1. Saida mak akontese bainhira ita laran-kraik?

LOROLORON ita hasoru problema oioin no ita hakaʼas an atu tahan hasoru ida-neʼe. Maibé susar atu halo nuneʼe bainhira ita laran-kraik. Tan neʼe ita presiza haree sentimentu laran-kraik hanesan ho naʼok-teen neʼebé hadau ita-nia ksolok, aten-brani no halo ita la fiar an. Provérbios 24:10 hatete: “Se ó sai laran-triste iha tempu susar, ó-nia forsa sei menus.” Loos duni, laran-triste ka laran-kraik bele halakon ita-nia forsa atu tahan hasoru problema ho susesu.

2. Saida deʼit mak bele halo ita laran-kraik? Iha lisaun neʼe, ita sei aprende saida?

² Ita bele sai laran-kraik tanba razaun oioin. Razaun sira-neʼe inklui sala neʼebé ita halo, ita-nia fraku sira ka moras ruma. Karik ita la hetan knaar neʼebé ita hakarak ka ita presiza haklaken iha área neʼebé ema ladún interese atu rona. Iha lisaun neʼe, ita sei koʼalia kona-ba buat neʼebé ita bele halo atu tahan hasoru sentimentu laran-kraik.

3. Saida mak bele ajuda ita atu iha hanoin neʼebé loos kona-ba ita-nia sala no fraku sira?

³ Dala ruma fasil ba ita atu iha hanoin negativu kona-ba ita-nia an tanba sala neʼebé ita halo no mós ita-nia fraku sira. Tan neʼe karik ita hanoin katak Jeová sei la husik ita atu moris iha mundu foun. Hanoin hanesan neʼe mak perigu. Entaun, ita presiza iha hanoin oinsá kona-ba ita-nia sala? Bíblia fó sai katak ema hotu “halo ona sala”, só Jesus deʼit mak la halo sala. (Rom 3:23) Maski nuneʼe, Jeová la tau fokus ba ita-nia sala ka ezije ita atu sai perfeitu.  Nia mak Aman domin nian neʼebé hakarak ajuda ita. Nia mós hatudu pasiénsia ba ita. Nia haree oinsá ita hakaʼas an atu luta hasoru ita-nia fraku sira no manán hasoru hanoin negativu kona-ba ita-nia an. No nia mós prontu atu ajuda ita.​—Rom 7:18, 19.

4-5. Oinsá 1 João 3:19, 20 ajuda irmán naʼin-rua atu luta hasoru laran-kraik?

⁴ Hanoin toʼok kona-ba irmán Deborah no Maria nia ezemplu. * Bainhira Deborah sei kiʼik, ninia família trata aat nia no ida-neʼe halo nia sente la iha folin. Nia mós la hetan gaba. Tan neʼe bainhira sai boot, nia iha hanoin negativu kona-ba ninia an. Kuandu nia halo sala kiʼik ida, nia sente katak nia sempre halo sala. Maria mós hasoru problema neʼebé hanesan. Ninia família hamoe nia. Tan neʼe nia sente la iha folin. Maski nia hetan ona batizmu, nia nafatin sente katak nia la merese atu sai Testemuña ba Jeová.

⁵ Maski nuneʼe, irmán naʼin-rua neʼe kontinua serbí Jeová. Saida mak ajuda sira? Sira entrega sira-nia laran-susar ba Jeová liuhusi orasaun. (Sal 55:22) Sira rekoñese katak Jeová hatene buat aat neʼebé akontese ba ita iha pasadu no oinsá ida-neʼe afeta ita-nia hanoin. Maibé nia mós haree hahalok diʼak sira neʼebé ita iha, maski ita rasik labele haree ida-neʼe.​—Lee 1 João 3:19, 20.

6. Ema balu halo saida bainhira sira halo fali sala neʼebé hanesan?

⁶ Ema ida karik hakaʼas an atu para husi toman aat ruma. Maibé tuirmai nia repete fali no sai laran-kraik. Baibain ita fó-sala ba ita-nia an bainhira ita halo sala. (2 Kor 7:10) Maibé, ita labele fó-sala demais ba ita-nia an hodi hanoin: ‘Haʼu folin-laek. Jeová sei nunka perdua haʼu.’ Neʼe mak hanoin neʼebé sala no bele hanetik ita atu serbí Jeová. Hanoin-hetan buat neʼebé hakerek iha Provérbios 24:10. Neʼe esplika katak ita-nia forsa sei menus bainhira ita laran-triste. Diʼak atu halo orasaun ba Jeová no husu nia atu perdua ita. (Isa 1:18) Bainhira Jeová haree katak ita arrepende an husi laran, nia sei perdua ita. Ita mós presiza hakbesik ba katuas sira. Sira sei ajuda ita ho pasiénsia atu hadiʼa fali ita-nia relasaun diʼak ho Jeová.​—Tgo 5:14, 15.

7. Tanbasá ita labele sente laran-kraik bainhira ita luta hasoru daudaun ita-nia fraku?

⁷ Bainhira ema sente laran-kraik tanba sira-nia fraku, katuas kongregasaun ida husi rai-Fransa naran João Lucas hatete ba sira: “Jeová la espera ema laran-loos atu nunka halo sala, maibé se nia halo  sala, nia arrepende ninia sala no hakaʼas an atu halo mudansa.” (Rom 7:21-25) Tan neʼe keta hanoin katak ita folin-laek bainhira ita luta hasoru daudaun ita-nia fraku. Hanoin-hetan katak ita hotu mak sala-naʼin, no ita hotu presiza Jeová nia laran-diʼak neʼebé boot. Nia hatudu ida-neʼe liuhusi Jesus nia sakrifísiu.​—Éf 1:7; 1 João 4:10.

8. Bainhira laran-kraik, ita bele husu ajuda ba sé?

⁸ Irmaun-irmán sira bele anima ita. Irmaun-irmán sira prontu atu rona ba ita no anima ita kuandu ita presiza. (Prov 12:25; 1 Tes 5:14) Irmán Joy husi rai-Nijéria luta hasoru sentimentu laran-kraik, no nia dehan: “Irmaun-irmán sira ajuda tebes haʼu atu bele tahan. Bainhira sira anima haʼu, neʼe halo haʼu fiar katak Jeová hatán duni haʼu-nia orasaun. Haʼu mós aprende husi sira oinsá atu anima ema seluk neʼebé laran-kraik.” Maibé, ita presiza hanoin-hetan katak dala ruma irmaun-irmán sira la hatene katak ita presiza anima. Tan neʼe, karik ita rasik presiza hakbesik ba maluk fiar-naʼin neʼebé maduru no fó sai katak ita presiza ajuda.

9. Oinsá mak Salmo 41:3 no 94:19 bele anima ita?

⁹ Husu Jeová nia ajuda. Bainhira ita moras, liuliu moras ba tempu kleur ona, karik susar ba ita atu iha hanoin pozitivu. Ohin loron, Jeová la kura ita ho milagre, maibé nia bele fó kmaan mai ita no bele fó kbiit ba ita atu tahan. (Lee Salmo 41:3; 94:19.) Porezemplu, karik Jeová sei book ita-nia maluk Kristaun atu ajuda ita halo serbisu uma-laran nian ka bá kompras. Nia bele book irmaun-irmán sira atu halo orasaun hamutuk ho ita. Ka karik nia ajuda ita hanoin-hetan eskritura balu neʼebé fó kmaan mai ita, hanesan eskritura neʼebé koʼalia kona-ba moris iha mundu foun ho saúde perfeitu no mós la sente moras tan.​—Rom 15:4.

10. Tanbasá irmaun Isaac la laran-triste nafatin?

¹⁰ Irmaun Isaac neʼebé hela iha rai-Nijéria hetan asidente no doutór dehan katak nia sei nunka bele laʼo fali. Irmaun Isaac hatete: “Haʼu laran-kanek no laran-triste.” Maibé nia laran-triste nafatin ka lae? Lae. Saida mak ajuda nia? Nia esplika: “Haʼu no haʼu-nia feen la para atu halo orasaun ba Jeová no estuda ninia Liafuan. Ami mós kontinua hatudu agradese ba buat diʼak neʼebé ami iha, inklui ami-nia esperansa atu moris iha mundu foun.”

11. Oinsá mak irmán Cindy hetan ksolok bainhira nia moras?

¹¹ Hanoin toʼok irmán Cindy neʼebé hela iha rai-Méxiku. Doutór sira fó-hatene nia katak nia iha moras neʼebé perigu ba ninia moris. Oinsá nia tahan? Bainhira nia simu daudaun tratamentu, nia halo planu atu haklaken loroloron. Nia hatete: “Neʼe ajuda haʼu atu hanoin ema seluk duké tau fokus ba haʼu-nia operasaun ka moras neʼebé haʼu sente. Haʼu halo buat tuirmai: Bainhira koʼalia ho doutór ka enfermeiru, haʼu husu sira kona-ba sira-nia família. Tuirmai haʼu husu tanbasá sira hili atu halo serbisu todan neʼe. Neʼe halo fasil ba haʼu atu hili tópiku neʼebé sei book sira-nia laran. Sira balu dehan katak baibain pasiente la husu kona-ba sira-nia situasaun. Sira barak hatoʼo agradese tanba haʼu hanoin sira. Sira balu mós fó-hatene sira-nia hela-fatin no númeru telefone. Haʼu hatene katak Jeová sei ajuda haʼu tahan.  Maibé haʼu hakfodak tanba nia mós fó ksolok boot mai haʼu.”​—Prov 15:15.

12-13. Oinsá irmaun-irmán balu neʼebé moras ka idade bele kontinua haklaken? Neʼe lori rezultadu saida?

¹² Ema neʼebé moras ka idade ona karik sente laran-kraik tanba sira labele haklaken beibeik tuir sira-nia hakarak. Maibé, sira barak buka dalan atu haklaken. Irmán Laurel iha Estadus Unidus toba deʼit iha mákina nia laran neʼebé ajuda nia dada iis durante tinan 37. Nia mós hetan moras kankru, hetan operasaun boot ba dala balu no hetan moras kulit. Maski nia hasoru problema sériu oioin, maibé neʼe la hanetik nia atu haklaken. Nia haklaken ba enfermeiru sira ka ema seluk neʼebé mai ninia uma. Rezultadu mak nia ajuda maizumenus ema naʼin-17 aprende kona-ba Jeová. *

¹³ Katuas kongregasaun ida iha rai-Fransa naran Ricardo fó sujestaun kapás ba ema neʼebé labele sai husi uma tanba moras ka idade ona. Nia dehan: “Haʼu fó sujestaun atu sira tau publikasaun balu iha fatin neʼebé ema seluk bele haree. Neʼe bele book ema atu husu pergunta. Hodi haklaken hanesan neʼe, bele anima irmaun-irmán sira neʼebé labele haklaken husi uma ba uma.” No mós irmaun-irmán sira neʼebé labele sai husi uma bele haklaken liuhusi karta ka telefone.

14. David hatudu ezemplu diʼak saida?

¹⁴ Karik iha razaun oioin tanbasá ita la simu knaar balu neʼebé ita hakarak iha Jeová nia organizasaun. Porezemplu, karik ita idade ona ka iha problema saúde ka situasaun seluk tan. Se ita hasoru situasaun neʼe, ita bele aprende husi Liurai David nia ezemplu. Maski David hakarak tebes atu harii templu ba Maromak, maibé Maromak la hili nia. Maski nuneʼe, David apoia ema neʼebé Maromak hili atu halaʼo knaar neʼe. David mós fó kontribuisaun barak ba projetu neʼe. Nia hatudu duni ezemplu diʼak mai ita.​—2 Sam 7:12, 13; 1 Krón 29:1, 3-5.

15. Oinsá mak irmaun Hugo tahan hasoru laran-kraik?

¹⁵ Irmaun Hugo iha rai-Fransa, iha problema saúde, tan neʼe nia labele serbí tan nuʼudar katuas kongregasaun, no nia mós la iha forsa atu halo serbisu kiʼik sira iha uma. Nia hakerek: “Foufoun haʼu sente folin-laek no laran-kraik. Maibé liutiha tempu balu, haʼu rekoñese katak importante atu simu haʼu-nia limitasaun. Hodi halo nuneʼe, haʼu bele sente kontente atu serbí Jeová. Haʼu hakaʼas  an atu la rende an. Hanesan Gideão no mane naʼin-atus tolu neʼebé sente kole maibé kontinua luta hasoru sira-nia inimigu, haʼu mós hakaʼas an atu kontinua luta maski sente kole.”​—Juís 8:4.

16. Ita bele aprende saida husi anju sira?

¹⁶ Anju sira neʼebé laran-metin hatudu ezemplu diʼak. Durante Liurai Acab nia ukun, Jeová husu anju sira atu fó sujestaun kona-ba oinsá atu lohi Liurai Acab. Anju balu fó sujestaun. Maibé Maromak hili deʼit anju ida no hatete ba nia katak ninia sujestaun sei susesu. (1 Reis 22:19-22) Anju laran-metin sira seluk sai laran-kraik ka lae, hodi husu: ‘Tanbasá haʼu presiza preokupa ho ida-neʼe’? Sira la halo nuneʼe. Sira haraik an no hakarak fó glória hotu ba Jeová.​—Juís 13:16-18; Apok 19:10.

17. Ita sei halo saida se ita sente laran-kraik tanba la hetan knaar ruma?

¹⁷ Hanoin-hetan katak ita iha priviléjiu boot atu lori Jeová nia naran no atu haklaken kona-ba ninia Ukun. Knaar sira la permanente. Maski ita iha knaar ka lae, maibé Jeová hafolin nafatin ita. Se ita hatudu haraik an, Jeová no irmaun-irmán sira sei hafolin ita. Tan neʼe, husu Jeová ajuda ita atu kontinua hatudu haraik an. Hanoin kona-ba ezemplu husi Maromak nia atan sira neʼebé hatudu haraik an no temi iha Bíblia laran. Sai prontu atu ajuda irmaun-irmán sira tuir ita-nia situasaun.​—Sal 138:6; 1 Ped 5:5.

18-19. Oinsá mak ita bele sente ksolok bainhira haklaken iha área neʼebé ema ladún interese?

¹⁸ Dala ruma ita laran-kraik tanba ema iha ita-nia haklaken-fatin ladún interese ka ita hasoru ema uitoan deʼit. Entaun, saida mak bele ajuda ita atu mantein ka aumenta ita-nia ksolok? Ita bele haree sujestaun balu iha kaixa “ Dalan atu aumenta ksolok iha serbisu haklaken”. Importante mós atu iha hanoin neʼebé loos kona-ba serbisu haklaken. Neʼe katak sá?

¹⁹ Tau fokus atu haklaken kona-ba Maromak nia naran no ninia Ukun. Jesus hatete ho klaru katak ema uitoan deʼit sei laʼo tuir nia. (Mt 7:13, 14) Bainhira ita haklaken, ita iha priviléjiu atu serbisu hamutuk ho Jeová, Jesus no anju sira. (Mt 28:19, 20; 1 Kor 3:9; Apok 14:6, 7) Jeová mak dada ema  neʼebé hakarak serbí nia. (João 6:44) Tan neʼe, se ohin loron ema ida lakohi rona ba ita-nia mensajen, karik iha loron seluk nia sei rona ba ita.

20. Jeremias 20:8, 9 hanorin saida mai ita kona-ba luta hasoru laran-kraik?

²⁰ Ita bele aprende buat barak husi profeta Jeremias. Nia simu knaar atu haklaken iha fatin neʼebé ema barak lakohi rona ba nia. Ema insulta nia no goza nia “loron tomak”. (Lee Jeremias 20:8, 9.) Nia sai laran-kraik tebes toʼo hakarak atu rende an deʼit. Maibé nia la halo nuneʼe. Tanbasá? Tanba “Jeová nia liafuan” mak hanesan ahi neʼebé lakan iha Jeremias nia laran, no nia labele tahan netik ida-neʼe. Ita mós bele sente hanesan neʼe kuandu ita halo nakonu ita-nia neon no laran ho Maromak nia Liafuan. Neʼe mak razaun ida ba ita atu estuda Bíblia loroloron no medita kona-ba neʼe. Rezultadu mak ita bele sente haksolok liután no karik ema barak tan sei rona ba ita.​—Jer 15:16.

21. Oinsá mak ita bele manán hasoru laran-kraik?

²¹ Irmán Deborah neʼebé temi ohin hatete: “Laran-kraik mak hanesan armas ida neʼebé Satanás uza.” Maibé Jeová iha kbiit boot liu fali Satanás no ninia armas sira. Tan neʼe bainhira ita sente laran-kraik, harohan ba Jeová atu husu ninia ajuda. Nia sei ajuda ita luta hasoru ita-nia sala no ita-nia fraku. Nia sei apoia ita bainhira ita moras. Nia sei ajuda ita atu iha hanoin neʼebé loos kona-ba knaar sira. No nia sei ajuda ita iha hanoin pozitivu kona-ba serbisu haklaken. Liután neʼe, halo orasaun ba Aman Jeová no fó sai ita-nia sentimentu. Nia sei ajuda ita atu manán hasoru laran-kraik.