Haʼu moris iha tinan 1927 iha sidade kiʼik ida besik Chicago, Illinois, Estadus Unidus. Haʼu-nia inan-aman iha oan naʼin-lima, Jetha, Don, haʼu, Karl, no Joy. Ami hotu hakaʼas an atu serbí Jeová ho laran tomak. Jetha tuir Eskola Gilead klase segundu iha tinan 1943. Don tama Betel Brooklyn iha tinan 1944, Karl iha tinan 1947, no Joy iha tinan 1951. Haʼu-nia família nia ezemplu diʼak anima haʼu atu serbí Jeová liután.

Apá no amá gosta lee Bíblia no hadomi Maromak. No sira hanorin ami atu hadomi Maromak. Uluk apá mak soldadu iha Europa durante Funu Mundiál Primeiru, tan neʼe nia lakon respeitu ba igreja. Loron ida, kuandu apá fila ho seguru husi funu, amá sente agradese ba Maromak no dehan ba apá: “Mai ita bá igreja, hanesan uluk.” Apá hatán: “Haʼu sei hamaluk ó, maibé haʼu sei la tama.” Amá husu: “Tanbasá?” Apá hatán: “Antes atu halo funu, ulun-naʼin relijiaun sira husi nasaun ida-idak fó bensaun ba sira-nia soldadu, maski loloos sira-nia relijiaun mak hanesan. Entaun Maromak sei apoia nasaun ida-neʼebé?”

Kuandu amá tuir hela misa, Testemuña naʼin-rua mai ami-nia uma. Sira oferese ba apá livru rua ho títulu Naroman neʼebé koʼalia kona-ba livru Apokalipse. Apá interese no simu livru sira-neʼe. Kuandu amá haree livru sira-neʼe, nia komesa lee kedas. Loron ida, nia haree informasaun iha jornál neʼebé konvida ema atu estuda Bíblia hodi uza livru Naroman. Entaun nia deside atu tuir. Kuandu amá toʼo iha neʼebá, ferik ida mak loke odamatan, amá hatudu livru Naroman, no husu: “Ita estuda livru neʼe iha neʼe ka?” No nia hatán: “Sin, tama lai.” Semana tuirmai amá mós lori ami bá, no depois neʼe ami tuir semana-semana.

Iha reuniaun ida, oradór husu haʼu atu lee Salmo 144:15 neʼebé dehan ema neʼebé adora Jeová mak kontente. Haʼu gosta versíkulu neʼe, no mós 1 Timóteo 1:11 neʼebé dehan katak Jeová mak “Maromak neʼebé kontente”, no Éfeso 1:5 neʼebé anima ita atu  “halo tuir Maromak nia ezemplu”. Haʼu rekoñese katak haʼu presiza sente kontente no agradese tanba haʼu iha priviléjiu atu serbí Jeová. Haʼu hakaʼas an atu halo ida-neʼe iha haʼu-nia moris tomak.

Ami-nia kongregasaun mak iha Chicago, neʼebé dook kilómetru 32. Maski nuneʼe, ami tuir beibeik reuniaun sira no haʼu-nia koñesimentu kona-ba Bíblia aumenta. Haʼu hanoin-hetan, loron ida, oradór hili Jetha atu fó komentáriu. Kuandu rona Jetha nia komentáriu, haʼu hanoin: “Haʼu mós hatene ida-neʼe. Haʼu mós bele fó komentáriu.” Haʼu komesa prepara no fó komentáriu. No importante liu mak haʼu laʼo ba oin, hamutuk ho haʼu-nia maun-alin sira. Haʼu hetan batizmu iha tinan 1941.

Reuniaun boot ida neʼebé haʼu nunka haluha mak iha tinan 1942 iha Cleveland, Ohio. Iha fatin 50 liu iha Estadus Unidus neʼebé liga ba reuniaun boot neʼe liuhusi telefone. Haʼu-nia família no família sira seluk hela iha tenda sira neʼebé besik fatin ba reuniaun boot. Iha tempu neʼebá, Funu Mundiál Segundu seidauk remata, no ema barak liután mak fó-terus ba Testemuña sira. Iha kalan, irmaun sira para karreta haleʼu tenda sira. Sira deside katak presiza iha irmaun ida neʼebé hein iha karreta ida-idak nia laran atu nuneʼe se ema ataka, irmaun sira sei halakan lampu no apita. No irmaun sira seluk bele mai ajuda. Haʼu hanoin: “Jeová nia povu prepara an ho didiʼak iha situasaun hotu.” Tanba sente seguru, haʼu bele toba-dukur, no ikusmai la iha buat ida mak akontese.

Tinan barak liutiha kuandu hanoin fali kona-ba neʼe, haʼu rekoñese katak amá la sente laran-susar ka taʼuk. Nia tau fiar tomak ba Jeová no mós organizasaun. Haʼu sei nunka haluha ninia ezemplu diʼak.

Lakleur antes reuniaun boot neʼe, amá komesa serbí nuʼudar pioneiru regulár. Tan neʼe nia rona didiʼak ba diskursu sira kona-ba serbí nuʼudar pioneiru. Iha dalan atu bá uma, nia hatete: “Haʼu hakarak kontinua pioneiru, maibé haʼu labele halo ida-neʼe no mós tau matan didiʼak ita-nia uma.” Tuirmai nia husu se ami bele ajuda nia ka lae. Ami dehan bele, no nia fó ami ida-idak knaar atu hamoos kuartu ida ka rua antes matabixu. Depois ami bá eskola, nia sei cek katak buat hotu moos ona no tuirmai bá haklaken. Maski nia sempre okupadu, maibé nia tau matan ami ho didiʼak. Bainhira ami fila ba uma atu han-meiudia ka depois fila eskola, nia sempre iha uma. Dala ruma depois fila eskola, ami haklaken hamutuk ho nia. Nia ajuda ami atu komprende serbisu pioneiru mak envolve saida deʼit.

Haʼu komesa serbí nuʼudar pioneiru bainhira haʼu tinan 16. Maski apá seidauk sai Testemuña, nia interese ho haʼu-nia serbisu haklaken. Iha kalan ida, haʼu hatete ba nia katak maski haʼu hakaʼas an ona, haʼu seidauk hetan ema neʼebé hakarak estuda  Bíblia. Tuirmai haʼu husu apá: “Apá hakarak estuda Bíblia ho haʼu ka?” Nia hanoin ba tempu balu no tuirmai konkorda. Entaun haʼu-nia estudante Bíblia primeiru mak haʼu-nia apá. Neʼe mak priviléjiu ida!

Ami estuda livru “The Truth Shall Make You Free” (“Lia-loos sei halo imi livre”). Tempu balu liutiha, haʼu rekoñese katak apá ajuda haʼu atu sai estudante no mestre neʼebé diʼak liu. Porezemplu, kalan ida depois lee tiha parágrafu, nia hatete: “Haʼu hatene buat neʼebé livru neʼe hatete. Maibé oinsá ó hatene katak livru neʼe mak loos?” Haʼu la hatene oinsá atu hatán, entaun haʼu hatete: “Haʼu labele prova ida-neʼe agora, maibé iha estuda tuirmai haʼu sei hatán.” Haʼu halo nuneʼe duni. Haʼu hetan eskritura neʼebé apoia pontu neʼebé ami estuda. Haʼu mós aprende atu halo peskiza hodi nuneʼe bele prepara didiʼak ba ami-nia estuda. Neʼe ajuda haʼu no apá atu laʼo ba oin. Apá halo tuir buat neʼebé nia aprende no hetan batizmu iha tinan 1952.

Haʼu sai husi uma kuandu haʼu tinan 17. Jetha a serbí nuʼudar misionária, no Don serbí iha Betel. Sira gosta tebes sira-nia knaar, no neʼe anima tebes haʼu. Entaun haʼu prenxe formuláriu ba Betel no mós Eskola Gilead, no entrega buat hotu ba Jeová. Ikusmai haʼu simu konvite atu serbí iha Betel iha tinan 1946.

Haʼu serbí iha Betel ba tinan 75 ona no haʼu halo knaar oioin, tan neʼe haʼu aprende buat foun barak. Haʼu aprende kona-ba oinsá atu print livru, finansas, kompras ba Betel no mós haruka sasán ba fatin seluk. Maibé buat neʼebé haʼu gosta liu mak edukasaun neʼebé haʼu simu liuhusi adorasaun dadeer nian no diskursu sira.

Haʼu mós aprende husi haʼu-nia alin Karl, neʼebé komesa serbí iha Betel iha tinan 1947. Nia mak estudante no mestre Bíblia neʼebé diʼak tebes. Tan neʼe, loron ida, haʼu husu ninia sujestaun kona-ba haʼu-nia diskursu. Haʼu esplika ba Karl katak haʼu hetan ona informasaun barak, maibé la hatene oinsá atu uza ida-neʼe. Nia ajuda haʼu hodi husu: “Saida mak tema ba ó-nia diskursu?” Haʼu komprende kedas katak haʼu presiza uza deʼit informasaun neʼebé liga ho diskursu nia tema. Haʼu nunka haluha ida-neʼe.

Atu serbí iha Betel ho kontente, ita presiza haklaken beibeik no ita sei hetan  esperiénsia neʼebé bele anima ita. Porezemplu, iha kalan ida iha Bronx, Novaiorke, haʼu no irmaun ida vizita feto neʼebé uluk simu Livru Haklaken no Matan-moris bá! Ami hatete: “Ohin, ami ajuda ema atu aprende oinsá Bíblia bele hametin ema.” Nia hatán: “Se kona-ba Bíblia, haʼu hakarak rona. Tama lai.” Ami lee no koʼalia hamutuk eskritura sira kona-ba Maromak nia Ukun no mundu foun. Neʼe book tebes ninia laran, tan neʼe nia konvida ninia kolega balu atu rona iha tempu tuirmai neʼebé ami vizita. Ikusmai nia no ninia laʼen serbí Jeová ho laran-metin.

Haʼu buka pár durante tinan 10 antes haʼu hasoru irmán neʼebé ikusmai sai haʼu-nia feen. Saida mak ajuda haʼu hetan feen neʼebé diʼak? Haʼu halo orasaun no hanoin: “Knaar saida mak haʼu hakarak halo hamutuk ho haʼu-nia feen.”

Depois reuniaun boot iha tinan 1953 iha Estádiu Yankee, haʼu hasoru irmán ida naran Mary Aniol. Nia ho Jetha tuir Eskola Gilead klase segundu. Nia no haʼu-nia biin serbí hamutuk nuʼudar misionária. Mary konta ho laran-manas kona-ba ninia knaar iha Karaíba no estudu Bíblia neʼebé nia halo. Nuʼudar ami koñese malu, ami rekoñese katak ami iha planu espirituál neʼebé hanesan. Ami-nia domin ba malu sai boot liután no ami kaben iha fulan-Abríl 1955. Mary mak prezente husi Jeová no nia hatudu ezemplu diʼak. Nia kontente atu halo knaar naran deʼit. Nia mak badinas, hanoin ema seluk, no sempre tau uluk Maromak nia Ukun. (Mt 6:33) Ami serbí nuʼudar katuas área ba tinan tolu, no iha tinan 1958, ami simu konvite atu serbí iha Betel.

Haʼu aprende buat barak husi Mary. Porezemplu, kuandu ami foin kaben, ami deside atu lee Bíblia hamutuk. Loroloron, ami lee maizumenus versíkulu 15. Depois lee tiha, ami koʼalia hamutuk kona-ba eskritura sira-neʼe no oinsá atu halo tuir iha ami-nia moris. Dala barak Mary konta kona-ba buat neʼebé nia aprende iha Eskola Gilead ka ninia esperiénsia nuʼudar misionária. Ami-nia diskusaun ajuda haʼu halo diskursu ho diʼak liután no hatene oinsá atu anima irmán sira.—Prov 25:11.

Haʼu-nia feen doben mate iha tinan 2013. Haʼu hein namanas atu hasoru fali nia iha mundu foun! Antes tempu neʼe mai, haʼu sei hakaʼas an atu kontinua aprende no tau fiar ba Jeová ho laran tomak. (Prov 3:​5, 6) Haʼu sente kmaan no kontente kuandu hanoin kona-ba buat neʼebé Jeová nia povu sei halo iha mundu foun. Neʼe inklui aprende buat foun husi ita-nia Mestre Boot. Haʼu agradese tebes ba hanorin no domin neʼebé laran-metin neʼebé haʼu simu husi Jeová.