LISAUN ESTUDU 51
KNANANUK 3 Ami-nia forsa no esperansa
Jeová haree Ita-nia matan-been
“Favór ida, halibur haʼu-nia matan-been sira iha Ita-nia bee-fatin husi animál kulit. Buat sira-neʼe hotu hakerek ona iha Ita-nia livru, loos ka lae?”—SAL 56:8.
OBJETIVU
Lisaun neʼe atu fó-hanoin ita katak Jeová hatene kuandu ita triste, no nia sei ajuda ita atu sente kmaan.
1-2. Situasaun saida deʼit mak bele halo ita-nia matan-been suli?
ITA hotu dala ruma matan-been suli ka tanis. Kuandu ita hasoru situasaun neʼebé halo ita kontente tebes, neʼe bele halo ita matan-been suli. Karik Ita tanis bainhira buat espesiál ida akontese ba Ita, porezemplu bainhira Ita-nia oan moris, bainhira Ita hanoin-hetan fali memória neʼebé furak, ka bainhira hasoru fali belun neʼebé kleur Ita la hasoru.
2 Maibé, dala barak liu ita tanis tanba sente triste no hasoru susar. Porezemplu, karik ita tanis kuandu ema ruma trata aat ita. Karik ita-nia matan-been suli kuandu ita moras todan ba tempu kleur ka kuandu ema neʼebé ita hadomi mate. Iha situasaun hanesan neʼe, karik ita sente buat neʼebé hanesan ho Jeremias bainhira tropa Babilónia harahun Jeruzalein. Nia hatete: “Haʼu-nia matan-been suli hanesan mota . . . Haʼu-nia matan-been suli nafatin, haʼu tanis la para.”—Lam 3:48, 49.
3. Jeová sente oinsá bainhira haree ita hasoru susar? (Isaias 63:9)
3 Jeová hatene didiʼak dala hira ita tanis tanba situasaun susar. Bíblia hatete katak Maromak haree ita-nia susar, no nia rona bainhira ita halerik hodi husu ninia ajuda. (Sal 34:15) Maibé Jeová laʼós deʼit haree no rona, nia mós halo buat ruma atu ajuda ita. Nia mak Aman neʼebé hadomi tebes ita. Tan neʼe, bainhira nia haree ita tanis, nia mós sente triste no hakarak tebes ajuda ita.—Lee Isaias 63:9.
4. Iha lisaun neʼe, ita sei aprende kona-ba saida?
4 Liuhusi Bíblia, Jeová fó sai kona-ba saida mak nia sente bainhira ninia atan sira tanis no oinsá nia ajuda sira. Ita bele haree ida-neʼe hodi aprende kona-ba ezemplu husi Ana, David, no Liurai Ezequias. Situasaun saida mak halo sira tanis? Oinsá mak Jeová ajuda sira? No oinsá mak sira-nia ezemplu bele fó kmaan mai ita kuandu ita tanis tanba triste, ema trata aat ita, ka sente lakon esperansa?
MATAN-BEEN SULI TANBA TRISTE
5. Situasaun neʼebé Ana hasoru halo nia sente oinsá?
5 Ana hasoru susar balu neʼebé halo ninia matan-been suli. Susar ida neʼebé nia hasoru mak ninia laʼen iha feen kiʼik naran Penina, no Penina la gosta Ana. No mós, Ana labele iha oan, maibé Penina iha oan balu. (1 Sam 1:1, 2) Penina hatún beibeik Ana tanba labele iha oan. Se Ita mak iha situasaun neʼe, Ita sei sente oinsá? Ana triste tebetebes toʼo “tanis no lakohi han”, no nia sai “laran-susar tebes”.—1 Sam 1:6, 7, 10.
6. Saida mak Ana halo atu bele sente kmaan?
6 Saida mak Ana halo atu bele sente kmaan? Buat ida neʼebé ajuda nia mak nia bá tenda santu ka tabernákulu atu adora Jeová. Karik nia laʼo toʼo fatin atu tama ba pátiu, no iha fatin neʼe nia “komesa halo orasaun ba Jeová no tanis la para”. Nia harohan ba Jeová: “Haree ba Ita-nia atan nia terus no hanoin-hetan Ita-nia atan.” (1 Sam 1:10b, 11) Ana fakar sai ninia sentimentu ba Jeová liuhusi orasaun. Jeová hadomi tebes Ana. Klaru katak Jeová haree Ana nia matan-been no Nia mós sente triste.
7. Ana sente oinsá depois halo tiha orasaun ba Jeová kona-ba ninia susar?
7 Depois Ana fakar sai ninia sentimentu ba Jeová, Amlulik Boot Eli mós koʼalia hodi hametin nia. Tuirmai Ana sente oinsá? Bíblia hatete: “Nia fila no han, no ninia oin la murón tan.” (1 Sam 1:17, 18) Maski Ana nia situasaun la troka kedas, maibé nia sente kmaan. Nia fiar katak Jeová komprende ninia sentimentu no sei ajuda nia. Jeová haree Ana nia susar, rona bainhira Ana tanis, no tuirmai ajuda Ana atu iha oan.—1 Sam 1:19, 20; 2:21.
8-9. Tuir Ebreu 10:24, 25, tanbasá ita presiza hakaʼas an atu tuir reuniaun? (Haree mós foto.)
8 Lisaun mai ita. Karik Ita hasoru daudaun susar neʼebé halo Ita triste tebetebes, karik tanba ema neʼebé Ita hadomi mate. Iha situasaun hanesan neʼe, karik Ita hakarak atu mesamesak, no neʼe normál. Maibé hanesan Ana neʼebé hetan anima no sente kmaan kuandu bá tenda santu, Ita mós bele hetan kmaan hodi tuir reuniaun Kristaun, maski Ita sente triste no la iha forsa. (Lee Ebreu 10:24, 25.) Nuʼudar ita rona eskritura sira neʼebé fó kmaan iha reuniaun, Jeová bele ajuda ita atu troka ita-nia hanoin neʼebé negativu sai fali pozitivu. Neʼe bele ajuda ita sente kmaan maski ita-nia situasaun la troka kedas.
9 Iha reuniaun, ita mós bele hetan anima no kmaan hodi ransu ho irmaun-irmán sira neʼebé hadomi ita. (1 Tes 5:11, 14) Haree toʼok esperiénsia husi irmaun pioneiru espesiál ida neʼebé ninia feen mate. Nia hatete: “Dala ruma haʼu presiza mesamesak tanba tanis beibeik. Maibé reuniaun ajuda haʼu atu hetan anima neʼebé haʼu presiza. Irmaun-irmán sira-nia liafuan neʼebé hatoʼo ho laran-diʼak no sira-nia komentáriu iha reuniaun fó kmaan duni mai haʼu. Maski antes bá reuniaun haʼu sente laran-taridu no hanoin barak, maibé kuandu haʼu toʼo tiha Reuniaun-Fatin, haʼu sempre sente kmaan.” Bainhira ita tuir reuniaun, Jeová bele uza irmaun-irmán sira atu ajuda ita.
Ita bele hetan kmaan husi irmaun-irmán sira (Haree parágrafu 8-9)
10. Oinsá mak ita bele banati-tuir Ana nia ezemplu bainhira ita sente triste?
10 Ana mós hetan kmaan kuandu fakar sai ninia sentimentu ba Jeová liuhusi orasaun. Ita mós bele ‘entrega Ita-nia laran-susar hotu ba Jeová’, no fiar katak nia sei rona Ita. (1 Ped 5:7) Irmán ida neʼebé ninia laʼen mate tanba ema oho, hatete: “Haʼu-nia fuan rahun tebes no hanoin katak haʼu nunka bele sente kontente fali. Maibé bainhira haʼu halo orasaun ba Aman Jeová neʼebé hadomi tebes haʼu, neʼe halo haʼu hetan kmaan. Dala ruma haʼu la hatene oinsá atu esplika haʼu-nia sentimentu, maibé Jeová komprende haʼu. Kuandu haʼu sente triste no estrese tebes, haʼu husu Jeová atu fó haʼu dame. Tuirmai haʼu sente kedas kalma no haʼu bele halo fali buat neʼebé haʼu presiza halo ba loron neʼe.” Bainhira Ita fakar sai Ita-nia sentimentu ba Jeová, Jeová komprende Ita-nia sentimentu no nia mós sente triste. Maski problema neʼe la lakon kedas, Jeová bele fó kmaan no ajuda Ita sente kalma. (Sal 94:19; Flp 4:6, 7) Nia mós haree saida mak Ita halo daudaun atu kontinua laran-metin ba nia, no nia sei fó kolen ba Ita.—Ebr 11:6.
MATAN-BEEN SULI TANBA EMA NEʼEBÉ ITA HADOMI LA LARAN-METIN
11. David sente oinsá bainhira ema seluk trata aat nia?
11 Durante David nia moris, nia tahan situasaun susar oioin neʼebé hamonu ninia matan-been. Ema barak odi nia. Ninia família no belun mós la laran-metin ba nia no koko halo aat ba nia. (1 Sam 19:10, 11; 2 Sam 15:10-14, 30) Durante situasaun susar, David dehan: “Haʼu halerik toʼo sai kole loos; kalan tomak haʼu-nia matan-been habokon haʼu-nia kama; no haʼu-nia toba-fatin mout ona ho matan-been.” Tanbasá David tanis? Nia esplika: “Tanba ema hotu neʼebé halo aat ba haʼu.” (Sal 6:6, 7) Situasaun hanesan neʼe halo David laran-susar tebes no tanis beibeik.
12. Hanesan temi iha Salmo 56:8, David fiar metin kona-ba saida?
12 Maski David hasoru susar barak, nia fiar metin katak Jeová hadomi nia. Nia hakerek: “Jeová sei rona ba haʼu-nia lian tanis.” (Sal 6:8) Iha situasaun ida, David hakerek poezia furak neʼebé ita bele hetan iha Salmo 56:8. (Lee.) Kuandu ita lee Salmo neʼe, ita bele haree duni katak Jeová hadomi tebes ita no komprende ita-nia sentimentu. David hatete katak neʼe hanesan Jeová halibur ninia matan-been iha bee-fatin husi animál kulit ka hakerek ida-neʼe iha livru ida. David fiar duni katak Jeová haree no hanoin-hetan ninia laran-susar. Nia mós fiar metin katak Aman Jeová laʼós deʼit haree ba susar neʼebé nia hasoru, maibé hatene mós ninia sentimentu.
13. Bainhira ema hakanek ita-nia laran, saida mak ita presiza hanoin-hetan? (Haree mós dezeñu.)
13 Lisaun mai ita. Ita sente estrese tanba ema neʼebé Ita tau fiar la laran-metin tan ba Ita ka lae? Karik Ita sente laran-kanek tanba Ita-nia namora ka kaben husik hela Ita, ka ema neʼebé Ita hadomi la adora tan Jeová. Irmaun ida neʼebé ninia feen halo adultériu no husik hela nia hatete: “Haʼu labele fiar katak neʼe akontese mai haʼu. Haʼu sente la iha folin, triste, no hirus.” Se ema ruma la laran-metin ba Ita ka hakanek Ita-nia laran, Ita bele hetan kmaan hodi hatene katak Jeová sei nunka husik hela Ita. Irmaun neʼe hatete: “Ikusmai haʼu rekoñese katak ema nia relasaun bele deʼit para, maibé Jeová mak ita-nia Fatuk Boot. Maski buat naran deʼit akontese, nia sempre iha ba ita. Nia sei nunka husik hela ema neʼebé laran-metin ba nia.” (Sal 37:28) Hanoin-hetan mós katak la iha ema ida mak hadomi Ita liu fali Jeová nia domin ba Ita. Bainhira ema neʼebé Ita hadomi husik hela Ita, Jeová nafatin hanoin Ita tanba Ita mak folin-boot ba nia. (Rom 8:38, 39) Hanoin-hetan bá katak maski ema ida trata aat Ita, Ita-nia Aman Jeová nafatin hadomi Ita.
Livru Salmo hametin ita katak Jeová besik ho ita (Haree parágrafu 13)
14. Oinsá mak Salmo 34:18 fó kmaan mai ita?
14 Bainhira ema ruma la laran-metin ba ita, ita mós bele hetan kmaan husi David nia liafuan iha Salmo 34:18. (Lee.) Referénsia ida dehan katak ema neʼebé “laran-triste” bele refere ba “sira neʼebé la iha esperansa katak buat diʼak ida sei akontese”. Oinsá mak Jeová ajuda ema hanesan neʼe? Hanesan inan ka aman neʼebé hakoʼak no fó kmaan ba oan neʼebé tanis, Jeová mós “besik” ba ema neʼebé laran-susar. Bainhira ita laran-triste tanba ema neʼebé ita hadomi la laran-metin ba ita, Jeová komprende ita-nia sentimentu no prontu atu ajuda kedas ita. Nia hakarak tebes fó kmaan mai ita bainhira ita sente laran-kanek no la iha folin. No nia mós fó esperansa atu ajuda ita tahan hasoru susar sira.—Isa 65:17.
MATAN-BEEN SULI TANBA MORAS TODAN
15. Tanbasá Ezequias tanis?
15 Bainhira Liurai Ezequias tinan 39, nia sai moras todan. Profeta Isaias hatoʼo Jeová nia lia-menon katak lakleur tan Ezequias sei mate tanba moras neʼe. (2 Reis 20:1) Bainhira Ezequias rona lia-menon neʼe, nia triste tebes no tanis makaʼas tanba sente katak la iha ona esperansa. No nia halo orasaun ba Jeová atu husu ajuda.—2 Reis 20:2, 3.
16. Oinsá Jeová hatán ba Ezequias nia orasaun?
16 Ezequias nia orasaun book duni Jeová nia laran. Jeová hanoin Ezequias no hatete: “Haʼu rona ona ó-nia orasaun. Haʼu haree ona ó-nia matan-been. Haʼu sei kura ó.” Liuhusi Isaias, Jeová ho laran-sadiʼa promete atu hanaruk Ezequias nia moris no salva Jeruzalein husi ema Asíria nia liman.—2 Reis 20:4-6.
17. Oinsá mak Jeová ajuda ita kuandu ita iha moras todan? (Sal 41:3) (Haree mós dezeñu.)
17 Lisaun mai ita. Ita bele halo saida se Ita iha moras todan no sente la iha esperansa? Halo orasaun hodi fakar sai Ita-nia sentimentu ba Jeová, maski ho matan-been. Bíblia hatete katak Jeová mak “Aman neʼebé laran-sadiʼa no Maromak neʼebé fó kmaan ba ema iha situasaun hotu”, tan neʼe nia sei fó kmaan mai ita iha situasaun naran deʼit. (2 Kor 1:3, 4) Ohin loron, ita labele espera katak Jeová sei halo milagre atu halakon ita-nia susar hotu, maibé ita bele fiar katak nia sempre ajuda ita. (Lee Salmo 41:3.) Liuhusi espíritu santu, Jeová fó ita forsa, matenek, no dame atu ita bele tahan. (Prov 18:14; Flp 4:13) Nia mós fó kmaan mai ita hodi fó esperansa katak nia sei halakon moras hotu iha futuru.—Isa 33:24.
Jeová sei hatán ita-nia orasaun hodi fó ita forsa, matenek, no dame iha laran (Haree parágrafu 17)
18. Eskritura saida mak fó kmaan ba Ita bainhira hasoru situasaun susar? (Haree kaixa “ Eskritura balu neʼebé fó kmaan mai ita”.)
18 Ezequias hetan kmaan husi Jeová nia liafuan. Ita mós bele hetan kmaan husi Maromak nia Liafuan. Kuandu ita hasoru susar, Jeová nia liafuan bele ajuda ita sai kalma. (Rom 15:4) Bainhira irmán ida iha Áfrika Oeste hatene katak nia iha kankru, nia tanis beibeik. Nia konta: “Eskritura ida neʼebé halo haʼu sente kmaan mak Isaias 26:3. Maski ita labele kontrola situasaun neʼebé ita hasoru, maibé Jeová bele halo ita sente dame iha laran, no neʼe ajuda ita atu kontrola ita-nia reasaun.” Oinsá ho Ita? Eskritura saida mak fó kmaan ba Ita bainhira hasoru situasaun susar?
19. Ita hein ba futuru hanesan saida?
19 Nuʼudar mundu nia rohan besik ona, ita sei hasoru susar barak tan neʼebé halo ita matan-been suli. Maibé hanesan ita aprende ona husi Ana, David, no Liurai Ezequias nia ezemplu, Jeová haree ita-nia matan-been no hanoin ita. Nia hafolin ita-nia laran-metin no hanoin-hetan ita-nia matan-been. Tan neʼe, bainhira hasoru susar, ita hakarak duni atu fó sai ita-nia sentimentu hotu ba Jeová liuhusi orasaun. Ita mós presiza besik nafatin ho irmaun-irmán sira iha kongregasaun. No hodi lee Bíblia, ita sei hetan kmaan husi Jeová. Ita bele fiar metin katak se ita kontinua tahan ho laran-metin, Jeová sei fó kolen mai ita. Neʼe inklui promesa furak katak lakleur tan, nia sei hamaran ita-nia matan-been hotu tanba susar neʼebé ita hasoru. (Apok 21:4) Iha tempu neʼebá, ita tanis laʼós tanba triste, maibé tanba kontente.
KNANANUK 4 “Jeová mak haʼu-nia Bibi-Atan”
