1. Saida mak paraízu espirituál, no ita presiza deside metin atu halo saida?

 OHIN loron, iha paraízu simbóliku ida neʼebé nakonu ho ema neʼebé okupadu atu halo atividade diʼak oioin. Ema neʼebé tama paraízu neʼe sente dame neʼebé loos, no sira deside metin atu nunka sai husi paraízu neʼe. Sira mós hakarak ajuda ema barak atu tama ba paraízu neʼe. Saida mak paraízu neʼe? Neʼe mak paraízu espirituál! a

2. Saida mak kmanek kona-ba paraízu espirituál?

² Iha dalan neʼebé kmanek, Jeová kria fatin simbóliku ida neʼebé ninia povu bele sente dame no iha unidade, maski moris iha Satanás nia mundu neʼebé perigu no nakonu ho ema aat. (1 João 5:19; Apok 12:12) Ita-nia Maromak neʼebé domin haree oinsá mundu neʼe lori susar ba ema, tan neʼe nia prepara fatin ba ita atu ita bele sente seguru no serbí nia ho kontente. Bíblia hatete katak paraízu espirituál mak hanesan “fatin seguru” no mós “jardín neʼebé rega ho bee barak”. (Isa 4:6; 58:11) Ho Jeová nia bensaun, ema neʼebé hela iha paraízu neʼe bele sente kontente no seguru maski moris iha loron ikus sira neʼebé susar.—Isa 54:14; 2 Tim 3:1.

3. Oinsá mak Isaias kapítulu 65 sai loos iha tempu antigu?

³ Liuhusi profeta Isaias, Jeová esplika kona-ba ema nia moris sei sai oinsá bainhira moris iha paraízu espirituál. Ita bele hetan esplikasaun neʼe iha Isaias kapítulu 65 neʼebé  uluk sai loos iha tinan 537 AEC. Iha tempu neʼebá, ema Judeu neʼebé arrepende an sai livre husi Babilónia no fila fali ba sira-nia rai. Jeová haraik bensaun ba ninia povu no ajuda sira halo sidade Jeruzalein neʼebé rahun sai furak fali. Nia mós ajuda sira halaʼo fali adorasaun neʼebé loos iha templu.—Isa 51:11; Zac 8:3.

4. Oinsá mak Isaias kapítulu 65 sai loos iha tempu modernu?

⁴ Isaias nia profesia komesa sai loos ba dala segundu hahú iha tinan 1919 bainhira Jeová nia atan sira sai livre husi Babilónia Boot. Tuirmai, paraízu espirituál komesa habelar ba mundu tomak. Haklaken-naʼin sira neʼebé laran-manas harii kongregasaun barak no hatudu hahalok Kristaun. Ema neʼebé uluk halo violénsia no hatudu hahalok la morál, ikusmai tau “hahalok foun neʼebé Maromak kria tuir ninia hakarak”. (Éf 4:24) Klaru katak bensaun barak tan neʼebé Isaias temi sei sai loos iha futuru iha mundu foun. Maski nuneʼe, ita hetan bensaun barak agora tanba ita sai parte ba paraízu espirituál. Mai ita haree oinsá paraízu espirituál kona ita no tanbasá ita lakohi husik ida-neʼe.

EMA IHA PARAÍZU ESPIRITUÁL SENTE OINSÁ?

5. Hanesan promete iha Isaias 65:​13, ita-nia situasaun iha paraízu espirituál mak oinsá?

⁵ Iha ai-han espirituál barak no sente kmaan. Isaias nia profesia hatudu katak iha diferensa boot entre ema nia situasaun kuandu tama ba paraízu espirituál no la tama ba paraízu espirituál. (Lee Isaias 65:13.) Jeová hatudu laran-luak hodi tau matan ba ninia atan sira-nia presiza espirituál. Ita iha ninia Liafuan, simu ninia espíritu santu, no ai-han espirituál barak atu bele “han, . . . hemu, . . . [no] haksolok”. (Kompara ho Apokalipse 22:17.) Maibé ema neʼebé la tama ba paraízu espirituál, sira-nia situasaun mak “hamlaha . . . , hamrook . . . , [no] moe”. Sira la iha relasaun diʼak ho Maromak.—Amós 8:11.

6. Joel 2:​21-24 temi saida kona-ba ai-han espirituál neʼebé Jeová fó mai ita, no neʼe lori benefísiu saida?

⁶ Iha Joel nia profesia, nia temi kona-ba presiza loroloron nian hanesan trigu, tua-uvas, no mina-oliveira atu hatudu katak Jeová fó ho laran-luak buat neʼebé Ninia povu presiza, inklui ai-han espirituál. (Joel 2:​21-24) Porezemplu, nia fó ba ita Bíblia, publikasaun sira, ita-nia website, no mós reuniaun, asembleia, no reuniaun boot sira. Ita bele hetan benefísiu husi ai-han espirituál neʼe loroloron, no rezultadu mak ita sente bosu iha dalan espirituál no sente kmaan.

7. Saida mak halo ita “laran-kontente”? (Isaias 65:14)

⁷ Haksolok no kontente ho buat neʼebé ita iha. Maromak nia povu bele “haklalak ho haksolok” tanba sira-nia laran nakonu ho sentimentu agradese. (Lee Isaias 65:14.) Lia-loos neʼebé hametin ita-nia fiar, promesa sira iha Bíblia, no mós esperansa ba futuru neʼebé bazeia ba Kristu nia sakrifísiu halo ita sente “laran-kontente”. Bainhira ita koʼalia ho irmaun-irmán sira kona-ba buat sira-neʼe, neʼe halo ita sente kontente!—Sal 34:8; 133:​1-3.

8. Saida mak parte importante ba paraízu espirituál?

⁸ Domin no unidade entre Jeová nia  povu mak parte importante ba paraízu espirituál. (Kol 3:14) Neʼe ajuda ita komprende ita-nia moris iha mundu foun sei sai oinsá. Iha tempu neʼebá, Jeová nia atan sira sei sente domin no unidade iha dalan neʼebé boot liután. Irmán ida konta buat neʼebé nia nota kona-ba Jeová nia povu kuandu nia hasoru sira ba dala primeiru, nia hatete: “Haʼu la hatene oinsá atu sente kontente, no haʼu-nia moris família mós la kontente. Primeiravés haʼu haree ema hatudu domin neʼebé loos ba malu mak kuandu haʼu hasoru Testemuña ba Jeová.” Se ema ida hakarak sente haksolok no kontente ho buat neʼebé sira iha, sira presiza tama ba paraízu espirituál. Maski ema iha mundu iha hanoin oioin kona-ba Jeová nia atan sira, maibé sira iha naran neʼebé diʼak ho Jeová no ninia atan hotu.—Isa 65:15.

9. Saida mak Isaias 65:​16, 17 promete kona-ba ita-nia problema sira?

⁹ Hakmatek no kalma. Isaias 65:14 hatete katak sira neʼebé hili atu la tama ba paraízu espirituál sei “tanis makaʼas tanba laran-moras [no] halerik tanba laran-kanek”. Maibé oinsá ho buat hotu neʼebé hamosu moras no susar ba Maromak nia povu? Ikusmai, ita sei haluha tiha buat sira-neʼe no buat sira-neʼe hotu sei subar tiha husi Maromak nia oin. (Lee Isaias 65:​16, 17.) Jeová sei halakon ita-nia problema hotu, no ikusmai ita mós sei la hanoin-hetan tan problema sira-neʼe.

10. Tanbasá Ita sente katak sai parte ba Maromak nia organizasaun mak bensaun boot ida? (Haree mós foto.)

¹⁰ Ohin loron ita sente laran-hakmatek kuandu ita asiste reuniaun sira, ita sente kalma no la fokus ba buat neʼebé halo ita estrese iha mundu aat neʼe. Ita mós bele ajuda irmaun-irmán sira atu sente hakmatek kuandu ita hatudu domin, ksolok, dame, laran-diʼak, no laran-maus, neʼe mak hahalok sira neʼebé mai husi espíritu santu. (Gal 5:​22, 23) Sai parte ba Maromak nia organizasaun mak bensaun boot ida! Ema neʼebé nafatin sai parte ba paraízu espirituál sei haree Maromak nia promesa kona-ba “lalehan foun no rai foun” sai loos.

11. Tuir Isaias 65:​18, 19, ita bele sente oinsá kona-ba paraízu espirituál?

¹¹ Agradese no laran-manas. Isaias mós fó sai tanbasá ita bele “haksolok no kontente” iha paraízu espirituál. Jeová  mak kria paraízu espirituál. (Lee Isaias 65:​18, 19.) Tan neʼe, ita la hakfodak katak Jeová uza ita atu ajuda ema seluk sai parte ba paraízu espirituál no husik tiha mundu nia organizasaun sira neʼebé la hanorin lia-loos! Ita sente kontente tebes kona-ba bensaun neʼebé ita sei simu tanba hatene lia-loos, no ita laran-manas fahe ida-neʼe ba ema seluk.—Jer 31:12.

12. Ita sente oinsá kona-ba promesa iha Isaias 65:​20-24, no tanbasá?

¹² Ita mós sente agradese no laran-manas kona-ba esperansa neʼebé ita iha tanba tama ba paraízu espirituál. Hanoin toʼok kona-ba buat hotu neʼebé ita sei haree no halo iha mundu foun! Bíblia promete: “Sei la iha tan bebé neʼebé moris ba loron balu deʼit, no la iha tan katuas neʼebé la kumpre ninia tinan sira.” Ita sei “harii uma no hela iha laran, [no] kuda uvas iha toʼos no han ninia fuan”. Ita-nia “serbisu makaʼas sei la sai saugati deʼit” tanba “Jeová fó ona bensaun”. Nia promete ba ita moris neʼebé seguru, kontente, no iha objetivu. Nia hatene ema ida-idak nia presiza “antes sira bolu” nia, no nia sei “halo kontente kriatura hotu neʼebé moris hodi fó buat neʼebé sira hakarak”.—Isa 65:​20-24; Sal 145:16.

13. Tuir Isaias 65:​25, ema neʼebé komesa serbí Jeová halo mudansa saida deʼit?

¹³ Dame no seguru. Ho Maromak nia espíritu santu nia ajuda, ema barak neʼebé uluk hanesan animál siʼak no halo violénsia, siʼak-teen no la onestu, ikusmai halo mudansa boot iha sira-nia moris. (Lee Isaias 65:25.) Sira hakaʼas an atu halakon sira-nia hahalok la diʼak. (Rom 12:2; Éf 4:​22-24) Klaru katak Maromak nia povu nafatin la perfeitu, tan neʼe sira kontinua halo sala. Maski nuneʼe, Jeová halibur hamutuk “ema oioin” neʼebé hadomi nia no hadomi malu, no rezultadu mak sira iha dame no unidade neʼebé loos. (Tito 2:11) Maromak neʼebé Kbiit Boot Liu Hotu deʼit mak bele halo milagre neʼe!

14. Oinsá mak Isaias 65:25 sai loos iha irmaun ida nia situasaun?

¹⁴ Ema bele troka duni sira-nia hahalok ka lae? Hanoin toʼok kona-ba esperiénsia tuirmai. Mane joven ida tama-sai komarka dala barak antes nia tinan 20, no nia halo hahalok la morál no violénsia barak. Nia tama komarka tanba naʼok karreta, naʼok sasán, no halo krime sériu seluk tan. Nia gosta baku malu. Bainhira nia rona lia-loos husi Bíblia no komesa tuir reuniaun husi Testemuña ba Jeová, nia foin rekoñese katak ninia objetivu ba moris mak atu adora Jeová iha paraízu espirituál. Depois hetan tiha batizmu, nia hanoin beibeik kona-ba oinsá Isaias 65:25 sai loos iha ninia moris. Uluk nia mak hanesan leaun neʼebé siʼak tanba halo violénsia, maibé agora nia sai fali hanesan bibi-malae tanba buka dame.

15. Tanbasá ita hakarak konvida ema seluk atu tama ba paraízu espirituál, no oinsá mak ita bele halo ida-neʼe?

¹⁵ Isaias 65:13 hahú ho liafuan: “Jeová, Naʼi Ukun-Naʼin Boot Liu, dehan nuneʼe.” Versíkulu 25 remata ho liafuan: “Jeová mak dehan.” Jeová nia liafuan sempre sai loos. (Isa 55:​10, 11) Paraízu espirituál eziste tiha ona. Jeová kria ona família úniku ida neʼebé adora nia. Iha ninia povu nia leet, ita bele sente dame no seguru iha mundu neʼebé nakonu ho violénsia. (Sal 72:7) Tan neʼe, ita hakarak ajuda ema barak atu sai parte ba Jeová  nia família. Ita bele halo nuneʼe hodi fokus atu ajuda ema sai Kristu nia dixípulu.—Mt 28:​19, 20.

OINSÁ ATU DADA EMA SELUK BA PARAÍZU ESPIRITUÁL?

16. Oinsá mak ita bele ajuda dada ema seluk tama ba paraízu espirituál?

¹⁶ Ita ida-idak bele ajuda atu dada ema seluk tama ba paraízu espirituál. Atu bele halo nuneʼe, ita presiza banati-tuir Jeová. Nia la obriga ema atu tama ba ninia organizasaun. Duké halo nuneʼe, ho laran-diʼak nia “dada” ema atu hakbesik ba nia. (João 6:44; Jer 31:3) Ema laran-loos neʼebé aprende kona-ba Jeová nia domin no hahalok diʼak oioin hakarak hakbesik ba nia. Oinsá mak ita bele dada ema seluk liuhusi ita-nia hahalok diʼak?

17. Oinsá mak ita bele dada ema seluk ba paraízu espirituál?

¹⁷ Dalan ida ita bele dada ema seluk ba paraízu espirituál mak hodi hatudu domin no laran-diʼak ba maluk fiar-naʼin. Bainhira ema foin tuir ita-nia reuniaun sira, ita hakarak sira foti konkluzaun neʼebé hanesan ho ema iha Korinto antigu neʼebé laʼós fiar-naʼin. Sira hatete: “Maromak iha duni imi-nia leet.” (1 Kor 14:​24, 25; Zac 8:23) Tan neʼe, mai ita kontinua halo tuir konsellu atu “moris ho dame”.—1 Tes 5:13.

18. Saida mak bele dada ema ba Jeová nia organizasaun?

¹⁸ Ita presiza hakaʼas an atu haree irmaun-irmán sira tuir dalan neʼebé Jeová haree sira. Ita bele halo nuneʼe hodi fokus ba sira-nia hahalok diʼak, laʼós sira-nia fraku. Iha futuru sira-nia fraku sei la iha tan. Ita bele rezolve problema sira ho domin se ita sempre “hatudu laran-diʼak ba malu, hanoin malu, [no] perdua malu  ho laran”. (Éf 4:32) Hodi halo nuneʼe, ema seluk neʼebé hakarak sente domin hanesan neʼe sei hakarak tama ba paraízu espirituál. b

KETA SAI HUSI PARAÍZU ESPIRITUÁL

19. (a) Tuir kaixa “ Sira sai no fila fali”, ema balu hatete saida kuandu sira fila fali ba paraízu espirituál? (b) Ita hakarak hakaʼas an atu halo saida? (Haree mós dezeñu.)

¹⁹ Ita agradese tebes tanba bele sai parte ba paraízu espirituál! Paraízu espirituál sai furak ba beibeik no agora iha ema barak liután neʼebé serbí Jeová. Ita hakarak kontinua hafolin paraízu espirituál neʼebé Jeová kria ba ita. Ema neʼebé hakarak atu sente kmaan, kontente, hakmatek, no kalma presiza tama ba paraízu espirituál no nunka sai fali! Maibé ita presiza kuidadu tebes tanba Satanás halo buat oioin hodi koko lohi ita atu sai husi paraízu espirituál. (1 Ped 5:8; Apok 12:9) Ita lakohi nia atu susesu. Mai ita hakaʼas an atu proteje dame no unidade iha paraízu espirituál.