1-2. Saida mak inan-aman presiza hanoin bainhira oan husu pergunta kona-ba Maromak no Bíblia?

 ITA barak konkorda katak atu haboot oan mak serbisu boot. Se Ita mak inan-aman neʼebé haboot hela oan, ami gaba Ita tanba hakaʼas an atu hametin sira-nia fiar. (Deut 6:​6, 7) Nuʼudar oan sai boot, karik nia sei husu pergunta importante sira kona-ba ita-nia fiar neʼebé bazeia ba Bíblia, inklui Bíblia nia hanorin kona-ba morál.

² Karik Ita hanoin katak Ita-nia oan husu pergunta sira-neʼe tanba nia la iha fiar neʼebé boot ba Maromak no Bíblia. Maibé, loloos nuʼudar oan sai boot, sira presiza husu pergunta sira atu bele hametin sira-nia fiar. (1 Kor 13:11) Tan neʼe lalika hanoin barak. Bainhira oan husu pergunta, Ita bele haree ida-neʼe nuʼudar oportunidade atu ajuda aumenta ninia kbiit atu hanoin.

3. Iha lisaun neʼe, ita sei koʼalia kona-ba saida?

³ Iha lisaun neʼe, ita sei koʼalia kona-ba oinsá inan-aman bele ajuda oan atu (1) haburas sira-nia fiar, (2) hafolin liután Bíblia nia matadalan kona-ba morál, no (3) defende sira-nia fiar. Ita mós sei koʼalia kona-ba tanbasá diʼak ba oan sira atu husu pergunta, no mós kona-ba atividade balu neʼebé bele fó oportunidade ba inan-aman atu koʼalia ho sira kona-ba ita-nia fiar.

AJUDA ITA-NIA OAN HABURAS SIRA-NIA FIAR

4. Karik oan sira sei husu pergunta saida, no tanbasá?

⁴ Inan-aman rekoñese katak fiar ba Maromak laʼós buat neʼebé automátiku deʼit. Ita la moris kedas ho fiar ba Jeová, nuneʼe mós ho Ita-nia oan. Tan neʼe, karik Ita-nia oan  komesa husu pergunta hanesan: ‘Oinsá haʼu hatene katak Maromak iha? Haʼu bele fiar duni saida mak Bíblia hatete ka lae?’ Tuir loloos, Bíblia anima ita atu uza ita-nia “kbiit atu hanoin” no “buka-hatene uluk buat hotu se neʼe mak loos ka lae”. (Rom 12:1; 1 Tes 5:21) Oinsá mak Ita bele ajuda Ita-nia oan atu hametin sira-nia fiar?

5. Saida mak inan-aman bele halo atu ajuda oan aumenta sira-nia fiar ba Bíblia? (Roma 12:2)

⁵ Anima oan buka rasik prova katak Bíblia nia hanorin mak loos. (Lee Roma 12:2.) Bainhira oan husu pergunta, uza oportunidade neʼe atu hatudu ba nia oinsá atu hetan resposta hodi uza ita-nia publikasaun sira, hanesan Livru atu ajuda Testemuña ba Jeová buka informasaun. Iha tópiku “Bíblia”, nia bele haree ba subtópiku “Eskritura hotu mai husi Maromak” atu buka-hetan evidénsia katak Maromak mak dirije ema atu hakerek Bíblia. Neʼe katak Bíblia mak “Maromak nia liafuan”. (1 Tes 2:13) Porezemplu, nia bele buka-hatene kona-ba ema Asíria nia sidade Nínive. Uluk, ema balu neʼebé la fiar Bíblia dehan katak sidade Nínive nunka eziste. Maibé maizumenus tinan 1850, matenek-naʼin sira keʼe no hetan sidade Nínive neʼebé rai mak taka tiha, no neʼe hatudu katak buat neʼebé Bíblia hatete mak loos. (Sof 2:​13-15) Atu buka-hatene oinsá Bíblia fó sai nanis kona-ba sidade Nínive, Ita-nia oan bele haree informasaun “Hakarak hatene?” iha Livru Haklaken Novembru 2021. Hodi kompara buat neʼebé nia aprende husi ita-nia publikasaun sira ho referénsia husi matenek-naʼin sira, neʼe sei ajuda Ita-nia oan aumenta ninia fiar ba Bíblia.

6. Oinsá mak inan-aman ajuda oan atu aumenta ninia kbiit atu hanoin? Fó toʼok ezemplu. (Haree mós foto.)

⁶ Ajuda oan atu aumenta ninia kbiit atu hanoin. Ita iha oportunidade oioin atu koʼalia ho oan kona-ba Bíblia ka fiar ba Maromak. Karik Ita bele hetan oportunidade atu hanorin oan kuandu vizita muzeu, laʼo iha jardín, ka vizita sukursál husi Testemuña ba Jeová. Porezemplu, bainhira vizita muzeu ka haree deʼit liuhusi vídeo ka website, Ita bele dada oan nia atensaun ba istória ka sasán sira neʼebé bele hametin ninia fiar ba Bíblia. Karik Ita bele hanorin oan kona-ba Fatuk Moab. Fatuk neʼe tinan 3.000 ona no Jeová nia naran hakerek iha fatuk  neʼe. Agora fatuk orijinál neʼe rai hela iha Muzeu Louvre iha Fransa. No mós kópia ba Fatuk Moab iha muzeu “Bíblia ho Maromak nia naran” iha Sede-Jerál husi Testemuña ba Jeová iha Warwick, Novaiorke. Fatuk Moab hakerek kona-ba Liurai Mesa husi Moab neʼebé kontra nasaun Izraél. Neʼe hanesan duni ho buat neʼebé Bíblia hatete. (2 Reis 3:​4, 5) Bainhira Ita-nia oan haree rasik evidénsia katak Bíblia mak loos, neʼe sei hametin liután ninia fiar.—Kompara ho 2 Krónikas 9:6.

7-8. (a) Saida mak ita bele aprende husi kriasaun furak iha natureza? Fó toʼok ezemplu. (Haree mós foto.) (b) Pergunta hanesan saida mak bele ajuda oan hametin sira-nia fiar ba Kriadór?

⁷ Anima oan atu hanoin kona-ba Jeová nia kriasaun. Bainhira Ita laʼo hamutuk ho oan iha foho ka jardín, diʼak atu dada ninia atensaun ba modelu furak husi kriasaun oioin. Tanbasá? Tanba neʼe mak evidénsia neʼebé prova katak tenkesér iha Kriadór ida. Porezemplu, sientista sira estuda kleur ona kona-ba modelu espirál ka dulas. Sientista kona-ba biolojia naran Nicola Fameli esplika katak bainhira konta númeru ba espirál iha kriasaun ida, ninia númeru sempre tuir orden no hanesan deʼit ho modelu espirál iha kriasaun seluk. Neʼe hanaran númeru Fibonacci. Ita bele haree modelu espirál neʼe iha kriasaun barak, hanesan galáksia, sipu tasi, ai-tahan, no ai-funan loro-matan nia parte klaran. a

⁸ Iha eskola, karik Ita-nia oan sei aprende kona-ba lei natureza neʼebé kontrola modelu ka kriasaun ida neʼebé bele mós haree iha kriasaun seluk. Porezemplu, ai-hun barak iha ninia lei neʼebé la troka. Ai-hun halo sanak, no sanak sira sai barak no ikusmai hamosu tahan. Modelu neʼe bolu nuʼudar fratál. Fratál neʼe mós bele hetan iha kriasaun seluk iha natureza. Maibé, sé mak halo lei kona-ba modelu furak neʼe? Kuandu Ita-nia oan hanoin kona-ba pergunta hanesan neʼe, neʼe mós sei hametin liután ninia fiar katak Maromak mak kria buat hotu. (Ebr 3:4) Nuʼudar oan sai boot, Ita mós presiza ajuda nia komprende tanbasá importante atu halo tuir Maromak nia matadalan. Atu halo nuneʼe, Ita bele husu pergunta hanesan: “Se Maromak mak kria ita, tuir ó-nia hanoin, nia hatene liu dalan neʼebé diʼak atu ita bele moris kontente ka lae?” Tuirmai Ita bele esplika katak Maromak fó ita Bíblia atu ita bele moris kontente.

 HAFOLIN LIUTÁN BÍBLIA NIA MATADALAN KONA-BA MORÁL

9. Karik tanbasá oan sira husu pergunta kona-ba Bíblia nia matadalan kona-ba morál?

⁹ Se Ita-nia oan husu pergunta tanbasá nia presiza halo tuir Bíblia nia matadalan kona-ba morál, koko atu buka-hatene tanbasá nia husu pergunta neʼe. Nia la konkorda ho buat neʼebé Bíblia hatete kona-ba morál? Ka nia la hatene deʼit oinsá atu esplika ida-neʼe ba ema seluk? Iha situasaun hanesan neʼe, Ita bele ajuda Ita-nia oan atu hafolin Bíblia nia matadalan hodi estuda hamutuk livru Moris Haksolok ba Nafatin. b

10. Oinsá mak Ita bele ajuda oan atu hanoin kona-ba ninia relasaun ho Jeová?

¹⁰ Anima oan atu hafolin ninia relasaun ho Jeová. Nuʼudar Ita estuda Bíblia ho Ita-nia oan, koko ajuda nia hodi uza pergunta no ilustrasaun sira iha livru Moris Haksolok ba Nafatin. (Prov 20:5) Porezemplu, lisaun 8 kompara Jeová hanesan belun neʼebé hanoin tebes ita hodi fó matadalan neʼebé bele proteje no lori benefísiu mai ita. Depois koʼalia kona-ba 1 João 5:​3, karik Ita bele husu: “Hodi hatene katak Jeová mak Belun neʼebé diʼak, ita presiza sente oinsá kona-ba buat neʼebé nia husu ita atu halo?” Pergunta neʼe haree hanesan simples, maibé neʼe bele ajuda Ita-nia oan atu haree Maromak nia lei sira nuʼudar evidénsia katak Jeová hadomi nia.—Isa 48:​17, 18.

11. Oinsá mak Ita bele ajuda oan atu hafolin liután Bíblia nia prinsípiu sira? (Provérbios 2:​10, 11)

¹¹ Koʼalia ho oan kona-ba benefísiu husi halo tuir Bíblia nia prinsípiu. Bainhira lee Bíblia ka eskritura loroloron nian hamutuk, koʼalia kona-ba oinsá Bíblia nia prinsípiu sira ajuda ona Ita-nia família. Porezemplu, Ita-nia oan haree benefísiu tanba hatudu badinas no laran-moos ka lae? (Ebr 13:18) Karik Ita mós bele esplika oinsá hodi halo tuir Bíblia nia prinsípiu bele ajuda ita atu iha saúde fíziku no mentál neʼebé diʼak. (Prov 14:​29, 30) Hodi koʼalia hamutuk prinsípiu sira hanesan neʼe, bele ajuda Ita-nia oan hafolin liután Bíblia nia matadalan.—Lee Provérbios 2:​10, 11.

12. Oinsá mak Steve ho ninia feen ajuda sira-nia oan hafolin liután Bíblia nia prinsípiu sira?

¹² Aman ida iha Fransa, naran Steve, esplika oinsá nia no ninia feen ajuda sira-nia oan joven Ethan atu komprende katak Jeová halo ukun-fuan sira tanba domin. Steve hatete: “Ami husu nia pergunta sira hanesan: ‘Tanbasá Jeová hakarak ita atu halo tuir prinsípiu neʼe? Oinsá neʼe hatudu katak nia hadomi ita? Saida mak bele akontese se ó la halo tuir prinsípiu neʼe?’” Hodi husu pergunta hanesan neʼe ajuda Ethan atu haburas ninia fiar katak buat neʼebé Jeová hatete mak loos. Steve hatutan tan: “Ami-nia objetivu mak atu ajuda Ethan haree katak matenek husi Bíblia mak folin-boot liu fali ema nia matenek.”

13. Oinsá mak inan-aman bele treinu oan atu aplika Bíblia nia prinsípiu? Fó toʼok ezemplu.

¹³ Treinu oan atu aplika Bíblia nia prinsípiu. Porezemplu, karik Ita-nia oan tenke lee livru ruma iha eskola. Karik livru neʼe konta kona-ba ema neʼebé hatudu hahalok la morál ka violénsia, no hakerek iha dalan neʼebé halo ema hanoin katak buat sira-neʼe mak la sala. Karik Ita bele anima Ita-nia oan atu hanoin kona-ba Jeová nia sentimentu ba ema  neʼebé koʼalia ka halo hahalok sira-neʼe. (Prov 22:​24, 25; 1 Kor 15:33; Flp 4:8) Neʼe sei ajuda Ita-nia oan atu komprende tanbasá diʼak atu halo tuir Jeová. No se mestre ka kolega eskola husu ninia hanoin kona-ba livru neʼe, nia hatene ona oinsá atu esplika kona-ba ninia fiar.

PREPARA ITA-NIA OAN ATU DEFENDE NINIA FIAR

14. Dala ruma joven Kristaun ida sente moe atu koʼalia kona-ba tópiku saida, no tanbasá?

¹⁴ Dala ruma joven sira sente taʼuk atu defende sira-nia fiar. Karik sira sente moe bainhira sira presiza esplika katak sira la fiar ba teoria evolusaun. Tanbasá? Neʼe tanba mestre sira dala ruma hanorin teoria evolusaun nuʼudar faktu. Se Ita mak inan-aman, oinsá mak Ita bele ajuda Ita-nia oan atu defende ninia fiar ho konfiansa?

15. Saida mak bele ajuda joven Kristaun ida atu iha konfiansa liután kona-ba ninia fiar?

¹⁵ Ajuda oan atu iha konfiansa liután kona-ba ninia fiar. Ita-nia oan la presiza sente moe tanba hatene lia-loos kona-ba kriasaun. (2 Tim 1:8) Tanbasá? Realidade mak sientista barak mós fiar katak moris la mosu mesak deʼit. Sira haree evidénsia katak iha ida neʼebé matenek mak kria moris neʼebé komplikadu. Rezultadu mak sira la simu teoria evolusaun neʼebé baibain ema aprende iha eskola iha mundu tomak. Ita-nia oan bele hametin ninia fiar hodi haree ba razaun oioin neʼebé ajuda ona irmaun-irmán barak atu fiar katak iha duni Kriadór ida. c

16. Oinsá mak inan-aman bele ajuda oan atu defende ninia fiar ba Kriadór? (1 Pedro 3:15) (Haree mós foto.)

¹⁶ Ajuda oan atu defende ninia fiar ba Kriadór. (Lee 1 Pedro 3:15.) Karik Ita bele haree ho oan informasaun kona-ba “Evolusaun no kriasaun” iha jw.org. Tuirmai, Ita-nia oan bele hili parte neʼebé karik bele ajuda ema komprende katak iha duni Kriadór ida. Fó-hanoin nia katak nia la presiza debate ho ninia kolega eskola. Anima nia atu esplika iha dalan neʼebé simples no lójiku se ema ida hakarak koʼalia kona-ba tópiku neʼe. Porezemplu, karik ninia kolega dehan: “Haʼu fiar deʼit ba buat neʼebé haʼu bele haree, no haʼu nunka haree Maromak.” Karik Ita-nia oan bele hatán: “Imajina toʼok ó  laʼo iha ai-laran neʼebé dook husi sidade no haree moru ida neʼebé hada ho fatuk. Ó sei hanoin oinsá? Tenke iha ida mak harii moru neʼe, loos ka lae? Nuneʼe mós kona-ba ita-nia planeta no kriatura hotu neʼebé moris, tenke iha ida mak kria buat sira-neʼe!”

17. Oinsá inan-aman bele ajuda oan buka oportunidade atu fahe lia-loos ba ema seluk? Esplika toʼok.

¹⁷ Ajuda oan buka oportunidade atu fahe lia-loos ba ema seluk. (Rom 10:10) Ita bele kompara ninia hakaʼas an atu koʼalia kona-ba ninia fiar ho toka instrumentu múzika ruma. Foufoun, ita aprende toka ho simples no badak. Maibé neineik-neineik ita sente fasil liu atu toka. Hanesan neʼe mós, karik foufoun Ita-nia oan haklaken iha dalan neʼebé simples. Porezemplu, karik nia bele husu pergunta ba ninia kolega: “Ó hatene ka lae, baibain ema inventa buat ruma hodi kopia buat neʼebé iha natureza? Haʼu hakarak hatudu vídeo kapás ida.” Depois hatudu tiha vídeo husi série Maromak mak kria ka lae?, nia bele dehan: “Se ema sira-neʼe hetan gaba tanba kopia buat neʼebé iha natureza, sé mak merese hetan gaba kona-ba buat furak hotu neʼebé ita haree iha natureza?” Karik neʼe sei halo ninia kolega hakarak atu aprende liután kona-ba Kriadór.

KONTINUA AJUDA ITA-NIA OAN HAMETIN NINIA FIAR

18. Oinsá mak inan-aman bele kontinua hametin oan nia fiar ba Maromak?

¹⁸ Ita moris iha mundu neʼebé nakonu ho ema neʼebé la fiar Maromak. (2 Ped 3:3) Tan neʼe, nuʼudar Ita estuda Bíblia ho Ita-nia oan, anima nia atu buka-hatene tópiku sira neʼebé bele ajuda nia atu hafolin liután Maromak nia Liafuan no matadalan kona-ba morál. Ajuda nia atu hanoin kleʼan kona-ba Jeová nia kriasaun. Ajuda nia atu komprende Bíblia nia profesia neʼebé kumpre ona. No importante liu mak halo orasaun ho Ita-nia oan no temi nia iha Ita-nia orasaun. Kuandu Ita halo nuneʼe, Ita bele fiar katak Jeová sei haraik bensaun ba Ita-nia hakaʼas an atu ajuda Ita-nia oan hametin ninia fiar.—2 Krón 15:7.