1. Tanbasá Abraão bele kontinua tau esperansa atu iha oan-mane ida?

 JEOVÁ promete ba ninia belun Abraão katak nasaun hotu iha mundu sei hetan bensaun liuhusi ninia bei-oan. (Gén 15:5; 22:18) Tanba Abraão fiar metin ba Maromak, neʼe halo nia fiar katak Maromak nia promesa neʼe sei sai loos. Maski nuneʼe, bainhira Abraão tinan 100 ona no ninia feen tinan 90, sira nafatin seidauk iha oan. (Gén 21:​1-7) Bíblia hatete: “Tanba esperansa neʼe, [Abraão] fiar katak nia bele sai aman ba nasaun barak. . . . Nia fiar buat neʼebé dehan sai ona.” (Rom 4:18) Ita hatene katak ikusmai Abraão nia esperansa sai loos. Nia sai aman ba Isaac, oan neʼebé nia hein ba tempu kleur ona. Tanbasá Abraão fiar metin katak Jeová sei kumpre ninia promesa?

2. Tanbasá Abraão fiar metin katak Jeová sei kumpre ninia promesa?

² Tanba Abraão iha relasaun besik ho Jeová, nia “fiar metin duni katak Maromak bele kumpre buat neʼebé nia promete ona”. (Rom 4:21) Jeová kontente ho Abraão no dehan katak nia mak ema laran-loos tanba ninia fiar. (Tgo 2:23) Hanesan temi iha Roma 4:​18, Abraão nia fiar no ninia esperansa liga malu. Mai ita haree saida mak apóstolu Paulo hatete kona-ba esperansa iha Roma kapítulu 5.

3. Paulo esplika saida kona-ba esperansa?

³ Paulo esplika tanbasá ita bele fiar katak ita-nia “esperansa neʼe sei la halo ita laran-triste”. (Rom 5:5) Nia mós  ajuda ita komprende oinsá ema Kristaun nia esperansa bele sai metin liután. Nuʼudar ita estuda kona-ba Roma 5:​1-5, hanoin kona-ba oinsá Ita-nia esperansa ba futuru sai metin liu se kompara ho uluk. Lisaun neʼe mós sei ajuda Ita atu hatene oinsá Ita bele hametin liután Ita-nia esperansa. Mai ita koʼalia uluk kona-ba esperansa furak neʼebé Paulo temi neʼebé sei la halo ita laran-triste.

4. Roma 5:​1, 2 koʼalia kona-ba saida?

⁴ Lee Roma 5:​1, 2. Paulo hakerek liafuan sira-neʼe ba kongregasaun iha Roma. Irmaun-irmán sira iha neʼebá aprende ona kona-ba Jeová no Jesus, hatudu ona fiar, no sai ona ema Kristaun. Nuneʼe “Maromak haree ona [sira] nuʼudar ema laran-loos tanba fiar” no hili sira liuhusi ninia espíritu santu. Sira bele hein namanas ba esperansa furak no fiar metin katak sira sei simu ida-neʼe.

5. Ema neʼebé Maromak hili liuhusi espíritu santu iha esperansa saida?

⁵ Paulo mós hakerek ba ema Kristaun iha Éfeso kona-ba esperansa neʼebé Maromak fó ba sira. Sira sei simu liman-rohan nuʼudar ema santu sira. (Éf 1:18) Paulo mós fó-hatene ema Kristaun iha Koloso kona-ba esperansa neʼebé sira sei simu. Nia bolu ida-neʼe “esperansa neʼebé rai hela ba [sira] iha lalehan”. (Kol 1:​4, 5) Ema neʼebé Maromak hili liuhusi espíritu santu iha esperansa atu bá lalehan no ukun hamutuk ho Jesus.—1 Tes 4:​13-17; Apok 20:6.

6. Irmaun ida neʼebé iha esperansa atu bá lalehan hatete saida?

⁶ Ema Kristaun neʼebé Maromak hili liuhusi espíritu santu hafolin tebes sira-nia esperansa. Iha tinan 1991, irmaun Frederick Franz fó sai ninia sentimentu kona-ba ninia esperansa neʼe: “Ami-nia esperansa sei sai loos duni, ami ida-idak neʼebé sai parte ba ema  naʼin-144.000 sei simu buat neʼebé Maromak promete. Ami-nia kolen sei furak liu fali buat neʼebé ami imajina.” Irmaun Frederick serbí Jeová durante tinan barak, no nia hatutan tan: “[Ami] nafatin hafolin tebes ami-nia esperansa. . . . Nuʼudar ami hein ba esperansa neʼe, ami mós kontinua hafolin liután ida-neʼe. Ami prontu atu hein maski ba tempu kleur tebes. Agora haʼu hafolin esperansa neʼe liu fali uluk.”

7-8. Jeová nia atan barak iha esperansa saida? (Roma 8:​20, 21)

⁷ Ema barak neʼebé serbí Jeová ohin loron iha esperansa neʼebé la hanesan. Sira-nia esperansa mak hanesan ho Abraão nia esperansa, neʼe mak moris ba nafatin iha rai iha Maromak nia Ukun okos. (Ebr 11:​8-10, 13) Paulo hakerek kona-ba esperansa furak neʼe. (Lee Roma 8:​20, 21.) Kuandu Ita foin aprende Bíblia nia promesa kona-ba futuru, Ita hein namanas ba saida? Karik Ita gosta loos hodi aprende katak loron ida Ita sei sai perfeitu no laʼós tan sala-naʼin. Ka karik Ita mós kontente hodi hatene katak ema neʼebé mate ona sei moris fali iha mundu paraízu. Ita hein namanas ba buat furak oioin tanba ita-nia esperansa.  

⁸ Maski ita-nia esperansa mak atu moris ba nafatin iha lalehan ka rai, maibé ita hotu iha esperansa furak neʼebé fó ita razaun atu haksolok nafatin. Ita-nia esperansa bele sai metin liután. Paulo nia liafuan tuirmai esplika kona-ba oinsá neʼe bele akontese. Mai ita aprende saida mak Paulo hakerek kona-ba ita-nia esperansa. Neʼe sei hametin liután ita-nia fiar katak ita-nia esperansa sei sai loos.

9-10. Hanesan Paulo nia ezemplu, saida mak bele akontese ba ema Kristaun? (Roma 5:3) (Haree mós foto sira.)

⁹ Lee Roma 5:3. Paulo dehan katak bainhira ita hasoru susar ita-nia esperansa  bele sai metin liután. Karik neʼe halo ita hakfodak. Tuir loloos, ema Kristaun hotu sei hasoru susar. Haree toʼok Paulo nia ezemplu. Nia hatete ba ema Kristaun iha Tesalónika: “Kuandu ami hamutuk ho imi, ami sempre fó sai nanis ba imi katak ita sei hasoru susar, no neʼe mak buat neʼebé akontese duni.” (1 Tes 3:4) No ba ema Kristaun iha Korinto, nia hakerek: “Maun-alin sira, ami hakarak atu imi hatene kona-ba terus neʼebé ami hasoru . . . Ami mós la hatene se ami sei moris ka lae.”—2 Kor 1:8; 11:​23-27.

¹⁰ Ema Kristaun ohin loron mós sei hasoru susar. (2 Tim 3:12) Oinsá ho Ita? Bainhira Ita tau fiar ba Jesus no laʼo tuir nia, Ita mós hasoru susar ka lae? Karik Ita-nia família ka belun goza Ita. Karik sira trata aat Ita. Ita mós bele hasoru susar iha serbisu-fatin tanba onestu. (Ebr 13:18) Ita hasoru ona susar husi governu tanba haklaken ka lae? Maski ita hasoru susar naran deʼit, Paulo hatete katak ita presiza haksolok. Tanbasá?

11. Tanbasá ita presiza deside metin atu tahan susar naran deʼit?

¹¹ Ita bele sente haksolok bainhira hasoru susar tanba hatene katak neʼe sei ajuda ita atu haburas hahalok importante. Roma 5:3 hatete: “Liuhusi terus ita aprende atu tahan.” Ema Kristaun hotu sei hasoru susar, tan neʼe ema Kristaun hotu presiza iha kbiit atu tahan. Ita presiza deside metin atu tahan susar naran deʼit hodi bele simu ita-nia esperansa. Jesus temi liafuan diʼak nuʼudar fini neʼebé monu iha fatuk leten neʼebé iha rai uitoan deʼit, no ita lakohi sai ema neʼebé simu liafuan diʼak iha dalan hanesan neʼe. Foufoun sira simu liafuan diʼak ho kontente, maibé kuandu hasoru terus, sira monu. (Mt 13:​5, 6, 20, 21) Klaru katak, la fasil atu hasoru susar no terus, maibé hodi tahan nafatin sei lori benefísiu mai ita. Iha dalan oinsá?

12. Benefísiu saida mak ita sei hetan bainhira ita tahan susar?

¹² Dixípulu Tiago temi kona-ba benefísiu neʼebé ita bele hetan bainhira ita tahan susar. Nia hakerek: “Hodi tahan nafatin susar, imi sei treinu didiʼak imi-nia an, atu nuneʼe imi bele sai kompletu no sai diʼak iha buat hotu, hodi la falta buat ida.” (Tgo 1:​2-4) Tiago esplika katak hahalok tahan bele treinu didiʼak ita. Neʼe katak sá? Neʼe katak hahalok tahan bele ajuda ita haburas liután pasiénsia, fiar, no sadere ba Maromak. Ita mós bele hetan benefísiu seluk tan bainhira ita tahan susar.

13-14. Saida mak rezultadu husi hahalok tahan, no oinsá neʼe liga ho esperansa? (Roma 5:4)

¹³ Lee Roma 5:4. Paulo dehan: “Kuandu ita tahan, Maromak sei simu ita.” Neʼe la dehan katak Jeová kontente bainhira Ita hasoru susar, maibé nia kontente tanba Ita tahan ho laran-metin. Ita hetan anima hodi hatene katak bainhira ita tahan, ita halo Jeová kontente!—Sal 5:12.

¹⁴ Hanoin-hetan, Abraão tahan susar ho laran-metin no Jeová haraik bensaun ba nia. Jeová haree nia nuʼudar belun no bolu nia nuʼudar ema laran-loos. (Gén 15:6; Rom 4:​13, 22) Neʼe mós bele akontese mai ita. Jeová simu ita laʼós tanba serbisu neʼebé ita halo ba nia ka priviléjiu neʼebé ita iha. Nia simu ita tanba ita tahan ho laran-metin. Ita hotu bele tahan, neʼe la depende ba idade, situasaun  moris, ka abilidade. Ita tahan daudaun susar ho laran-metin ka lae? Se nuneʼe, Ita bele sente kmaan tanba hatene katak Maromak simu Ita. Bainhira ita hatene katak Maromak simu ita, ita-nia esperansa ba ninia promesa sei sai metin liután.

15. Saida mak Paulo dehan iha Roma 5:​4, 5, no tanbasá neʼe bele halo ema balu konfuzaun?

¹⁵ Hanesan Paulo temi ona, Jeová sei simu ita se ita tahan susar ho laran-metin. Tuirmai Paulo dehan: “Kuandu Maromak simu ita, ita iha esperansa, no esperansa neʼe sei la halo ita laran-triste.” (Rom 5:​4, 5) Karik neʼe halo ema balu konfuzaun. Tanbasá? Tanba antes neʼe, iha Roma 5:2 Paulo temi katak ema Kristaun iha Roma iha ona esperansa, neʼe mak “esperansa katak [sira] sei simu glória husi Maromak”. Tan neʼe, karik ema balu husu: ‘Se ema Kristaun sira-neʼe iha ona esperansa, tanbasá Paulo temi tan kona-ba esperansa?’

16. Oinsá ema ida nia esperansa bele sai metin? (Haree mós foto sira.)

¹⁶ Ita bele komprende signifikadu husi Paulo nia liafuan hodi hanoin-hetan katak esperansa mak buat ida neʼebé kontinua sai metin. Nuʼudar ezemplu, Ita hanoin-hetan ka lae dala primeiru Ita rona kona-ba esperansa furak neʼebé temi iha Bíblia? Karik Ita hanoin katak moris ba nafatin iha mundu paraízu mak mehi deʼit. Maibé nuʼudar Ita kontinua aprende kona-ba Jeová no promesa sira iha Bíblia, Ita-nia fiar sai metin liután katak esperansa neʼe sei sai loos.

17. Depois dedika an no hetan tiha batizmu, oinsá mak Ita-nia esperansa kontinua sai metin?

¹⁷ Depois Ita dedika an no hetan tiha batizmu, Ita-nia esperansa mós kontinua sai metin nuʼudar Ita kontinua aprende no sai maduru liután. (Ebr 5:13–6:1) Karik Ita rasik mós sente ona  buat neʼebé temi iha Roma 5:​2-4. Ita hasoru susar oioin, maibé Ita tahan ida-neʼe no haree oinsá Jeová simu Ita. Tanba Ita hatene Jeová hadomi Ita, Ita iha razaun liután atu fiar katak ninia promesa sei sai loos. Ita-nia esperansa sai metin liután se kompara ho uluk. No Ita hafolin liután esperansa neʼe. Neʼe fó impaktu boot ba Ita-nia moris tomak, inklui dalan neʼebé Ita halo desizaun, uza Ita-nia tempu, no mós dalan neʼebé Ita trata Ita-nia família.

18. Jeová fó garantia saida?

¹⁸ Apóstolu Paulo temi tan pontu importante seluk kona-ba esperansa neʼebé Ita hetan kuandu Maromak simu ita. Paulo hatete katak Ita-nia esperansa sei sai loos. Tanbasá Ita bele fiar ida-neʼe? Jeová dirije Paulo atu fó garantia ba ema Kristaun katak: “Esperansa neʼe sei la halo ita laran-triste, tanba liuhusi espíritu santu neʼebé Maromak tau ona iha ita-nia laran, nia hatudu katak nia hadomi ita.” (Rom 5:5) Ita iha razaun barak atu fiar katak Ita-nia esperansa sei sai loos.

19. Ita bele fiar metin saida kona-ba Ita-nia esperansa?

¹⁹ Hanoin kleʼan kona-ba Jeová nia promesa ba Abraão no oinsá Jeová simu nia no haree nia nuʼudar belun. Ikusmai Abraão nia esperansa sai loos. Bíblia hatete: “Bainhira Abraão hatudu tiha pasiénsia, nia simu duni promesa neʼe.” (Ebr 6:15; 11:​9, 18; Rom 4:​20-22) Nia la triste kona-ba ninia esperansa. Ita mós bele fiar metin katak se Ita laran-metin nafatin Ita sei simu Ita-nia esperansa. Ita-nia esperansa mak realidade duni, no neʼe sei lori kontente mai Ita! (Rom 12:12) Paulo hakerek: “Haʼu harohan katak Maromak neʼebé fó esperansa sei halo imi nakonu ho ksolok hotu no dame liuhusi imi-nia fiar ba nia, atu nuneʼe imi bele sai nakonu ho esperansa liuhusi espíritu santu nia kbiit.”—Rom 15:13.