1-2. Tanbasá Jesus fó ninia moris? Tanbasá ita presiza ida-neʼe?

BAINHIRA Adão neʼebé perfeitu halo sala, nia halakon oportunidade ba ninia an no mós ba ninia bei-oan sira atu moris ba nafatin. Nia ho neon hili atu halo sala. Maibé oinsá ho ninia bei-oan sira? Sira la hola parte iha Adão nia sala. (Rom 5:12, 14) Adão merese duni atu mate. Maibé Jeová bele halo buat ruma atu Adão nia bei-oan sira bele moris ba nafatin ka lae? Sin bele. Lakleur depois Adão halo sala, neineik-neineik Jeová fó sai kona-ba oinsá nia sei salva Adão nia bei-oan sira husi sala no mate. (Gén 3:15) Tuir tempu neʼebé deside ona, Jeová haruka ninia Oan-Mane husi lalehan atu “fó ninia moris hodi sosa fali ema barak”.—Mc 10:45; João 6:51.

² Jesus fó ninia moris atu sosa fali buat neʼebé Adão halakon. (1 Kor 15:22) Tanbasá ita presiza Jesus nia sakrifísiu? Iha Moisés nia Ukun-Fuan, Jeová fó sai kona-ba buat neʼebé nia haree nuʼudar justu, neʼe mak moris tenke troka ho moris. (Éx 21:23, 24) Adão halakon moris neʼebé perfeitu. Jesus presiza fó ninia moris neʼebé perfeitu atu kumpre buat neʼebé Jeová haree nuʼudar justu. (Rom 5:17) Hodi halo nuneʼe, Jesus sai nuʼudar “Aman Rohan-Laek” ba ema hotu neʼebé hatudu fiar ba ninia sakrifísiu.—Isa 9:6; Rom 3:23, 24.

3. Tuir João 14:31 no 15:13, tanbasá Jesus prontu fó ninia moris nuʼudar sakrifísiu?

³ Jesus prontu atu fó ninia moris nuʼudar sakrifísiu tanba nia hadomi tebes ninia Aman iha lalehan no mós ita. (Lee João 14:31; 15:13.) Domin book Jesus atu kontinua laran-metin toʼo mate no kumpre ninia Aman nia hakarak. Rezultadu mak Jeová nia hakarak ba ema no  mundu sei sai loos. Iha lisaun neʼe, ita sei koʼalia kona-ba tanbasá Maromak husik Jesus hetan terus antes nia mate. Ita mós sei koʼalia kona-ba apóstolu João neʼebé hafolin tebes Jesus nia sakrifísiu. No ikusliu ita sei aprende kona-ba oinsá ita bele hatudu agradese ba Jesus nia sakrifísiu no oinsá atu hafolin liután buat neʼebé Jeová no Jesus halo ona ba ita.

4. Esplika toʼok oinsá Jesus mate.

⁴ Hanoin toʼok buat neʼebé akontese durante Jesus nia loron ikus iha rai. Maski nia bele husu ajuda husi anju lubun atu proteje nia, maibé nia husik soldadu Roma nian kaer nia no baku nia. (Mt 26:52-54; João 18:3; 19:1) Sira baku nia ho xikote no neʼe lees ninia kulit. Tuirmai sira haruka nia atu lori ai-riin todan iha ninia kotuk neʼebé kanek hela. Jesus komesa lori ai-riin neʼe ba fatin neʼebé nia sei hetan kastigu-mate, maibé lakleur soldadu Roma nian haruka mane seluk atu lori ai-riin neʼe. (Mt 27:32) Bainhira Jesus toʼo iha fatin neʼebé nia sei hetan kastigu-mate, soldadu sira prega ninia liman no ninia ain ba ai-riin. Bainhira soldadu sira halo hamriik ai-riin neʼe, Jesus nia isin nia todan halo ninia kanek sira sai luan liután. Jesus nia belun sira sente laran-triste tebes no ninia inan tanis, maibé ulun-naʼin Judeu sira goza Jesus. (Lc 23:32-38; João 19:25) Jesus hetan terus ba oras balu. Tanba Jesus nia isin prega ba ai-riin, ninia fuan no pulmaun serbisu makaʼas tebes, no neʼe halo nia susar atu dada iis. Jesus hatene katak nia laran-metin ona ba Jeová, no bainhira nia besik atu mate, nia halo orasaun ikus ba Jeová. Tuirmai nia hakruʼuk no entrega ninia moris ba Jeová. (Mc 15:37; Lc 23:46; João 10:17, 18; 19:30) Ninia dalan atu mate mak neineik, moras tebes, no lori moe.

5. Saida mak halo Jesus laran-susar liu?

⁵ Maski dalan neʼebé Jesus mate mak aat tebes, maibé buat neʼebé halo nia laran-susar liu mak razaun tanbasá nia hetan kastigu-mate. Ema duun matak katak nia la respeitu Maromak no la respeitu Maromak nia naran. (Mt 26:64-66) Neʼe halo Jesus laran-susar tebes no nia hakarak atu ninia Aman la husik ema atu hamoe nia iha dalan hanesan neʼe. (Mt 26:38, 39, 42) Tanbasá Jeová husik ninia Oan-Mane hetan terus no mate? Mai ita koʼalia kona-ba razaun tolu.

6. Tanbasá Jesus tenke prega iha ai-riin?

⁶ Primeiru, Jesus presiza mate iha ai-riin atu halo livre ema Judeu sira husi malisan ida. (Gal 3:10, 13) Ema Judeu promete atu halo tuir Maromak nia Ukun-Fuan maibé sira la kumpre ida-neʼe. Tan neʼe sira hetan malisan neʼe no mate laʼós deʼit tanba sira mak Adão nia bei-oan neʼebé sala-naʼin. (Rom 5:12) Maromak nia Ukun-Fuan ba ema Izraél hatete katak mane ida neʼebé halo sala merese atu hetan kastigu-mate. No dala ruma ninia mate-isin tara iha ai-riin. * (Deut 21:22, 23; 27:26) Entaun, maski ema Judeu la simu Jesus nuʼudar Mesias, maibé tanba Jesus tara iha ai-riin, neʼe bele loke dalan ba sira atu sai livre husi malisan neʼe no hetan benefísiu husi Jesus nia sakrifísiu.

7. Saida mak razaun segundu Maromak husik ninia Oan-Mane atu hetan terus?

 ⁷ Hanoin toʼok razaun segundu tanbasá Maromak husik ninia Oan-Mane atu hetan terus. Nia treinu Jesus atu serbí nuʼudar Amlulik Boot iha futuru. Jesus rasik sente ona oinsá susar atu halo tuir Maromak bainhira hasoru koko neʼebé makaʼas. Jesus sente laran-susar tebes toʼo nia halo orasaun ho “lian makaʼas no ho matan-been” atu husu ajuda. Tanba Jesus sente ona hanesan neʼe, nia bele komprende ita-nia presiza, no nia “bele ajuda” ita bainhira ita “hetan koko”. Ita agradese tebes tanba Jeová hili Amlulik Boot ida neʼebé laran-sadiʼa no bele “hanoin no komprende ita-nia fraku sira”.—Ebr 2:17, 18; 4:14-16; 5:7-10.

8. Saida mak razaun terseiru Maromak husik Jesus atu hetan koko neʼebé makaʼas?

⁸ Terseiru, Jeová husik Jesus hetan terus hodi hatán ba pergunta importante ida: Ema bele laran-metin nafatin ba Jeová maski hetan koko makaʼas ka lae? Satanás dehan lae. Nia duun katak ema serbí Maromak tanba hakarak hetan buat ruma. Nia fiar katak sira la hadomi Jeová hanesan Adão la hadomi Jeová. (Job 1:9-11; 2:4, 5) Jeová fiar metin katak Jesus sei laran-metin, tan neʼe nia husik Jesus hetan koko neʼebé makaʼas. Jesus laran-metin nafatin no hatudu katak Satanás bosok-teen.

9. Apóstolu João hatudu ezemplu diʼak saida?

⁹ Ema Kristaun barak sai fiar metin liután tanba hanorin kona-ba Jesus nia sakrifísiu. Sira kontinua haklaken maski ema kontra sira no tahan susar oioin durante sira-nia moris tomak. Hanoin toʼok apóstolu João nia ezemplu. Nia haklaken ho laran-metin kona-ba Kristu no Kristu nia sakrifísiu maizumenus ba tinan 60. Bainhira nia tinan 90 liu, governu Roma hanoin katak nia kontra governu, tan neʼe sira hatama nia ba komarka iha illa Patmos. Nia halo sala saida? Nia “koʼalia kona-ba Maromak no fó sasin kona-ba Jesus”. (Apok 1:9) João hatudu ezemplu diʼak kona-ba fiar no tahan susar.

10. Oinsá João nia liafuan hatudu katak nia hafolin Jesus nia sakrifísiu?

¹⁰ Iha livru sira neʼebé João hakerek iha Bíblia, nia fó sai ninia domin boot ba Jesus no ninia agradese ba Jesus nia sakrifísiu. João temi kona-ba Jesus nia sakrifísiu no benefísiu husi sakrifísiu neʼe dala 100 liu. Porezemplu, João hakerek: “Se ema ida halo sala, ita iha ajuda-naʼin ida neʼebé hamutuk ho Aman, ajuda-naʼin neʼe mak Jesus Kristu neʼebé halo buat loos iha Maromak nia oin.” (1 João 2:1, 2) João nia liafuan mós fó sai katak importante atu “fó sasin kona-ba Jesus”. (Apok 19:10) Klaru katak, João hafolin tebes Jesus nia sakrifísiu. Oinsá ita mós bele halo nuneʼe?

11. Saida mak ajuda ita atu la monu ba tentasaun?

¹¹ Hakaʼas an atu la monu ba sala. Se ita hafolin Jesus nia sakrifísiu, ita sei la hanoin: ‘Haʼu la presiza hakaʼas an atu la monu ba sala bainhira hasoru tentasaun. Haʼu bele halo sala deʼit no tuirmai mak husu perdua.’ Duké halo nuneʼe, bainhira ita hetan tentasaun atu halo sala, ita sei hatete: ‘Laʼe. Jeová no Jesus halo ona buat barak mai haʼu, haʼu lakohi halo sala.’ Ita bele husu Jeová atu fó kbiit mai  ita hodi dehan: ‘Keta husik haʼu monu ba tentasaun.’—Mt 6:13.

12. Oinsá ita bele aplika 1 João 3:16-18?

¹² Hadomi irmaun-irmán sira. Bainhira ita hadomi sira, ita mós hatudu katak ita hafolin Jesus nia sakrifísiu. Tanbasá? Tanba Jesus fó ninia moris laʼós deʼit ba Ita, maibé mós ba irmaun-irmán sira. Se nia prontu atu mate ba sira, neʼe hatudu katak nia hafolin tebes sira. (Lee 1 João 3:16-18.) Ita hatudu domin ba irmaun-irmán sira liuhusi dalan neʼebé ita trata sira. (Éf 4:29, 31–5:2) Porezemplu, ita ajuda sira bainhira sira moras ka hasoru susar, inklui dezastre naturais. Maibé saida mak ita presiza halo bainhira maluk Kristaun ida halo ka hatete buat ruma neʼebé hakanek ita-nia laran?

13. Tanbasá ita presiza fó perdua ba malu?

¹³ Dala ruma ita sente susar atu fó perdua ba irmaun-irmán sira ka lae? (Lev 19:18) Se nuneʼe, halo tuir konsellu tuirmai: “Kontinua hatudu pasiénsia ba malu no prontu atu fó perdua ba malu ho laran tomak maski ema halo buat ruma neʼebé hakanek imi-nia laran. Hanesan Jeová prontu atu fó perdua ba imi ho laran tomak, imi mós tenke halo nuneʼe.” (Kol 3:13) Bainhira ita fó perdua ba irmaun-irmán sira, ita hatudu ba Aman Jeová katak ita hafolin Jesus nia sakrifísiu. Oinsá ita bele hafolin liután Maromak nia prezente neʼe?

14. Oinsá ita bele hafolin liután Jesus nia sakrifísiu?

¹⁴ Fó obrigadu ba Jeová tanba Jesus nia sakrifísiu. Irmán Joanna neʼebé tinan 83 no hela iha rai-Índia hatete: “Importante tebes atu temi kona-ba Jesus nia sakrifísiu loroloron iha ita-nia orasaun no fó obrigadu ba Jeová kona-ba neʼe.” Iha loron ida-idak, bainhira Ita halo orasaun ba Jeová, fó sai ba Jeová sala neʼebé Ita halo no husu nia atu fó perdua ba Ita. Maibé se Ita halo sala neʼebé sériu, Ita presiza husu ajuda husi katuas kongregasaun sira. Sira sei rona didiʼak ba Ita no fó konsellu neʼebé bazeia ba Bíblia. Tuirmai sira sei halo orasaun hamutuk ho Ita no husu Jeová atu fó perdua ba Ita liuhusi Jesus nia sakrifísiu atu nuneʼe Ita bele hetan fali relasaun diʼak ho Jeová.—Tgo 5:14-16.

15. Tanbasá ita presiza buka tempu atu lee no medita kona-ba Jesus nia sakrifísiu?

 ¹⁵ Medita kona-ba Jesus nia sakrifísiu. Irmán Rajamani neʼebé tinan 73 hatete: “Bainhira haʼu lee kona-ba susar neʼebé Jesus hetan, haʼu-nia matan-been nakonu.” Karik Ita mós sente triste bainhira hanoin kona-ba susar neʼebé Jesus hetan. Bainhira Ita medita kona-ba Jesus nia sakrifísiu, Ita-nia domin ba nia no ninia Aman sei sai boot liu. Atu bele ajuda Ita medita kona-ba Jesus nia sakrifísiu, Ita bele halaʼo estudu mesak kona-ba neʼe.

16. Oinsá ita bele hetan benefísiu hodi hanorin ema seluk kona-ba Jesus nia sakrifísiu? (Haree dezeñu iha livru oin.)

¹⁶ Hanorin ema seluk kona-ba Jesus nia sakrifísiu. Bainhira ita koʼalia ba ema seluk kona-ba Jesus nia sakrifísiu, ita sei hafolin liután ida-neʼe. Ita bele uza ita-nia publikasaun no vídeo sira atu hanorin ema seluk kona-ba tanbasá Jesus tenke mate ba ita. Porezemplu, ita bele uza lisaun 4 husi broxura Liafuan Diʼak Husi Maromak ho títulu “Sé mak Jesus Kristu?”. Ka ita bele uza kapítulu 5 husi livru Ita Bele Komprende Bíblia! ho títulu “Jesus nia sakrifísiu mak Maromak nia prezente furak liu”. Ita bele hafolin liután Jesus nia sakrifísiu liuhusi tuir Memoriál tinan-tinan no mós ho laran-manas konvida ema seluk atu asiste Memoriál. Jeová fó ita priviléjiu boot atu hanorin ema seluk kona-ba ninia Oan-Mane.

17. Tanbasá Jesus nia sakrifísiu mak prezente boot liu neʼebé Maromak fó?

¹⁷ Ita bele fiar katak ita iha razaun diʼak oioin atu kontinua hafolin liután Jesus nia sakrifísiu. Tanba Jesus nia sakrifísiu, ita bele iha relasaun diʼak ho Jeová maski ita la perfeitu. Tanba Jesus nia sakrifísiu, Maromak sei uza Jesus atu harahun Diabu nia serbisu hotu. (1 João 3:8) No mós tanba Jesus nia sakrifísiu, Jeová nia hakarak ba rai sei sai loos. Mundu tomak sei sai paraízu. Iha Paraízu, ema hotu sei hadomi no serbí Jeová. Tan neʼe, loroloron mai ita buka dalan oioin atu hatudu katak ita hafolin Jesus nia sakrifísiu. Neʼe mak prezente boot liu neʼebé Maromak fó ba ita.