼebé laloos, porezemplu, tan deʼit nia la kontente ona ho ninia kaben. Tan neʼe, keta hanoin atu soe malu lalais.—Malaquias (Maleakhi) 2:16; Mateus 19:3-6.

“Ema neʼebé soe nia feen, sala-foʼer deʼit mak lae, hodi hola fali feto seluk, ema neʼe halo sala adultériu nian.”​—Mateus 5:32, Liafuan diak ba imi, segunda edisaun.

SAIDA MAK BÍBLIA HANORIN?

Bíblia hatete katak Maromak sei fó perdua ba ema hotu neʼebé hakribi ninia sala no husik tiha ninia hahalok aat, inklui mós sala adultériu. (Apóstolu 3:19; Galásia 5:19-21) Tuir loloos, Bíblia koʼalia kona-ba ema neʼebé uluk halo “sala-foʼer ho kaben-naʼin”, maibé ikusmai sai Maromak nia belun.​—1 Korinto 6:9-11.

Porezemplu, hanoin toʼok kona-ba Liurai David, neʼebé ukun rai-Izraél iha tempu uluk. David halo sala-foʼer ho xefe tropa nian ida nia feen. (2 Samuel 11:2-4) Bíblia hatete katak “buat neʼebé David halo mak aat” iha Maromak nia oin. (2 Samuel 11:27) Maibé ikusmai David arrepende an no hakribi ninia sala, tan neʼe Maromak fó perdua ba nia. Maski nuneʼe, David tenke simu rezultadu husi ninia hahalok sala neʼebé lori susar oioin ba ninia moris. (2 Samuel 12:13, 14) Liutiha neʼe, Liurai Salomão mós hakerek: “Ema neʼebé halo sala-foʼer . . . mak ema beik.”—Provérbios (Amsal) 6:32.

ITA BELE HALO SAIDA?

Se Ita halo ona sala adultériu, Ita tenke husu perdua ba Maromak no mós ba Ita-nia kaben. (Salmo [Mazmur] 51:1-5) Ita mós tenke hakribi sala neʼe tuir Maromak nia haree. (Salmo [Mazmur] 97:10) No hakaʼas an atu la haree pornografia ka filme neʼebé hatudu hahalok seksuál. Sees husi toman aat hanesan kaan mane seluk ka feto seluk, ka buat naran deʼit neʼebé bele book Ita atu hatudu interese ba ema neʼebé laʼós Ita-nia kaben.​—Mateus 5:27, 28; Tiago 1:14, 15.

Se Ita-nia kaben mak halo sala-foʼer ho ema seluk, ita bele fiar metin katak Maromak sei komprende Ita-nia sentimentu. (Malaquias [Maleakhi] 2:13, 14) Husu ba Maromak atu fó kmaan no matadalan ba Ita, tanba nia sei ajuda duni Ita. (Salmo [Mazmur] 55:22) Se Ita hili ona atu fó perdua ba Ita-nia kaben nia sala no kontinua moris hamutuk, neʼe katak Ita ho Ita-nia kaben tenkesér hakaʼas an duni atu hametin fali moris kaben nian nuʼudar feen-laʼen.—Éfeso 4:32.

Ba David neʼebé halo ona sala adultériu no depois arrepende an, profeta Natan hatete: “Jeová mós fó perdua ba ó-nia sala.”​—2 Samuel 12:13.