1. Ita sente oinsá kona-ba lia-loos?

 JEOVÁ nia povu hadomi lia-loos neʼebé mai husi Bíblia. Ita-nia fiar bazeia ba ida-neʼe. (Rom 10:17) Ita mós fiar katak Jeová harii kongregasaun Kristaun “nuʼudar ai-riin no fundasaun ba lia-loos”. (1 Tim 3:15) No ita kontente atu halo tuir “sira neʼebé dirije” ita, neʼebé esplika lia-loos husi Bíblia no fó matadalan tuir Maromak nia hakarak.—Ebr 13:17.

2. Tuir Tiago 5:​19, saida mak bele akontese maski ita simu ona lia-loos?

² Maski ita simu ona lia-loos no rekoñese katak ita presiza halo tuir matadalan neʼebé mai husi Maromak nia organizasaun, maibé ita bele deʼit laʼo sees husi lia-loos. (Lee Tiago 5:19.) Satanás hakarak tebes atu halo ita lakon ita-nia fiar ba Bíblia ka matadalan neʼebé ita simu husi Maromak nia organizasaun.—Éf 4:14.

3. Tanbasá ita presiza kaer metin ba lia-loos? (Éfeso 6:​13, 14)

³ Lee Éfeso 6:​13, 14. Lakleur tan Diabu sei uza lia-bosok no informasaun falsu atu book nasaun sira hodi kontra Jeová. (Apok 16:​13, 14) Ita mós hatene katak Satanás sei hakaʼas an liután atu lohi Jeová nia povu. (Apok 12:9) Tan neʼe, importante ba ita atu treinu ita-nia an hodi hatene diferensa entre lia-loos no informasaun falsu, no atu halo tuir lia-loos. (Rom 6:17; 1 Ped 1:22) Neʼe  mak buat neʼebé importante atu bele moris liu terus boot!

4. Saida mak ita sei aprende iha lisaun neʼe?

⁴ Iha lisaun neʼe, ita sei aprende kona-ba hahalok rua neʼebé ita presiza atu bele rekoñese lia-loos neʼebé mai husi Bíblia, no simu matadalan husi Maromak nia organizasaun. Tuirmai, ita sei haree sujestaun tolu neʼebé ita bele halo tuir atu kontinua kaer metin ba lia-loos.

HAHALOK NEʼEBÉ ITA PRESIZA ATU BELE REKOÑESE LIA-LOOS

5. Oinsá mak hodi hamtaʼuk Jeová bele ajuda ita rekoñese lia-loos?

⁵ Hamtaʼuk Jeová. Bainhira ita hamtaʼuk Jeová, ita sei hadomi nia liután no ita lakohi halo buat neʼebé halo nia triste. Ita hakarak tebes atu aprende kona-ba diferensa entre buat neʼebé loos no sala, entre lia-loos no lia-bosok atu nuneʼe Jeová bele simu ita. (Prov 2:​3-6; Ebr 5:14) Ita labele husik ita-nia sentimentu taʼuk ba ema sai boot liu fali ita-nia domin ba Jeová. Tanba baibain buat neʼebé halo ema kontente, sei la halo Jeová kontente.

6. Tanba taʼuk ba ema, neʼe halo espiaun naʼin-10 hatete saida ba povu Izraél?

⁶ Se ita taʼuk liu ba ema duké Maromak, neʼe bele halo ita husik tiha lia-loos. Hanoin toʼok kona-ba espiaun naʼin-12 neʼebé bá hafuhu rai neʼebé Jeová promete atu fó ba povu Izraél. Ba espiaun naʼin-10, sira-nia sentimentu taʼuk ba ema Kanaan mak boot liu fali sira-nia domin ba Jeová. Sira hatete ba povu Izraél: “Ita labele bá atu kontra hasoru povu neʼe, tanba sira forte liu ita.” (Núm 13:​27-31) Tuir ema nia haree, ema Kanaan mak forte liu ema Izraél, no neʼe loos. Maibé se ema ida dehan katak ema Izraél labele manán sira-nia inimigu, neʼe katak nia la rekoñese kona-ba Jeová  nia kbiit. Espiaun naʼin-10 neʼe presiza fokus ba buat neʼebé Jeová hakarak povu Izraél atu halo. Sira mós presiza medita kona-ba buat neʼebé Jeová halo ona ba sira tempu balu antes neʼe. Sira presiza rekoñese katak ema Kanaan nia kbiit mak la iha folin se kompara ho Jeová neʼebé kbiit boot liu. La hanesan ho espiaun sira neʼebé la iha fiar, Josué no Caleb hakarak atu Jeová simu sira naʼin-rua. Sira hatete ba povu: “Se Jeová kontente ho ita, nia sei lori ita hodi tama duni ba rai neʼe no fó ba ita.”—Núm 14:​6-9.

7. Oinsá mak ita bele hamtaʼuk liután ba Jeová? (Haree mós dezeñu.)

⁷ Atu bele hamtaʼuk liután ba Jeová, ita presiza fokus atu halo nia kontente iha ita-nia desizaun hotu. (Sal 16:8) Nuʼudar Ita lee istória sira iha Bíblia, husu Ita-nia an: ‘Se haʼu mak iha situasaun neʼe, desizaun saida mak haʼu sei halo?’ Porezemplu, imajina toʼok Ita rona hela ba espiaun naʼin-10 neʼebé fó sai hela informasaun negativu. Ita sei fiar ba informasaun neʼe no komesa taʼuk ba ema, ka Ita-nia domin ba Jeová no Ita-nia hakarak atu halo nia kontente mak boot liu? Povu Izraél hotu la fiar katak buat neʼebé Josué no Caleb fó sai mak loos. No rezultadu mak sira lakon oportunidade atu tama ba Rai neʼebé Maromak Promete.—Núm 14:​10, 22, 23.

8. Ita presiza hakaʼas an atu haburas hahalok saida, no tanbasá?

⁸ Haraik an. Jeová fó sai lia-loos ba sira neʼebé haraik an. (Mt 11:25) Ita hatudu haraik an hodi simu ajuda atu aprende lia-loos. (Após 8:​30, 31) Maibé, ita mós presiza kuidadu atu la sai foti an. Hahalok foti an bele halo ita hanoin katak ita-nia opiniaun mak loos liu fali Bíblia nia prinsípiu no matadalan neʼebé mai husi Jeová nia organizasaun.

9. Oinsá mak ita bele nafatin haraik an?

⁹ Atu nafatin haraik an, ita presiza hanoin-hetan katak ita mak kiʼik deʼit se kompara ho Jeová. (Sal 8:​3, 4) Ita bele halo orasaun atu haburas hahalok haraik an no prontu atu simu hanorin. Jeová sei ajuda ita atu hafolin ninia hanoin neʼebé nia fó sai liuhusi Bíblia no ninia organizasaun, liu fali ita rasik nia hanoin. Bainhira ita lee Bíblia, buka evidénsia neʼebé hatudu katak Jeová hadomi ema neʼebé haraik an, no odi ema neʼebé foti an, no loko an. No hakaʼas an atu kontinua haraik an bainhira simu knaar importante ruma.

OINSÁ ATU KAER METIN BA LIA-LOOS

10. Jeová uza sé atu fó matadalan ba ninia povu?

¹⁰ Kontinua tau fiar ba matadalan husi Jeová nia organizasaun. Iha Izraél antigu, Jeová uza Moisés, no tuirmai Josué atu fó matadalan ba Ninia povu. (Jos 1:​16, 17) Povu Izraél hetan bensaun kuandu sira haree Moisés no Josué nuʼudar Jeová nia reprezentante. Tinan atus ba atus liutiha, bainhira kongregasaun Kristaun foin harii, apóstolu naʼin-12 mak fó matadalan. (Após 8:​14, 15) No tuirmai grupu neʼe mós inklui katuas sira seluk iha Jeruzalein. Hodi halo tuir matadalan neʼebé mai husi mane fiar-naʼin sira-neʼe, “kongregasaun sira-nia fiar kontinua sai metin liután no loron ba loron fiar-naʼin sira aumenta ba beibeik”. (Após 16:​4, 5) Ohin loron, ita mós sei simu bensaun bainhira ita  halo tuir matadalan neʼebé mai husi Jeová nia organizasaun. Maibé, Jeová sei sente oinsá se ita la rekoñese sira neʼebé Jeová hili atu dirije? Ita bele hatán ba pergunta neʼe hodi aprende kona-ba saida mak akontese bainhira povu Izraél laʼo ba Rai neʼebé Maromak Promete.

11. Saida mak akontese ba ema iha Izraél antigu neʼebé kontra Moisés neʼebé Jeová hili atu dirije sira? (Haree mós dezeñu.)

¹¹ Durante povu Izraél laʼo ba Rai neʼebé Maromak Promete, mane balu neʼebé iha naran-boot kontra hasoru Moisés no knaar neʼebé Jeová fó ba nia. Sira hatete: “Povu tomak [laʼós Moisés deʼit] mak santu, sira hotu santu, no Jeová iha sira-nia leet.” (Núm 16:​1-3) Neʼe loos, tuir Jeová nia haree “povu tomak” mak santu, maibé Jeová hili ona Moisés atu dirije Ninia povu. (Núm 16:28) Hodi kritika Moisés, loloos sira kritika Jeová. Sira la fokus ba buat neʼebé Jeová hakarak, maibé fokus ba sira-nia hakarak, neʼe mak atu iha podér liután no ema barak respeitu. Jeová oho mane sira-neʼe no mós ema rihun ba rihun neʼebé apoia sira. (Núm 16:​30-35, 41, 49) Ohin loron, ita bele fiar katak Jeová la simu ema neʼebé la hatudu respeitu ba arranju husi ninia organizasaun.

12. Tanbasá ita bele kontinua tau fiar ba Jeová nia organizasaun?

¹² Ita bele kontinua tau fiar ba Jeová nia organizasaun. Bainhira Grupu Administradór rekoñese katak presiza halo mudansa kona-ba esplikasaun balu husi Bíblia, ka mudansa kona-ba oinsá ita sei halaʼo ita-nia serbisu, sira lalais atu halo mudansa. (Prov 4:18) Sira halo nuneʼe tanba sira hakarak halo Jeová kontente. Sira mós hakaʼas an atu halo desizaun hodi tuir baze husi liafuan neʼebé loos katak Bíblia, neʼebé Jeová nia povu hotu presiza halo tuir.

13. Saida mak “baze husi liafuan neʼebé loos”, no saida mak ita presiza halo ho ida-neʼe?

 ¹³ “Kontinua kaer metin ba baze husi liafuan neʼebé loos.” (2 Tim 1:13) “Baze husi liafuan neʼebé loos” refere ba hanorin Kristaun neʼebé mai husi Bíblia. (João 17:17) Hanorin sira-neʼe mak nuʼudar hun ba ita-nia fiar. Jeová nia organizasaun hanorin ita atu kaer metin ba ida-neʼe. Bainhira ita halo nuneʼe, ita sei simu bensaun.

14. Oinsá mak ema Kristaun balu la kaer metin ba “baze husi liafuan neʼebé loos”?

¹⁴ Saida mak sei akontese se ita la kaer metin ba “baze husi liafuan neʼebé loos”? Haree toʼok ezemplu tuirmai. Iha apóstolu sira-nia tempu, ema Kristaun balu habelar istória falsu katak Jeová nia loron toʼo ona mai. Karik sira simu karta neʼebé fó sai kona-ba neʼe, no sira hanoin katak apóstolu Paulo mak hakerek karta neʼe. Ema Kristaun balu iha Tesalónika la buka-hatene uluk faktu sira, no tau fiar kedas ba istória falsu no habelar ida-neʼe. Sira sei la monu ba istória falsu neʼe se sira hanoin-hetan buat neʼebé Paulo hanorin kuandu nia sei hamutuk ho sira. (2 Tes 2:​1-5) Paulo fó konsellu ba irmaun-irmán sira atu la ansi hodi tau fiar ba buat neʼebé sira rona. No atu ajuda sira iha futuru, Paulo remata ninia karta segundu ba ema Kristaun iha Tesalónika ho liafuan: “Haʼu Paulo, haʼu hakerek kumprimentus neʼe ho haʼu-nia liman rasik, neʼe mak sinál iha haʼu-nia karta hotu, no ida-neʼe mak dalan neʼebé haʼu hakerek.”—2 Tes 3:17.

15. Oinsá mak ita bele proteje ita-nia an husi informasaun falsu neʼebé haree hanesan buat neʼebé loos? Fó toʼok ezemplu. (Haree mós foto.)

¹⁵ Saida mak ita aprende husi Paulo nia liafuan ba ema Kristaun iha Tesalónika? Bainhira ita rona kona-ba buat ruma neʼebé la hanesan ho buat neʼebé ita aprende husi Bíblia, ka bainhira ita rona istória falsu, ita presiza uza ita-nia kbiit atu tetu didiʼak. Iha tempu eis-Uniaun Soviétika, kontradór balu fahe  karta ba irmaun sira no dehan katak karta neʼe mai husi sede-jerál. Karta neʼe anima irmaun balu atu forma organizasaun ketak. Haree hanesan karta neʼe fó sai buat neʼebé loos, maibé irmaun sira neʼebé laran-metin la monu ba lia-bosok neʼe. Sira rekoñese katak liafuan iha karta neʼe la tuir buat neʼebé sira aprende ona. Ohin loron, dala ruma kontradór sira uza teknolojia atu halo ita konfuzaun no haketak ita. Duké ‘husik ema seluk troka lalais ita-nia hanoin’, ita bele proteje ita-nia an hodi buka-hatene se buat neʼebé ita lee ka rona mak tuir duni lia-loos neʼebé ita aprende ona ka lae.—2 Tes 2:2; 1 João 4:1.

16. Tuir Roma 16:​17, 18, saida mak ita presiza halo se ema ruma habelar informasaun falsu kona-ba lia-loos?

¹⁶ Nafatin unidade ho sira neʼebé laran-metin ba Jeová. Maromak hakarak ninia povu atu adora nia ho unidade. Ita sei nafatin unidade se ita kaer metin ba lia-loos. Ema neʼebé habelar informasaun falsu kona-ba lia-loos bele haketak kongregasaun. Tan neʼe, Maromak fó avizu mai ita atu “hadook an husi sira”. Se lae, ita bele husik tiha lia-loos.—Lee Roma 16:​17, 18.

17. Benefísiu saida mak ita sei hetan hodi rekoñese lia-loos no kaer metin ba ida-neʼe?

¹⁷ Bainhira ita rekoñese lia-loos no kaer metin ba ida-neʼe, ita sei nafatin besik ba Jeová no iha fiar neʼebé metin. (Éf 4:​15, 16) Ita sei la monu ba Satanás nia hanorin falsu no lia-bosok sira, no Jeová sei nafatin tau matan ba ita durante terus boot. Kontinua kaer metin ba lia-loos, ‘no Maromak dame nian sei hamutuk ho ita’.—Flp 4:​8, 9.