Ita bele ka lae hatán ba pergunta sira tuirmai neʼebé bazeia ba Livru Haklaken 2020?

Ita presiza hanoin oinsá kona-ba irmaun-irmán sira neʼebé atu bá lalehan?

Ita hafolin sira-nia fiar, maibé ita lakohi tau atensaun demais ba sira. Ita lakohi admira ema. (Jud 16, nota) Ita mós labele husu pergunta kona-ba sira-nia esperansa.​—w20.01, p. 29.

Tanbasá Ita fiar katak Jeová haree Ita?

Bíblia hatudu katak Jeová haree Ita antes Ita moris mai. Nia rona ba Ita-nia orasaun. Nia hatene Ita-nia hanoin no sentimentu. Ita-nia hahalok kona Jeová nia sentimentu. (1 Krón 28:9; Prov 27:11) Nia mak dada Ita ba nia.​—w20.02, p. 12.

Bainhira mak ita presiza koʼalia no nonook?

Ita kontente atu koʼalia ba ema seluk kona-ba Jeová. Ita presiza koʼalia bainhira ita haree ema ruma komesa laʼo sala dalan. Katuas sira presiza fó konsellu ba ema. Ita presiza nonook bainhira ita hakarak hatene ka fó sai informasaun kona-ba serbisu haklaken iha rai neʼebé governu bandu. Ita la fó sai informasaun neʼebé segredu.​—w20.03, p. 20-21.

Oinsá mak gafañotu iha Joel kapítulu 2 no Apokalipse kapítulu 9 la hanesan?

Joel 2:20-29 hatete katak Maromak sei duni sai tiha gafañotu sira no promete atu selu fali buat aat neʼebé mosu. Depois neʼe, Maromak fakar sai ninia espíritu. Neʼe sai loos bainhira Babilónia ataka Izraél no depois tempu neʼe. Apokalipse 9:1-11 koʼalia kona-ba Kristu nia alin sira neʼebé moris ohin loron neʼebé hanesan gafañotu bainhira sira haklaken Jeová nia mensajen tesi-lia nian hasoru mundu neʼe. Neʼe halo ema neʼebé apoia mundu neʼe sente la kontente.​—w20.04, p. 3-6.

Ohin loron sé mak liurai norte?

Rúsia no nasaun sira neʼebé apoia Rúsia. Sira kontra Maromak nia povu hodi bandu serbisu haklaken no hatudu katak sira odi Testemuña sira. Liurai norte kompete malu ho liurai súl.​—w20.05, p. 13.

Hahalok neʼebé mai husi espíritu santu mak inklui deʼit hahalok sia neʼebé temi iha Galásia 5:22, 23 ka lae?

Lae. Espíritu santu mós ajuda ita atu haburas hahalok seluk tan hanesan hahalok loos. (Éf 5:8, 9)​—w20.06, p. 17.

Saida mak perigu ida kona-ba tau foto sira iha média sosiál?

Buat neʼebé tau iha média sosiál bele halo ema hanoin katak ita mak gaba an no la haraik an.​—w20.07, p. 6-7.

Saida mak haklaken-naʼin sira bele aprende husi peskadór neʼebé matenek?

Sira halo serbisu iha tempu no fatin neʼebé sira bele hetan ikan. Sira hetan ona treinu atu uza ekipamentu neʼebé loos. No sira aten-brani atu halo serbisu maski susar. Ita bele halo nuneʼe kuandu haklaken.​—w20.09, p. 5.

Oinsá ita bele hametin ita-nia estudante Bíblia nia domin ba Jeová?

Ita bele anima sira atu lee Bíblia loroloron no medita buat neʼebé sira lee. No hanorin sira atu halo orasaun.​—w20.11, p. 4.

Ema hotu neʼebé “sei hetan moris tanba Kristu” inklui sé?​—1 Kor 15:22.

Apóstolu Paulo la dehan katak ema hotu sei hetan moris-hiʼas. Nia koʼalia kona-ba ema Kristaun neʼebé iha esperansa atu bá lalehan, sira neʼebé ‘Maromak haketak ona atu sai ida deʼit ho Kristu’. (1 Kor 1:2; 15:18)—w20.12, p. 5-6.

Kristu nia alin sira sei halo saida depois sira nakfila an ‘durante trombeta ikus nia lian’?​—1 Kor 15:51-53.

Hamutuk ho Kristu, sira sei ukun nasaun sira ho ai-tonka besi. (Apok 2:26, 27)—w20.12, p. 12-13.