1-2. Ita presiza halo saida nuʼudar ita hein ba mundu foun?

 ITA hafolin tebes Jeová nia promesa atu troka sistema aat neʼe ho mundu foun. (2 Ped 3:13) Maski ita la hatene ho loloos bainhira mak mundu foun sei mai, maibé akontesimentu sira iha mundu hatudu katak ita la presiza hein kleur tan.​—Mt 24:32-34, 36; Após 1:7.

² Maski ita iha lia-loos kleur ona, maibé ita hotu presiza hametin ita-nia fiar ba promesa neʼe. Tanbasá? Tanba ita-nia fiar bele sai fraku. Tuir loloos, apóstolu Paulo bolu fiar neʼebé fraku nuʼudar “sala neʼebé bele kaer metin ita”. (Ebr 12:1) Atu ita-nia fiar la sai fraku, ita presiza medita beibeik kona-ba evidénsia sira neʼebé prova katak lakleur tan mundu foun sei mai.​—Ebr 11:1.

3. Iha lisaun neʼe, ita sei koʼalia kona-ba saida?

³ Iha lisaun neʼe, ita sei koʼalia kona-ba dalan tolu atu hametin ita-nia fiar ba Jeová nia promesa kona-ba mundu foun: (1) medita kona-ba Jesus nia sakrifísiu, (2) hanoin kona-ba Jeová nia kbiit, no (3) uza tempu atu halo atividade espirituál. Tuirmai ita sei koʼalia kona-ba oinsá Jeová nia mensajen ba Habakuk bele hametin ita-nia fiar ohin loron. Maibé ulukliu, mai ita koʼalia kona-ba susar neʼebé ita hasoru daudaun no atu bele tahan ida-neʼe, ita presiza fiar neʼebé metin kona-ba mundu foun.

 ITA PRESIZA HATUDU FIAR IHA SITUASAUN SAIDA DEʼIT?

4. Ita presiza fiar neʼebé metin bainhira halo desizaun saida deʼit?

⁴ Loroloron ita halo desizaun oioin no ita presiza fiar metin atu halo desizaun neʼe. Porezemplu, ita presiza halo desizaun kona-ba ita-nia ransu, atividade halimar nian, edukasaun, kaben, oan, no mós serbisu. Diʼak atu husu ba ita-nia an: ‘Haʼu-nia desizaun sira hatudu katak haʼu fiar metin sistema aat neʼe mak temporáriu no lakleur sei troka ho Maromak nia mundu foun ka lae? Ka haʼu-nia desizaun sira hetan influénsia husi ema neʼebé fiar katak moris mak dala ida deʼit?’ (Mt 6:19, 20; Lc 12:16-21) Se ita hametin ita-nia fiar katak mundu foun besik ona, ita sei halo desizaun neʼebé diʼak.

5-6. Tanbasá ita presiza fiar neʼebé metin durante tempu susar? Konta toʼok ai-knanoik.

⁵ Ita mós hasoru susar sira no atu bele tahan ida-neʼe, ita presiza fiar neʼebé metin. Karik ema fó-terus ba ita, ita iha problema saúde neʼebé sériu ka problema seluk tan neʼebé halo ita sente laran-kraik. Karik foufoun, ita sente katak ita bele tahan susar sira-neʼe. Maibé se susar sira-neʼe kontinua ba tempu kleur, ita presiza iha fiar neʼebé metin atu bele tahan no kontinua serbí Jeová ho ksolok.​—Rom 12:12; 1 Ped 1:6, 7.

⁶ Bainhira ita hasoru situasaun susar, karik ita sente katak Jeová nia mundu foun sei nunka mai. Neʼe katak ita-nia fiar fraku ka lae? Lae. Hanoin toʼok kona-ba ai-knanoik ida. Karik durante tempu bailoro neʼebé naruk, ita hanoin katak udan sei nunka mai. Maibé ikusmai udan tun no tempu bailoro remata. Nuneʼe mós, bainhira ita sente laran-kraik tebes, karik ita sente katak mundu foun sei nunka mai. Maibé se ita-nia fiar metin, ita hatene katak Maromak nia promesa sira sei sai loos. (Sal 94:3, 14, 15; Ebr 6:17-19) Ho konfiansa, ita bele kontinua tau uluk ita-nia adorasaun ba Jeová.

7. Ita tenke hasees an husi hanoin saida?

⁷ Ita mós presiza fiar neʼebé metin atu bele haklaken. Ema barak neʼebé ita hasoru bainhira haklaken hanoin katak “liafuan diʼak” kona-ba mundu foun mak mehi deʼit. (Mt 24:14; Eze 33:32) Ita lakohi duvida kona-ba Jeová nia hanorin hanesan ema sira-neʼe. Atu neʼe labele akontese, ita presiza kontinua hametin ita-nia fiar. Mai ita koʼalia kona-ba dalan tolu atu halo ida-neʼe.

MEDITA KONA-BA JESUS NIA SAKRIFÍSIU

8-9. Oinsá medita kona-ba Jesus nia sakrifísiu bele ajuda hametin ita-nia fiar?

⁸ Dalan ida atu hametin ita-nia fiar mak liuhusi medita kona-ba Jesus nia sakrifísiu. Jesus nia sakrifísiu mak garantia katak Maromak nia promesa sira sei sai loos. Bainhira ita hanoin kleʼan kona-ba tanbasá Jeová fó Jesus nuʼudar sakrifísiu no saida mak envolve iha sakrifísiu neʼe, neʼe sei hametin ita-nia fiar katak Maromak nia promesa kona-ba moris ba nafatin iha mundu foun sei sai loos. Tanbasá?

⁹ Jesus nia sakrifísiu envolve saida deʼit? Jeová haruka ninia Oan-Mane primeiru neʼebé nia hadomi tebes atu husik lalehan hodi moris mai nuʼudar ema perfeitu ida. Bainhira iha mundu, Jesus tahan hasoru susar oioin. Tuirmai nia hetan terus no mate. Jeová selu folin neʼebé boot tebes! Maromak sei la husik  ninia Oan-Mane atu hetan terus no mate tanba deʼit atu fó ita moris neʼebé diʼak liu ba tempu badak deʼit. (João 3:16; 1 Ped 1:18, 19) Jeová selu folin neʼebé boot tebes, tan neʼe nia sei kumpre ninia promesa atu fó moris ba nafatin ba ema iha mundu foun.

HANOIN KONA-BA JEOVÁ NIA KBIIT

10. Tuir Éfeso 3:20, Jeová bele halo saida?

¹⁰ Dalan segundu atu hametin ita-nia fiar mak liuhusi hanoin kona-ba Jeová nia kbiit. Nia iha kbiit atu kumpre ninia promesa hotu. Ohin loron, ema barak hanoin katak moris ba nafatin iha mundu foun mak imposivel. Maibé dala barak, Jeová promete atu halo buat ruma neʼebé ema nunka bele halo. Nia halo nuneʼe tanba nia mak Maromak neʼebé Kbiit Boot Liu Hotu. (Job 42:2; Mc 10:27) Tan neʼe, ita la hakfodak bainhira nia promete atu halo buat kmanek oioin!​—Lee Éfeso 3:20.

11. Fó toʼok ezemplu kona-ba Jeová nia promesa kmanek ida. (Haree kaixa “ Jeová nia promesa kmanek sira neʼebé sai loos ona”.)

¹¹ Hanoin toʼok kona-ba buat balu neʼebé Maromak promete iha tempu uluk no tuir ema nia haree neʼe imposivel atu akontese. Nia promete ba Abraão no Sara katak sira sei iha oan-mane maski sira idade ona. (Gén 17:15-17) Nia mós hatete ba Abraão katak Abraão nia bei-oan sira sei simu rai-Kanaan. Durante tinan barak, ema Izraél neʼebé mai husi Abraão nia jerasaun sai atan iha rai-Ejitu, entaun karik haree hanesan promesa neʼe sei nunka sai loos. Maibé neʼe sai loos duni. Tuirmai, Jeová fó sai katak Isabel sei iha oan maski nia ferik ona. Nia mós fó sai ba Maria neʼebé virjen katak Maria sei tuur-ahi Maromak nia Oan-Mane. Ida-neʼe kumpre promesa neʼebé Jeová halo tinan rihun ba rihun liubá iha jardín Eden.​—Gén 3:15.

12. Josué 23:14 no Isaias 55:10, 11 fó sai saida kona-ba Jeová nia kbiit?

¹² Bainhira ita hanoin kona-ba Jeová nia promesa hotu no oinsá nia kumpre promesa sira-neʼe, neʼe sei hametin ita-nia fiar ba ninia kbiit atu kumpre promesa sira kona-ba mundu foun. (Lee Josué 23:14; Isaias 55:10, 11.) Neʼe mós sei ajuda ita atu hanorin ema seluk katak Jeová nia promesa kona-ba mundu foun laʼós mehi deʼit. Bainhira Jeová promete kona-ba lalehan foun no rai foun, nia hatete: “Liafuan sira-neʼe mak loos no ema bele tau fiar.”​—Apok 21:1, 5.

HALO ATIVIDADE ESPIRITUÁL BARAK

13. Oinsá reuniaun sira bele hametin ita-nia fiar? Esplika toʼok.

¹³ Dalan terseiru atu hametin ita-nia fiar mak uza tempu atu halo atividade espirituál. Porezemplu, hanoin toʼok benefísiu neʼebé ita hetan husi reuniaun sira. Irmán Anna b neʼebé serbí tempu-tomak iha dalan oioin durante tinan barak, hatete: “Reuniaun sira ajuda haʼu atu iha fiar neʼebé metin. Maski oradór ladún iha matenek atu hanorin ka la fó sai pontu ruma neʼebé foun, maibé baibain haʼu nafatin rona buat ruma neʼebé ajuda haʼu atu komprende diʼak liután Bíblia, no ida-neʼe hametin haʼu-nia fiar.” Klaru katak ita-nia fiar mós bele sai metin liután bainhira ita rona irmaun-irmán sira fó komentáriu.​—Rom 1:11, 12; 10:17.

14. Oinsá mak haklaken hametin ita-nia fiar?

¹⁴ Ita mós hametin ita-nia fiar bainhira  haklaken. (Ebr 10:23) Irmán Barbara neʼebé serbí Jeová durante tinan 70 liu, hatete: “Bainhira haʼu haklaken, ida-neʼe sempre hametin haʼu-nia fiar. Kuandu haʼu koʼalia ba ema seluk kona-ba Jeová nia promesa sira, neʼe halo haʼu-nia fiar sai metin liután.”

15. Oinsá estuda mesak bele hametin ita-nia fiar? (Haree mós dezeñu sira.)

¹⁵ Atividade espirituál seluk neʼebé hametin ita-nia fiar mak estuda mesak. Irmán Susan hatete katak buat neʼebé ajuda nia mak halo oráriu atu estuda mesak. Nia hatete: “Iha loron-domingu, haʼu estuda Livru Haklaken ba semana tuirmai. Iha loron-segunda no tersa, haʼu prepara ba reuniaun loron baileet nian.” Irmán Susan kontinua hametin ninia fiar tanba nia sempre halo tuir ninia oráriu atu estuda mesak. Irmán Irene neʼebé serbí durante tinan barak iha sede-jerál hatete katak estuda Bíblia nia profesia mak hametin ninia fiar. Nia hatete: “Haʼu admira ho oinsá Jeová nia profesia hotu sai loos, maski neʼe mak detalla kiʼik deʼit.” c

“VIZAUN NEʼE SEI KUMPRE DUNI”

16. Tanbasá Maromak nia liafuan ba Habakuk bele ajuda ita ohin loron? (Ebreu 10:36, 37)

¹⁶ Jeová nia atan balu hein ona sistema aat neʼe nia rohan ba tempu kleur. Karik ema balu hanoin katak Jeová demora atu kumpre ninia promesa. Maibé Jeová hatene ninia atan sira-nia sentimentu. Nia hatete ba profeta Habakuk: “Vizaun neʼe sei kumpre tuir tempu neʼebé hili tiha ona, neʼe halai lalais toʼo ninia rohan, neʼe laʼós lia-bosok. Maski vizaun neʼe demora karik, hein nafatin bá! Tanba vizaun neʼe sei kumpre duni. Neʼe sei la tarde!” (Hab 2:3) Maromak fó sai liafuan  sira-neʼe atu ajuda deʼit Habakuk ka lae? Ka ninia liafuan sira-neʼe mós bele ajuda ita ohin loron? Jeová haruka apóstolu Paulo atu aplika liafuan sira-neʼe ba ema Kristaun neʼebé hein namanas mundu foun. (Lee Ebreu 10:36, 37.) Tan neʼe, maski ita sente katak Jeová demora atu kumpre ninia promesa atu salva ita, ita bele iha konfiansa katak promesa “neʼe sei kumpre duni. Neʼe sei la tarde!”

17. Oinsá mak irmán Louise halo tuir Jeová nia konsellu ba Habakuk?

¹⁷ Jeová nia atan barak halo tuir Jeová nia konsellu atu “hein nafatin bá”. Irmaun-irmán balu halo ona ida-neʼe ba tinan barak. Porezemplu, irmán Louise komesa serbí Jeová iha tinan 1939. Nia hatete: “Iha tempu neʼebá, haʼu hanoin katak Armagedon sei mai antes haʼu remata eskola sekundária. Maibé neʼe la akontese. Durante tinan barak buat neʼebé ajuda haʼu mak lee istória sira iha Bíblia kona-ba ema neʼebé hein Jeová atu kumpre ninia promesa sira. Haʼu lee istória kona-ba Noé, Abraão, José no ema seluk neʼebé tenke hein kleur atu simu kolen neʼebé Jeová promete ona. Hodi hein nafatin ba Jeová nia promesa ajuda haʼu atu fiar metin nafatin katak lakleur tan mundu foun sei mai.” Irmaun-irmán barak neʼebé serbí ona Jeová ba tempu kleur mós konkorda ho liafuan sira-neʼe.

18. Oinsá mak haree ba kriasaun bele hametin ita-nia fiar kona-ba mundu foun?

¹⁸ Maski mundu foun seidauk mai, maibé hanoin kona-ba buat balu neʼebé ita bele haree agora, hanesan fitun sira, ai-hun sira, animál sira no mós ema. La iha ema ida mak duvida katak buat sira-neʼe eziste duni, maski loloos uluk buat sira-neʼe la iha. Buat sira-neʼe iha tanba Jeová mak kria. (Gén 1:1, 26, 27) Maromak mós promete atu kria mundu foun. Nia sei kumpre promesa neʼe. Iha mundu foun, ema sei moris ba nafatin ho saúde neʼebé perfeitu. Ita bele fiar metin katak mundu foun sei mai tuir tempu neʼebé Maromak deside ona.​—Isa 65:17; Apok 21:3, 4.

19. Oinsá Ita bele hametin Ita-nia fiar?

¹⁹ Nuʼudar Ita hein ba mundu foun, aproveita oportunidade hotu atu hametin Ita-nia fiar. Hametin Ita-nia fiar ba Jesus nia sakrifísiu. Hanoin kona-ba Jeová nia kbiit. Uza tempu atu halo atividade espirituál. Hodi halo nuneʼe, Ita bele sai parte ba ema “sira neʼebé simu buat neʼebé promete ona liuhusi sira-nia fiar no pasiénsia”.​—Ebr 6:11, 12; Rom 5:5.