1. Esplika toʼok saida mak akontese bainhira Jesus halo ninia milagre primeiru.

 IMAJINA toʼok situasaun maizumenus iha fulan-Outubru tinan 29 EC bainhira Jesus hahú ninia serbisu haklaken. Jesus, ninia inan Maria, no dixípulu balu hetan konvite atu tuir festa kazamentu iha Kaná, neʼebé iha parte norte husi Nazaré, fatin neʼebé Maria hela bá. Família neʼe mak Maria nia belun no Maria ajuda tau matan bainaka sira. Maibé durante festa, mosu problema ida neʼebé bele hamoe família neʼe no mós noivu ho noiva. Problema mak tua-uvas hotu. b Karik ema neʼebé tuir festa mak barak liu fali buat neʼebé sira espera. Maria hakbesik kedas ba ninia oan-mane no hatete: “Sira-nia tua-uvas hotu ona.” (João 2:1-3) Saida mak Jesus halo? Nia halo milagre kmanek ida hodi troka bee sai fali “tua-uvas diʼak”.​—João 2:9, 10.

2-3. (a) Jesus halo milagre hanesan saida? (b) Ita hetan benefísiu saida hodi aprende kona-ba Jesus nia milagre sira?

² Jesus halo milagre barak durante ninia serbisu haklaken iha rai. c Nia uza ninia kbiit atu halo milagre hodi ajuda ema rihun ba rihun. Porezemplu, Jesus halo milagre dala rua atu fó han mane naʼin-5.000 no tuirmai mane naʼin-4.000, no se sura ho feto no labarik sira karik Jesus  fó han ema naʼin-27.000 liu. (Mt 14:15-21; 15:32-38) Iha situasaun rua neʼe, Jesus mós kura ema barak neʼebé moras. (Mt 14:14; 15:30, 31) Imajina toʼok ksolok neʼebé ema-lubun neʼe sente bainhira Jesus kura sira no fó han ba sira!

³ Ita bele aprende buat barak husi Jesus nia milagre sira. Iha lisaun neʼe, ita sei koʼalia kona-ba lisaun oioin husi milagre sira-neʼe neʼebé bele hametin ita-nia fiar. Depois neʼe, ita sei haree oinsá ita bele banati-tuir Jesus nia hahalok haraik an no laran-sadiʼa bainhira nia halo milagre sira.

4. Jesus nia milagre hanorin ita lisaun importante kona-ba sé?

⁴ Jesus nia milagre hanorin ita lisaun importante kona-ba nia no mós ninia Aman. Neʼe tanba Jeová mak Hun ba kbiit atu halo milagre sira. Apóstolu 10:38 hatete: “Maromak hili ona [Jesus] liuhusi espíritu santu no kbiit, no nia laʼo haleʼu rai neʼe hodi halo diʼak no kura ema hotu neʼebé Diabu haterus, tanba Maromak hamutuk ho nia.” Hanoin-hetan Jesus nia hahalok no liafuan hotu, inklui ninia milagre sira haleno ninia Aman nia hanoin no sentimentu. (João 14:9) Ita bele aprende lisaun tolu husi Jesus nia milagre sira.

5. Saida mak book Jesus atu halo milagre? (Mateus 20:30-34)

⁵ Primeiru, Jesus no ninia Aman hadomi tebes ita. Bainhira Jesus iha rai, nia hatudu domin boot ba ema liuhusi uza ninia kbiit atu halo milagre hodi ajuda ema neʼebé hetan susar. Loron ida, nia kura mane matan-delek naʼin-rua neʼebé husu ninia ajuda. (Lee Mateus 20:30-34.) Eskritura dehan katak Jesus “hanoin tebes sira”, no tuirmai nia kura sira. Verbu Gregu neʼebé tradús nuʼudar “hanoin tebes” refere ba laran-sadiʼa neʼebé boot neʼebé ema sente iha laran. Jesus sente hanesan neʼe, no neʼe book nia atu fó han ba ema neʼebé hamlaha no kura ema moras-lepra ida. (Mt 15:32; Mc 1:41) Ita bele fiar katak Jeová neʼebé “laran-sadiʼa” no ninia Oan-Mane hadomi tebes ita no sente laran-triste bainhira ita hasoru susar. (Lc 1:78; 1 Ped 5:7) Sira hakarak atu halakon ema nia susar hotu.

6. Maromak fó kbiit saida ba Jesus?

⁶ Segundu, Maromak fó kbiit ba Jesus atu hadiʼa ema nia problema. Bainhira Jesus halo milagre, nia hatudu katak nia bele hadiʼa problema hotu neʼebé ema labele rezolve. Porezemplu, nia iha kbiit atu halo ita livre husi sala neʼebé ita hetan husi Adão no rezultadu oioin husi sala neʼe, inklui moras no mate. (Mt 9:1-6; Rom 5:12, 18, 19) Jesus nia milagre hatudu katak nia bele kura “moras hotu” no mós fó moris-hiʼas ba ema mate. (Mt 4:23; João 11:43, 44) Jesus mós iha kbiit atu kontrola anin-fuik no halo ema livre husi anju aat. (Mc 4:37-39; Lc 8:2) Ita sente kmaan tanba Jeová fó kbiit hanesan neʼe ba ninia Oan-Mane.

7-8. (a) Jesus nia milagre fó konfiansa saida mai ita? (b) Ita hein namanas ba milagre saida iha mundu foun?

⁷ Terseiru, ita bele fiar metin katak Maromak sei kumpre buat hotu neʼebé nia promete ona liuhusi ninia Ukun. Milagre sira neʼebé Jesus halo iha rai, hanorin ita katak nia sei halo ida-neʼe iha mundu tomak tanba nia mak Liurai ba Maromak nia Ukun. Hanoin toʼok buat neʼebé lakleur tan ita sei hetan  bainhira Jesus ukun mundu. Ita sei iha saúde neʼebé perfeitu, tanba nia sei halakon moras no defisiente hotu neʼebé hamosu susar ba ema. (Isa 33:24; 35:5, 6; Apok 21:3, 4) Ita sei nunka hamlaha tan ka hasoru susar tanba dezastre naturais. (Isa 25:6; Mc 4:41) Ita sei kontente atu fó benvindu fali ba ita-nia família no belun sira neʼebé sai husi “rate”. (João 5:28, 29) Ita hein namanas ba milagre saida iha mundu foun?

⁸ Bainhira Jesus halo milagre, nia hatudu hahalok haraik an no laran-sadiʼa, neʼe mak hahalok sira neʼebé ita presiza banati-tuir. Mai ita hanoin kona-ba ezemplu rua, no ita sei hahú ho istória kona-ba festa kazamentu iha Kaná.

9. Tanbasá Jesus halo milagre iha festa kazamentu? (João 2:6-10)

⁹ Lee João 2:6-10. Bainhira tua-uvas hotu ona iha festa neʼe, Jesus iha obrigasaun atu ajuda ka lae? Lae. La iha profesia neʼebé fó sai katak Mesias sei uza milagre atu halo tua-uvas. Maibé imajina toʼok, Ita sei sente oinsá se la iha tan buat ruma ba Ita-nia bainaka atu hemu iha Ita-nia festa kazamentu. Ita bele fiar katak Jesus hanoin família neʼe, liuliu noiva no noivu, no nia lakohi sira sente moe. Tan neʼe, hanesan temi ona, Jesus halo milagre hodi halo bee maizumenus litru 390 sai fali tua-uvas neʼebé diʼak. Karik Jesus halo tua-uvas barak atu bele  iha restu ba família neʼe atu uza fali iha futuru ka karik bele faʼan atu ajuda noiva no noivu neʼe. Ita bele fiar katak noiva no noivu neʼe sente agradese tebes!

10. Informasaun importante saida mak fó sai iha João kapítulu 2? (Haree mós dezeñu.)

¹⁰ Hanoin toʼok informasaun importante balu neʼebé temi iha João kapítulu 2. Laʼós Jesus mak enxe bee iha sanan-fatuk sira. Duké dada atensaun ba ninia an rasik, nia hatete ba atan sira atu enxe bee nakonu iha sanan sira-neʼe. (Versíkulu 6, 7) Bainhira nia halo tiha bee sai fali tua-uvas, nia rasik la lori tua balu atu fó ba ulun-naʼin festa nian. Maibé nia haruka atan sira atu halo nuneʼe. (Versíkulu 8) Jesus mós la foti tua kopu ida no hiʼit saʼe ida-neʼe iha bainaka hotu nia oin no gaba an dehan: ‘Koko toʼok tua neʼebé haʼu foin halo!’

11. Ita bele aprende saida husi Jesus nia milagre?

¹¹ Saida mak ita bele aprende husi Jesus nia milagre neʼe? Ita aprende kona-ba hahalok haraik an. Jesus la gaba an kona-ba milagre neʼe. Tuir loloos, nia nunka gaba an kona-ba buat neʼebé nia halo. Duké halo nuneʼe, nia hatudu haraik an hodi fó glória hotu ba ninia Aman. (João 5:19, 30; 8:28) Se ita banati-tuir Jesus hodi kontinua haraik an, ita sei la gaba an kona-ba buat neʼebé ita kumpre. Maski ita halo buat oioin iha Jeová nia serbisu, ita lakohi gaba an, maibé ita gaba Maromak neʼebé ita serbí. (Jer 9:23, 24) Ita tenke fó glória hotu ba nia. Tuir loloos se Jeová la ajuda ita, ita labele kumpre buat diʼak oioin.​—1 Kor 1:26-31.

12. Saida mak dalan ida tan atu banati-tuir Jesus nia hahalok haraik an? Esplika toʼok.

¹² Iha dalan seluk atu bele banati-tuir Jesus nia hahalok haraik an. Hanoin toʼok situasaun ida-neʼe: Katuas kongregasaun ida uza tempu barak atu ajuda atan ba kongregasaun ida atu prepara ninia diskursu públiku primeiru. Rezultadu mak irmaun joven neʼe hatoʼo diskursu neʼebé kapás no kongregasaun gosta. Depois reuniaun, ema ida hakbesik ba katuas neʼe no dehan: ‘Irmaun joven neʼe hatoʼo diskursu kapás tebes.’ Saida mak katuas neʼe sei halo? Nia sei dehan: ‘Loos, maibé haʼu uza oras barak atu ajuda nia.’ Ka katuas neʼe ho haraik an dehan: ‘Loos, nia hatoʼo diskursu kapás. Haʼu orgullu tebes ho nia.’ Se ita haraik an, ita la buka atu hetan glória tanba buat diʼak neʼebé ita halo ba ema seluk. Ita kontente tanba hatene katak Jeová haree no hafolin buat neʼebé ita halo. (Kompara ho Mateus 6:2-4; Ebr 13:16) Ita halo Jeová kontente bainhira ita banati-tuir Jesus hodi hatudu hahalok haraik an.​—1 Ped 5:6.

13. Saida mak Jesus haree besik sidade Naim, no nia halo saida? (Lucas 7:11-15)

¹³ Lee Lucas 7:11-15. Hanoin toʼok situasaun neʼebé mosu durante Jesus haklaken iha rai. Nia halo viajen ba sidade Naim iha Galileia neʼebé ladún dook husi Sunem. Uluk Eliseu fó moris-hiʼas ba feto ida nia oan-mane iha sidade Sunem. (2 Reis 4:32-37) Bainhira Jesus hakbesik ba sidade Naim nia portaun, nia haree ema lori mate-isin atu bá hakoi. Situasaun neʼe triste tebes, tanba feto-faluk ida foin lakon ninia oan-mane mesak. Ema barak husi sidade neʼe akompaña feto-faluk neʼe. Jesus hapara sira no halo buat kmanek ida, Jesus fó moris-hiʼas ba feto neʼe nia oan-mane. Neʼe mak  milagre primeiru husi milagre tolu neʼebé Evanjellu sira fó sai kona-ba Jesus fó moris-hiʼas ba ema.

14. Informasaun importante saida mak fó sai iha Lucas kapítulu 7? (Haree mós dezeñu.)

¹⁴ Haree toʼok informasaun importante balu neʼebé fó sai iha Lucas kapítulu 7. Jesus “haree feto-faluk” neʼebé triste hela no tuirmai “nia hanoin tebes feto neʼe”. (Versíkulu 13) Karik Jesus haree oinsá feto neʼe tanis nuʼudar nia laʼo besik ninia oan-mane nia mate-isin no neʼe book tebes Jesus atu hatudu laran-sadiʼa ba feto neʼe. Jesus laʼós deʼit hanoin feto neʼe, maibé nia mós hatudu laran-sadiʼa ba feto neʼe. Jesus koʼalia ba feto neʼe ho lian neʼebé mamar hodi dehan: “Keta tanis.” Tuirmai Jesus halo buat ruma. Jesus fó moris-hiʼas ba feto neʼe nia oan-mane no entrega fali nia “ba ninia inan”.​—Versíkulu 14, 15.

15. Saida mak ita bele aprende husi Jesus nia milagre?

¹⁵ Ita aprende saida husi Jesus nia milagre neʼe? Ita aprende atu hatudu laran-sadiʼa ba ema neʼebé triste tanba família mate. Klaru katak ita labele fó moris-hiʼas ba ema hanesan Jesus. Maibé ita bele haree didiʼak ema nia situasaun atu nuneʼe ita bele hatudu laran-sadiʼa ba sira neʼebé triste tanba família mate. Ita bele iha inisiativu atu hatudu laran-sadiʼa liuhusi ita-nia liafuan no mós hakaʼas an atu ajuda no fó kmaan ba sira. d (Prov 17:17; 2 Kor 1:3, 4; 1 Ped 3:8) Maski ita halo buat neʼebé kiʼik deʼit ka hatoʼo liafuan neʼebé simples, neʼe bele halo ema sente kmaan.

16. Hanesan hatudu iha foto, saida mak Ita aprende husi esperiénsia kona-ba inan ida neʼebé ninia oan-feto foin mate?

¹⁶ Hanoin kona-ba esperiénsia ida. Tinan balu liubá, bainhira kanta knananuk ida durante reuniaun, irmán ida nota katak inan ida tanis. Knananuk neʼe  temi kona-ba esperansa moris-hiʼas, no inan neʼe nia oan-feto foin mate. Entaun irmán neʼe muda hodi hamriik besik inan neʼe, hakoʼak nia no kanta hamutuk. Inan neʼe dehan: “Haʼu sente domin boot husi irmaun-irmán sira.” Nia sente agradese tanba bele tuir reuniaun. Nia hatete: “Reuniaun-Fatin mak fatin neʼebé ita simu ajuda.” Ita bele fiar metin katak Jeová haree no hafolin buat simples neʼebé ita halo atu hatudu laran-sadiʼa ba ema sira neʼebé “laran-triste” tanba família mate.​—Sal 34:18.

17. Saida mak ita aprende ona iha lisaun neʼe?

¹⁷ Ita bele hetan anima bainhira estuda istória husi Evanjellu sira kona-ba Jesus nia milagre. Milagre sira-neʼe hanorin ita katak Jeová no Jesus hadomi tebes ita, Jesus iha kbiit atu hadiʼa ema nia problema, no ita bele fiar metin katak Maromak sei kumpre ninia promesa hotu liuhusi ninia Ukun. Kuandu ita estuda istória sira-neʼe, ita bele medita kona-ba dalan oioin atu banati-tuir Jesus nia hahalok. Entaun diʼak atu uza tempu hodi estuda mesak ka uza tempu iha ita-nia adorasaun família atu aprende liután kona-ba Jesus nia milagre sira seluk. Buka-hatene lisaun importante saida mak Ita bele aprende no tuirmai fahe neʼe ba ema seluk. Bainhira Ita halo nuneʼe, Ita sei iha informasaun diʼak barak atu anima maluk Kristaun sira.​—Rom 1:11, 12.

18. Iha lisaun tuirmai, ita sei aprende saida?

¹⁸ Bainhira Jesus besik atu remata ninia serbisu haklaken iha rai, nia halo milagre terseiru kona-ba moris-hiʼas neʼebé hakerek iha Bíblia. Maibé milagre neʼe diferente. Nia fó moris-hiʼas ba ninia belun neʼebé mate ona ba loron haat. Saida mak ita bele aprende husi istória iha Evanjellu sira kona-ba milagre neʼe? Oinsá ita bele hametin ita-nia fiar kona-ba moris-hiʼas? Lisaun tuirmai sei hatán ba pergunta sira-neʼe.