1. Tanbasá ema Babilónia nota kona-ba profeta Daniel?

 PROFETA Daniel sei joven hela kuandu tropa Babilónia lori nia nuʼudar dadur no dook husi Jeruzalein. Maibé, ema neʼebé serbisu ba liurai nota kona-ba Daniel. Sira “haree deʼit buat neʼebé iha liʼur”, katak Daniel iha “isin-diʼak, bonitu”, no nia mai husi família importante. (1 Sam 16:7) Tanba razaun sira-neʼe, ema Babilónia treinu nia atu sai ema importante iha sira-nia ukun.​—Dan 1:3, 4, 6.

2. Oinsá Jeová nia haree kona-ba Daniel? (Ezequiel 14:14)

² Jeová hadomi Daniel laʼós tanba ninia fíziku ka knaar neʼebé nia iha, maibé tanba dalan neʼebé nia halaʼo ninia moris nuʼudar joven. Daniel maizumenus tinan 20 deʼit kuandu Jeová temi ninia naran hamutuk ho Noé no Job. Entaun Jeová haree Daniel nuʼudar ema laran-loos hanesan ho Noé no Job neʼebé laran-metin ba Maromak durante tinan barak. (Gén 5:32; 6:9, 10; Job 42:16, 17; lee Ezequiel 14:14.) No Jeová kontinua hadomi Daniel durante Daniel nia moris tomak.​—Dan 10:11, 19.

3. Iha lisaun neʼe, ita sei aprende saida?

³ Iha lisaun neʼe, ita sei haree Daniel nia hahalok rua neʼebé halo nia iha folin-boot ba Jeová. Ulukliu, ita sei buka-hatene hahalok ida-idak no haree oinsá nia hatudu ida-neʼe iha situasaun oioin. Tuirmai, ita sei haree saida mak ajuda Daniel atu haburas hahalok sira-neʼe. Ikusliu, ita sei aprende oinsá mak ita bele banati-tuir nia. Maski lisaun neʼe mak ba joven sira, maibé ita hotu bele aprende husi Daniel nia ezemplu.

4. Oinsá Daniel hatudu aten-brani? Fó toʼok ezemplu.

⁴ Ema neʼebé aten-brani mós bele sente taʼuk, maibé sira la husik ida-neʼe atu hanetik sira hodi halo buat neʼebé loos. Daniel mak joven neʼebé aten-brani tebes. Haree toʼok situasaun rua neʼebé nia hatudu aten-brani. Karik situasaun primeiru akontese tinan rua depois Babilónia harahun Jeruzalein. Liurai Nabukodonozór husi Babilónia hetan mehi kona-ba estátua boot no mehi neʼe halo nia taʼuk. Se Daniel no matenek-naʼin sira labele fó-hatene kona-ba saida mak liurai mehi no esplika ninia signifikadu, liurai sei oho sira. (Dan 2:3-5) Daniel presiza halo buat ruma lalais se nia lakohi ema barak mate. Nia “tama no husu ba liurai atu fó tempu ba nia atu esplika mehi neʼe nia signifika ba liurai”. (Dan 2:16) Nia presiza duni aten-brani no fiar. Antes neʼe, nia nunka esplika kona-ba ema nia mehi. Nia husu ninia kolega Sadrak, Mexak, no Abednego b “atu halo orasaun ba Maromak iha lalehan atu hatudu laran-sadiʼa no fó sai segredu neʼe ba sira”. (Dan 2:18) Jeová hatán sira-nia orasaun. Ho Maromak nia ajuda, Daniel esplika kona-ba liurai nia mehi. Daniel no ninia kolega sira-nia moris seguru ona.

5. Situasaun saida tan mak koko Daniel nia aten-brani?

⁵ Depois Daniel esplika tiha kona-ba mehi neʼe, nia hasoru tan situasaun seluk neʼebé koko ninia aten-brani. Nabukodonozór hetan tan mehi seluk. Nia mehi kona-ba ai-hun neʼebé boot tebes. Daniel ho aten-brani esplika ba liurai kona-ba mehi neʼe nia signifikadu, inklui fó sai katak liurai sei sai bulak no lakon ninia ukun ba tempu balu. (Dan 4:25) Liurai bele oho Daniel tanba hanoin katak Daniel nia liafuan neʼe hanesan planu neʼebé aat. Maski nuneʼe, Daniel hatudu aten-brani no esplika kona-ba mehi neʼe.

6. Saida mak ajuda Daniel atu hatudu aten-brani?

⁶ Saida mak ajuda Daniel atu hatudu aten-brani? Nuʼudar joven, karik Daniel aprende husi ninia inan-aman nia ezemplu. Karik sira halo tuir instrusaun  neʼebé Jeová fó ba inan-aman sira, no sira hanorin sira-nia oan kona-ba Maromak nia Ukun-Fuan. (Deut 6:6-9) Daniel laʼós deʼit hatene kona-ba Ukun-Fuan neʼebé báziku, hanesan Ukun-Fuan Sanulu, maibé nia mós hatene didiʼak kona-ba saida mak ema Izraél bele ka labele han. c (Lev 11:4-8; Dan 1:8, 11-13) Daniel mós aprende istória kona-ba Maromak nia povu no hatene saida mak akontese ba sira bainhira sira la moris tuir Jeová nia matadalan. (Dan 9:10, 11) Ninia esperiénsia halo nia fiar metin katak Jeová no anju sira neʼebé forsa boot sei apoia nia.​—Dan 2:19-24; 10:12, 18, 19.

7. Saida tan mak ajuda Daniel atu hatudu aten-brani? (Haree mós dezeñu.)

⁷ Daniel estuda kona-ba liafuan husi profeta sira, inklui Jeremias nia profesia. Husi buat neʼebé nia estuda, ikusmai nia bele komprende katak ema Judeu besik ona atu sai livre husi Babilónia. (Dan 9:2) Hodi haree Bíblia nia profesia sai loos, neʼe halo Daniel nia fiar ba Jeová sai metin liután, no ema neʼebé iha fiar metin ba Maromak bele sai aten-brani. (Kompara ho Roma 8:31, 32, 37-39.) Buat neʼebé importante liu mak Daniel sempre halo orasaun ba ninia Aman iha lalehan. (Dan 6:10) Daniel fó sai ninia sala no fakar sai ninia sentimentu ba Jeová, no nia mós husu ajuda. (Dan 9:4, 5, 19) Nia mós ema hanesan ita, entaun nia la moris-mai ho aten-brani kedas. Maibé, nia haburas hahalok neʼe liuhusi estuda, halo orasaun, no tau fiar ba Jeová.

8. Oinsá ita bele haburas aten-brani?

⁸ Saida mak ita bele halo atu haburas aten-brani? Karik ita-nia inan-aman husu ita atu sai aten-brani. Maski inan-aman mak aten-brani, neʼe la dehan katak ita moris-mai ho aten-brani kedas. Haburas aten-brani mak hanesan aprende buat foun. Dalan ida atu bele aprende lalais mak hodi haree didiʼak ba mestre nia hahalok no halo tuir ninia ezemplu. Nuneʼe mós, ita bele aprende atu sai aten-brani hodi haree didiʼak oinsá ema seluk hatudu hahalok neʼe no halo tuir sira-nia ezemplu. Entaun, saida mak ita aprende husi Daniel? Hanesan Daniel, ita presiza hatene didiʼak Bíblia. Ita tenke iha relasaun besik ho Jeová hodi halo orasaun beibeik ba nia no fó sai ita-nia sentimentu. Ita presiza tau fiar ba Jeová, no fiar metin katak nia apoia ita. Tuirmai bainhira ita-nia fiar hetan koko, ita sei hatudu aten-brani.

9. Ita hetan benefísiu saida hodi hatudu aten-brani?

⁹ Ita sei hetan benefísiu oioin hodi hatudu aten-brani. Haree toʼok ezemplu kona-ba Ben. Nia eskola iha Alemaña no ema hotu iha eskola fiar ba evolusaun no dehan katak Bíblia nia hanorin kona-ba kriasaun mak la loos. Loron ida, Ben hetan oportunidade atu esplika iha klase tanbasá nia fiar katak iha Kriadór neʼebé kria buat hotu. Nia ho aten-brani esplika ninia fiar. Rezultadu mak saida? Nia dehan: “Haʼu-nia mestre rona didiʼak, no nia kopia informasaun hotu neʼebé haʼu uza no fahe ba haʼu-nia kolega sira iha klase laran.” Saida mak Ben nia kolega halo? Nia dehan: “Sira barak rona ba  haʼu, no sira hatete katak sira admira ho haʼu.” Hanesan Ben nia esperiénsia, baibain ema neʼebé hatudu aten-brani sei simu respeitu husi ema seluk. Sira mós bele book ema neʼebé laran-moos atu serbí Jeová. Klaru katak ita iha razaun diʼak atu haburas aten-brani.

10. Laran-metin katak sá?

¹⁰ Iha Bíblia, liafuan “laran-metin”, ka “domin neʼebé laran-metin”, fó ideia kona-ba domin neʼebé Maromak hatudu ba ninia atan sira, no mós domin neʼebé Maromak nia atan sira hatudu ba malu. (2 Sam 9:6, 7) Ita-nia laran-metin bele sai buras husi tempu ba tempu. Haree oinsá Daniel nia laran-metin bele sai buras.

11. Oinsá Daniel hatudu laran-metin kuandu nia idade ona? (Haree dezeñu iha livru oin.)

¹¹ Daniel nia laran-metin ba Jeová hetan koko durante ninia moris tomak. Maibé koko ida neʼebé boot liu mak bainhira nia tinan 90 liu. Iha tempu neʼebá, Liurai Dário husi Média no Pérsia mak ukun Babilónia. Sira neʼebé serbí iha liurai nia palásiu la gosta Daniel no la hatudu respeitu ba Daniel nia Maromak. Tan neʼe sira halo planu atu oho Daniel. Sira husu liurai atu halo lei foun ida neʼebé sei hatudu se Daniel laran-metin ba Maromak ka ba liurai. Daniel bele prova ninia laran-metin ba liurai no la hetan kastigu hodi la halo orasaun ba Jeová ba loron 30. Daniel hili atu laran-metin ba Jeová. Rezultadu mak ema soe nia ba leaun kuak. Maibé Jeová hafolin Daniel nia laran-metin hodi salva nia husi leaun nia ibun. (Dan 6:12-15, 20-22) Hanesan Daniel, oinsá mak ita bele haburas ita-nia laran-metin ba Jeová?

12. Oinsá Daniel haburas laran-metin ba Jeová?

¹² Hanesan temi ona, laran-metin mai husi domin neʼebé boot. Daniel hatudu laran-metin ba Jeová tanba hadomi tebes ninia Aman Jeová. Daniel haburas hahalok neʼe hodi hanoin kona-ba Jeová nia hahalok sira no oinsá Jeová hatudu hahalok sira-neʼe. (Dan 9:4) Daniel mós medita no agradese ba buat diʼak hotu neʼebé Jeová halo ona ba nia no ba Ninia povu.​—Dan 2:20-23; 9:15, 16.

13. (a) Saida mak koko joven sira-nia laran-metin? Fó toʼok ezemplu. (Haree mós foto.) (b) Se ema husu Testemuña ba Jeová apoia hahalok omoseksuál ka lae, ita sei hatán oinsá? (Haree vídeo iha jw.org ho títulu “Rezultadu husi hahalok loos mak dame”.)

 ¹³ Hanesan Daniel, ohin loron joven sira mós tenke tahan susar tanba ema barak la hatudu respeitu ba Jeová no ninia matadalan sira. Ema hanesan neʼe karik la gosta ema neʼebé fiar la hanesan ho sira-nian. Ema balu goza ka hatún joven sira hodi koko estraga sira-nia laran-metin ba Jeová. Porezemplu, hanoin toʼok kona-ba joven ida naran Graeme neʼebé hela iha Austrália. Nia hasoru situasaun susar bainhira iha eskola sekundária. Mestre husu ba alunu sira iha klase, saida mak sira-nia reasaun se sira-nia kolega ida hatete katak nia omoseksuál. Mestre haruka alunu neʼebé la apoia hahalok hanesan neʼe atu hamriik ketak, no sira neʼebé apoia hamriik ketak. Graeme hatete: “Ema hotu iha klase laran simu hahalok neʼe, só deʼit haʼu ho Testemuña ida tan mak lae.” Iha susar seluk tan neʼebé koko Graeme nia laran-metin ba Jeová. Nia dehan: “Durante iha klase laran, estudante seluk inklui mestre hatún no goza ami. Haʼu hakaʼas an atu defende haʼu-nia fiar ho respeitu no kalma, maibé sira lakohi rona.” Graeme sente oinsá? Nia dehan: “Haʼu la kontente bainhira sira hatún haʼu, maibé haʼu kontente tanba haʼu nafatin laran-metin no defende haʼu-nia fiar.”

14. Saida mak dalan ida atu haburas laran-metin ba Jeová?

¹⁴ Hanesan Daniel, ita bele haburas laran-metin ba Jeová se ita iha domin neʼebé kleʼan ba nia. Ita haburas domin hanesan neʼe hodi aprende kona-ba Jeová nia hahalok sira. Porezemplu, ita bele estuda kona-ba ninia kriasaun. (Rom 1:20) Se Ita hakarak haburas liután domin no respeitu ba Jeová, diʼak atu lee informasaun iha série “Maromak mak kria ka lae?” ka haree vídeo sira. Ita mós bele haree informasaun iha broxura Moris Hotu Mosu Mesak Deʼit ka lae? no Asal Mula Kehidupan—Lima Pertanyaan yang Patut Direnungkan. Irmán joven ida naran Ester husi rai-Dinamarka hatete kona-ba publikasaun sira-neʼe: “Informasaun sira mak lójiku tebes. Broxura neʼe la dehan kona-ba ita tenke fiar ba saida, maibé fó sai deʼit faktu sira no husik ita mak halo desizaun.” Ben neʼebé temi ona, dehan: “Informasaun sira hametin duni haʼu-nia fiar no fó prova katak Maromak mak kria moris hotu.” Depois estuda tiha informasaun sira-neʼe, ita sei konkorda ho Apokalipse 4:11 neʼebé dehan: “Jeová, ami-nia Maromak, Ita-Boot merese simu glória, respeitu no kbiit, tanba Ita kria ona buat hotu, no tanba Ita-nia hakarak mak buat hotu iha no kria tiha.” d

15. Saida mak dalan seluk tan atu haburas domin ba Jeová?

¹⁵ Dalan seluk atu haburas domin ba Jeová mak hodi estuda didiʼak kona-ba ninia Oan-Mane Jesus nia moris. Irmán joven ida naran Samira neʼebé hela iha Alemaña halo nuneʼe. Nia dehan: “Liuhusi Jesus haʼu bele koñese Jeová diʼak liután.” Bainhira nia kiʼik, susar ba nia atu komprende katak Jeová bele sai ninia belun no hadomi nia. Maibé nia bele komprende Jesus nia sentimentu. Nia dehan: “Haʼu gosta Jesus tanba nia  laran-diʼak no hadomi labarik sira.” Samira dehan katak kuandu nia aprende liután kona-ba Jesus, nia mós bele komprende no hadomi Jeová liután. Tanbasá? Nia hatete: “Neineik-neineik haʼu komprende katak Jesus haleno ninia Aman iha dalan kompletu. Sira-nia hahalok mak atu hanesan deʼit. Haʼu rekoñese katak razaun ida Jeová haruka Jesus mai mundu mak atu ema bele hatene diʼak liután kona-ba Jeová.” (João 14:9) Se Ita hakarak haburas domin ba Jeová, diʼak atu uza tempu hodi aprende kona-ba Jesus. Se Ita halo nuneʼe, Ita-nia domin no laran-metin ba Jeová sei sai buras liután.

16. Benefísiu saida mak ita hetan se ita hatudu laran-metin? (Salmo 18:25; Miqueias 6:8)

¹⁶ Baibain ema neʼebé laran-metin sempre iha belun neʼebé laran-metin ba nia. (Rute 1:14-17) Nuneʼe mós se ita laran-metin ba Jeová, ita sei sente kalma no sente kontente neʼebé loos. Tanbasá? Tanba Jeová promete atu laran-metin ba sira neʼebé laran-metin ba nia. (Lee Salmo 18:25; Miqueias 6:8.) Hanoin toʼok, Kriadór neʼebé boot liu hotu promete atu nafatin hatudu domin ba ita! No bainhira ita iha relasaun besik ho nia, maski ita hasoru susar, ema kontra, no mós mate labele haketak ita husi nia. (Dan 12:13; Lc 20:37, 38; Rom 8:38, 39) Importante tebes atu banati-tuir Daniel hodi laran-metin nafatin ba Jeová!

17-18. Saida tan mak ita bele aprende husi Daniel?

¹⁷ Iha lisaun neʼe, ita aprende kona-ba Daniel nia hahalok rua. Maibé iha buat barak tan neʼebé ita bele aprende husi nia. Porezemplu, Jeová fó ba Daniel vizaun no mehi oioin, no mós matenek atu esplika profesia sira. Profesia barak kumpre ona. Balu tan fó sai detalla kona-ba akontesimentu sira iha futuru neʼebé sei kona ema hotu iha mundu.

¹⁸ Iha lisaun tuirmai, ita sei haree ba profesia rua neʼebé Daniel hakerek. Neʼe sei ajuda ita hotu, joven no ferik-katuas atu halo desizaun matenek agora. Profesia sira-neʼe mós bele ajuda ita haburas aten-brani no laran-metin hodi nuneʼe ita bele sai prontu atu hasoru koko sira neʼebé besik ona atu akontese.