1-2. Saida mak akontese antes Jesus fó sai ninia liafuan ikus?

NEʼE mak loron 14 fulan-Nisan tinan 33 EC. Ema duun matak Jesus no tesi-lia katak nia halo krime, maski loloos nia la halo sala ida. Sira goza nia, haterus nia no tuirmai prega nia ba ai-riin terus nian. Pregu tama borus ninia liman no ain. Nia sente moras tebes bainhira nia dada iis no koʼalia. Maibé nia presiza koʼalia tanba nia iha buat importante atu fó sai.

² Mai ita koʼalia kona-ba buat neʼebé Jesus hatete bainhira nia iha ai-riin terus nian no saida mak ita bele aprende husi ida-neʼe. Mai ita ‘rona ba Jesus’.—Mt 17:5.

3. Karik Jesus koʼalia kona-ba sé bainhira nia dehan: “Aman, perdua sira bá”?

³ Saida mak Jesus hatete? Bainhira ema prega Jesus ba ai-riin terus nian, nia halo orasaun: “Aman, perdua sira bá.” Perdua sé? Jesus nia liafuan tuirmai bele ajuda ita komprende: “Sira la hatene buat neʼebé sira halo.” (Lc 23:33, 34) Karik Jesus koʼalia kona-ba soldadu Roma nian neʼebé prega Jesus nia ain no liman ba ai-riin. Sira la hatene nia mak Kristu. Karik nia mós hanoin kona-ba ema balu husi ema-lubun neʼebé husu atu fó-kastigu ba nia, maibé ikusmai sira sai ninia dixípulu. (Após 2:36-38) Jesus la merese atu mate, maibé nia la sai hirus no rai odi ba sira neʼebé kontra nia. (1 Ped 2:23) Duké halo nuneʼe, nia husu Jeová atu perdua sira.

4. Saida mak ita bele aprende husi Jesus kona-ba fó perdua?

 ⁴ Saida mak ita bele aprende? Hanesan Jesus, ita mós presiza sai prontu atu fó perdua ba ema seluk. (Kol 3:13) Karik ema balu, inklui ita-nia família, kontra ita tanba sira la komprende ita-nia fiar no ita-nia dalan moris. Karik sira koʼalia bosok kona-ba ita, hamoe ita iha ema seluk nia oin, estraga ita-nia publikasaun sira, no mós ameasa atu halo aat ba ita. Duké sai hirus, ita bele husu Jeová atu ajuda sira neʼebé kontra ita atu simu lia-loos. (Mt 5:44, 45) Dala ruma ita sente susar atu fó perdua ba ema, liuliu se sira trata aat ita. Maibé se ita rai odi no kontinua hirus, neʼe bele lori susar ba ita. Irmán ida esplika: “Haʼu rekoñese katak fó perdua ba ema la dehan katak haʼu taka matan ba sira-nia hahalok sala ka husik sira trata aat haʼu. Maibé bainhira haʼu fó perdua, neʼe katak haʼu la rai odi tan.” (Sal 37:8) Bainhira ita fó perdua, neʼe katak ita hili atu la sente hirus nafatin tanba esperiénsia neʼebé aat.—Éf 4:31, 32.

5. Jesus promete saida ba kriminozu ida? Tanbasá nia halo promesa neʼe?

⁵ Saida mak Jesus hatete? Kriminozu naʼin-rua hetan kastigu-mate hamutuk ho Jesus. Foufoun, sira naʼin-rua goza Jesus. (Mt 27:44) Maibé ikusmai, sira ida para atu goza. Nia rekoñese katak Jesus “la halo sala ida”. (Lc 23:40, 41) No nia mós fiar katak Jesus sei moris-hiʼas no loron ida sei ukun nuʼudar liurai. Nia hatete: “Jesus, hanoin-hetan haʼu bá kuandu Ita tama iha Ita-nia Ukun.” (Lc 23:42) Mane neʼe hatudu duni fiar. No Jesus hatán: “Haʼu hatete loloos ba ó ohin, ó sei hamutuk ho haʼu [laʼós iha Maromak nia Ukun, maibé] iha Paraízu.” (Lc 23:43) Jesus uza liafuan “haʼu” no “ó” bainhira halo promesa ba mane neʼe. Jesus bele halo ida-neʼe tanba nia hatene katak ninia Aman mak laran-sadiʼa.—Sal 103:8.

6. Saida mak ita bele aprende husi Jesus nia liafuan ba kriminozu ida?

⁶ Saida mak ita bele aprende? Jesus haleno ninia Aman nia hahalok ho perfeitu. (Ebr 1:3) Jeová hakarak fó perdua ba ita no hatudu laran-sadiʼa ba ita se ita arrepende ita-nia sala neʼebé uluk ita halo no mós hatudu fiar ba Jesus nia sakrifísiu. (1 João 1:7) Ema balu sente susar atu fiar katak Jeová sei perdua sira. Se karik Ita mós sente nuneʼe, hanoin toʼok ida-neʼe: Lakleur antes Jesus mate, nia hatudu laran-sadiʼa ba kriminozu neʼebé foin hatudu fiar. Entaun ita bele fiar katak Jeová mós sei hatudu laran-sadiʼa ba ninia atan sira neʼebé serbí nia ho laran-metin no hakaʼas an atu halo tuir ninia mandamentu sira.—Sal 51:1; 1 João 2:1, 2.

7. Tuir João 19:26, 27, saida mak Jesus hatete ba Maria no João? Tanbasá?

⁷ Saida mak Jesus hatete? (Lee João 19:26, 27.) Jesus hakarak tau matan ba ninia inan neʼebé karik faluk ona. Karik Jesus nia alin sira bele tau matan ba sira-nia inan nia presiza fíziku nian. Maibé sé mak bele tau matan ba ninia inan nia presiza espirituál? La iha evidénsia neʼebé hatudu katak Jesus nia alin-mane sira mak ninia dixípulu. Maibé João mak Jesus nia apóstolu neʼebé  laran-metin no Jesus nia belun diʼak. Jesus haree ema sira neʼebé adora Jeová hamutuk ho nia nuʼudar ninia família. (Mt 12:46-50) Jesus hadomi no hanoin Maria, tan neʼe nia husu João atu tau matan ba Maria tanba nia hatene João sei tau matan ba Maria nia presiza espirituál. Jesus hatete ba ninia inan: “Haree bá! Neʼe Ita-nia oan!” No nia hatete ba João: “Haree bá! Neʼe ó-nia inan!” Hahú husi loron neʼebá, João sai hanesan Maria nia oan, no João tau matan ba Maria hanesan ninia inan. Jesus hatudu domin neʼebé boot ba ninia inan neʼebé tau matan ba nia husi tempu neʼebé nia moris toʼo nia mate.

8. Saida mak ita bele aprende husi Jesus nia liafuan ba Maria no João?

 ⁸ Saida mak ita bele aprende? Ita-nia relasaun diʼak ho irmaun-irmán sira bele metin liu fali ita-nia relasaun ho família sira. Maski ita-nia família kontra ita no husik hela ita, maibé Jesus promete katak se ita nafatin besik ba Jeová no Ninia organizasaun, ita sei hetan “dala atus ida liu fali” buat neʼebé ita lakon. Irmaun-irmán barak sei sai hanesan ita-nia oan-mane, oan-feto, inan ka aman. (Mc 10:29, 30) Ita kontente tebes atu sai parte ba família neʼebé iha unidade tanba iha fiar no domin ba Jeová no mós ba malu.—Kol 3:14; 1 Ped 2:17.

9. Ita aprende saida husi Jesus nia liafuan iha Mateus 27:46?

⁹ Saida mak Jesus hatete? Lakleur antes Jesus mate, nia hatete: “Haʼu-nia Maromak, haʼu-nia Maromak, tanbasá mak Ita husik hela haʼu?” (Mt 27:46) Bíblia la esplika tanbasá Jesus hatete nuneʼe. Saida mak ita bele aprende husi liafuan sira-neʼe? Buat ida neʼebé ita bele aprende mak Jesus kumpre profesia neʼebé hakerek iha Salmo 22:1 bainhira nia koʼalia liafuan sira-neʼe. * Liután neʼe, liafuan sira-neʼe hatudu ho klaru katak Jeová la “tau lutu haleʼu” ninia Oan-Mane atu proteje nia. (Job 1:10) Jesus komprende katak ninia Aman husik ema sira neʼebé odi nia atu koko ninia fiar toʼo nia mate. La iha ema ida mak hetan ona koko hanesan Jesus hetan. Liafuan sira-neʼe mós hatudu katak Jesus la halo sala ida neʼebé merese atu hetan kastigu-mate.

10. Ita aprende saida husi Jesus nia liafuan ba ninia Aman?

¹⁰ Saida mak ita bele aprende? Lisaun ida neʼebé ita bele aprende mak ita labele hein katak Jeová sei proteje ita husi susar sira neʼebé bele koko ita-nia fiar. Jesus hetan koko toʼo mate, tan neʼe ita mós presiza sai prontu atu laran-metin nafatin toʼo mate se presiza. (Mt 16:24, 25) Maibé ita bele fiar katak Maromak sei la husik ita atu hetan koko liu fali ita-nia kbiit. (1 Kor 10:13) Buat seluk neʼebé ita bele aprende mak ita mós bele hetan susar maski ita la sala. (1 Ped 2:19, 20) Ema kontra ita laʼós tanba ita halo sala maibé tanba ita la sai parte ba mundu neʼe no ita haklaken liafuan diʼak. (João 17:14; 1 Ped 4:15, 16) Jesus komprende tanbasá Jeová husik nia atu hetan terus. Maibé Maromak nia atan sira seluk neʼebé hasoru susar, dala ruma hanoin tanbasá Jeová husik sira atu hetan terus. (Hab 1:3) Ita-nia Maromak neʼebé pasiénsia no laran-sadiʼa, komprende katak ema sira-neʼe la lakon sira-nia fiar. Sira presiza hetan kmaan husi nia.—2 Kor 1:3, 4.

11. Tanbasá Jesus koʼalia liafuan sira iha João 19:28?

¹¹ Saida mak Jesus hatete? (Lee João 19:28.) Tanbasá Jesus hatete: “Haʼu hamrook”? Nia koʼalia ida-neʼe “atu kumpre eskritura” iha Salmo 22:15, neʼebé dehan: “Haʼu-nia kbiit sai maran ona hanesan sanan-rai rohan ida; haʼu-nia nanál belit ba haʼu-nia ibun laran.” No tanba Jesus mós hasoru susar  neʼebé todan tebes, inklui sente moras loos iha ai-riin terus nian, klaru katak nia sente hamrook. Nia presiza buat ruma atu hemu.

12. Saida mak ita bele aprende husi Jesus nia liafuan “haʼu hamrook”?

¹² Saida mak ita bele aprende? Jesus la hanoin katak nia fraku bainhira nia husu ajuda. Ita mós presiza iha hanoin hanesan Jesus. Durante ita-nia moris tomak, karik ita lakohi fó sai ba ema seluk kona-ba ita-nia presiza. Maibé bainhira ita presiza ajuda, ita labele dada an atu husu ajuda. Porezemplu, se ita mak idade ona ka iha problema saúde, karik ita presiza husu belun ida atu tula ita bá kompras ka bá hasoru doutór. Se ita laran-kraik, karik ita presiza husu katuas ida ka maluk Kristaun ida neʼebé maduru atu rona ba ita ka fahe ‘liafuan diʼak’ neʼebé bele anima ita. (Prov 12:25) Hanoin-hetan katak irmaun-irmán sira hadomi ita, no sira hakarak ajuda ita iha “tempu susar”. (Prov 17:17) Maibé sira labele siʼik ita-nia hanoin no sentimentu. Se ita la fó-hatene sira, karik sira la hatene katak ita presiza ajuda.

13. Jesus kumpre saida hodi laran-metin toʼo mate?

¹³ Saida mak Jesus hatete? Maizumenus iha tuku tolu lokraik iha loron 14 fulan-Nisan, Jesus hatete ho lian makaʼas: “Buat hotu kumpre ona!” (João 19:30) Jesus nia liafuan sira-neʼe hanorin ita katak antes nia mate, nia hatene katak nia halo ona buat hotu tuir Jeová nia hakarak. Hodi laran-metin toʼo mate, Jesus kumpre buat oioin. Primeiru, nia hatudu katak Satanás mak bosok-teen. Jesus hatudu katak ema neʼebé perfeitu bele laran-metin nafatin maski hetan koko husi Satanás. Segundu, Jesus fó ninia moris nuʼudar sakrifísiu. Ninia sakrifísiu loke dalan ba ema neʼebé la perfeitu atu iha relasaun diʼak ho Maromak no iha esperansa atu moris ba nafatin. Terseiru, Jesus apoia Jeová nia direitu atu ukun no nia halo santu ninia Aman nia naran.

14. Ita hakaʼas an atu moris hanesan saida? Esplika toʼok.

¹⁴ Saida mak ita bele aprende? Ita presiza hakaʼas an atu nafatin laran-metin loroloron. Mestre ida ba Eskola Gilead naran Maxwell Friend hatoʼo diskursu iha reuniaun boot internasionál kona-ba hahalok laran-metin. Nia dehan: “Halo buat neʼebé ita bele halo ka hatete ohin duké hein toʼo aban. Tanba ita la hatene aban ita sei moris ka lae. Moris bá hanesan ohin mak ita-nia loron ikus atu hatudu katak ita merese atu moris ba nafatin.” Mai ita hatudu laran-metin hanesan ohin mak ita-nia loron ikus atu hatudu laran-metin. Hodi nuneʼe, se ita-nia moris iha perigu laran, ita bele hatete: “Jeová, haʼu hakaʼas an ona atu laran-metin nafatin, atu hatudu katak Satanás mak bosok-teen, no atu halo santu Ita-nia naran no apoia Ita-nia direitu atu Ukun.”

15. Tuir Lucas 23:46, Jesus fiar metin ba saida?

¹⁵ Saida mak Jesus hatete? (Lee Lucas 23:46.) Ho fiar metin Jesus hatete: “Aman, iha Ita-Boot nia liman mak haʼu entrega haʼu-nia moris.” Jesus hatene katak ninia futuru depende ba Jeová, no nia fiar metin katak ninia Aman sei hanoin-hetan nia.

16. Saida mak Ita aprende husi irmaun Joshua?

 ¹⁶ Saida mak ita bele aprende? Nafatin laran-metin ba Jeová maski Ita-nia moris iha perigu laran. Atu halo nuneʼe, Ita presiza ‘tau fiar ba Jeová ho Ita-nia laran tomak’. (Prov 3:5) Hanoin toʼok kona-ba irmaun Joshua nia ezemplu. Nia tinan 15 no nia moras todan. Nia lakohi simu tratamentu médiku neʼebé kontra Maromak nia ukun-fuan. Lakleur antes nia mate, nia hatete ba ninia inan: “Amá, haʼu seguru ona iha Jeová nia liman. . . . Amá, haʼu fiar metin katak Jeová sei fó moris-hiʼas ba haʼu. Nia hatene haʼu-nia laran, no haʼu hadomi tebes nia.” Ita ida-idak bele husu ba Ita-nia an: ‘Se haʼu hasoru situasaun neʼebé perigu ba haʼu-nia moris no koko haʼu-nia fiar, haʼu sei laran-metin ba Jeová no fiar katak nia sei hanoin-hetan haʼu ka lae?’

17-18. Lisaun saida deʼit mak ita aprende? (Haree mós kaixa “ Buat neʼebé ita bele aprende husi Jesus nia liafuan ikus”.)

¹⁷ Ita bele aprende buat barak husi Jesus nia liafuan ikus. Ita aprende katak ita presiza fó perdua ba malu no tau fiar katak Jeová sei perdua ita. Ita kontente tebes tanba ita iha família espirituál neʼebé prontu atu ajuda ita. Bainhira ita presiza ajuda, ita tenke husu ajuda ba sira. Ita fiar katak Jeová sei ajuda ita atu tahan hasoru susar naran deʼit. No ita mós aprende katak importante atu moris hanesan ohin mak ita-nia loron ikus atu laran-metin ba Maromak no fiar katak Jeová sei fó moris-hiʼas se ita mate.

¹⁸ Jesus nia liafuan bainhira nia iha ai-riin terus nian hanorin ita buat oioin. Hodi aplika buat neʼebé ita aprende ona, ita halo tuir Jeová nia liafuan kona-ba ninia Oan-Mane: “Rona nia bá.”—Mt 17:5.