1. Ita fiar metin saida?

 ITA mak Jeová nia povu, tan neʼe ita hatene katak nia hadomi ita no hakarak ita atu iha moris neʼebé diʼak liu. (Rom 8:35-39) Ita mós fiar katak bainhira ita halo tuir Bíblia nia prinsípiu, neʼe sempre lori benefísiu. (Isa 48:17, 18) Maibé oinsá se problema ruma mosu derrepente?

2. Karik ita hasoru problema hanesan saida? Bainhira hasoru problema, karik neʼe book ita hanoin saida?

² Jeová nia atan hotu hasoru problema. Porezemplu, karik ita-nia família ruma hakanek ita-nia laran. Karik ita iha problema saúde neʼebé hanetik ita halo serbisu barak ba Jeová. Karik ita hasoru susar tanba dezastre naturais. Ka karik ema fó-terus ba ita tanba ita-nia fiar. Bainhira hasoru susar hanesan neʼe, karik ita hanoin: ‘Tanbasá neʼe akontese ba haʼu? Haʼu halo sala ruma ka? Jeová la kontente ho haʼu ka?’ Ita rasik sente ona hanesan neʼe ka lae? Se nuneʼe keta sai laran-kraik. Jeová nia atan barak neʼebé laran-metin mós sente hanesan neʼe.​—Sal 22:1, 2; Hab 1:2, 3.

3. Saida mak ita bele aprende husi Salmo 34:19?

³ Lee Salmo 34:19. Eskritura neʼe fó sai pontu importante rua: (1) Ema laran-loos hasoru susar. (2) Jeová salva ita husi ita-nia susar sira. Oinsá mak Jeová salva ita? Dalan ida mak liuhusi ajuda ita iha hanoin neʼebé loos kona-ba moris iha mundu aat neʼe. Maski Jeová promete katak ita sei hetan ksolok hodi serbí nia, maibé nia la promete katak ita-nia moris sei la iha problema. (Isa 66:14) Nia anima ita atu tau fokus ba futuru bainhira ita moris  ba nafatin hodi tuir ninia hakarak. (2 Kor 4:16-18) Antes tempu neʼe toʼo mai, nia ajuda ita atu kontinua serbí nia loroloron.​—Lam 3:22-24.

4. Iha lisaun neʼe, ita sei koʼalia kona-ba saida?

⁴ Mai ita koʼalia kona-ba buat neʼebé ita bele aprende husi Jeová nia atan sira iha tempu uluk no mós ohin loron. Hanesan ita sei aprende, problema oioin bele mosu derrepente. Maibé kuandu ita sadere ba Jeová, nia sempre apoia ita. (Sal 55:22) Bainhira ita koʼalia kona-ba ezemplu sira-neʼe, husu ba Ita-nia an: ‘Se haʼu hasoru situasaun neʼe, haʼu sei halo saida? Oinsá ezemplu sira-neʼe hametin haʼu-nia fiar ba Jeová? Lisaun saida mak haʼu rasik bele aplika?’

5. Jacob hasoru problema saida deʼit tanba Labão? (Haree dezeñu iha livru oin.)

⁵ Jeová nia atan sira iha tempu uluk hasoru problema neʼebé sira nunka espera. Hanoin toʼok kona-ba Jacob. Ninia aman haruka nia kaben ho Labão nia oan-feto ida neʼebé mós adora Jeová, no dehan katak Jeová sei haraik bensaun barak ba nia. (Gén 28:1-4) Entaun Jacob halo tuir ninia aman. Nia sai husi rai-Kanaan no halo viajen ba Labão nia uma. Labão iha oan-feto naʼin-rua naran Lea no Raquel. Jacob laran-monu ba Labão nia oan-feto segundu Raquel no nia prontu atu serbisu tinan hitu ba Labão antes kaben ho Raquel. (Gén 29:18) Maibé neʼe la akontese. Labão lohi Jacob atu nuneʼe Jacob kaben ho Lea. Labão fó lisensa ba Jacob atu kaben ho Raquel iha semana tuirmai, maibé Jacob tenke serbisu tan ba tinan hitu. (Gén 29:25-27) Labão mós la hatudu justisa ba Jacob bainhira sira serbisu hamutuk. Durante tinan 20, Labão trata Jacob la ho justisa.​—Gén 31:41, 42.

6. Jacob hasoru problema saida tan?

⁶ Jacob mós hasoru problema seluk tan. Nia iha família boot, maibé ninia oan-mane sira la iha relasaun diʼak. Sira faʼan sira-nia alin José nuʼudar atan. Jacob nia oan-mane naʼin-rua naran Simeão no Levi hafoʼer sira-nia família nia naran no mós Jeová nia naran. Ninia feen neʼebé nia hadomi naran Raquel mós mate bainhira tuur-ahi sira-nia oan segundu. No tanba rai-hamlaha boot, Jacob tenke muda ba rai-Ejitu kuandu idade loos ona.​—Gén 34:30; 35:16-19; 37:28; 45:9-11, 28.

7. Oinsá mak Jeová hatudu katak nia simu Jacob?

⁷ Maski Jacob hasoru problema barak, maibé nia nunka lakon fiar ba Jeová no Jeová nia promesa sira. No Jeová hatudu katak nia simu Jacob. Porezemplu, maski Labão trata Jacob la ho justisa, Jeová haraik bensaun ba Jacob hodi fó rikusoin barak ba nia. No Jacob agradese tebes ba Jeová bainhira hasoru fali José neʼebé nia hanoin katak mate ona. Jacob iha relasaun besik ho Jeová no neʼe ajuda nia tahan hasoru problema sira ho susesu. (Gén 30:43; 32:9, 10; 46:28-30) Bainhira ita kontinua iha relasaun diʼak ho Jeová, ita mós bele tahan hasoru problema sira neʼebé mosu derrepente.

8. Liurai David hakarak halo saida?

 ⁸ Liurai David labele halo buat hotu neʼebé nia hakarak atu serbí Jeová. Porezemplu, David hakarak tebes atu harii templu ida ba Jeová. Nia fó sai ida-neʼe ba profeta Natan. Natan hatete: “Halo tuir buat hotu neʼebé iha Ita-nia laran, tanba Maromak loos hamutuk ho Ita.” (1 Krón 17:1, 2) Ita bele fiar katak liafuan sira-neʼe halo David sente kontente tebes. Karik nia komesa halo kedas planu ba projetu boot neʼe.

9. David halo saida kuandu nia rona informasaun neʼebé halo nia triste?

⁹ Maibé lakleur profeta Natan bá hasoru fali David no fó sai informasaun neʼebé halo David triste. “Iha kalan neʼe duni”, Jeová dehan ba Natan katak laʼós David mak sei harii templu, maibé ninia oan-mane ida mak sei halo ida-neʼe. (1 Krón 17:3, 4, 11, 12) David halo saida kuandu nia rona ida-neʼe? Nia troka ninia planu. Nia tau fokus atu halibur osan no sasán neʼebé ninia oan-mane Salomão presiza atu halo projetu neʼe.​—1 Krón 29:1-5.

10. Jeová haraik bensaun saida ba David?

¹⁰ Lakleur depois Jeová dehan katak David sei la harii templu, Jeová halo aliansa ho David. Jeová promete ba David katak David nia bei-oan ida mak sei ukun ba nafatin. (2 Sam 7:16) Iha mundu foun, durante Kristu nia Ukun ba Tinan Rihun Ida, David sei kontente tebes bainhira hatene katak Liurai Jesus mai husi ninia liña jerasaun! Istória neʼe ajuda ita komprende katak maski ita labele halo buat hotu neʼebé ita hakarak atu serbí Jeová, maibé karik Jeová sei haraik bensaun seluk ba ita neʼebé ita nunka espera.

11. Ema Kristaun hetan bensaun saida maski Maromak nia Ukun la mai tuir tempu neʼebé sira espera? (Apóstolu 6:7)

¹¹ Ema Kristaun iha apóstolu sira-nia tempu hasoru problema neʼebé sira la espera. Porezemplu, sira hakarak tebes Maromak nia Ukun atu mai, maibé sira la hatene bainhira ida-neʼe sei akontese. (Após 1:6, 7) Entaun sira halo saida? Sira kontinua haklaken ho badinas. Bainhira sira haklaken iha fatin barak liután, sira haree oinsá Jeová haraik bensaun ba sira-nia hakaʼas an.​—Lee Apóstolu 6:7.

12. Ema Kristaun iha apóstolu sira-nia tempu halo saida bainhira mosu rai-hamlaha?

¹² Rai-hamlaha boot mosu “iha mundu tomak”. (Após 11:28) Rai-hamlaha neʼe mós afeta ema Kristaun iha apóstolu sira-nia tempu. Imajina toʼok susar neʼebé sira hasoru tanba hahán la iha. Ulun ba família hanoin barak kona-ba oinsá atu hetan hahán ba sira-nia família. Oinsá ho joven sira neʼebé iha planu atu aumenta sira-nia serbisu haklaken? Karik sira hanoin katak sira tenke hein toʼo susar neʼe liu mak bele kumpre sira-nia planu. Maski ema Kristaun ida-idak nia moris la hanesan, maibé sira halo mudansa tuir situasaun. Sira kontinua haklaken tuir sira-nia kbiit no sira kontente atu fahe buat neʼebé sira iha ho sira-nia irmaun-irmán sira iha Judeia.​—Após 11:29, 30.

13. Ema Kristaun simu bensaun saida durante rai-hamlaha?

¹³ Ema Kristaun simu bensaun saida durante rai-hamlaha? Sira neʼebé simu ajuda husi irmaun-irmán sira seluk, sente rasik Jeová nia ajuda. (Mt 6:31-33) Sira sente besik liu ba irmaun-irmán sira neʼebé ajuda sira. No irmaun-irmán sira neʼebé fó osan ka fó ajuda iha dalan seluk sente kontente tanba fó ba ema seluk. (Após 20:35) Jeová haraik bensaun ba sira hotu tanba sira halo mudansa tuir sira-nia situasaun.

14. Saida mak akontese ba Barnabé no Paulo? Neʼe lori rezultadu saida? (Apóstolu 14:21, 22)

¹⁴ Dala barak ema fó-terus ba ema Kristaun  iha apóstolu sira-nia tempu, no dala ruma neʼe akontese iha tempu neʼebé sira nunka espera. Hanoin toʼok buat neʼebé akontese ba Barnabé no apóstolu Paulo bainhira sira haklaken iha Listra. Foufoun ema simu no rona ba sira. Maibé depois neʼe, kontradór sira “soran ema-lubun” no ema balu neʼebé uluk rona, tuda Paulo no husik nia atu mate deʼit. (Após 14:19) Maibé Barnabé no Paulo kontinua haklaken iha fatin seluk. Neʼe lori rezultadu saida? Sira ‘ajuda ema barak atu sai dixípulu’ no sira-nia liafuan no hahalok hametin maluk fiar-naʼin sira. (Lee Apóstolu 14:21, 22.) Ema barak hetan benefísiu tanba Barnabé no Paulo la para atu haklaken maski ema fó-terus ba sira. Se ita la rende an atu halo Jeová nia serbisu, nia sei haraik bensaun ba ita.

15. Ita aprende saida husi irmaun Alexander?

¹⁵ Antes tinan 1914, Jeová nia povu hein ba buat balu atu akontese. Hanoin toʼok kona-ba irmaun Alexander H. Macmillan. Hanesan ho ema barak iha tempu neʼebá, irmaun Alexander hanoin katak lakleur tan nia sei simu ninia kolen atu bá lalehan. Iha fulan-Setembru tinan 1914, nia hatoʼo diskursu ida no hatete: “Karik neʼe mak diskursu ikus neʼebé haʼu sei hatoʼo.” Maibé neʼe laʼós ninia diskursu ikus. Depois neʼe, irmaun Alexander hakerek: “Karik ami balu ansi liu atu hanoin katak ami sei bá kedas lalehan.” Nia hatutan tan: “Buat neʼebé ami presiza halo iha tempu neʼebá mak kontinua halo Naʼi nia serbisu ho badinas.” Irmaun Alexander kontinua serbí Jeová no haklaken ho badinas. Nia iha priviléjiu atu anima irmaun barak neʼebé tama komarka tanba nafatin neutrál. No nia asiste reuniaun sira ho laran-metin maski nia idade boot ona. Irmaun Alexander hetan benefísiu saida tanba kontinua serbí Jeová ho badinas nuʼudar nia hein atu simu ninia kolen? Antes nia mate iha tinan 1966, nia hakerek: “Haʼu-nia fiar nunka sai fraku.” Neʼe mak ezemplu diʼak ba ita hotu atu banati-tuir, liuliu se ita tahan ona susar sira kleur liu fali buat neʼebé ita espera!​—Ebr 13:7.

16. Situasaun saida mak Herbert no ninia feen hasoru neʼebé sira nunka espera? (Tiago 4:14)

¹⁶ Jeová nia povu barak hasoru problema saúde neʼebé sira nunka espera. Porezemplu, irmaun Herbert Jennings b esplika katak nia no ninia feen halaʼo sira-nia knaar nuʼudar misionáriu iha rai-Gana ho kontente. Maibé, liutiha tempu balu doutór fó sai katak nia iha moras mentál neʼebé fó impaktu ba ninia hahalok. Irmaun Herbert esplika katak ninia situasaun foun mak hanesan duni ho Tiago 4:14 no nia dehan nia ‘la hatene ninia moris sei sai oinsá loos iha loron aban’. (Lee.) Nia hakerek: “Ami tenke simu realidade, ami tenke sai husi rai-Gana no husik ami-nia belun sira no fila fali ba rai-Kanadá atu haʼu bele hetan tratamentu médiku.” Jeová ajuda irmaun Herbert no ninia feen atu kontinua serbí Jeová ho laran-metin, maski sira hasoru susar neʼe.

17. Oinsá mak irmaun Herbert nia ezemplu ajuda ema seluk?

 ¹⁷ Irmaun Herbert koʼalia nakloke kona-ba ninia esperiénsia no neʼe ajuda tebes ema seluk. Irmán ida hakerek: “Esperiénsia neʼe book tebes haʼu-nia laran. . . . Bainhira haʼu lee katak irmaun Herbert tenke husik ninia knaar atu bele hetan tratamentu médiku, neʼe ajuda haʼu atu iha hanoin neʼebé loos kona-ba haʼu-nia situasaun.” Irmaun ida seluk hakerek: “Haʼu serbí nuʼudar katuas kongregasaun durante tinan 10 no tuirmai haʼu tenke para tanba haʼu iha moras mentál. Haʼu sente katak haʼu falla, tan neʼe dala barak susar tebes ba haʼu atu lee esperiénsia sira neʼebé fó sai iha ita-nia publikasaun sira. Irmaun Herbert nia kbiit atu tahan anima tebes haʼu.” Ida-neʼe fó-hanoin ita katak bainhira ita tahan susar, ita bele anima ema seluk. Maski ita hasoru susar neʼebé ita nunka espera, maibé ita nafatin bele hatudu ezemplu diʼak kona-ba fiar no kbiit atu tahan.​—1 Ped 5:9.

18. Hanesan hatudu iha foto, saida mak Ita aprende husi irmán faluk iha rai-Nijéria?

¹⁸ Dezastre sira hanesan COVID-19 afeta Jeová nia povu barak. Porezemplu, irmán faluk ida iha rai-Nijéria iha hahán no osan uitoan deʼit. Dadeer ida, ninia oan-feto husu kona-ba saida mak sira sei han depois teʼin tiha sira-nia foos ikus. Irmán neʼe hatete ba ninia oan-feto katak sira la iha ona osan ka hahán maibé sira tenke banati-tuir feto-faluk husi Sarepta. Sira presiza prepara sira-nia hahán ikus no tau fiar tomak ba Jeová. (1 Reis 17:8-16) Antes sira komesa hanoin kona-ba saida mak sira sei han iha meiudia, sira simu hahán husi maluk fiar-naʼin. No hahán neʼe toʼo ba semana rua liu. Irmán neʼe hatete katak nia foin rekoñese oinsá Jeová rona didiʼak ba buat neʼebé nia hatete ba ninia oan-feto. Loos duni, bainhira situasaun susar  mosu derrepente deʼit, se ita sadere ba Jeová, neʼe bele ajuda ita hakbesik liután ba nia.​—1 Ped 5:6, 7.

19. Irmaun Aleksey Yershov tahan terus saida?

¹⁹ Iha tinan hirak-neʼe nia laran, irmaun-irmán barak hasoru terus oioin neʼebé sira nunka espera. Hanoin toʼok kona-ba irmaun Aleksey Yershov iha rai-Rúsia. Bainhira nia hetan batizmu iha tinan 1994, Jeová nia povu iha liberdade. Maibé ikusmai situasaun iha rai-Rúsia troka. Iha tinan 2020, polísia tama no halo revista ba irmaun Aleksey nia uma, no sira hadau ninia sasán barak. Fulan balu liutiha, autoridade sira halo kazu hasoru nia. Aat liután tan mak kazu neʼe bazeia ba vídeo sira neʼebé ema ida foka. Ema neʼe finje hatudu interese no estuda Bíblia durante tinan ida liu. Neʼe mak hahalok aat loos.

20. Oinsá mak irmaun Aleksey hametin ninia relasaun diʼak ho Jeová?

²⁰ Bainhira irmaun Aleksey hetan terus, neʼe lori rezultadu diʼak ruma ka lae? Sin. Ninia relasaun diʼak ho Jeová sai metin liután. Nia hatete: “Agora haʼu no haʼu-nia feen halo orasaun hamutuk barak liu fali uluk. Haʼu rekoñese katak haʼu labele tahan situasaun neʼe se Jeová la ajuda haʼu.” Nia mós hatete: “Bainhira haʼu estuda mesak, neʼe ajuda haʼu luta hasoru sentimentu laran-kraik. Haʼu medita kona-ba Jeová nia atan sira iha tempu uluk neʼebé hatudu ezemplu diʼak. Iha istória barak iha Bíblia neʼebé hatudu katak importante tebes atu kalma nafatin no tau fiar ba Jeová.”

21. Saida mak ita aprende ona iha lisaun neʼe?

²¹ Saida mak ita aprende ona iha lisaun neʼe? Dala ruma ita hasoru problema neʼebé ita nunka espera. Maski nuneʼe, Jeová sempre ajuda ninia atan sira bainhira sira sadere ba nia. Eskritura tema ba lisaun neʼe hatete: “Ema laran-loos hetan susar barak, maibé Jeová salva nia husi susar sira-neʼe hotu.” (Sal 34:19) Mai ita hakaʼas an atu kontinua tau fokus ba Jeová nia kbiit atu ajuda ita tahan, laʼós susar neʼebé ita hasoru. Tuirmai hanesan apóstolu Paulo, ita bele hatete: “Iha situasaun hotu haʼu hetan forsa liuhusi nia neʼebé fó kbiit mai haʼu.”​—Flp 4:13.