1-2. Ai-knanoik saida mak ajuda ita komprende 1 Pedro 2:21?

IMAJINA katak Ita laʼo iha ai-laran fuik neʼebé perigu hamutuk ho Ita-nia belun sira. No iha ema ida neʼebé hatene dalan no dirije imi. Bainhira nia laʼo, nia husik hela ninia ain-fatin iha tahu. Tuirmai Ita labele haree tan ema neʼebé dirije imi. Maibé Ita la pániku. Ita no Ita-nia belun sira laʼo tuir ema neʼe nia ain-fatin ho didiʼak.

² Nuʼudar ema Kristaun neʼebé loos, ita hela iha mundu aat neʼe neʼebé hanesan ho ai-laran fuik. Ita agradese tanba Jeová fó ninia Oan-Mane Jesus Kristu atu dirije ita. Ita bele laʼo tuir ninia ain-fatin ho didiʼak. (1 Ped 2:21) Tuir livru ida kona-ba Bíblia, Pedro kompara Jesus ho ema neʼebé hatene dalan no dirije ema bainhira halo viajen. Jesus mós husik hela ninia ain-fatin atu ita bele laʼo tuir. Mai ita buka resposta ba pergunta tolu tuirmai: Laʼo tuir Jesus nia ain-fatin ho didiʼak katak sá? Tanbasá ita presiza halo nuneʼe? No oinsá ita bele halo ida-neʼe?

3. Laʼo tuir ema ida nia ain-fatin katak sá?

³ Laʼo tuir ema ida nia ain-fatin katak sá? Iha Bíblia, liafuan “laʼo” no “ain” dala ruma refere ba ema ida nia dalan atu halaʼo moris. (Gén 6:9; Prov 4:26) Ain-fatin neʼebé ema ida husik hela kuandu nia laʼo mak atu hanesan ho dalan neʼebé ema neʼe halaʼo ninia moris. Tan neʼe, atu laʼo tuir ema ida nia ain-fatin, neʼe katak ita halo tuir ninia ezemplu ka banati-tuir nia.

4. Laʼo tuir Jesus nia ain-fatin katak sá?

 ⁴ Laʼo tuir Jesus nia ain-fatin katak sá? Resposta simples mak hodi banati-tuir ninia ezemplu. Iha eskritura tema, apóstolu Pedro koʼalia kona-ba Jesus nia ezemplu diʼak kona-ba tahan susar. Maski nuneʼe, ita bele banati-tuir Jesus iha dalan oioin. (1 Ped 2:18-25) Jesus nia moris tomak sai nuʼudar ezemplu atu ita banati-tuir, inklui ninia liafuan no mós hahalok.

5. Maski la perfeitu, ita bele banati-tuir Jesus nia ezemplu ka lae? Esplika toʼok.

⁵ Maski la perfeitu, ita bele banati-tuir Jesus nia ezemplu ka lae? Sin bele. Hanoin-hetan katak Pedro anima ita “atu laʼo tuir [Jesus nia] ain-fatin ho didiʼak”, laʼós laʼo tuir ho perfeitu. Maski ita la perfeitu, maibé se ita laʼo tuir Jesus nia ain-fatin ho didiʼak no hakaʼas an atu banati-tuir nia, neʼe katak ita halo tuir apóstolu João nia liafuan: “Kontinua laʼo tuir Jesus nia dalan.”—1 João 2:6.

6-7. Tanbasá laʼo tuir Jesus nia ain-fatin halo ita hakbesik liután ba Jeová?

⁶ Bainhira ita laʼo tuir Jesus nia ain-fatin, neʼe ajuda ita atu hakbesik liután ba Jeová. Tanbasá? Primeiru, Jesus hatudu ezemplu furak kona-ba oinsá atu halaʼo moris iha dalan neʼebé lori kontente ba Jeová. (João 8:29) Entaun, bainhira ita laʼo tuir Jesus nia ain-fatin, ita sei halo Jeová kontente. Ita mós bele fiar katak Aman Jeová sei hakbesik ba ema sira neʼebé hakaʼas an atu sai ninia belun.—Tgo 4:8.

⁷ Segundu, Jesus banati-tuir ninia Aman ho perfeitu. Tan neʼe mak nia bele dehan: “Ema neʼebé haree ona haʼu, haree ona mós Aman.” (João 14:9) Ita bele  banati-tuir Jesus nia hahalok no ninia dalan atu trata ema seluk. Porezemplu, Jesus hanoin tebes ema neʼebé moras-lepra, feto neʼebé moras todan, no mós ema neʼebé laran-triste tanba família mate. Bainhira ita banati-tuir Jesus, ita mós banati-tuir Jeová. (Mc 1:40, 41; 5:25-34; João 11:33-35) Bainhira ita banati-tuir Jeová nia hahalok sira, ita-nia relasaun ho nia sai besik liután.

8. Tanbasá laʼo tuir Jesus nia ain-fatin bele ajuda ita atu manán mundu? Esplika toʼok.

⁸ Bainhira ita laʼo tuir Jesus nia ain-fatin, neʼe ajuda ita atu la husik ema hanetik ita atu serbí Jeová. Iha Jesus nia kalan ikus iha rai, nia bele hatete: “Haʼu manán tiha ona mundu.” (João 16:33) Neʼe katak nia la husik ema iha mundu atu fó influénsia ba ninia hanoin, planu no mós ninia hahalok. Jesus nunka haluha razaun tanbasá Jeová haruka nia mai rai, neʼe mak atu halo santu Jeová nia naran. Oinsá ho ita? Iha mundu neʼe, iha buat oioin neʼebé bele dada ita-nia atensaun atu la serbí tan Jeová. Maibé se ita tau fokus atu halo Jeová nia hakarak hanesan Jesus, ita mós bele “manán” mundu.—1 João 5:5.

9. Ita presiza halo saida atu bele moris ba nafatin?

⁹ Bainhira ita laʼo tuir Jesus nia ain-fatin, ita bele moris ba nafatin. Mane joven ida neʼebé riku husu kona-ba saida mak nia presiza halo atu hetan moris rohan-laek, Jesus hatán: “Mai tuir haʼu.” (Mt 19:16-21) Ema Judeu balu la fiar katak Jesus mak Kristu, no Jesus hatete ba sira: “Haʼu-nia bibi sira . . . laʼo tuir haʼu. Haʼu fó sira moris rohan-laek.” (João 10:24-29) Membru Sinédriu ida naran Nicodemos hakarak buka-hatene kona-ba Jesus nia hanorin sira, no Jesus hatete ba nia katak ema neʼebé “hatudu fiar ba [Jesus] sei . . . hetan moris rohan-laek”. (João 3:16) Ita hatudu fiar ba Jesus liuhusi halo tuir ninia hanorin no mós banati-tuir ninia ezemplu. Se ita halo nuneʼe, ita bele moris ba nafatin.—Mt 7:14.

10. Ita presiza halo saida atu hatene didiʼak Jesus? (João 17:3)

¹⁰ Atu bele laʼo tuir Jesus nia ain-fatin ho didiʼak, ita presiza hatene didiʼak nia. (Lee João 17:3 no nota-rodapé.) Ita presiza “kontinua hetan koñesimentu” kona-ba Jesus. Ita mós presiza kontinua aprende liután kona-ba nia, neʼe inklui ninia hahalok sira, ninia hanoin no mós ninia morál. Maski ita kleur ona ka foun iha lia-loos, maibé ita tenke “kontinua hetan koñesimentu” kona-ba Jeová no ninia Oan-Mane Jesus.

11. Evanjellu haat fó sai saida deʼit?

 ¹¹ Atu ajuda Ita hatene didiʼak ninia Oan-Mane, Jeová dirije ema atu hakerek Evanjellu haat neʼebé sai parte ba Bíblia. Evanjellu sira fó sai kona-ba Jesus nia moris, ninia serbisu haklaken, buat neʼebé nia hatete, halo no mós sente. Evanjellu sira-neʼe ajuda ita atu “hanoin didiʼak” kona-ba Jesus nia ezemplu. (Ebr 12:3) Evanjellu sira mak hanesan Jesus nia ain-fatin neʼebé nia husik hela mai ita. Hodi estuda Evanjellu sira, ita bele koñese Jesus diʼak liután. Rezultadu mak ita bele laʼo tuir ninia ain-fatin ho didiʼak.

12. Oinsá atu hetan benefísiu husi Evanjellu sira?

¹² Atu bele hetan benefísiu husi Evanjellu sira, la toʼo atu lee deʼit ida-neʼe. Ita presiza uza tempu atu estuda didiʼak no medita kona-ba neʼe. (Jos 1:8) Mai ita koʼalia kona-ba sujestaun rua neʼebé bele ajuda ita atu medita no aplika buat neʼebé ita lee.

13. Oinsá atu halo istória iha Evanjellu sira sai moris?

¹³ Primeiru, halo istória iha Evanjellu sira sai moris. Uza Ita-nia imajinasaun atu haree, rona no sente buat neʼebé akontese. Atu ajuda Ita halo nuneʼe, halo riset hodi uza ita-nia publikasaun sira. Haree ba kontestu husi istória neʼebé Ita lee, neʼe katak haree buat neʼebé akontese antes no depois istória neʼe. Buka informasaun liután kona-ba ema no mós fatin neʼebé temi iha istória neʼe. Kompara istória neʼe ho istória neʼebé hanesan iha Evanjellu seluk. Dala ruma hakerek-naʼin ida temi buat neʼebé hakerek-naʼin seluk la temi.

14-15. Oinsá ita bele aplika buat neʼebé ita aprende husi Evanjellu sira?

¹⁴ Segundu, aplika buat neʼebé Ita aprende husi Evanjellu sira. (João 13:17) Bainhira estuda tiha istória ida husi Evanjellu, husu ba Ita-nia an: ‘Iha lisaun ida husi istória neʼe neʼebé haʼu bele  aplika ka lae? Oinsá haʼu bele uza istória neʼe atu ajuda ema seluk?’ Hanoin kona-ba ema ida neʼebé Ita koñese, no tuirmai iha tempu neʼebé diʼak, Ita bele fó sai kona-ba lisaun neʼebé Ita aprende.

¹⁵ Mai ita haree ezemplu ida kona-ba oinsá atu aplika sujestaun rua neʼe. Ita sei koʼalia kona-ba feto-faluk kiak ida neʼebé Jesus haree iha templu.

16. Esplika toʼok situasaun iha Marcos 12:41.

¹⁶ Halo istória sai moris. (Lee Marcos 12:41.) Imajina buat neʼebé akontese iha loron balu antes Jesus mate. Iha loron 11 fulan-Nisan, tinan 33 EC, Jesus hanorin iha templu maizumenus ba loron tomak. Ulun-naʼin relijiaun kontra nia. Sira balu mós husu kona-ba sé mak fó podér ba Jesus atu hanorin. Sira seluk koko husu pergunta neʼebé sira hanoin katak Jesus labele hatán. (Mc 11:27-33; 12:13-34) Tuirmai, Jesus muda ba fatin seluk iha templu. Karik neʼe mak Pátiu Feto nian. Husi fatin neʼe, nia bele haree osan-fatin sira. Nia tuur no komesa hateke ba ema sira neʼebé tau kontribuisaun iha osan-fatin. Nia haree ema riku barak tau osan-besi barak. Karik nia mós bele rona lian husi osan-besi sira neʼebé monu ba osan-fatin.

17. Feto-faluk neʼebé temi iha Marcos 12:42 halo saida?

¹⁷ Lee Marcos 12:42. Liutiha tempu balu, Jesus haree feto-faluk kiak ida. Nia moris susar. Karik ninia osan la toʼo atu sosa presiza loroloron nian. Maski nuneʼe, nia hakbesik ba osan-fatin no tau osan-besi rua neʼebé kiʼik. Karik osan-besi neʼe mós la halo lian bainhira monu ba osan-fatin. Maibé Jesus hatene buat neʼebé feto-faluk neʼe fó. Neʼe mak osan lepton rua neʼebé iha folin kiʼik tebes iha tempu neʼebá. Osan neʼe mós la toʼo atu sosa manu-liin ida atu han. Manu-liin nia folin mak baratu liu hotu.

18. Tuir Marcos 12:43, 44, saida mak Jesus hatete kona-ba feto-faluk nia kontribuisaun?

¹⁸ Lee Marcos 12:43, 44. Jesus admira tebes ho feto-faluk neʼe. Tan neʼe, nia bolu ninia dixípulu no haruka sira haree ba feto-faluk neʼe, no nia dehan: “Feto-faluk kiak neʼe tau barak liu fali ema sira seluk.” Tuirmai nia esplika: “Sira hotu [liuliu ema neʼebé riku] tau buat neʼebé resin husi sira-nia rikusoin, maibé feto-faluk neʼe, maski nia kiak, nia fó buat hotu neʼebé nia iha.” Bainhira feto-faluk neʼe fó hotu ninia osan, nia fiar katak Jeová sei tau matan ba nia.—Sal 26:3.

19. Lisaun importante saida mak ita bele aprende husi Jesus nia liafuan kona-ba feto-faluk?

¹⁹ Aplika buat neʼebé Ita aprende. Husu ba Ita-nia an: ‘Saida mak haʼu bele aprende husi Jesus nia liafuan kona-ba feto-faluk?’ Hanoin kona-ba feto-faluk neʼe. Karik nia hakarak atu fó buat barak liután ba Jeová. Maski nuneʼe, nia fó tuir buat neʼebé nia bele fó. Nia fó buat neʼebé diʼak liu ba Jeová. No Jesus hatene katak Jeová hafolin duni feto neʼe nia kontribuisaun. Lisaun importante mak Jeová sente kontente bainhira ita serbí nia ho laran tomak no kbiit tomak. (Mt 22:37; Kol 3:23) Jeová sente kontente se ita halo buat neʼebé ita bele halo, tuir ita-nia kbiit. Neʼe inklui tempu no enerjia neʼebé ita uza atu adora nia, hanesan bá haklaken no tuir reuniaun sira.

20. Oinsá Ita bele aplika buat neʼebé Ita aprende husi istória kona-ba feto-faluk? Fó toʼok ezemplu.

²⁰ Oinsá Ita bele aplika buat neʼebé  Ita aprende husi istória kona-ba feto-faluk? Hanoin toʼok kona-ba ema neʼebé sei hetan laran-manas bainhira Ita fó-hanoin sira katak Jeová hafolin sira-nia hakaʼas an. Porezemplu, Ita koñese irmán ferik ida neʼebé iha problema saúde no fó-sala ba nia an no sente folin-laek tanba labele haklaken barak hanesan uluk ka lae? Ka Ita koñese irmaun ida neʼebé moras todan no sente laran-kraik tanba nia labele tuir reuniaun hotu iha Reuniaun-Fatin ka lae? Ajuda ema sira-neʼe hodi koʼalia liafuan neʼebé hametin sira. (Éf 4:29) Fahe buat neʼebé Ita aprende husi istória kona-ba feto-faluk. Ita-nia liafuan bele fó-hanoin sira katak Jeová hafolin tebes sira-nia hakaʼas an. (Prov 15:23; 1 Tes 5:11) Ita laʼo tuir Jesus nia ain-fatin ho didiʼak bainhira Ita gaba ema seluk tanba sira hakaʼas an atu serbí Jeová ho laran tomak maski buat neʼebé sira halo mak kiʼik deʼit.

21. Ita hakaʼas an atu halo saida?

²¹ Ita agradese tebes tanba Evanjellu sira fó sai informasaun barak kona-ba Jesus nia moris. Neʼe ajuda ita atu banati-tuir Jesus no laʼo tuir ninia ain-fatin ho didiʼak. Karik ita bele halo planu atu estuda mesak ka halaʼo adorasaun família nian hodi estuda Evanjellu sira. Maibé hanoin-hetan katak atu bele hetan benefísiu husi ita-nia estuda, ita presiza halo istória sira sai moris no aplika buat neʼebé ita aprende. Ita presiza banati-tuir buat neʼebé Jesus halo, no mós rona ba buat neʼebé nia hatete. Iha lisaun tuirmai, ita sei estuda kona-ba Jesus nia liafuan ikus antes nia mate.