1. Tanbasá ita fó komentáriu iha reuniaun?

 TANBASÁ ita presiza asiste reuniaun sira? Razaun primeiru mak atu fó hahiʼi ba Jeová. (Sal 26:12; 111:1) Ita mós asiste reuniaun sira atu nuneʼe ita bele anima malu durante loron ikus sira-neʼe neʼebé nakonu ho susar. (1 Tes 5:11) Bainhira ita hiʼit liman no fó komentáriu, ita kumpre buat rua neʼe.

2. Ita iha oportunidade saida deʼit atu fó komentáriu iha reuniaun?

² Semana-semana, ita iha oportunidade oioin atu fó komentáriu iha reuniaun. Porezemplu, iha findesemana, ita bele hola parte durante Estudu Livru Haklaken. Iha reuniaun loron baileet, ita bele fó komentáriu durante parte Keʼe no hetan buat murak husi Bíblia, Estudu Bíblia iha Kongregasaun no mós parte seluk.

3. Karik ita hasoru susar saida? Oinsá Ebreu 10:24, 25 bele ajuda ita?

³ Ita hotu hakarak hahiʼi Jeová no anima maluk fiar-naʼin sira. Maibé iha buat oioin neʼebé bele halo susar ba ita atu fó komentáriu. Ita sente taʼuk atu fó komentáriu ka ita hakarak tebes fó komentáriu, maibé irmaun sira la hili ita kuandu ita hiʼit liman. Saida mak bele ajuda ita? Apóstolu Paulo nia karta ba ema Ebreu bele ajuda ita hetan resposta. Bainhira nia koʼalia kona-ba tanbasá importante atu halibur hamutuk, nia hatete katak ita presiza tau fokus atu “fó aten-brani ba malu”. (Lee Ebreu 10:24, 25.) Bainhira ita hatene katak ema seluk bele hetan aten-brani husi ita-nia komentáriu maski neʼe mak  simples deʼit, neʼe bele motiva ita atu fó komentáriu. No se irmaun sira ladún hili ita atu fó komentáriu, ita nafatin bele sente kontente tanba irmaun-irmán seluk hetan oportunidade atu fó komentáriu.​—1 Ped 3:8.

4. Iha lisaun neʼe, ita sei koʼalia kona-ba saida?

⁴ Iha lisaun neʼe, ita sei koʼalia ulukliu kona-ba oinsá ita bele anima malu iha kongregasaun kiʼik neʼebé iha ema uitoan deʼit atu fó komentáriu. Tuirmai, ita sei koʼalia kona-ba oinsá ita bele anima malu iha kongregasaun neʼebé boot no iha ema barak neʼebé hiʼit liman atu fó komentáriu. Ikusliu, ita sei koʼalia kona-ba oinsá ita bele fó komentáriu neʼebé anima ema seluk.

5. Oinsá ita bele anima malu se ema uitoan deʼit mak asiste reuniaun?

⁵ Iha kongregasaun ka grupu neʼebé iha irmaun-irmán uitoan deʼit, ladún iha ema barak atu fó komentáriu. Dala ruma irmaun neʼebé dirije tenke hein uitoan atu ema hiʼit liman no fó komentáriu. Karik neʼe halo ita sente reuniaun kleur demais no ita la hetan anima. Saida mak Ita bele halo? Sai prontu atu hiʼit liman beibeik. Bainhira Ita halo nuneʼe, karik Ita mós sei book ema seluk atu fó komentáriu barak liután.

6-7. Oinsá ita bele hamenus ita-nia sentimentu taʼuk atu fó komentáriu?

⁶ Oinsá se Ita sente taʼuk atu fó komentáriu? Ema barak sente hanesan neʼe. Atu bele anima irmaun-irmán sira, buka dalan atu hamenus Ita-nia sentimentu taʼuk atu fó komentáriu. Oinsá Ita bele halo nuneʼe?

⁷ Karik Ita bele lee fali sujestaun sira neʼebé uluk fó sai iha Livru Haklaken. b Porezemplu, prepara ho didiʼak. (Prov 21:5) Bainhira Ita hatene didiʼak informasaun, fasil liu ba Ita atu fó komentáriu. Diʼak mós atu fó komentáriu neʼebé badak. (Prov 15:23; 17:27) Ita sei la sente taʼuk demais se Ita fó komentáriu neʼebé badak. Dala ruma fasil liu ba irmaun-irmán sira atu komprende komentáriu neʼebé badak ho fraze ida ka rua deʼit duké komentáriu neʼebé naruk. Bainhira Ita fó komentáriu neʼebé badak ho Ita-nia liafuan rasik, Ita hatudu katak Ita prepara ho didiʼak no komprende didiʼak informasaun.

8. Jeová hanoin oinsá kona-ba ita-nia hakaʼas an?

⁸ Oinsá se Ita koko ona sujestaun sira-neʼe balu, maibé nafatin sente taʼuk atu fó komentáriu liu dala rua? Ita bele fiar metin katak Jeová hafolin Ita-nia hakaʼas an atu fó komentáriu tuir Ita-nia kbiit. (Lc 21:1-4) Jeová la husu Ita atu halo buat neʼebé liu fali Ita-nia kbiit. (Flp 4:5) Entaun deside saida mak Ita bele halo, halo planu atu kumpre ida-neʼe, no halo orasaun atu sente kalma. Karik foufoun Ita-nia planu mak atu fó komentáriu ida neʼebé badak.

9. Susar saida mak bele mosu iha kongregasaun neʼebé boot?

⁹ Se Ita-nia kongregasaun iha irmaun-irmán barak, karik Ita hasoru susar seluk tan. Karik irmaun-irmán barak mak hiʼit liman atu fó komentáriu, tan neʼe  irmaun neʼebé dirije ladún hili Ita. Porezemplu, irmán Danielle c sempre gosta atu fó komentáriu iha reuniaun. Nia haree ida-neʼe nuʼudar parte ba ninia adorasaun, dalan atu anima ema seluk no mós dalan atu hametin ninia fiar ba Bíblia nia hanorin. Maibé bainhira nia muda ba kongregasaun ida neʼebé iha irmaun-irmán barak, nia ladún hetan oportunidade atu fó komentáriu, dala ruma nia la fó komentáriu. Nia hatete: “Haʼu sente estrese. Haʼu sente hanesan haʼu lakon priviléjiu ruma. Bainhira neʼe akontese beibeik, haʼu komesa duvida katak irmaun sira la hili haʼu ho neon.”

10. Ita bele halo saida atu aumenta ita-nia oportunidade atu fó komentáriu?

¹⁰ Ita mós sente ona hanesan Danielle ka lae? Se nuneʼe, karik Ita hanoin atu rende an no rona deʼit ba reuniaun sira. Maibé keta rende an atu fó komentáriu. Saida mak Ita bele halo? Diʼak atu prepara komentáriu balu ba reuniaun ida-idak atu nuneʼe se irmaun neʼebé dirije la hili kedas Ita, Ita sei iha oportunidade seluk atu fó komentáriu. Bainhira Ita prepara Livru Haklaken, hanoin kona-ba oinsá parágrafu ida-idak liga ho lisaun nia tema. Se Ita halo nuneʼe, Ita sei iha komentáriu diʼak neʼebé Ita bele hatoʼo durante lisaun ida. Liután neʼe, Ita mós bele prepara atu fó komentáriu iha parágrafu neʼebé koʼalia kona-ba lia-loos neʼebé kleʼan neʼebé susar atu esplika. (1 Kor 2:10) Tanbasá? Tanba baibain ema uitoan deʼit mak hiʼit liman durante parágrafu sira-neʼe. Oinsá se Ita koko ona sujestaun sira-neʼe, maibé Ita seidauk hetan oportunidade atu fó komentáriu ba semana balu? Se nuneʼe, karik antes reuniaun Ita bele hakbesik ba irmaun neʼebé dirije estudu no fó-hatene nia kona-ba parágrafu neʼebé ita hakarak hatán.

11. Filipe 2:4 anima ita atu halo saida?

¹¹ Lee Filipe 2:4. Jeová dirije apóstolu Paulo atu anima ema Kristaun atu hanoin ema seluk nia diʼak. Oinsá ita bele aplika konsellu neʼe durante reuniaun sira? Hanoin-hetan katak hanesan  ho ita, ema seluk mós hakarak fó komentáriu.

12. Saida mak dalan diʼak atu anima ema seluk iha reuniaun? (Haree mós foto.)

¹² Hanoin toʼok kona-ba neʼe. Bainhira Ita konversa ho belun sira, baibain Ita la koʼalia barak liu toʼo sira la iha oportunidade atu koʼalia. Ita hakarak sira mós koʼalia. Nuneʼe mós ho reuniaun sira, ita hakarak fó oportunidade ba ema barak atu fó komentáriu. Tuir loloos, dalan diʼak atu anima irmaun-irmán sira mak liuhusi fó oportunidade ba sira atu fó komentáriu. (1 Kor 10:24) Mai ita koʼalia kona-ba oinsá ita bele halo ida-neʼe.

13. Oinsá mak ita bele fó oportunidade ba ema seluk atu fó komentáriu?

¹³ Fó komentáriu neʼebé badak, atu nuneʼe ema seluk mós bele fó komentáriu. Katuas kongregasaun sira no irmaun-irmán sira neʼebé iha esperiénsia bele hatudu ezemplu diʼak kona-ba neʼe. Maski Ita fó komentáriu neʼebé badak, maibé keta koʼalia kona-ba pontu barak liu. Se Ita koʼalia kona-ba pontu hotu iha parágrafu laran, la iha tan pontu seluk ba ema atu koʼalia. Porezemplu, parágrafu neʼe koʼalia kona-ba sujestaun rua. Primeiru fó komentáriu badak no segundu keta koʼalia kona-ba pontu barak liu. Se Ita mak ema primeiru atu fó komentáriu kona-ba parágrafu neʼe, koʼalia kona-ba sujestaun ida deʼit.

14. Saida mak bele ajuda ita deside dala hira atu hiʼit liman? (Haree mós foto.)

¹⁴ Tetu didiʼak bainhira deside kona-ba dala hira mak Ita sei hiʼit liman atu fó komentáriu. Se ita hiʼit liman beibeik, irmaun neʼebé dirije estudu bele sente katak nia tenke hili ita beibeik maski ema seluk seidauk hetan oportunidade atu fó komentáriu. Karik neʼe sei halo ema seluk dada an atu hiʼit liman.​—Ecle 3:7.

15. (a) Ita presiza halo saida se irmaun neʼebé dirije estudu la hili ita? (b) Oinsá irmaun neʼebé dirije bele hanoin ema hotu nia diʼak? (Haree kaixa “ Se Ita mak dirije estudu”.)

¹⁵ Bainhira irmaun-irmán barak hiʼit liman, karik ita sei la hetan oportunidade atu fó komentáriu barak. Dala ruma irmaun neʼebé dirije estudu labele hili ita. Karik neʼe halo ita sente estrese, maibé keta sente an bainhira irmaun neʼe la hili ita.​—Ecle 7:9.

16. Oinsá ita bele anima ema neʼebé fó komentáriu?

¹⁶ Se Ita labele fó komentáriu barak tuir Ita-nia hakarak, karik Ita bele rona didiʼak ba ema seluk nia komentáriu no depois reuniaun Ita bele gaba sira. Bainhira Ita gaba irmaun-irmán sira, neʼe mós bele anima sira hanesan bainhira Ita fó komentáriu. (Prov 10:21) Gaba ema seluk mak dalan ida tan neʼebé ita bele anima malu.

17. (a) Oinsá mak inan-aman bele ajuda sira-nia oan atu fó komentáriu neʼebé diʼak? (b) Tuir vídeo, saida mak hakat haat atu prepara komentáriu? (Haree mós nota-rodapé.)

¹⁷ Saida mak dalan seluk atu anima malu kuandu asiste reuniaun? Inan-aman sira bele ajuda oan sira atu prepara komentáriu neʼebé diʼak tuir sira-nia idade. (Mt 21:16) Dala ruma, tópiku neʼebé ita estuda mak sériu hanesan problema  iha moris kaben nian ka ema nia morál, maibé karik iha parágrafu ida ka rua neʼebé labarik ida bele fó komentáriu. Inan-aman sira mós bele ajuda sira-nia oan komprende tanbasá irmaun neʼebé dirije estudu sei la hili sira iha tempu ida-idak neʼebé sira hiʼit liman. Bainhira esplika ida-neʼe, neʼe bele ajuda oan sira atu la sente triste kuandu ema seluk mak fó komentáriu duké sira.​—1 Tim 6:18. d

18. Oinsá atu la dada atensaun ba ita-nia an bainhira fó komentáriu? (Provérbios 27:2)

¹⁸ Ita hotu bele prepara komentáriu neʼebé fó hahiʼi ba Jeová no anima maluk fiar-naʼin sira. (Prov 25:11) Maski dala ruma ita bele fó sai ita-nia esperiénsia neʼebé badak, maibé diʼak atu la koʼalia barak liu kona-ba ita-nia an. (Lee Provérbios 27:2; 2 Kor 10:18) Duké halo nuneʼe, ita hakarak tau fokus ba Jeová, ninia Liafuan no ninia povu. (Apok 4:11) Klaru katak, se pergunta ba parágrafu husu ita atu fó sai ita-nia esperiénsia, la sala atu halo nuneʼe. Ita bele haree ezemplu kona-ba neʼe iha parágrafu tuirmai.

19. (a) Saida mak rezultadu bainhira ita hanoin ema seluk nia diʼak kuandu asiste reuniaun? (Roma 1:11, 12) (b) Ita rasik gosta saida kona-ba komentáriu sira iha reuniaun?

¹⁹ Maski la iha regra kona-ba oinsá atu fó komentáriu, maibé ita hotu bele hakaʼas an atu anima malu. Karik neʼe katak ita presiza fó komentáriu barak liután. Ka karik ita presiza fó komentáriu uitoan deʼit no sente kontente tanba ema seluk mós fó komentáriu. Hodi hanoin kona-ba ema seluk nia diʼak bainhira asiste reuniaun, ita hotu bele “hametin malu”.​—Lee Roma 1:11, 12.