1. Saida deʼit mak irmaun-irmán sira halo atu serbí Jeová liután?

NUʼUDAR mundu nia rohan besik ba daudaun, ita iha serbisu barak liután atu halo. (Mt 24:14; Lc 10:2; 1 Ped 5:2) Ita hotu hakarak serbí Jeová ho kbiit tomak. Irmaun-irmán barak aumenta sira-nia serbisu haklaken. Sira balu hakarak atu serbí nuʼudar pioneiru. Sira balu tan hakarak atu serbí iha Betel ka ajuda iha serbisu konstrusaun. No irmaun barak hakaʼas an atu kumpre kritéria hodi serbí nuʼudar atan ba kongregasaun no katuas kongregasaun. (1 Tim 3:1, 8) Jeová sente kontente tebes bainhira haree ninia povu hakaʼas an serbí nia ho hakarak rasik.—Sal 110:3; Isa 6:8.

2. Karik ita sente oinsá se ita labele kumpre planu espirituál ruma?

² Se ita hein ba tempu kleur, maibé ita seidauk kumpre ita-nia planu espirituál, neʼe bele halo ita sente laran-kraik. Ka karik ita sente laran-kraik bainhira ita labele halo knaar ruma tanba ita-nia idade aumenta ka tanba situasaun seluk. (Prov 13:12) Irmán Melissa * hasoru situasaun hanesan neʼe. Nia hakarak atu serbí iha Betel ka tuir Eskola ba Haklaken-Naʼin Tempu-Tomak, maibé nia hatete: “Tanba haʼu-nia idade, haʼu la kumpre kritéria atu hetan priviléjiu sira-neʼe. Haʼu sente katak priviléjiu sira-neʼe mak mehi deʼit. Dala ruma haʼu sente laran-kraik.”

3. Ema balu presiza halo saida atu kumpre kritéria hodi bele simu priviléjiu ruma?

³ Irmaun-irmán balu mak joven no iha saúde diʼak, maibé sira presiza sai maduru no haburas hahalok diʼak oioin antes sira simu priviléjiu ruma. Karik sira balu mak matenek, la demora atu halo desizaun no laran-manas, maibé karik sira presiza aprende atu hatudu pasiénsia liután,  halo serbisu ho didiʼak, ka hatudu respeitu ba ema seluk. Se Ita hakaʼas an atu haburas hahalok oioin neʼebé Ita presiza, karik irmaun sira sei fó responsabilidade ruma iha tempu neʼebé Ita la espera. Hanoin toʼok irmaun Nick nia esperiénsia. Bainhira nia tinan 20, nia sai laran-kraik tebes tanba la hetan knaar nuʼudar atan ba kongregasaun. Nia hatete: “Haʼu sente buat ruma la loos ho haʼu.” Maibé nia la rende an. Nia halo buat neʼebé nia bele halo iha kongregasaun no serbisu haklaken. Agora nia serbí nuʼudar membru ba Komisaun ba Sukursál.

4. Iha lisaun neʼe, ita sei aprende kona-ba saida?

⁴ Ita sente laran-kraik tanba seidauk kumpre Ita-nia planu ruma ka lae? Se nuneʼe, fó sai ida-neʼe ba Jeová. (Sal 37:5-7) Ita mós bele husu sujestaun husi irmaun sira neʼebé maduru kona-ba oinsá atu serbí Jeová ho diʼak liután, no tuirmai hakaʼas an atu aplika ida-neʼe. Se Ita halo nuneʼe, karik Ita bele kumpre Ita-nia planu. Maibé hanesan irmán Melissa neʼebé temi ona ohin, karik Ita labele halo buat neʼebé Ita hakarak halo. Se nuneʼe, saida mak Ita bele halo atu haksolok nafatin? Atu hatán ba pergunta neʼe, ita sei koʼalia kona-ba (1) saida mak bele halo Ita haksolok, (2) oinsá Ita bele aumenta Ita-nia ksolok, no (3) Ita bele halo planu saida atu aumenta Ita-nia ksolok.

5. Atu bele hetan ksolok, ita tenke tau fokus ba saida? (Eclesiastes 6:9)

⁵ Eclesiastes 6:9 esplika kona-ba buat neʼebé bele ajuda ita atu sente haksolok. (Lee.) Ema neʼebé ‘haksolok ho buat neʼebé matan bele haree’ mak kontente ho buat neʼebé nia iha ona. Porezemplu, nia kontente ho ninia situasaun agora. Maibé ema neʼebé buka tuir ninia hakarak kontinua hein namanas ba buat neʼebé nia nunka bele hetan no la sente kontente. Saida mak ita aprende? Atu bele hetan ksolok, ita presiza tau fokus ba buat neʼebé ita iha ona no halo planu neʼebé ita bele kumpre tuir ita-nia kbiit.

6. Ita sei koʼalia kona-ba ai-knanoik saida, no ita sei aprende saida?

⁶ Ita bele duni sente kontente ho buat neʼebé Ita iha ona ka lae? Ema barak hanoin katak labele tanba ita ema gosta atu aprende buat foun oioin. Maibé, tuir loloos, ita bele duni haksolok ho buat neʼebé ita iha ona. Oinsá? Mai ita koʼalia kona-ba Jesus nia ai-knanoik kona-ba osan talentu neʼebé hakerek iha Mateus 25:14-30. Ita sei aprende kona-ba oinsá atu sente haksolok no aumenta ita-nia ksolok iha ita-nia situasaun agora.

7. Konta toʼok Jesus nia ai-knanoik kona-ba osan talentu.

⁷ Iha Jesus nia ai-knanoik, iha mane ida neʼebé atu halo viajen. Antes nia bá, nia bolu ninia atan naʼin-tolu no fó sira ida-idak osan talentu * atu halo negósiu. Nia hatene katak ninia atan ida-idak iha abilidade neʼebé la hanesan. Tan neʼe, nia fó osan talentu lima ba atan primeiru, fó osan talentu rua ba atan segundu no fó osan talentu ida ba atan terseiru. Atan primeiru no atan segundu serbisu makaʼas atu aumenta sira-nia naʼi nia osan. Maibé atan terseiru la uza osan neʼe atu halo negósiu. Tan neʼe, ninia naʼi hasai nia husi serbisu.

8. Tanbasá atan primeiru bele sente kontente?

 ⁸ Karik atan primeiru sente kontente tanba ninia naʼi fó nia osan talentu lima. Neʼe mak osan neʼebé barak tebes no hatudu katak ninia naʼi konfia nia. Maibé oinsá ho atan neʼebé hetan talentu rua? Karik nia bele sente laran-kraik tanba la simu osan talentu barak hanesan atan primeiru. Maibé saida mak nia halo?

9. Jesus la hatete saida kona-ba atan segundu? (Mateus 25:22, 23)

⁹ Lee Mateus 25:22, 23. Jesus la dehan katak atan segundu sente triste no hirus tanba simu deʼit osan talentu rua. No Jesus mós la dehan katak atan neʼe muramura no hatete: ‘Tanbasá naʼi fó osan talentu rua deʼit mai haʼu? Haʼu mós serbisu makaʼas hanesan ho atan neʼebé simu osan talentu lima. Se naʼi la hafolin haʼu-nia serbisu, diʼak liu haʼu hakoi tiha osan talentu rua neʼe no serbisu ba haʼu-nia an rasik.’

10. Atan segundu halo saida ho ninia osan talentu?

¹⁰ Hanesan atan primeiru, atan segundu mós komprende katak ninia naʼi fó nia knaar importante no nia hakaʼas an atu halo didiʼak ninia serbisu. Rezultadu mak nia manán tan osan talentu rua. Tanba atan neʼe badinas no hatudu matenek, nia simu kolen. Ninia naʼi kontente tebes no fó responsabilidade liután ba nia.

11. Oinsá ita bele aumenta ita-nia ksolok?

¹¹ Ita mós sei sente haksolok liután se ita hakaʼas an atu halo didiʼak knaar hotu neʼebé ita simu. Ita mós bele hakaʼas an  liután iha serbisu haklaken no iha kongregasaun. (Após 18:5; Ebr 10:24, 25) Prepara didiʼak ba reuniaun sira atu nuneʼe Ita bele fó komentáriu neʼebé anima ema seluk. Se Ita simu knaar iha reuniaun loron baileet, haree ida-neʼe nuʼudar buat neʼebé importante. Se katuas sira husu Ita atu halo knaar ruma, halo ida-neʼe ho didiʼak no tuir oras. Keta hanoin katak knaar neʼe la importante. No hakaʼas an atu aumenta Ita-nia matenek kona-ba knaar neʼe. (Prov 22:29) Bainhira Ita serbí Jeová ho badinas, Ita-nia relasaun ho nia sai diʼak liután, no Ita sei haksolok liután. (Gal 6:4) Neʼe mós sei ajuda Ita atu sente kontente bainhira ema seluk hetan responsabilidade neʼebé Ita hakarak.—Rom 12:15; Gal 5:26.

12. Saida mak ajuda irmán Melissa no irmaun Nick atu aumenta sira-nia ksolok?

¹² Ita hanoin-hetan irmán Melissa neʼebé hakarak atu serbí iha Betel ka tuir Eskola ba Haklaken-Naʼin Tempu-Tomak ka lae? Maski nia labele halo nuneʼe, nia hatete: “Haʼu hakaʼas an atu sai pioneiru neʼebé diʼak no koko haklaken iha dalan oioin. Neʼe lori ksolok mai haʼu.” No oinsá mak irmaun Nick la laran-kraik tan maski nia la simu knaar nuʼudar atan ba kongregasaun? Nia hatete: “Haʼu tau fokus ba buat neʼebé haʼu bele halo, hanesan haklaken no mós fó komentáriu neʼebé bele anima ema seluk. Haʼu mós prenxe formuláriu atu serbí iha Betel no tinan ida liutiha, haʼu tama Betel.”

13. Ita sei hetan rezultadu saida se Ita halo didiʼak Ita-nia knaar? (Eclesiastes 2:24)

¹³ Se Ita halo didiʼak knaar neʼebé ita iha agora, neʼe katak ita sei simu responsabilidade liután iha futuru ka lae? Karik neʼe bele akontese hanesan irmaun Nick. Maibé se Ita la hetan knaar liután hanesan irmán Melissa, Ita nafatin bele aumenta Ita-nia ksolok no mós sente kontente ho buat neʼebé Ita bele halo ba Jeová. (Lee Eclesiastes 2:24.) Ita mós sei sente haksolok tanba hatene katak Ita halo ita-nia Naʼi Jesus Kristu kontente.

14. Ita presiza kontinua halo planu espirituál ka lae? Esplika toʼok.

¹⁴ Se ita hakaʼas an ona atu halo didiʼak ita-nia serbisu ba Jeová, neʼe katak ita la presiza tan atu aumenta ita-nia serbisu ba nia ka lae? Lae duni. Ita presiza halo planu espirituál neʼebé bele ajuda ita atu haklaken no hanorin ho diʼak liután, no mós ajuda liután irmaun-irmán sira. Ita bele kumpre planu sira-neʼe se ita tau fokus atu ajuda ema seluk duké tau fokus ba ita-nia an rasik.—Prov 11:2; Após 20:35.

15. Saida mak planu balu neʼebé bele ajuda Ita aumenta Ita-nia ksolok?

¹⁵ Saida mak planu espirituál balu neʼebé Ita bele halo? Husu Jeová ajuda Ita atu hatene planu saida mak diʼak ba Ita tuir Ita-nia kbiit. (Prov 16:3; Tgo 1:5) Karik Ita bele halo planu atu serbí nuʼudar pioneiru estra ka pioneiru regulár, serbí iha Betel ka ajuda iha serbisu konstrusaun. Karik Ita bele aprende língua seluk ka muda ba fatin foun atu haklaken iha língua seluk. Ita bele hetan informasaun liután kona-ba planu sira-neʼe hodi lee livru Organizasaun neʼebé Halo Jeová Nia Hakarak kapítulu 10 no koʼalia ba katuas kongregasaun sira. * Bainhira Ita hakaʼas  an atu kumpre planu sira-neʼe, ema bele haree katak Ita laʼo ba oin. Ita mós sei haksolok liután.

16. Ita bele halo saida se Ita labele kumpre planu espesífiku ruma?

¹⁶ Maibé oinsá se agora Ita labele kumpre planu neʼebé temi ona iha leten? Importante atu koko halo planu seluk neʼebé Ita bele kumpre. Hanoin toʼok kona-ba planu balu tuirmai.

17. Tuir 1 Timóteo 4:13, 15, irmaun ida bele halo saida atu sai mestre neʼebé diʼak?

¹⁷ Lee 1 Timóteo 4:13, 15. Se Ita mak irmaun neʼebé batizmu ona, Ita bele aumenta Ita-nia matenek atu koʼalia no hanorin. Tanbasá? Tanba se Ita hakaʼas an atu lee, koʼalia no hanorin ho didiʼak, neʼe sei lori benefísiu ba ema neʼebé rona ba Ita. Koko halo planu atu estuda no aplika lisaun ida-idak husi broxura Hakaʼas An atu Lee no Hanorin. Estuda didiʼak lisaun ida-idak no treinu didiʼak iha uma, no mós hakaʼas an atu aplika buat neʼebé Ita aprende kuandu Ita hatoʼo diskursu. Husu sujestaun husi katuas konsellu nian * ka katuas sira seluk neʼebé hakaʼas an “atu koʼalia no hanorin” ho diʼak liután. (1 Tim 5:17) Hakaʼas an atu aplika lisaun husi broxura neʼe no mós ajuda Ita-nia rona-naʼin sira atu hametin sira-nia fiar ka anima sira atu aplika buat neʼebé sira aprende. Hodi halo nuneʼe, Ita sei aumenta Ita-nia ksolok no mós rona-naʼin nia ksolok.

18. Saida mak bele ajuda ita atu kumpre planu iha serbisu haklaken?

¹⁸ Ita hotu simu knaar atu haklaken no  hanorin ema sai dixípulu. (Mt 28:19, 20; Rom 10:14) Ita hakarak sai matenek liután iha serbisu importante neʼe ka lae? Ita bele estuda broxura Hanorin no tuirmai halo planu espesífiku neʼebé bele ajuda Ita atu aplika buat neʼebé Ita aprende ona. Ita mós bele hetan sujestaun seluk husi livru Moris Kristaun no Haklaken no vídeo kona-ba ezemplu atu haklaken neʼebé fó sai iha reuniaun loron baileet. Koko dalan oioin no haree ida-neʼebé mak diʼak liu ba Ita-nia área. Bainhira Ita aplika sujestaun sira-neʼe, Ita sei sai haklaken-naʼin neʼebé diʼak liu no mós Ita sei sente haksolok liután.—2 Tim 4:5.

19. Oinsá Ita bele haburas hahalok Kristaun?

¹⁹ Bainhira hanoin kona-ba halo planu, Ita mós bele halo planu atu haburas hahalok Kristaun sira. (Gal 5:22, 23; Kol 3:12; 2 Ped 1:5-8) Oinsá Ita bele kumpre planu neʼe? Karik Ita hakarak atu hametin liután Ita-nia fiar. Karik Ita bele lee sujestaun husi ita-nia publikasaun kona-ba oinsá atu hametin Ita-nia fiar. Ita mós bele haree programa husi JW Broadcasting^® neʼebé hatudu oinsá irmaun-irmán sira nafatin hatudu fiar maski hasoru susar. Tuirmai hanoin kona-ba oinsá Ita bele banati-tuir sira-nia fiar.

20. Oinsá ita bele aumenta ita-nia ksolok no hamenus ita-nia laran-kraik?

²⁰ Klaru katak ita hotu hakarak aumenta ita-nia serbisu ba Jeová. Iha mundu foun, ita bele serbí Jeová iha dalan neʼebé kompletu. Antes toʼo tempu neʼe, mai ita aproveita oportunidade hotu tuir ita-nia kbiit atu serbí Jeová liután. Se ita halo nuneʼe, ita-nia ksolok sei aumenta liután no ita-nia laran-kraik sei sai menus. No importante liu hotu mak ita sei fó hahiʼi no glória ba Jeová, ita-nia “Maromak neʼebé kontente”. (1 Tim 1:11) Tan neʼe, mai ita hotu haksolok ho priviléjiu neʼebé ita iha.