1. Saida mak bele ajuda ita atu gosta estuda Bíblia nia profesia?

 IRMAUN joven ida naran Ben hatete: “Haʼu gosta estuda kona-ba Bíblia nia profesia.” Ita mós sente hanesan neʼe ka lae? Ka karik Ita sente katak Bíblia nia profesia mak susar atu komprende no halo Ita sente baruk. Maibé, bainhira Ita aprende kona-ba tanbasá Jeová dirije ema atu hakerek profesia sira iha Bíblia laran, neʼe sei halo Ita gosta atu aprende.

2. Iha lisaun neʼe, ita sei koʼalia kona-ba saida?

² Iha lisaun neʼe, ita sei koʼalia kona-ba tanbasá ita tenke estuda Bíblia nia profesia no mós oinsá atu estuda kona-ba neʼe. Ita mós sei koʼalia kona-ba profesia rua husi livru Daniel neʼebé bele ajuda ita ohin loron.

3. Ita presiza halo saida se ita hakarak komprende Bíblia nia profesia?

³ Ita presiza husu ajuda se ita hakarak komprende Bíblia nia profesia. Hanoin toʼok ilustrasaun neʼe. Imajina toʼok Ita viajen hela ba fatin foun ida, no Ita laʼo hamutuk ho belun neʼebé hatene didiʼak fatin neʼe. Nia hatene imi iha neʼebé no atu bá neʼebé. Klaru katak, Ita sei sente kontente tebes tanba bele laʼo hamutuk belun neʼe! Jeová mak hanesan ho belun neʼe, nia hatene didiʼak kona-ba ita-nia futuru. Entaun, atu bele komprende kona-ba Bíblia nia profesia, ita tenke haraik an hodi husu Jeová nia ajuda.​—Dan 2:28; 2 Ped 1:19, 20.

4. Tanbasá Jeová fó sai profesia sira iha Bíblia laran? (Jeremias 29:11) (Haree mós foto.)

⁴ Hanesan aman neʼebé diʼak, Jeová hakarak ninia oan sira atu iha futuru neʼebé kapás. (Lee Jeremias 29:11.) Maibé la hanesan ho ema, Jeová bele fó-hatene ita kona-ba futuru ho loloos. Jeová hili ema atu hakerek profesia  sira iha Bíblia laran atu ita bele hatene nanis kona-ba akontesimentu importante sira. (Isa 46:10) Entaun, Bíblia nia profesia sira mak prezente furak husi ita-nia Aman iha lalehan. Maibé oinsá mak ita bele fiar metin katak Bíblia nia profesia sei sai loos?

5. Joven sira bele aprende saida husi Max?

⁵ Iha nasaun barak, baibain joven Testemuña sira iha eskola hasoru ema neʼebé la gosta ka la hatudu respeitu ba Bíblia. Dala ruma sira-nia liafuan no hahalok bele halo joven Testemuña sira duvida kona-ba sira-nia fiar. Hanoin toʼok kona-ba irmaun Max, nia hatete: “Bainhira haʼu sei joven, haʼu komesa duvida katak apá no amá hanorin haʼu relijiaun neʼebé loos no Bíblia mai husi Maromak ka lae.” Saida mak Max nia inan-aman halo? Nia hatete: “Sira nafatin kalma, maski loloos haʼu hatene katak sira hanoin barak.” Max nia inan-aman ajuda nia atu hetan resposta husi Bíblia. No Max mós halo buat ruma. Nia hatete: “Haʼu estuda didiʼak Bíblia nia profesia no haʼu mós fahe neʼe ba joven seluk.” Rezultadu mak saida? Max hatete: “Ikusmai, haʼu fiar duni katak Bíblia mai husi Maromak!”

6. Saida mak Ita presiza halo se Ita sente duvida, no tanbasá?

⁶ Hanesan irmaun Max, se Ita komesa duvida katak Bíblia nia mensajen mak loos ka lae, keta fó-sala Ita-nia an maibé lalais atu halo buat ruma. Duvida mak hanesan ferrujen. Se Ita husik deʼit, neineik-neineik neʼe bele estraga buat neʼebé importante liu. Atu halakon duvida neʼebé bele estraga Ita-nia fiar, Ita presiza husu ba Ita-nia an: ‘Hau tau fiar ba buat neʼebé Bíblia hatete kona-ba futuru ka lae?’ Se Ita duvida hela, Ita presiza estuda kona-ba Bíblia nia profesia neʼebé sai loos ona. Oinsá Ita bele halo ida-neʼe?

7. Ezemplu saida mak Daniel hatudu kona-ba estuda profesia? (Daniel 12:10) (Haree mós foto.)

⁷ Daniel hatudu ezemplu diʼak kona-ba oinsá atu estuda profesia. Daniel estuda kona-ba profesia ho motivu neʼebé loos, neʼe mak atu hatene lia-loos. Nia mós hatudu haraik an hodi rekoñese katak Jeová sei ajuda nia komprende profesia sira se nia kontinua hakbesik no halo tuir Jeová. (Dan 2:27, 28; lee Daniel 12:10.) Daniel hatudu katak nia haraik an liuhusi sadere ba Jeová nia ajuda. (Dan 2:18) Nia mós estuda didiʼak. Nia halo peskiza kona-ba Eskritura sira neʼebé hakerek ona iha tempu neʼebá. (Jer 25:11, 12; Dan 9:2) Oinsá Ita bele banati-tuir Daniel?

8. Ema balu estuda Bíblia nia profesia ho razaun saida? Saida mak ita presiza halo?

⁸ Hanoin kona-ba Ita-nia motivu. Ita estuda Bíblia nia profesia tanba hakarak atu hatene kona-ba lia-loos ka lae? Se  nuneʼe, Jeová sei ajuda Ita. (João 4:23, 24; 14:16, 17) Maibé, ema balu estuda Bíblia tanba razaun seluk. Sira hakarak buka evidénsia katak Bíblia la mai husi Maromak. Sira hanoin katak se Bíblia la mai husi Maromak neʼe katak sira bele deside rasik saida mak loos no sala. Maibé, Ita presiza iha motivu neʼebé loos. Ita mós presiza hatudu hahalok seluk tan atu bele komprende Bíblia nia profesia.

9. Ita presiza hatudu hahalok saida atu bele komprende Bíblia nia profesia? Esplika toʼok.

⁹ Hatudu haraik an. Jeová promete atu ajuda ema neʼebé haraik an. (Tgo 4:6) Tan neʼe, ita presiza halo orasaun atu husu ninia ajuda hodi bele komprende Bíblia nia profesia. Se ita haraik an, ita mós sei rekoñese katak ita presiza ajuda husi atan laran-metin neʼebé Jeová uza atu fó ita ai-han espirituál iha tempu neʼebé loos. (Lc 12:42) Jeová laʼós Maromak neʼebé runguranga, tan neʼe lójiku katak nia sei uza dalan ida deʼit atu ajuda ita komprende lia-loos husi Bíblia.​—1 Kor 14:33; Éf 4:4-6.

10. Saida mak Ita bele aprende husi Ester nia esperiénsia?

¹⁰ Estuda didiʼak. Hili profesia ida neʼebé Ita gosta no estuda didiʼak. Neʼe mak buat neʼebé irmán Ester halo. Nia hakarak atu buka-hatene liután profesia neʼebé koʼalia kona-ba Mesias. Nia hatete: “Bainhira haʼu tinan 15, haʼu hahú halo peskiza hodi prova katak profesia sira hakerek nanis ona antes Jesus moris.” Buat neʼebé nia aprende kona-ba Livru Tasi Mate hametin ninia fiar. Nia hatete: “Liafuan balu hakerek ona antes Kristu nia tempu. Entaun neʼe hatudu katak profesia sira mai duni husi Maromak. Haʼu presiza lee dala barak informasaun balu atu bele komprende.” Ester sente kontente tanba nia hakaʼas an ona. Depois estuda tiha Bíblia nia profesia sira, nia hatete: “Haʼu bele haree katak buat neʼebé Bíblia hatete mak loos duni!”

11. Tanbasá diʼak atu prova katak Bíblia mak loos?

¹¹ Bainhira ita haree oinsá profesia balu iha Bíblia sai loos, ita sei tau fiar tomak ba Jeová no matadalan hotu neʼebé ita simu husi nia. Laʼós neʼe deʼit, Bíblia nia profesia mós fó-hatene ita kona-ba esperansa iha futuru. Kuandu ita estuda kona-ba neʼe, ita sei kontinua iha hanoin pozitivu maski hasoru susar. Mai ita koʼalia kona-ba Daniel nia profesia rua neʼebé sai loos daudaun. Hodi komprende kona-ba neʼe sei ajuda ita atu halo desizaun ho matenek.

12. Estátua nia “ain parte kraik” reprezenta saida? (Daniel 2:41-43)

¹² Lee Daniel 2:41-43. Estátua nia ain parte kraik iha Liurai Nabukodonozór nia mehi mak halo husi “besi kahur ho  rai-mean mamar”. Hodi kompara profesia neʼe ho profesia seluk husi livru Daniel no Apokalipse, ita bele hatene katak ain parte kraik neʼe reprezenta Bretaña ho Amérika nia ukun neʼebé kbiit boot liu ohin loron. Kona-ba ukun neʼe, Daniel hatete: “Ukun neʼe sei forte iha parte balu no fraku iha parte seluk.” Tanbasá fraku iha parte seluk? Tanba ema baibain neʼebé reprezenta rai-mean neʼebé mamar mak hanetik ukun neʼe atu foti desizaun neʼebé metin. b

13. Lia-loos importante saida mak ita bele aprende husi profesia neʼe?

¹³ Ita aprende lia-loos importante oioin husi buat neʼebé Daniel fó sai kona-ba estátua neʼebé liurai haree, liuliu kona-ba estátua nia ain parte karik. Primeiru, Bretaña ho Amérika nia ukun hatudu duni katak neʼe mak ukun neʼebé iha kbiit boot. Porezemplu, ukun neʼe hola parte importante atu manán Funu Mundiál Primeiru no Segundu. Maibé, sira mós fraku no kontinua sai fraku tanba sira-nia sidadaun kontra malu no kontra hasoru governu. Segundu, Bretaña ho Amérika mak sai nuʼudar ukun boot ikus antes Maromak nia Ukun halakon ema nia governu hotu. Maski dala ruma nasaun sira kontra Bretaña ho Amérika nia ukun, maibé sira sei la manán no troka ukun neʼe. Ita hatene ida-neʼe tanba “fatuk” neʼebé reprezenta Maromak nia Ukun sei harahun ain neʼe, katak Bretaña ho Amérika.​—Dan 2:34, 35, 44, 45.

14. Oinsá komprende profesia kona-ba ain parte kraik bele ajuda ita atu halo desizaun neʼebé matenek?

¹⁴ Ita fiar duni ka lae, katak Daniel nia profesia kona-ba ain parte kraik husi besi no rai-mean mak loos? Se nuneʼe, neʼe sei kona duni dalan neʼebé Ita halaʼo Ita-nia moris. Ita sei la fokus atu buka deʼit osan tanba Ita hatene katak lakleur tan mundu aat neʼe sei lakon. (Lc 12:16-21; 1 João 2:15-17) Hodi komprende didiʼak profesia neʼe, sei ajuda Ita haree katak haklaken no hanorin mak importante. (Mt 6:33; 28:18-20) Depois estuda tiha profesia neʼe, husu ba Ita-nia an: ‘Haʼu-nia desizaun sira hatudu katak haʼu fiar metin katak lakleur tan Maromak nia Ukun sei halakon tiha ema nia governu hotu ka lae?’

15. Ohin loron, sé mak “liurai norte” no “liurai súl”? (Daniel 11:40)

¹⁵ Lee Daniel 11:40. Daniel kapítulu 11 koʼalia kona-ba liurai rua, ka governu rua neʼebé kompete malu. Hodi kompara profesia neʼe ho profesia seluk husi Bíblia, ita bele hatene katak “liurai norte” mak Rúsia no nasaun neʼebé apoia nia no “liurai súl” mak Bretaña ho Amérika. c

16. Maromak nia povu neʼebé moris iha “liurai norte” nia ukun okos hasoru susar saida deʼit?

¹⁶ Maromak nia povu neʼebé moris iha “liurai norte” nia ukun okos hasoru susar husi liurai neʼe. Testemuña balu hetan baku no tama komarka tanba sira-nia fiar. Susar neʼebé sira hetan husi “liurai norte” hametin liután sira-nia fiar. Tanbasá? Tanba sira hatene katak susar sira-neʼe kumpre profesia iha  livru Daniel. d (Dan 11:41) Hodi hatene kona-ba neʼe bele ajuda ita atu nafatin kaer metin ba ita-nia esperansa no laran-metin nafatin ba Jeová.

17. Maromak nia povu neʼebé moris iha “liurai súl” nia ukun okos hasoru susar saida deʼit?

¹⁷ Iha tempu uluk, “liurai súl” mós fó-terus Jeová nia povu. Porezemplu durante Funu Mundiál Primeiru no Segundu, irmaun barak tama komarka tanba mantein neutrál no Testemuña nia oan balu mós hasai husi eskola tanba razaun neʼebé hanesan. Iha tinan sira-neʼe nia laran, Jeová nia povu neʼebé hela iha liurai neʼe nia ukun okos mós hetan koko iha dalan seluk tan. Porezemplu, durante kampaña ba eleisaun, karik ema Kristaun ida bele iha hanoin atu apoia partidu ida ka ulun-naʼin ida. Maski nia la tuir votasaun, maibé iha ninia laran nia apoia partidu ida. Tan neʼe importante  atu mantein neutrál liuhusi ita-nia hahalok, hanoin, no sentimentu!​—João 15:18, 19; 18:36.

18. Ita sente oinsá kuandu haree liurai rua neʼe odi malu? (Haree mós dezeñu.)

¹⁸ Sira neʼebé la tau fiar ba Bíblia nia profesia sei sai taʼuk tebes bainhira sira haree “liurai súl nia dikur sei kaʼit malu” ho “liurai norte”. (Dan 11:40, nota) Liurai rua neʼe iha bomba nukleár neʼebé bele harahun mundu tomak. Maibé, ita hatene katak Jeová sei la husik ida-neʼe atu akontese. (Isa 45:18) Duké halo ita taʼuk kona-ba futuru, odi malu entre “liurai norte” no “liurai súl” hametin ita-nia fiar. Neʼe fó prova katak mundu nia rohan besik ona.

19. Saida mak ita presiza hatene kona-ba Bíblia nia profesia?

¹⁹ Ita la hatene oinsá Bíblia ninia profesia balu sei sai loos. Profeta Daniel mós la komprende signifikadu husi buat hotu neʼebé nia hakerek. (Dan 12:8, 9) Tanba deʼit ita la hatene ho loloos oinsá profesia ruma sei sai loos, neʼe la dehan katak profesia neʼe sei la kumpre duni. Maibé ita bele fiar katak Jeová sei ajuda ita atu komprende ida-neʼe iha tempu neʼebé loos hanesan nia halo ona iha tempu uluk.​—Amós 3:7.

20. Lakleur tan Bíblia nia profesia saida mak sei sai loos? Saida mak ita presiza halo?

²⁰ Iha futuru, sei iha deklarasaun kona-ba “dame no hakmatek”. (1 Tes 5:3) Tuirmai governu sira sei ataka relijiaun falsu no halakon sira. (Apok 17:16, 17) Sira mós sei ataka Maromak nia povu. (Eze 38:18, 19) No funu Armagedon sei hahú. (Apok 16:14, 16) Ita bele fiar metin katak akontesimentu sira-neʼe sei akontese lakleur tan. Antes tempu neʼe, mai ita kontinua hatudu agradese ba ita-nia Aman iha lalehan hodi tau atensaun didiʼak ba Bíblia nia profesia no mós ajuda ema seluk atu halo nuneʼe.