1. Bainhira ita hanoin kona-ba Abraão nia fiar, karik ita sei husu pergunta saida?

 MASKI ema barak rona ona kona-ba Abraão, maibé sira barak ladún hatene didiʼak kona-ba nia. Maibé Ita hatene didiʼak kona-ba Abraão. Porezemplu, Ita hatene katak Bíblia temi Abraão nuʼudar “aman ba ema hotu neʼebé iha fiar”. (Rom 4:11) Karik Ita husu: ‘Haʼu bele halo tuir Abraão nia ezemplu kona-ba fiar ka lae?’ Sin, Ita bele.

2. Tanbasá importante atu estuda kona-ba Abraão nia ezemplu? (Tiago 2:​22, 23)

² Dalan ida atu haburas fiar hanesan Abraão mak hodi estuda kona-ba ninia ezemplu. Abraão halo tuir Maromak nia mandamentu hodi muda ba fatin neʼebé dook, hela iha tenda ba tempu naruk, no prontu atu fó ninia oan-mane Isaac nuʼudar sakrifísiu. Hahalok sira-neʼe hatudu katak Abraão iha fiar neʼebé metin. Tanba Abraão nia fiar no hahalok, neʼe halo Jeová kontente no sai Jeová nia belun. (Lee Tiago 2:​22, 23.) Jeová hakarak ita hotu atu simu bensaun neʼebé hanesan. Tan neʼe nia dirije Paulo no Tiago atu hakerek Abraão nia ezemplu iha Bíblia. Mai ita haree Abraão nia ezemplu iha Roma kapítulu 4 no Tiago kapítulu 2. Paulo no Tiago temi buat neʼebé importante tebes kona-ba Abraão.

3. Paulo no Tiago temi liafuan husi eskritura saida?

³ Paulo no Tiago temi fali liafuan iha Génesis 15:​6, neʼebé dehan: “Abram tau fiar ba Jeová, no Nia haree Abram nuʼudar ema laran-loos.” Ema neʼebé laran-loos ka hatudu hahalok loos, refere ba ema neʼebé Maromak  simu. Furak tebes hodi hatene katak Maromak bele haree ema neʼebé la perfeitu no sala-naʼin nuʼudar ema laran-loos. Klaru katak Ita hakarak Maromak haree Ita nuʼudar ema laran-loos! Maibé oinsá? Mai ita aprende tanbasá Maromak bolu Abraão nuʼudar ema laran-loos, no saida mak ita bele halo atu sai ema laran-loos.

4. Saida mak hanetik ema atu sai laran-loos?

⁴ Iha Paulo nia karta ba ema Kristaun iha Roma, nia temi katak ema hotu mak sala-naʼin. (Rom 3:23) Oinsá mak Maromak bele haree ita nuʼudar ema laran-loos no simu ita? Atu ajuda ema Kristaun hatán ba pergunta neʼe, Paulo temi kona-ba Abraão nia ezemplu.

5. Tanbasá Jeová bolu Abraão nuʼudar ema laran-loos? (Roma 4:​2-4)

⁵ Jeová bolu Abraão nuʼudar ema laran-loos bainhira nia hela iha rai-Kanaan. Tanbasá Jeová bele bolu Abraão hanesan neʼe? Neʼe tanba Abraão halo tuir didiʼak Moisés nia Ukun-Fuan ka lae? Lae. (Rom 4:13) Nasaun Izraél simu Ukun-Fuan tinan 400 liutiha husi tempu neʼebé Maromak bolu Abraão nuʼudar ema laran-loos. Entaun, Jeová hatudu laran-diʼak neʼebé boot no bolu Abraão ema laran-loos tanba Abraão nia fiar.—Lee Roma 4:​2-4.

6. Tanbasá Jeová bele haree ema sala-naʼin nuʼudar ema laran-loos?

⁶ Paulo dehan katak bainhira ema ida tau fiar ba Maromak, “ema neʼe sai ema neʼebé laran-loos”. (Rom 4:5) Paulo hatutan tan: “David mós koʼalia kona-ba ksolok husi ema neʼebé Maromak haree nuʼudar ema laran-loos, maski ida-neʼe laʼós tanba ninia hahalok rasik. David dehan: ‘Ksolok ba ema neʼebé hetan ona perdua husi sira-nia hahalok aat no sira-nia sala hamoos ona. Ksolok ba ema neʼebé ninia sala Jeová la hanoin-hetan tan.’” (Rom 4:​6-8; Sal 32:​1, 2) Maromak fó perdua ka hamoos sala husi ema sira neʼebé tau fiar ba nia. Nia fó perdua iha dalan neʼebé kompletu no la hanoin tan sira-nia sala. Nia haree sira nuʼudar ema neʼebé iha hahalok loos no laran-loos tanba sira-nia fiar.

7. Tanbasá ita bele dehan katak Maromak nia atan iha tempu uluk mak ema laran-loos?

⁷ Maski Maromak bolu Abraão, David, no fiar-naʼin sira seluk nuʼudar ema laran-loos, maibé sira nafatin sala-naʼin. Maibé tanba sira-nia fiar, Maromak haree sira nuʼudar ema ho hahalok loos, liuliu bainhira kompara sira ho ema neʼebé la adora nia. (Éf 2:12) Iha Paulo nia karta, nia esplika katak ita presiza iha fiar atu bele sai Maromak nia belun. Abraão no David bele sai Maromak nia belun tanba sira hatudu fiar, nuneʼe mós ho ita.

8-9. Ema balu iha hanoin sala saida kona-ba Paulo no Tiago nia liafuan, no tanbasá?

⁸ Ba tinan barak ona, ulun-naʼin relijiaun sira diskute malu kona-ba oinsá mak fiar no hahalok liga malu. Ulun-naʼin relijiaun balu hanorin katak atu bele hetan salvasaun, ita presiza deʼit fiar ba Naʼi Jesus Kristu. Karik Ita rona sira dehan: “Atu hetan salvasaun Ita presiza tau fiar deʼit ba Jesus.” Karik ulun-naʼin relijiaun balu temi Paulo nia liafuan neʼebé dehan: ‘Maromak haree  ema ida nuʼudar ema laran-loos, maski laʼós tanba ninia hahalok rasik.’ (Rom 4:6) Ulun-naʼin relijiaun seluk dehan katak Ita bele hetan salvasaun hodi halo buat neʼebé diʼak no vizita fatin neʼebé igreja bolu nuʼudar santu. Karik sira temi liafuan husi Tiago 2:24: “Ema bele sai nuʼudar ema laran-loos liuhusi hahalok, laʼós liuhusi fiar deʼit.”

⁹ Tanba ulun-naʼin relijiaun balu fiar la hanesan, matenek-naʼin balu kona-ba Bíblia hanoin katak Paulo no Tiago la konkorda malu kona-ba saida mak ema ida tenke halo atu Maromak simu nia. Tuir ulun-naʼin relijiaun balu, Paulo fiar katak ema ida presiza iha deʼit fiar atu bele sai ema laran-loos. No Tiago hanorin katak ema ida presiza halo hahalok diʼak atu Maromak simu nia. Matenek-naʼin ida dehan: “Tiago la komprende tanbasá Paulo énfaze katak ema ida presiza deʼit iha fiar atu bele sai ema laran-loos, no Tiago la konkorda ho Paulo nia esplikasaun.” Maibé Jeová dirije Paulo no Tiago atu hakerek buat neʼebé sira halo. (2 Tim 3:16) Tan neʼe, dalan neʼebé simples atu bele komprende sira naʼin-rua nia liafuan mak hodi haree ba kontestu.

10. “Hahalok” saida mak Paulo temi? (Roma 3:​21, 28) (Haree mós dezeñu.)

¹⁰ “Hahalok” saida mak Paulo temi iha Roma kapítulu 3 no 4? Paulo temi kona-ba halo tuir Moisés nia Ukun-Fuan neʼebé Maromak fó ba ema Izraél iha Foho Sinai. (Lee Roma 3:​21, 28.) Maibé, ema Kristaun Judeu balu iha Paulo nia tempu fiar katak sira presiza nafatin halo tuir Moisés nia Ukun-Fuan. Tan neʼe, Paulo uza Abraão nia ezemplu  atu prova katak ema la presiza halo tuir Ukun-Fuan atu bele sai laran-loos. Maibé Paulo esplika katak ita presiza iha fiar. Neʼe hametin duni ita tanba neʼe hanorin ita katak se ita hatudu fiar ba Maromak no Kristu, Maromak sei simu ita.

11. Tiago koʼalia liu kona-ba “hahalok” saida?

¹¹ Maibé, “hahalok” neʼebé temi iha Tiago kapítulu 2 la hanesan ho hahalok neʼebé Paulo temi. Tiago refere ba hahalok ka atividade neʼebé ema Kristaun halo iha moris loroloron nian. Hahalok sira-neʼe hatudu sai se ema Kristaun iha fiar neʼebé metin ba Maromak ka lae. Mai ita koʼalia kona-ba ezemplu rua neʼebé Tiago uza.

12. Oinsá Tiago esplika kona-ba ligasaun entre fiar no hahalok? (Haree mós dezeñu.)

¹² Iha ezemplu primeiru, Tiago esplika katak ema Kristaun labele hatudu hahalok todan ba sorin. Nia fó sai pontu neʼe hodi uza ezemplu kona-ba mane ida neʼebé hatudu laran-diʼak ba ema riku, maibé la hafolin ema kiak. Tiago dehan katak mane hanesan neʼe karik hanoin katak nia iha fiar, maibé ninia hahalok hatudu katak nia la iha fiar. (Tgo 2:​1-5, 9) Iha ezemplu segundu, Tiago temi kona-ba ema ida neʼebé haree ninia ‘maluk fiar-naʼin presiza roupa no ai-han’, maibé nia la ajuda ninia maluk neʼe. Maski ema neʼe dehan katak nia iha fiar, maibé ninia hahalok hatudu katak nia la iha fiar. Tiago hakerek: “Se ita la hatudu liuhusi hahalok, fiar neʼe mate.”—Tgo 2:​14-17.

13. Tiago uza sé-nia ezemplu atu esplika katak ita presiza hatudu fiar liuhusi hahalok? (Tiago 2:​25, 26)

¹³ Tiago temi Raab nuʼudar ezemplu  diʼak kona-ba ema neʼebé hatudu fiar liuhusi hahalok. (Lee Tiago 2:​25, 26.) Raab rona ona kona-ba Jeová no rekoñese katak Jeová apoia povu Izraél. (Jos 2:​9-11) Nia hatudu fiar liuhusi hahalok hodi proteje espiaun naʼin-rua husi Izraél bainhira sira-nia moris iha perigu laran. Rezultadu mak Maromak haree Raab nuʼudar ema laran-loos maski la perfeitu no laʼós ema Izraél hanesan ho Abraão. Raab nia ezemplu hatudu katak importante tebes atu hatudu fiar liuhusi hahalok.

14. Tanbasá Paulo no Tiago nia liafuan sira la kontra malu?

¹⁴ Tiago no Paulo esplika kona-ba fiar no hahalok iha dalan rua neʼebé la hanesan. Paulo hatete ba ema Kristaun Judeu katak Maromak sei la simu sira se sira halo tuir deʼit Moisés nia Ukun-Fuan. Tiago tau énfaze katak ema Kristaun hotu presiza hatudu fiar hodi halo hahalok diʼak ba ema seluk.

15. Iha dalan saida deʼit mak ita bele hatudu fiar liuhusi hahalok? (Haree mós foto.)

¹⁵ Jeová la dehan katak atu sai ema laran-loos ita tenke halo tuir buat hotu neʼebé Abraão halo. Tuir loloos, iha dalan oioin atu hatudu fiar liuhusi hahalok. Ita presiza fó benvindu ba ema foun iha kongregasaun, ajuda irmaun-irmán sira, no halo buat neʼebé diʼak iha família laran. Se ita halo nuneʼe, Maromak sei kontente no haraik bensaun mai ita. (Rom 15:7; 1 Tim 5:​4, 8; 1 João 3:18) Dalan importante liu atu hatudu fiar mak liuhusi haklaken ho laran-manas kona-ba liafuan diʼak. (1 Tim 4:16) Liuhusi ita-nia hahalok, ita bele hatudu katak ita tau fiar ba Jeová nia promesa sira no ninia  dalan sira mak diʼak liu. Se ita halo nuneʼe, ita bele iha konfiansa katak Maromak sei haree ita nuʼudar ema laran-loos no bolu ita nuʼudar ninia belun.

16. Oinsá mak Abraão nia esperansa liga ho fiar?

¹⁶ Roma kapítulu 4 temi lisaun importante seluk neʼebé ita bele aprende husi Abraão, katak esperansa mak importante. Jeová promete katak liuhusi Abraão “nasaun barak” sei simu bensaun. Imajina toʼok esperansa furak neʼebé Abraão simu! (Gén 12:3; 15:5; 17:4; Rom 4:17) Maski Abraão tinan 100 ona no Sara tinan 90, promesa kona-ba oan-mane seidauk sai loos. Tuir ema nia haree, imposivel atu Abraão no Sara iha oan. Neʼe koko duni Abraão nia fiar. Maibé, “tanba esperansa neʼe, nia fiar katak nia bele sai aman ba nasaun barak”. (Rom 4:​18, 19) No ikusmai Abraão nia esperansa sai loos. Nia sai aman ba Isaac, oan neʼebé nia hein ba tempu kleur ona.—Rom 4:​20-22.

17. Oinsá mak ita hatene katak Maromak bele haree ita nuʼudar ninia belun?

¹⁷ Hanesan Abraão, Maromak bele simu ita no haree ita nuʼudar ninia belun. Paulo temi kona-ba neʼe hodi hatete: “Liafuan iha eskritura neʼebé dehan: ‘Maromak haree nia nuʼudar ema loos’, laʼós ba Abraão deʼit, maibé mós ba ita neʼebé Maromak sei haree nuʼudar ema laran-loos, tanba ita fiar ba Nia neʼebé fó moris-hiʼas ba ita-nia Naʼi Jesus husi mate.” (Rom 4:​23, 24) Hanesan Abraão, ita presiza iha fiar, hatudu hahalok diʼak, no mós esperansa. Paulo esplika kona-ba ita-nia esperansa iha Roma kapítulu 5, neʼebé ita sei aprende iha lisaun tuirmai.