Tanbasá Jesus temi David nia liafuan iha Salmo 22:1 lakleur antes nia mate?

Lakleur antes Jesus mate, nia temi liafuan sira iha Mateus 27:46: “Haʼu-nia Maromak, haʼu-nia Maromak, tanbasá mak Ita husik hela haʼu?” Bainhira nia temi liafuan sira-neʼe, nia kumpre David nia liafuan neʼebé hakerek iha Salmo 22:1. (Mc 15:34) Sala atu hanoin katak Jesus temi liafuan sira-neʼe tanba nia laran-kanek ka tanba nia lakon fiar ba tempu balu. Jesus hatene razaun tanbasá nia presiza mate no nia prontu atu halo ida-neʼe. (Mt 16:21; 20:28) Nia mós hatene katak bainhira nia besik atu mate, Jeová presiza atu hasai “lutu [neʼebé] haleʼu nia”, neʼe katak Jeová nia protesaun. (Job 1:10) Entaun Jeová para atu proteje Jesus hodi nuneʼe Jesus bele prova katak nia sei laran-metin nafatin maski nia hasoru susar oioin toʼo mate.—Mc 14:35, 36.

Tanbasá Jesus temi liafuan iha salmo neʼe? Maski ita la hatene loloos, maibé ita sei koʼalia kona-ba razaun balu. *

Hodi temi liafuan sira-neʼe, Jesus hatudu katak Jeová la koko atu proteje Jesus husi mate. Jesus presiza fó ninia moris nuʼudar sakrifísiu no Jeová labele ajuda nia atu halo ida-neʼe. Nia presiza mate atu bele “koko mate ba ema hotu”.—Ebr 2:9.

Hodi temi liafuan husi salmo neʼe, karik Jesus hakarak dada ema nia atensaun ba salmo neʼe tomak. Iha tempu neʼebá, ema  Judeu iha toman atu dekór salmo sira. Bainhira sira rona versíkulu ida husi salmo ida, baibain sira hanoin kedas kona-ba salmo neʼe tomak. Karik Jesus mós halo nuneʼe hodi ajuda ninia dixípulu sira neʼebé mak ema Judeu atu hanoin-hetan profesia barak iha salmo neʼe neʼebé koʼalia kona-ba ninia mate. (Sal 22:7, 8, 15, 16, 18, 24) No mós parte ikus husi Salmo 22 fó hahiʼi ba Jeová no fó sai katak nia mak Liurai ba mundu tomak.—Sal 22:27-31.

Hodi temi fali David nia liafuan, Jesus hatudu katak nia la halo sala ida. Antes Jesus mate, Sinédriu halaʼo julgamentu ilegál no tesi-lia katak Jesus halo sala tanba koʼalia aat Maromak. (Mt 26:65, 66) Membru husi Sinédriu halibur hamutuk lalais iha kalan-boot no halaʼo julgamentu neʼebé la tuir lei sira. (Mt 26:59; Mc 14:56-59) Bainhira Jesus temi liafuan husi Salmo 22:1, neʼe hanesan nia hatete: “Haʼu-nia Maromak, haʼu-nia Maromak, tanbasá mak Ita husik hela haʼu? Haʼu la halo sala ida.” Karik Jesus hakarak hatudu katak nia la halo sala ida.

Karik Jesus mós hakarak atu fó-hanoin ema katak maski David neʼebé hakerek salmo neʼe hasoru susar oioin, maibé neʼe la dehan katak Jeová la kontente ho David. David nia pergunta la hatudu katak nia lakon fiar ba Maromak. Depois husu tiha pergunta neʼe, David fó sai ninia fiar kona-ba Jeová nia kbiit atu salva ninia povu no Jeová kontinua haraik bensaun ba David. (Sal 22:23, 24, 27) Nuneʼe mós ho “David nia Oan” Jesus, maski Jesus hetan terus iha ai-riin terus nian, maibé neʼe la dehan katak Jeová la kontente ona ho Jesus.—Mt 21:9.

Karik Jesus sente laran-triste tanba Jeová tenke para atu proteje nia atu nuneʼe nia bele hatudu katak nia laran-metin duni. Laʼós Jeová nia hakarak atu ninia Oan-Mane hetan terus no mate. Maibé Jeová presiza halo ida-neʼe tanba Adão no Eva kontra nia. Jesus la halo sala ida, maibé nia presiza hetan terus no mate atu hatán ba Satanás no atu fó ninia moris nuʼudar sakrifísiu hodi sosa fali buat neʼebé Adão halakon tiha ona. (Mc 8:31; 1 Ped 2:21-24) Nia bele kumpre ida-neʼe só deʼit se Jeová para atu proteje nia ba tempu balu. Neʼe mak dala primeiru Jeová para atu proteje ninia Oan-Mane.

Karik Jesus koko atu ajuda ninia dixípulu sira tau fokus ba razaun tanbasá mak Jeová husik Jesus atu mate iha ai-riin terus nian. * Jesus hatene katak hodi mate nuʼudar kriminozu iha ai-riin terus nian, neʼe bele halo ema barak sidi. (1 Kor 1:23) Se ninia dixípulu sira tau fokus ba razaun tanbasá Jesus mate, sira sei komprende tanbasá nia presiza mate. (Gal 3:13, 14) Sira sei rekoñese Jesus nuʼudar Salvadór no laʼós kriminozu ida.

Jesus iha razaun oioin atu temi liafuan sira-neʼe, maski nuneʼe nia hatene katak hodi mate iha ai-riin terus nian, nia halo tuir Jeová nia hakarak. Lakleur depois Jesus temi liafuan sira iha salmo neʼe, Jesus mós hatete: “Buat hotu kumpre ona!” (João 19:30; Lc 22:37) Tanba Jeová para atu proteje Jesus ba tempu balu, neʼe fó oportunidade ba Jesus atu kumpre ninia knaar hotu iha mundu. Neʼe mós fó oportunidade ba nia atu kumpre buat hotu neʼebé hakerek kona-ba nia iha “Moisés nia Ukun-Fuan no Profeta sira-nia liafuan no mós Salmo sira”.—Lc 24:44.