1. Oinsá mak Jeová organiza ninia povu iha apóstolu sira-nia tempu?

 BAINHIRA Jeová fó knaar ruma ba ninia povu, nia hakarak sira atu halaʼo knaar neʼe iha dalan neʼebé organizadu. (1 Kor 14:33) Porezemplu, Maromak hakarak ninia povu atu haklaken liafuan diʼak iha mundu tomak. (Mt 24:14) Jeová fó knaar ba Jesus atu dirije serbisu neʼe. No Jesus tau matan didiʼak atu serbisu neʼe bele halaʼo iha dalan neʼebé organizadu. Iha apóstolu sira-nia tempu, bainhira kongregasaun sira harii iha fatin oioin, irmaun sira simu knaar nuʼudar katuas kongregasaun atu dirije no tau matan kongregasaun sira. (Após 14:23) Iha Jeruzalein, iha grupu administradór neʼebé inklui apóstolu no katuas balu neʼebé iha esperiénsia. Sira halo desizaun neʼebé irmaun-irmán sira iha kongregasaun hotu presiza halo tuir. (Após 15:2; 16:4) Tanba irmaun-irmán sira halo tuir matadalan neʼebé sira simu, “kongregasaun sira-nia fiar kontinua sai metin liután no . . . fiar-naʼin sira aumenta ba beibeik”.—Após 16:5.

2. Husi tinan 1919, oinsá mak Jeová dirije no fó ai-han espirituál ba ninia povu?

² Jeová mós kontinua organiza ninia povu ohin loron. Husi tinan 1919, Jesus uza irmaun grupu kiʼik ida neʼebé iha esperansa atu bá lalehan atu organiza serbisu haklaken no prepara ai-han espirituál ba ninia dixípulu sira. a (Lc 12:42) Klaru katak Jeová haraik bensaun ba serbisu neʼebé grupu neʼe halo.—Isa 60:22; 65:​13, 14.

3-4. (a) Fó toʼok ezemplu neʼebé hatudu katak ita hetan benefísiu tanba organizadu. (b) Iha lisaun neʼe, ita sei aprende saida?

 ³ Se ita-nia serbisu la organizadu, ita labele kumpre serbisu neʼebé Jesus haruka ita atu halo. (Mt 28:​19, 20) Porezemplu, se irmaun sira la organiza ita atu haklaken iha fatin hotu iha kongregasaun nia territóriu, karik ita sei haklaken iha fatin naran deʼit tuir ita-nia hakarak, no rezultadu mak ita haklaken beibeik iha área balu no iha área seluk karik ita nunka haklaken. Ita bele hanoin kona-ba benefísiu seluk tan neʼebé ita hetan tanba ita organizadu ka lae?

⁴ Bainhira Jesus iha rai, nia organiza ninia dixípulu sira. Nuneʼe mós ohin loron, nia kontinua organiza Maromak nia povu. Iha lisaun neʼe, ita sei aprende oinsá Jesus organiza ninia dixípulu sira no oinsá Jeová nia organizasaun halo tuir ninia ezemplu. Ita mós sei aprende oinsá ita bele hatudu katak ita tau fiar ba Jeová nia organizasaun.

JEOVÁ NIA ORGANIZASAUN HALO TUIR JESUS NIA EZEMPLU

5. Ita halo tuir Jesus nia ezemplu iha dalan oinsá? (João 8:28)

⁵ Jesus aprende husi ninia Aman iha lalehan kona-ba saida mak nia presiza halo no koʼalia. Jeová nia organizasaun halo tuir Jesus nia ezemplu hodi uza Maromak nia Liafuan atu hanorin ita kona-ba morál neʼebé loos no dirije ita. (Lee João 8:28; 2 Tim 3:​16, 17) Ita hetan beibeik anima atu lee no halo tuir Maromak nia Liafuan. Benefísiu saida mak ita hetan tanba halo tuir konsellu neʼe?

6. Saida mak dalan importante ida atu bele hetan benefísiu husi estuda Bíblia?

⁶ Ita bele hetan benefísiu barak kuandu ita estuda Bíblia hodi uza ita-nia publikasaun sira. Porezemplu, ita bele kompara Bíblia nia hanorin ho matadalan sira neʼebé ita simu husi Jeová nia organizasaun. Bainhira ita haree katak matadalan neʼebé ita simu bazeia ba Bíblia, neʼe hametin liután ita-nia fiar ba Jeová nia organizasaun.—Rom 12:2.

7. Jesus haklaken kona-ba saida, no oinsá Jeová nia organizasaun halo tuir ninia ezemplu?

⁷ Jesus haklaken “liafuan diʼak kona-ba Maromak nia Ukun”. (Lc 4:​43, 44) Jesus mós haruka ninia dixípulu sira atu haklaken kona-ba Ukun neʼe. (Lc 9:​1, 2; 10:​8, 9) Ohin loron, ema hotu neʼebé sai parte ba Jeová nia organizasaun mós haklaken kona-ba Maromak nia Ukun, maski sira hela iha fatin naran deʼit ka iha responsabilidade barak iha organizasaun.

8. Ita iha priviléjiu saida?

⁸ Ita iha priviléjiu boot atu fahe lia-loos kona-ba Maromak nia Ukun! Laʼós ema hotu mak iha priviléjiu neʼe. Porezemplu, kuandu Jesus iha rai, nia la husik anju aat sira atu fó sasin kona-ba nia. (Lc 4:41) Ohin loron, antes ema ida bele hola parte atu haklaken hamutuk ho Jeová nia povu, nia presiza kumpre kritéria. Ita bele hatudu katak ita hafolin ita-nia priviléjiu neʼe hodi haklaken iha situasaun no tempu naran deʼit. Hanesan Jesus, ita-nia objetivu mak atu kuda no rega fini lia-loos nian iha ema nia laran.—Mt 13:​3, 23; 1 Kor 3:6.

9. Oinsá mak Jeová nia organizasaun fó sai ninia naran?

⁹ Jesus fó sai Maromak nia naran. Iha orasaun ba ninia Aman iha lalehan, Jesus hatete: “Haʼu fó sai tiha ona Ita-nia naran.” (João 17:26) Jeová nia  organizasaun banati-tuir Jesus hodi halo buat oioin atu ajuda ema seluk hatene kona-ba Maromak nia naran. Dalan ida neʼebé Jeová nia organizasaun halo nuneʼe mak hodi tau fali Maromak nia naran iha fatin neʼebé loos iha Bíblia Sagrada Tradusaun Mundu Foun. Agora iha ona Bíblia neʼe kompletu ka parte balu deʼit neʼebé fó sai ona iha língua 270. Iha Apéndise A4 no A5, Ita bele hetan informasaun oioin kona-ba tanbasá no oinsá tradusaun neʼe tau fali Maromak nia naran. Apéndise A5 mós fó sai evidénsia barak neʼebé hatudu tanbasá Maromak nia naran tenke mosu iha Eskritura Lian Gregu hamutuk dala 237.

10. Saida mak Ita aprende husi feto ida iha rai-Myanmar nia liafuan?

¹⁰ Hanesan Jesus, ita hakarak ajuda ema barak atu hatene kona-ba Maromak nia naran. Bainhira feto ida neʼebé tinan 67 husi rai-Myanmar aprende katak Maromak iha naran, nia komesa tanis no hatete ba ema neʼebé estuda ho nia: “Neʼe mak dala primeiru iha haʼu-nia moris haʼu rona katak Maromak nia naran mak Jeová. . . . Ita hanorin haʼu buat neʼebé importante liu.” Hanesan esperiénsia neʼe hatudu, hodi aprende kona-ba Maromak nia naran bele fó impaktu boot ba ema neʼebé laran-loos.

KONTINUA HATUDU KATAK ITA TAU FIAR BA JEOVÁ NIA ORGANIZASAUN

11. Oinsá mak katuas sira bele hatudu katak sira tau fiar ba Jeová nia organizasaun? (Haree mós foto.)

¹¹ Oinsá mak katuas sira bele hatudu katak sira tau fiar ba Maromak nia organizasaun? Bainhira simu matadalan ruma, katuas sira presiza lee ho didiʼak ida-neʼe, no tuirmai hakaʼas an atu halo tuir ho didiʼak. Porezemplu, sira simu matadalan kona-ba oinsá atu hatoʼo parte sira iha reuniaun, oinsá atu halo orasaun iha kongregasaun, no mós oinsá atu tau matan ba Kristu nia bibi-malae sira. Bainhira katuas sira halo tuir matadalan husi organizasaun, neʼe ajuda irmaun-irmán sira atu sente seguru no domin.

12. (a) Tanbasá ita presiza halo tuir sira neʼebé dirije ita? (Ebreu 13:​7, 17) (b) Tanbasá ita presiza tau fokus ba katuas sira-nia hahalok diʼak?

¹² Bainhira ita simu matadalan husi katuas sira, ita presiza prontu atu halo tuir. Hodi halo nuneʼe, sei fasil ba sira atu halaʼo sira-nia knaar. Bíblia anima ita atu halo tuir no hakruʼuk ba sira neʼebé dirije ita. (Lee Ebreu 13:​7, 17.) Dala ruma neʼe susar. Tanbasá? Tanba mane sira-neʼe la perfeitu. Maibé se ita fokus ba sira-nia fraku duké sira-nia hahalok diʼak, neʼe hanesan ita ajuda ita-nia inimigu. Neʼe katak sá? Ita-nia inimigu hakarak halo ita la fiar katak neʼe mak Maromak nia organizasaun. Entaun se ita hanoin negativu kona-ba katuas sira, karik ita mós sei komesa hanoin negativu no lakon fiar ba organizasaun neʼe. Saida mak ita bele halo atu identifika no la simu lia-bosok husi ita-nia inimigu sira?

KETA LAKON ITA-NIA FIAR BA MAROMAK NIA ORGANIZASAUN

13. Oinsá Maromak nia inimigu sira koko halo ema hanoin katak ninia organizasaun mak la diʼak?

¹³ Ema neʼebé kontra Maromak koko atu halo ema hanoin katak buat neʼebé diʼak husi Maromak nia organizasaun mak laʼós buat neʼebé diʼak. Porezemplu, ita aprende husi Bíblia katak Jeová hakarak ninia atan sira atu moos nafatin iha dalan fíziku, morál, no espirituál. Nia hatete katak ema neʼebé kontinua halo hahalok  la moos no lakohi arrepende an tenke hasai husi kongregasaun. (1 Kor 5:​11-13; 6:​9, 10) Tuir loloos, ita halo tuir Bíblia nia mandamentu. Maibé ema neʼebé kontra lia-loos dehan katak ita tesi-lia ema, la hatudu domin no toleránsia tanba halo tuir mandamentu neʼe.

14. Sé mak hun ba istória falsu sira kona-ba Jeová nia organizasaun?

¹⁴ Rekoñese sé mak hun ba istória falsu sira-neʼe. Diabu Satanás mak habelar lia-bosok kona-ba Jeová nia organizasaun. Nia mak “lia-bosok nia aman”. (João 8:44; Gén 3:​1-5) Tan neʼe ita la hakfodak katak Satanás uza ema balu atu habelar istória falsu kona-ba Jeová nia organizasaun. Ida-neʼe mós akontese iha Jesus no apóstolu sira-nia tempu.

15. Saida mak ulun-naʼin relijiaun halo ba Jesus no ninia dixípulu sira?

¹⁵ Maski Jesus mak Maromak nia Oan-Mane neʼebé perfeitu no halo milagre barak, maibé Satanás uza ema balu atu habelar lia-bosok oioin kona-ba Jesus. Porezemplu, ulun-naʼin relijiaun hatete ba povu katak Jesus hetan kbiit husi “anju aat sira-nia ukun-naʼin” atu duni sai anju aat sira. (Mc 3:22) Bainhira Jesus hetan tesi-lia iha tribunál, ulun-naʼin relijiaun sira duun katak Jesus koʼalia aat Maromak no sira book povu atu husu hodi Jesus hetan kastigu-mate. (Mt 27:20) Tuirmai, bainhira Kristu nia dixípulu sira haklaken liafuan diʼak, kontradór sira “book ema husi nasaun seluk hodi hanoin aat no kontra” dixípulu sira-neʼe. (Após 14:​2, 19) Menara Pengawal 1 Dezembru 1998 esplika kona-ba Apóstolu 14:2: “Ema Judeu neʼebé sai nuʼudar kontradór laʼós deʼit la simu mensajen kona-ba liafuan diʼak, maibé sira mós halo buat aat oioin hodi book ema husi nasaun  seluk atu la simu liafuan diʼak no mós kontra ema Kristaun.”

16. Ita presiza hanoin-hetan saida bainhira rona istória falsu sira?

¹⁶ Satanás kontinua fó sai lia-bosok toʼo ohin loron. Nia nafatin “lohi ema iha mundu tomak”. (Apok 12:9) Se Ita rona istória negativu kona-ba Jeová nia organizasaun ka irmaun sira neʼebé dirije ita, hanoin-hetan oinsá Maromak nia inimigu sira trata aat Jesus no ninia dixípulu sira iha tempu uluk. Jesus fó-hatene nanis katak ema sei kontra no bosok kona-ba Jeová nia povu, no neʼe akontese duni ohin loron. (Mt 5:​11, 12) Maibé, ita sei la fiar istória falsu sira se ita rekoñese hun ba istória sira-neʼe no halo kedas buat ruma atu proteje an. Oinsá mak ita bele proteje an?

17. Oinsá mak ita bele proteje an husi istória falsu sira? (2 Timóteo 1:13) (Haree mós kaixa “ Ita presiza halo saida se ita rona istória falsu ruma?”)

¹⁷ Labele simu istória falsu sira. Apóstolu Paulo fó matadalan neʼebé klaru kona-ba saida mak ita presiza halo se ita rona istória falsu ruma. Nia hatete ba Timóteo atu “fó konsellu makaʼas ba ema balu atu labele . . . see tilun ba istória falsu” no “labele simu istória falsu neʼebé la hatudu respeitu ba Maromak”. (1 Tim 1:​3, 4; 4:7) Hanoin toʼok, dala ruma bebé ida bele hatama buat foʼer ba ninia ibun, maibé ema boot sei nunka halo ida-neʼe tanba hatene katak neʼe bele halo nia moras. Ita la simu istória falsu sira tanba ita rekoñese sé mak hun ba lia-bosok neʼe. Ita kaer metin deʼit ba “liafuan neʼebé loos” kona-ba lia-loos.—Lee 2 Timóteo 1:13.

18. Oinsá mak ita bele hatudu katak ita tau fiar ba Jeová nia organizasaun?

¹⁸ Iha lisaun neʼe, ita foin aprende dalan tolu deʼit neʼebé Maromak nia organizasaun banati-tuir Jesus. Bainhira Ita estuda Bíblia, Ita bele buka-hatene dalan seluk tan. Ita mós bele ajuda ema seluk iha kongregasaun atu hametin sira-nia fiar ba Jeová nia organizasaun. No kontinua hatudu katak Ita tau fiar ba Jeová nia organizasaun hodi serbí Jeová ho laran-metin no hakbesik nafatin ba ninia organizasaun neʼebé nia uza atu kumpre ninia hakarak. (Sal 37:28) Mai ita kontinua hafolin ita-nia priviléjiu atu sai parte ba Jeová nia povu neʼebé hatudu domin no laran-metin.