LISAUN ESTUDU 49
KNANANUK 147 Maromak promete moris ba nafatin
Oinsá Ita bele hetan moris rohan-laek?
“Ema hotu neʼebé simu Oan-Mane no hatudu fiar ba nia [sei] hetan moris rohan-laek.”—JOÃO 6:40.
OBJETIVU
Aprende oinsá Jesus nia sakrifísiu lori benefísiu ba ema neʼebé iha esperansa atu bá lalehan no bibi seluk.
1. Ema balu sente oinsá kona-ba moris ba nafatin?
EMA barak koko atu halo ezersísiu no han ai-han neʼebé saudavel atu bele iha saúde diʼak no moris naruk. Maski nuneʼe, sira la espera atu bele moris ba nafatin. Sira hanoin katak imposivel atu ema bele moris ba nafatin. Maibé Jesus hatete katak ema bele hetan “moris rohan-laek”, hanesan temi iha João 3:16 no 5:24.
2. João kapítulu 6 hatete saida kona-ba moris rohan-laek? (João 6:39, 40)
2 Loron ida, Jesus halo milagre hodi fahe paun no ikan ba ema-lubun. a Neʼe halo ema barak hakfodak, maibé buat neʼebé nia hatete iha loron tuirmai halo ema hakfodak liután. Ema-lubun laʼo tuir Jesus toʼo Kafarnaum, no besik iha Tasi Galileia, nia hatete ba sira katak ema bele hetan moris-hiʼas no moris rohan-laek. (Lee João 6:39, 40.) Hanoin toʼok kona-ba Ita-nia família ka belun neʼebé mate ona. Jesus nia liafuan hatudu katak ema neʼebé mate ona sei hetan moris-hiʼas. No Ita, Ita-nia família, no belun sira bele moris ba nafatin. Maibé, bainhira ema rona Jesus nia liafuan tuirmai neʼebé hakerek iha João kapítulu 6, sira la komprende. Mai ita haree toʼok saida mak Jesus hatete.
3. Tuir João 6:51, saida mak Jesus hatete kona-ba ninia an?
3 Bainhira Jesus fó ai-han ba ema-lubun, sira hanoin kona-ba maná neʼebé uluk Jeová fó ba sira-nia beiʼala. Tuir loloos, Bíblia bolu maná nuʼudar “ai-han husi lalehan”. (Sal 105:40; João 6:31) Tuirmai, Jesus uza maná atu hanorin kona-ba buat neʼebé importante. Maski maná mak ai-han espesiál husi Maromak, sira neʼebé han ida-neʼe ikusmai mate. (João 6:49) La hanesan ho maná, Jesus bolu ninia an nuʼudar “ai-han neʼebé loos husi lalehan”, “ai-han husi Maromak”, no “ai-han moris nian”. (João 6:32, 33, 35) Jesus esplika kona-ba diferensa entre maná no ninia an rasik. Nia hatete: “Haʼu mak ai-han moris nian neʼebé tun husi lalehan. Se ema ruma han ai-han neʼe nia sei moris ba nafatin.” (Lee João 6:51.) Ema Judeu sira konfuzaun ho Jesus nia liafuan neʼe. Oinsá Jesus bele hatete katak nia mak “ai-han” husi lalehan neʼebé diʼak liu fali maná? Tuirmai Jesus hatutan tan: “Ai-han neʼebé haʼu sei fó mak haʼu-nia isin.” Neʼe katak sá? Ita presiza komprende liafuan neʼe, tanba neʼe iha ligasaun ho moris rohan-laek neʼebé Ita no mós ema neʼebé Ita hadomi sei hetan. Mai ita buka-hatene signifikadu husi Jesus nia liafuan.
AI-HAN MORIS NIAN NO JESUS NIA ISIN
4. Tanbasá ema balu hakfodak ho Jesus nia liafuan?
4 Ema balu hakfodak bainhira rona Jesus hatete katak nia sei fó ninia “isin atu fó moris ba mundu”. Karik sira hanoin katak nia hakarak sira atu han ninia isin. (João 6:52) No tuirmai Jesus hatete kona-ba buat neʼebé halo sira hakfodak liután, hodi dehan: “Se imi la han Oan-Mane husi Ema nia isin no la hemu ninia raan, imi sei la hetan moris.”—João 6:53.
5. Tanbasá ita bele fiar katak Jesus la hatete kona-ba hemu ninia raan rasik?
5 Iha Noé nia tempu, Maromak bandu ema atu han raan. (Gén 9:3, 4) Jeová fó sai fali mandamentu neʼe iha ninia Ukun-Fuan ba ema Izraél. Ema naran deʼit neʼebé han raan “tenke mate”. (Lev 7:27) Jesus hanorin ema Judeu atu halo tuir Moisés nia Ukun-Fuan hotu. (Mt 5:17-19) Tan neʼe, ita bele fiar katak Jesus la haruka ema Judeu atu han ninia isin no hemu ninia raan rasik. Maibé Jesus uza liafuan neʼebé dada sira-nia atensaun atu hanorin kona-ba oinsá mak sira bele hetan “moris rohan-laek”.—João 6:54.
6. Oinsá ita hatene katak Jesus nia liafuan iha João 6:53 mak simbóliku deʼit?
6 Jesus nia liafuan iha João 6:53 katak sá? Klaru, Jesus temi kona-ba ninia isin no raan iha dalan simbóliku. Neʼe hanesan tempu neʼebé nia koʼalia ba feto Samaria ida, hodi dehan: “Ema neʼebé hemu bee neʼebé haʼu fó, nia sei nunka sente hamrook tan, tanba bee neʼebé haʼu fó ba nia sei sai hanesan bee-matan neʼebé suli iha nia laran hodi fó nia moris rohan-laek.” (João 4:7, 14) b Jesus la hatete katak feto Samaria neʼe sei hetan moris rohan-laek hodi hemu duni bee husi bee-matan ruma. Hanesan neʼe mós, Jesus la dehan katak ema-lubun sei moris ba nafatin se sira han ninia isin no hemu ninia raan.
DIFERENSA ENTRE SITUASAUN RUA
7. Ema balu hatete saida kona-ba Jesus nia liafuan iha João 6:53?
7 Ema balu hatete katak Jesus nia liafuan iha João 6:53 esplika kona-ba buat neʼebé ema presiza halo iha Naʼi nia Han-Kalan, tanba iha tempu neʼebá nia mós uza liafuan neʼebé hanesan. (Mt 26:26-28) Sira hatete katak ema neʼebé asiste Naʼi nia Han-Kalan presiza han paun no hemu tua-uvas neʼebé pasa ba sira. Neʼe loos ka lae? Importante atu buka-hatene kona-ba neʼe tanba tinan-tinan ema millaun ba millaun iha mundu tomak halaʼo selebrasaun neʼe hamutuk ho ita. Mai ita buka-hatene diferensa entre situasaun neʼebé temi iha João 6:53 ho situasaun iha Naʼi nia Han-Kalan.
8. Saida mak diferensa entre situasaun rua neʼe? (Haree mós dezeñu.)
8 Mai ita buka-hatene diferensa entre situasaun rua neʼe. Primeiru, bainhira no iha neʼebé mak Jesus koʼalia liafuan iha João 6:53-56? Nia koʼalia ida-neʼe ba ema-lubun iha Galileia iha tinan 32 EC. Neʼe maizumenus tinan ida antes nia halaʼo Naʼi nia Han-Kalan iha Jeruzalein. Segundu, Jesus koʼalia ba sé? Iha João 6:53, Jesus koʼalia ba ema-lubun neʼebé fokus liu kona-ba ai-han duké buat espirituál nian. (João 6:26) Bainhira Jesus koʼalia buat neʼebé sira la komprende, sira la fiar tan nia. Jesus nia dixípulu balu mós husik tiha nia. (João 6:14, 36, 42, 60, 64, 66) Ema sira-neʼe la hanesan duni ho apóstolu naʼin-11 neʼebé hamutuk ho Jesus iha Naʼi nia Han-Kalan iha tinan 33 EC. Iha tempu neʼebá, apóstolu sira-neʼe laran-metin ba Jesus maski seidauk komprende ho loloos ninia hanorin balu. La hanesan ho ema iha Galileia, apóstolu sira-neʼe fiar metin katak Jesus mak Maromak nia Oan neʼebé mai husi lalehan. (Mt 16:16) Tan neʼe Jesus gaba sira hodi dehan: “Imi laran-metin ona ba haʼu durante haʼu-nia susar sira.” (Lc 22:28) Diferensa rua neʼe mós hatudu ona katak Jesus nia liafuan iha João 6:53 la hanesan duni ho buat neʼebé nia hatete iha Naʼi nia Han-Kalan. No iha mós diferensa seluk tan.
João kapítulu 6 fó sai Jesus nia liafuan ba ema-lubun iha Galileia (karuk). Liutiha tinan ida, nia koʼalia ba ninia apóstolu naʼin-11 iha Jeruzalein (loos) (Haree parágrafu 8)
JESUS NIA LIAFUAN KATAK SÁ BA ITA
9. Jesus nia liafuan iha Naʼi nia Han-Kalan aplika ba sé?
9 Durante Naʼi nia Han-Kalan, Jesus oferese paun neʼebé la iha fermentu ba ninia apóstolu sira no hatete katak paun neʼe reprezenta ninia isin. Tuirmai nia fó ba sira tua-uvas no hatete katak neʼe reprezenta “raan aliansa nian”. (Mc 14:22-25; Lc 22:20; 1 Kor 11:24) Liafuan neʼe importante tebes. Aliansa neʼe bolu nuʼudar “aliansa foun”. Neʼe mak aliansa neʼebé Jeová halo ho “umakain Izraél [espirituál]” neʼebé sei ukun hamutuk ho Jesus iha “Maromak nia Ukun”, neʼe laʼós aliansa ho ema hotu. (Ebr 8:6, 10; 9:15) Iha tempu neʼebá apóstolu sira ladún komprende, maibé lakleur sira simu espíritu santu no sai parte ba aliansa foun atu bele hamutuk ho Jesus iha lalehan.—João 14:2, 3.
10. Saida tan mak diferensa entre Jesus nia liafuan iha Naʼi nia Han-Kalan no iha Galileia? (Haree mós dezeñu.)
10 Buat neʼebé Jesus hatete durante Naʼi nia Han-Kalan aplika deʼit ba “bibi-lubun kiʼik”. Ema primeiru neʼebé sai parte ba grupu kiʼik neʼe mak apóstolu sira neʼebé hamutuk ho Jesus iha ninia han-kalan ikus. (Lc 12:32) Sira han paun no hemu tua-uvas bainhira Jesus oferese ba sira. No ema seluk neʼebé sei sai parte ba grupu neʼe mós presiza halo buat neʼebé hanesan bainhira sira komemora Naʼi nia Han-Kalan. Sira mak ema neʼebé sei hamutuk ho Jesus iha lalehan. Jesus nia liafuan ba apóstolu sira iha Naʼi nia Han-Kalan la hanesan duni ho ninia liafuan iha Galileia neʼebé nia koʼalia ba ema-lubun neʼebé sura labele.
Sira neʼebé han paun no hemu tua-uvas mak ema uitoan deʼit, maibé ema hotu bele iha oportunidade atu hatudu fiar ba Jesus no moris ba nafatin (Haree parágrafu 10)
11. Bainhira Jesus iha Galileia, ninia liafuan saida mak hatudu katak nia la koʼalia kona-ba grupu kiʼik?
11 Bainhira Jesus iha Galileia iha tinan 32 EC, ema Judeu barak hakarak atu hetan ai-han husi nia. Maibé Jesus dada sira-nia atensaun ba buat neʼebé importante liu fali ai-han. Nia fó sai buat neʼebé sei ajuda sira atu hetan moris ba nafatin. No Jesus hatete katak sira neʼebé mate ona bele hetan moris-hiʼas iha loron ikus no bele moris ba nafatin. Jesus la koʼalia kona-ba ema uitoan deʼit, hanesan iha Naʼi nia Han-Kalan. Iha Galileia, Jesus dada ema nia atensaun ba bensaun neʼebé ema hotu bele hetan. Nia hatete: “Se ema ruma han ai-han neʼe nia sei moris ba nafatin. Loloos, ai-han neʼebé haʼu sei fó mak haʼu-nia isin atu fó moris ba mundu.”—João 6:51. c
12. Saida mak ita presiza atu bele hetan moris ba nafatin?
12 Jesus la hatete ba ema Judeu iha Galileia katak ema hotu neʼebé moris ona ka ema hotu neʼebé sei moris mai sei hetan bensaun neʼe. Maibé ida neʼebé sei hetan mak ema neʼebé “han ai-han neʼe”, katak ema neʼebé hatudu fiar ba Jesus. Ema barak neʼebé bolu sira-nia an nuʼudar Kristaun sente katak hodi iha deʼit fiar ba Jesus nuʼudar salvadór mós toʼo ona atu bele hetan salvasaun. (João 6:29) Maibé tuir loloos fiar deʼit la toʼo. Ema barak iha Galileia neʼebé foufoun fiar ba Jesus ikusmai husik hela nia. Tanbasá?
13. Saida mak ita presiza halo atu bele sai Jesus nia dixípulu neʼebé loos?
13 Ema barak husi ema-lubun laʼo tuir Jesus tanba hakarak buat ruma husi Jesus. Sira hakarak Jesus atu kura sira, fó sira ai-han, no koʼalia ba sira kona-ba buat neʼebé sira hakarak rona. Maibé, Jesus hatudu ho klaru katak nia mai iha mundu laʼós atu fó buat neʼebé sira hakarak. Nia mai atu hanorin sira kona-ba saida mak sira presiza halo atu bele sai ninia dixípulu neʼebé loos. Sira presiza ‘hakbesik ba nia’ hodi simu no halo tuir ninia hanorin hotu.—João 5:40; 6:44.
14. Saida mak ita presiza halo atu hetan benefísiu husi Jesus nia sakrifísiu?
14 Jesus hanorin ema-lubun katak hodi fó ninia isin no raan nuʼudar sakrifísiu, neʼe loke dalan ba sira atu bele moris ba nafatin. Maibé sira presiza hatudu fiar ba Jesus nia sakrifísiu neʼe. Fiar hanesan neʼe importante tebes ba ema Judeu sira no mós ba ita ohin loron. (João 6:40) Sin, atu bele hetan benefísiu husi Jesus nia isin no raan, hanesan temi iha João 6:53, ita presiza hatudu fiar ba Jesus nia sakrifísiu. No oportunidade neʼe loke ba ema hotu.—Éf 1:7.
15-16. Lisaun importante saida deʼit mak ita aprende husi João kapítulu 6?
15 Iha João kapítulu 6, ita aprende ona buat barak neʼebé importante no anima tebes ita hotu. Ita aprende katak Jesus hanoin tebes ema. Iha Galileia, nia kura ema neʼebé moras, hanorin kona-ba Maromak nia Ukun, no fó ai-han ba ema-lubun. (Lc 9:11; João 6:2, 11, 12) Importante liu mak nia hanorin katak nia mak “ai-han moris nian”.—João 6:35, 48.
16 Klaru katak sira neʼebé Jesus bolu nuʼudar ‘bibi seluk’ labele no la presiza han paun ka hemu tua-uvas iha Naʼi nia Han-Kalan. (João 10:16) Maski nuneʼe, sira nafatin hetan benefísiu husi Jesus Kristu nia isin no raan. Sira hetan benefísiu neʼe liuhusi hatudu fiar ba Jesus nia sakrifísiu neʼebé folin-boot. (João 6:53) La hanesan ho bibi seluk, sira neʼebé han paun no hemu tua-uvas iha Naʼi nia Han-Kalan hatudu katak sira mak parte ba aliansa foun no iha esperansa atu ukun hamutuk ho Jesus iha lalehan. Tan neʼe, maski ita iha esperansa atu bá lalehan ka moris iha rai, liafuan iha João kapítulu 6 mak importante tebes mai ita hotu. Neʼe hanorin ita katak ita tenke iha fiar neʼebé metin ba Jesus nia sakrifísiu atu bele hetan moris ba nafatin.
KNANANUK 150 Buka Jeová hodi salva Ita
a Lisaun antes neʼe esplika ona kona-ba João 6:5-35.
b Bee neʼebé Jesus temi reprezenta buat neʼebé Jeová halo iha tempu uluk no agora atu ema bele moris ba nafatin.
c João kapítulu 6 uza beibeik liafuan neʼebé bele fó ideia “ema naran deʼit” no “ema hotu” kuandu koʼalia kona-ba sira neʼebé sei hetan moris ba nafatin.—João 6:35, 40, 47, 54, 56-58.
