1. Oinsá mak labarik ida fó sai ninia fiar kona-ba moris-hiʼas?

 LABARIK-MANE ida naran Matthew moras todan no presiza hetan operasaun dala barak. Bainhira tinan hitu, nia no ninia família nonton JW Broadcasting^®. Iha programa neʼe, sira haree vídeo múzika kona-ba fó benvindu fali ba ema neʼebé hetan moris-hiʼas. b Depois nonton hotu, Matthew hakbesik ba ninia inan-aman, kaer sira-nia liman no dehan: “Apá, amá, maski haʼu mate, haʼu sei moris-hiʼas. Imi bele hein haʼu, buat hotu sei sai diʼak.” Imajina toʼok ksolok neʼebé inan-aman neʼe sente bainhira hatene katak sira-nia oan fiar metin ba moris-hiʼas.

2-3. Tanbasá diʼak atu hanoin kona-ba promesa moris-hiʼas nian?

² Diʼak se ita uza tempu atu hanoin Bíblia nia promesa kona-ba moris-hiʼas. (João 5:28, 29) Tanbasá? Tanba ita la hatene bainhira mak ita sai moras todan ka karik ema neʼebé ita hadomi mate derrepente. (Ecle 9:11; Tgo 4:13, 14) Ita-nia esperansa kona-ba moris-hiʼas bele ajuda ita atu tahan susar sira-neʼe. (1 Tes 4:13) Eskritura sira fó-hanoin ita katak ita-nia Aman iha lalehan hatene didiʼak ita no hadomi tebes ita. (Lc 12:7) Jeová presiza hatene didiʼak ita hodi bele fó moris-hiʼas ba ita ho hahalok no memória neʼebé hanesan uluk. Jeová hadomi tebes ita no loke ona dalan atu ita bele hetan moris ba nafatin. Maski ita mate, nia sei halo ita moris-hiʼas.

³ Iha lisaun neʼe, ita sei koʼalia uluk kona-ba tanbasá ita bele fiar promesa moris-hiʼas. Tuirmai, ita sei haree istória husi Bíblia neʼebé temi eskritura tema ba lisaun neʼe: “Ó-nia alin sei moris fali.” (João 11:23) Ikusliu, ita sei aprende oinsá ita bele hametin ita-nia fiar kona-ba moris-hiʼas.

4. Atu tau fiar ba promesa ida, ita tenke fiar metin kona-ba saida? Esplika toʼok.

⁴ Atu bele fiar ba promesa ida, ita tenke fiar katak ema neʼebé halo promesa neʼe iha hakarak no kbiit ka abilidade atu kumpre ida-neʼe. Imajina toʼok anin-fuik estraga Ita-nia uma. Ita-nia belun ida mai no promete: ‘Haʼu sei ajuda ó harii fali uma neʼe.’ Nia koʼalia ho laran no Ita fiar katak nia hakarak ajuda Ita. Se nia mak badaen ida no iha ekipamentu atu harii uma, Ita hatene katak nia iha abilidade atu ajuda Ita. Tan neʼe, Ita tau fiar ba nia. Oinsá ho Maromak nia promesa kona-ba moris-hiʼas? Nia hakarak duni no iha kbiit atu kumpre promesa neʼe ka lae?

5-6. Tanbasá ita bele fiar katak Jeová hakarak fó moris-hiʼas ba ema?

⁵ Jeová hakarak duni atu fó moris-hiʼas ba ema neʼebé mate ona ka lae? Sin, nia hakarak duni. Nia dirije ema balu neʼebé hakerek Bíblia atu fó sai ninia promesa kona-ba moris-hiʼas iha futuru. (Isa 26:19; Os 13:14; Apok 20:11-13) Bainhira Jeová fó sai promesa ruma, nia sempre kumpre ida-neʼe. (Jos 23:14) Jeová hakarak duni atu fó moris-hiʼas ba ema neʼebé mate ona. Tanbasá?

⁶ Hanoin toʼok Job nia liafuan. Nia fiar metin katak maski nia mate, Jeová sei hanoin ka hakarak tebes atu haree Job moris fali. (Job 14:14, 15) Jeová mós hakarak tebes atu halo nuneʼe ba ninia atan hotu neʼebé mate ona. Nia hakarak atu halo sira moris fali ho saúde diʼak no kontente. Oinsá ho ema millaun ba millaun neʼebé mate ona no la iha oportunidade atu aprende lia-loos kona-ba Jeová? Ita-nia Maromak neʼebé domin mós hakarak fó moris-hiʼas ba sira. (Após 24:15) Nia hakarak sira atu iha oportunidade atu sai ninia belun no moris ba nafatin iha rai. (João 3:16) Klaru katak Jeová hakarak duni atu fó moris-hiʼas ba ema.

7-8. Tanbasá ita bele fiar katak Jeová iha kbiit atu fó moris-hiʼas ba ema?

⁷ Jeová iha kbiit atu fó moris-hiʼas ba ema ka lae? Sin. Nia mak “Ida neʼebé Kbiit Boot Liu Hotu”. (Apok 1:8) Tan neʼe nia iha duni kbiit atu halakon inimigu naran deʼit, inklui mate. (1 Kor 15:26) Ita hetan forsa no kmaan tanba hatene ida-neʼe. Hanoin toʼok esperiénsia husi irmán Emma Arnold. Nia no ninia família hetan koko makaʼas durante Funu Mundiál Segundu. Irmán Emma fó kmaan ba ninia oan-feto tanba ema neʼebé sira hadomi mate iha kampu-konsentrasaun Nazi nian, no nia hatete: “Se ema neʼebé mate ona nunka moris fali, neʼe katak mate mak inimigu neʼebé forsa boot liu fali Maromak. Maibé neʼe la loos.” La iha buat ida mak forsa liu fali Jeová! Maromak Kbiit Boot Liu Hotu neʼebé kria moris iha kbiit atu fó fali moris ba ema neʼebé mate ona.

⁸ Razaun seluk tanbasá ita hatene katak Maromak iha kbiit atu fó moris-hiʼas ba ema mate mak tanba ninia memória la iha rohan. Nia bolu fitun ida-idak ho sira-nia naran. (Isa 40:26) No mós nia hanoin-hetan ema neʼebé mate ona. (Job 14:13; Lc 20:37, 38) Fasil deʼit ba nia atu hanoin-hetan ema nia oin no toman, inklui sira-nia jenétiku, esperiénsia moris, no sira-nia memória.

9. Tanbasá Ita tau fiar ba Jeová nia promesa kona-ba moris-hiʼas iha futuru?

 ⁹ Entaun ita bele tau fiar ba Jeová nia promesa kona-ba moris-hiʼas iha futuru tanba ita hatene katak nia hakarak no iha kbiit atu kumpre promesa neʼe. Hanoin kona-ba razaun seluk atu fiar Maromak nia promesa kona-ba moris-hiʼas: Jeová fó ona moris-hiʼas ba ema balu. Iha Bíblia nia tempu, nia fó kbiit ba ema balu, inklui Jesus atu fó moris-hiʼas ba ema mate. Mai ita haree istória ida iha João kapítulu 11 neʼebé konta kona-ba Jesus fó moris-hiʼas ba ema.

10. Saida mak akontese bainhira Jesus haklaken iha Mota Jordaun nia sorin seluk, no nia halo saida? (João 11:1-3)

¹⁰ Lee João 11:1-3. Imajina toʼok situasaun iha Betánia iha tinan 32 EC nia rohan. Jesus nia belun diʼak sira naran Lázaro, Maria no Marta hela iha knua neʼe. (Lc 10:38-42) Maibé Lázaro sai moras, no ninia biin sira hanoin barak. Sira haruka lia-menon ba Jesus neʼebé iha Mota Jordaun nia sorin seluk, neʼe dook maizumenus laʼo ain durante loron rua husi Betánia. (João 10:40) Triste mak kuandu Jesus simu lia-menon neʼe, karik Lázaro mate ona. Maski Jesus hatene ninia belun foin mate, nia hela tan loron rua iha fatin neʼe no tuirmai mak nia bá Betánia. Bainhira Jesus toʼo, Lázaro mate ona ba loron haat. Jesus iha planu atu halo buat ruma neʼebé lori benefísiu ba ninia belun sira no mós fó glória ba Maromak.​—João 11:4, 6, 11, 17.

11. Ita bele aprende saida husi istória neʼe kona-ba habelun malu?

¹¹ Ita aprende lisaun kona-ba habelun malu iha istória neʼe. Porezemplu, bainhira Maria no Marta haruka lia-menon ba Jesus, sira la husu Jesus atu mai Betánia. Sira dehan deʼit katak Jesus nia belun moras. (João 11:3) Bainhira Lázaro mate, Jesus bele deʼit fó moris-hiʼas ba Lázaro husi dook. Duké halo nuneʼe, Jesus halo viajen ba Betánia atu hamaluk ninia belun Maria no Marta. Ita iha belun neʼebé prontu atu ajuda, maski Ita la husu ka lae? Se nuneʼe, Ita hatene katak Ita bele tau fiar ba nia atu ajuda Ita iha “tempu susar”. (Prov 17:17) Hanesan Jesus, ita mós hakarak sai belun hanesan neʼe ba ema seluk! Mai ita hanoin fali istória neʼe no haree saida mak akontese tuirmai.

12. Jesus promete saida ba Marta, no tanbasá Marta bele tau fiar ba promesa neʼe? (João 11:23-26)

¹² Lee João 11:23-26. Marta rona katak Jesus besik toʼo Betánia. Entaun nia bá lalais atu hasoru Jesus no dehan: “Naʼi, se Ita-Boot iha neʼe karik, haʼu-nia alin sei la mate.” (João 11:21) Sin, Jesus bele kura Lázaro. Maibé Jesus hakarak halo buat neʼebé kmanek liu. Nia promete: “Ó-nia alin sei moris fali.” Nia mós fó sai razaun seluk tanbasá Marta bele tau fiar ba ninia promesa, hodi dehan: “Haʼu mak moris-hiʼas no moris.” Maromak fó kbiit ba nia atu fó moris-hiʼas ba ema mate. Antes neʼe, nia fó moris-hiʼas  ona ba labarik-feto ida lakleur depois nia mate no mós mane joven ida, karik iha loron neʼebé mane neʼe mate. (Lc 7:11-15; 8:49-55) Maibé nia bele fó moris-hiʼas ba ema neʼebé mate ona ba loron haat no isin komesa dodok ona ka lae?

13. Tuir João 11:32-35, saida mak Jesus halo bainhira haree Maria no ema seluk tanis? (Haree mós dezeñu.)

¹³ Lee João 11:32-35. Imajina toʼok buat neʼebé akontese tuirmai. Lázaro nia biin Maria bá hasoru Jesus. Nia repete fali liafuan neʼebé Marta fó sai ona hodi dehan: “Naʼi, se Ita-Boot iha neʼe karik, haʼu-nia alin sei la mate.” Maria no ema seluk sente triste tebes. Bainhira Jesus haree no rona sira tanis, nia mós triste tebes. Jesus hadomi tebes ninia belun sira, tan neʼe ninia matan-been mós tun. Nia komprende ema nia triste bainhira ema neʼebé sira hadomi mate. Klaru katak, nia hakarak tebes atu halakon buat neʼebé halo ema tanis.

14. Ita aprende saida kona-ba Jeová husi Jesus nia hahalok bainhira haree Maria tanis?

¹⁴ Jesus tanis bainhira haree Maria tanis, neʼe hanorin ita katak Jeová mak Maromak neʼebé nakonu ho laran-sadiʼa. Tanbasá? Ita aprende ona iha lisaun antes neʼe katak Jesus haleno ninia Aman nia hanoin no sentimentu ho perfeitu. (João 12:45) Entaun bainhira ita lee katak Jesus hanoin tebes ninia belun sira neʼebé tanis, ita bele dehan katak Jeová mós sente triste tebes bainhira haree ita tanis. (Sal 56:8) Neʼe book Ita atu hakbesik ba Maromak neʼebé laran-sadiʼa.

15. Tuir João 11:41-44, saida mak akontese iha Lázaro nia rate? (Haree mós dezeñu.)

¹⁵ Lee João 11:41-44. Jesus bá Lázaro nia rate no husu ema atu hasai tiha fatuk neʼebé taka rate neʼe. Marta la konkorda no dehan katak Lázaro nia isin karik dois ona. Jesus hatán: “Haʼu hatete ona ba ó katak se ó fiar, ó sei haree Maromak nia glória, loos ka lae?” (João 11:39, 40) Tuirmai Jesus foti matan ba lalehan no  halo orasaun iha ema nia oin. Nia hakarak fó glória hotu ba Jeová kona-ba buat neʼebé akontese tuirmai. Jesus bolu ho lian makaʼas: “Lázaro, sai mai liʼur!” Lázaro laʼo sai husi rate! Jesus halo buat neʼebé ema balu hanoin katak imposivel.

16. Oinsá istória iha João kapítulu 11 hametin ita-nia fiar kona-ba esperansa moris-hiʼas nian?

¹⁶ Istória iha João kapítulu 11 hametin ita-nia fiar kona-ba esperansa moris-hiʼas. Oinsá? Hanoin-hetan Jesus nia promesa ba Marta: “Ó-nia alin sei moris fali.” (João 11:23) Hanesan ninia Aman, Jesus iha hakarak no kbiit atu kumpre promesa neʼe. Ninia matan-been hatudu katak nia hakarak tebes atu halakon mate no halakon triste neʼebé ema sente tanba família mate. Bainhira Lázaro sai husi rate, neʼe hatudu katak Jesus iha duni kbiit atu fó moris-hiʼas ba ema. No mós hanoin kona-ba Jesus nia liafuan ba Marta: “Haʼu hatete ona ba ó katak se ó fiar, ó sei haree Maromak nia glória, loos ka lae?” (João 11:40) Ita iha razaun diʼak oioin atu fiar katak Maromak nia promesa kona-ba moris-hiʼas sei sai loos. Entaun oinsá ita bele hametin ita-nia fiar ba promesa neʼe?

17. Ita presiza hanoin kona-ba saida bainhira lee istória kona-ba moris-hiʼas iha Bíblia?

¹⁷ Lee no medita kona-ba moris-hiʼas iha tempu uluk. Bíblia fó sai istória ualu kona-ba moris-hiʼas iha rai. c Diʼak se Ita estuda istória ida-idak. Bainhira Ita halo nuneʼe, hanoin-hetan katak ema sira-neʼe uluk moris duni. Hanoin kona-ba lisaun neʼebé Ita bele aprende. Hanoin mós kona-ba oinsá ezemplu ida-idak hatudu katak Maromak hakarak no iha kbiit atu fó moris-hiʼas ba ema. No importante liu mak hanoin kona-ba Jesus  nia moris-hiʼas tanba neʼe mak moris-hiʼas neʼebé importante liu hotu. Hanoin-hetan katak ema atus ba atus mak sai sasin ba moris-hiʼas neʼe no neʼe mak evidénsia forte neʼebé hametin ita-nia fiar.​—1 Kor 15:3-6, 20-22.

18. Oinsá mak ita-nia knananuk sira kona-ba moris-hiʼas bele ajuda ita? (Haree mós nota-rodapé.)

¹⁸ Rona, kanta no hanoin kona-ba “knananuk adorasaun nian” neʼebé temi kona-ba moris-hiʼas. d (Éf 5:19) Knananuk sira-neʼe ajuda hametin ita-nia fiar kona-ba moris-hiʼas. Rona knananuk sira-neʼe, treinu, no koʼalia hamutuk kona-ba ninia liafuan sira durante Ita-nia adorasaun família nian. Dekór no hanoin kleʼan kona-ba neʼe atu nuneʼe bele hametin Ita-nia fiar no book Ita-nia laran. Tuirmai bainhira Ita hasoru susar boot ka bainhira ema neʼebé Ita hadomi mate, Jeová nia espíritu santu sei ajuda Ita atu hanoin-hetan knananuk sira-neʼe no hetan kmaan no kbiit husi ida-neʼe.

19. Ita bele imajina saida kona-ba moris-hiʼas? (Haree kaixa “ Ita sei husu pergunta saida ba sira?”)

¹⁹ Uza Ita-nia imajinasaun. Jeová fó kbiit ba ita atu imajina katak ita hela iha mundu foun. Irmán ida esplika: “Haʼu uza tempu barak atu imajina katak haʼu hela iha mundu foun toʼo haʼu bele sente katak haʼu horon ai-funan roza nia morin iha Paraízu.” Imajina kona-ba hasoru mane no feto fiar-naʼin sira husi Bíblia nia tempu. Ita hein namanas atu hasoru sé? Pergunta saida mak Ita hakarak husu ba ema neʼe? Imajina mós kona-ba hasoru fali ema neʼebé Ita hadomi neʼebé mate ona. Hanoin kona-ba saida mak Ita sei hatete ba sira, oinsá Ita sei hakoʼak sira, no oinsá Ita kontente atu hasoru fali sira.

20. Ita hakarak halo saida?

²⁰ Ita agradese tebes tanba Jeová promete atu fó moris-hiʼas ba ema! Ita bele fiar metin katak promesa neʼe sei sai loos tanba Jeová hakarak no iha kbiit atu kumpre ida-neʼe. Mai ita deside metin atu kontinua hametin ita-nia fiar ba esperansa furak neʼe. Hodi halo nuneʼe, ita sei hakbesik liután ba Maromak neʼebé promete ba ita ida-idak, ‘Ema neʼebé imi hadomi sei moris fali!’