Hakarak hatene?
Tanbasá mak ema husi nasaun seluk sai parte ba Liurai David nia tropa?
IHA David nia tropa sira, iha ema neʼebé mai husi nasaun seluk, ema sira-neʼe inklui ema Amon naran Zelek, ema Hetes naran Urias, no ema Moab naran Itma. a (1 Krón 11:39, 41, 46) David nia tropa mós inklui “ema Kereti, ema Peleti, no ema Gat”. (2 Sam 15:18) Karik ema Kereti no ema Peleti iha relasaun família ho ema Filístia. (Eze 25:16) Ema Gat mai husi ema Filístia nia sidade naran Gat.—Jos 13:2, 3; 1 Sam 6:17, 18.
Tanbasá David hili ema husi nasaun seluk atu sai parte ba ninia tropa? Nia fiar metin katak sira laran-metin ba nia, no importante liu laran-metin ba Jeová. Porezemplu, kona-ba ema Kereti no ema Peleti, livru The New Interpreter’s Dictionary of the Bible hatete: “Sira laran-metin nafatin ba David iha tempu neʼebé susar liu durante ninia ukun.” Oinsá mak sira hatudu laran-metin? Bainhira “ema Izraél hotu” husik tiha Liurai David no tuir fali “ema ida neʼebé bukaliadór naran Seba”, ema Peleti nafatin laran-metin ba David no ajuda atu hapara kontradór sira-neʼe. (2 Sam 20:1, 2, 7) Iha tempu seluk, Liurai David nia oan-mane naran Adonias koko atu sai liurai duké Salomão. Dala ida tan, ema Kereti no ema Peleti laran-metin nafatin ba David no ajuda Salomão atu sai liurai tuirmai tanba Jeová mak hili Salomão atu sai liurai.—1 Reis 1:24-27, 38, 39.
Ema estranjeiru seluk tan neʼebé laran-metin tebes ba David mak ema Gat naran Itai. Itai no ninia asuwaʼin naʼin-600 apoia David bainhira David nia oan-mane Absalão kontra David no mós book ema Izraél atu kontra liurai. Foufoun David hatete ba Itai katak Itai mak ema estranjeiru, tan neʼe nia la presiza hola parte iha funu neʼe. Maibé Itai hatete: “Haʼu jura hodi Jeová, Maromak neʼebé moris, no hodi haʼu-nia naʼi liurai nia moris, katak iha fatin naran deʼit neʼebé haʼu-nia naʼi liurai bá, maski ba mate ka moris, Ita-nia atan mós sei bá!”—2 Sam 15:6, 18-21.
Itai laran-metin ba David, liurai neʼebé Jeová hili
Maski ema Kereti, ema Peleti, no ema Gat mak ema estranjeiru, maibé sira rekoñese katak Jeová mak Maromak loos mesak deʼit no David mak liurai neʼebé Jeová hili. Ita bele fiar katak David agradese tebes tanba ema laran-metin sira-neʼe apoia nia!
a Maromak nia ukun-fuan iha Deuteronómio 23:3-6 bandu ema Amon no ema Moab atu tama ba ema Izraél nia leet. Neʼe katak sira labele sai sidadaun legál ba Izraél no la iha direitu neʼebé hanesan ho ema Izraél. Maski nuneʼe, sira bele ransu no moris hamutuk ho ema Izraél se sira simu adorasaun neʼebé loos. Haree subtópiku “Kawin Campur dengan Orang Israel”, tópiku “Ammon, orang” iha livru Pemahaman Alkitab, Volume 1, pájina 108.
