1. Ita hotu presiza halo saida?

SE ITA sente kole ka moras, Ita gosta atu hola parte iha halai-taru neʼebé susar ka lae? Karik lae. Maibé apóstolu Paulo hatete katak ema Kristaun hotu hola parte daudaun iha halai-taru ida. (Ebr 12:1) No ita hotu maski joven ka idade ona, iha enerjia ka sente kole, ita presiza kontinua halai toʼo rohan se ita hakarak simu kolen husi Jeová.—Mt 24:13.

2. Tuir 2 Timóteo 4:7, 8, tanbasá Paulo bele fó konsellu kona-ba halai-taru?

² Paulo bele fó konsellu kona-ba tópiku neʼe tanba nia ‘halai toʼo rohan’ ho susesu. (Lee 2 Timóteo 4:7, 8.) Maibé halai-taru neʼebé Paulo temi katak sá?

3. Paulo koʼalia kona-ba halai-taru saida?

³ Dala ruma Paulo hakerek kona-ba buat neʼebé ema halo durante kompetisaun sira iha rai-Grésia antigu atu hanorin lisaun importante. (1 Kor 9:25-27; 2 Tim 2:5) Nia mós kompara ema Kristaun nia moris ho halai-taru. (1 Kor 9:24; Flp 2:16) Ema ida komesa hola parte iha halai-taru neʼe bainhira nia dedika an ba Jeová no hetan batizmu. (1 Ped 3:21) Ninia halai-taru neʼe remata bainhira nia simu prezente moris rohan-laek husi Jeová.—Mt 25:31-34, 46; 2 Tim 4:8.

4. Iha lisaun neʼe, ita sei aprende kona-ba saida?

⁴ Saida mak hanesan entre halai maratona no moris nuʼudar ema Kristaun? Iha buat barak neʼebé hanesan. Mai ita koʼalia kona-ba buat tolu. Primeiru, ita presiza halai iha dalan neʼebé loos. Segundu, ita presiza fokus  atu halai toʼo rohan. Terseiru, ita presiza kontinua halai maski mosu problema.

5. Ita presiza halai iha dalan ida-neʼebé, no tanbasá?

⁵ Atu bele manán prémiu, ema neʼebé halai-taru presiza halai tuir dalan neʼebé deside ona. Nuneʼe mós, se ita hakarak atu hetan moris ba nafatin, ita tenke moris tuir dalan Kristaun nian. (Após 20:24; 1 Ped 2:21) Maibé, Satanás no sira neʼebé apoia nia, lakohi ita atu moris tuir dalan Kristaun nian. Sira hakarak ita atu halai-taru iha dalan uluk nian hamutuk ho sira. (1 Ped 4:4) Sira goza ita tanba ita-nia dalan atu halaʼo moris no dehan katak sira-nia dalan mak diʼak liu no lori liberdade. Maibé neʼe mak la loos.—2 Ped 2:19.

6. Saida mak Ita aprende husi Brian nia ezemplu?

⁶ Ema neʼebé hetan influénsia husi Satanás nia mundu, ikusmai sei rekoñese katak dalan neʼebé sira halaʼo sira-nia moris la lori liberdade, maibé halo sira sai atan. (Rom 6:16) Hanoin toʼok Brian nia ezemplu. Ninia inan-aman anima nia atu moris tuir dalan Kristaun nian. Maibé bainhira nia joven, nia duvida se dalan neʼe bele lori kontente ba nia. Brian deside atu halaʼo moris hanesan ho ema sira neʼebé moris tuir Satanás nia hanoin. Brian hatete: “Haʼu la hatene katak liberdade neʼebé haʼu hakarak hetan sei halo haʼu sai atan ba toman aat oioin. Lakleur haʼu komesa uza droga, hemu tua demais, no halaʼo moris neʼebé la morál. Durante tinan balu depois neʼe, haʼu mós komesa uza droga neʼebé forte liu no haʼu sai atan ba droga oioin. . . . Haʼu mós komesa faʼan droga atu bele kontinua moris hanesan neʼe.” Ikusmai, Brian deside atu moris tuir Jeová nia matadalan sira. Brian troka ninia moris no hetan batizmu iha tinan 2001. Agora nia kontente tebes atu moris tuir dalan Kristaun nian. *

7. Saida mak dalan rua neʼebé temi iha Mateus 7:13, 14?

⁷ Importante tebes atu halaʼo moris tuir dalan neʼebé loos. Satanás hakarak ita hotu atu para halai iha dalan kloot neʼebé “lori ema ba moris”, no nia hakarak ita atu halai fali iha dalan luan neʼebé ema barak iha mundu neʼe halai. Ema barak gosta dalan neʼe no fasil atu halai iha dalan neʼe. Maibé dalan neʼe “lori ema ba mate”. (Lee Mateus 7:13, 14.) Atu bele  kontinua halai iha dalan neʼebé loos no la husik buat ida dada ita-nia atensaun, ita presiza tau fiar ba Jeová no rona ba nia.

8. Se ema ida sidi bainhira halai-taru, nia presiza halo saida?

⁸ Ema neʼebé hola parte iha halai maratona hateke ba dalan iha oin atu nuneʼe labele sidi. Maski nuneʼe, dala ruma ema seluk neʼebé halai-taru ho sira karik halo sira sidi ka karik sira-nia ain tama ba estrada kuak. Se sira monu, sira presiza hamriik fali no kontinua halai. Sira la tau fokus ba buat neʼebé halo sira sidi, maibé tau fokus liu atu halai toʼo rohan no manán prémiu.

9. Se ita sidi, saida mak ita presiza halo?

⁹ Iha ita-nia halai-taru, karik ita sidi dala barak, no halo sala liuhusi ita-nia liafuan no hahalok. Ka ita-nia maluk neʼebé halai-taru ho ita karik halo sala neʼebé hakanek ita-nia laran. Ita la hakfodak kona-ba neʼe. Ita hotu la perfeitu no halai iha dalan kloot neʼebé lori ba moris. Tan neʼe dala ruma ita bele xoke malu. Paulo rekoñese katak dala ruma ita hotu halo buat neʼebé hakanek ema nia laran. (Kol 3:13) Maibé duké tau fokus ba buat neʼebé halo ita sidi, diʼak liu tau fokus ba prémiu neʼebé iha ita-nia oin. Se ita sidi, diʼak atu hamriik fali no kontinua halai. Se ita sai hirus, rai odi no lakohi atu hamriik fali, ita sei la halai toʼo rohan no la simu prémiu. Dala ruma, ita mós bele halo sidi ema seluk neʼebé hakaʼas an atu halai iha dalan kloot neʼebé lori ba moris.

10. Oinsá atu ita la halo sidi ema seluk?

¹⁰ Dalan seluk atu la halo ema seluk sidi mak la obriga sira atu halo tuir deʼit ita-nia hakarak. (Rom 14:13, 19-21; 1 Kor 8:9, 13) Iha dalan neʼe mak ita la hanesan ho ema neʼebé tuir kompetisaun halai-taru. Sira kompete malu, no sira ida-idak hakaʼas an atu manán prémiu. Ema sira-neʼe hanoin deʼit atu manán prémiu. Tan neʼe karik sira koko atu dudu sees ema seluk hodi sira bele halai ba oin. Maibé ita la kompete malu. (Gal 5:26; 6:4) Ita-nia objetivu mak atu  ajuda ema barak halai hamutuk ho ita toʼo rohan no simu prémiu moris rohan-laek. Tan neʼe ita hakaʼas an atu aplika Paulo nia konsellu neʼebé dehan: “Keta buka diʼak deʼit ba imi-nia an rasik, maibé buka mós ema seluk nia diʼak.”—Flp 2:4.

11. Ema neʼebé halai-taru tau fokus ba saida, no tanbasá?

¹¹ Ema neʼebé halai-taru tau fokus ba dalan iha oin no mós tau fokus atu halai toʼo rohan. Maski sira labele haree dalan nia rohan, maibé sira imajina kona-ba neʼe no mós kona-ba prémiu. Sira laran-manas nafatin tanba hanoin kona-ba prémiu.

12. Jeová fó ona garantia saida mai ita?

¹² Jeová fó ona garantia katak ninia povu sei hetan prémiu moris rohan-laek iha rai ka iha lalehan bainhira sira remata sira-nia halai-taru. Eskritura sira esplika kona-ba prémiu neʼe, tan neʼe ita bele imajina kona-ba buat furak neʼebé ita sei hetan. Bainhira ita kontinua hanoin kona-ba Jeová nia promesa sira, ita sei la husik buat ida halo ita sidi maibé ita sei hakaʼas an atu halai toʼo rohan.

13. Tanbasá mak ita-nia situasaun diʼak liu fali ema neʼebé halai-taru?

¹³ Ema neʼebé halai-taru iha rai-Grésia antigu tenke tahan hasoru susar oioin hanesan kole no moras. No buat neʼebé ajuda sira mak sira-nia treinu no sira-nia forsa rasik. Ita mós simu treinu kona-ba oinsá atu halai-taru. Maibé ita-nia situasaun diʼak liu fali sira. Ita bele hetan forsa husi Jeová no neʼe la iha limite. Se ita sadere ba Jeová, nia promete atu treinu ita no mós fó kbiit ba ita.—1 Ped 5:10.

14. Oinsá mak 2 Korinto 12:9, 10 ajuda ita atu tahan hasoru susar sira?

¹⁴ Paulo tahan hasoru susar barak. Ema insulta no kontra nia. Dala ruma nia sente fraku no nia presiza tahan hasoru susar neʼebé nia bolu nuʼudar ‘ai-tarak iha isin’. (2 Kor 12:7) Maibé duké haree susar sira-neʼe nuʼudar razaun atu rende an, nia haree ida-neʼe nuʼudar oportunidade atu sadere ba Jeová. (Lee 2 Korinto 12:9, 10.) Tanba Paulo iha hanoin hanesan neʼe, Jeová ajuda nia atu tahan hasoru ninia susar hotu.

15. Se ita banati-tuir Paulo, ita bele sente saida?

¹⁵ Dala ruma ema mós insulta ka kontra ita tanba ita-nia fiar. Karik ita mós presiza tahan hasoru susar tanba moras ka kole. Maibé se ita banati-tuir Paulo, ita sei haree susar ida-idak nuʼudar oportunidade atu bele sente Jeová nia ajuda.

16. Maski Ita moras, Ita bele halo saida?

¹⁶ Agora daudaun Ita moras no latan deʼit iha kama ka tuur iha kadeira-roda ka lae? Ita-nia ain sai fraku ka matan haree la moos ka lae? Se nuneʼe, Ita bele halai hamutuk ho joven sira no ema neʼebé iha saúde diʼak ka lae? Bele duni. Ema barak neʼebé idade ona no moras, halai daudaun iha dalan neʼebé lori ba moris. Sira halo ida-neʼe laʼós ho sira-nia kbiit rasik. Maibé sira hetan forsa husi Jeová hodi rona ba reuniaun sira liuhusi telefone ka haree liuhusi vídeo streaming. Sira mós haklaken ba doutór, enfermeiru no família sira.

17. Jeová sente oinsá kona-ba sira neʼebé iha limitadu tanba problema saúde?

¹⁷ Se Ita labele halo buat barak ba Jeová tuir Ita-nia hakarak, keta sai laran-kraik no hanoin katak Ita fraku liu atu  halai iha dalan neʼebé lori ba moris. Jeová hadomi Ita tanba Ita tau fiar ba nia no mós tanba buat hotu neʼebé Ita halo ona ba nia. Agora Ita presiza liután Jeová nia ajuda, no nia sei nunka husik Ita. (Sal 9:10) Nia sei hakbesik liután ba Ita. Irmán ida neʼebé hasoru problema saúde hatete: “Tanba haʼu-nia saúde kontinua sai aat liután, haʼu la iha oportunidade barak atu fahe lia-loos ba ema seluk. Maibé haʼu hatene katak Jeová kontente ho buat neʼebé haʼu halo maski uitoan deʼit, no neʼe halo haʼu kontente.” Bainhira Ita sente laran-kraik, hanoin-hetan katak Ita la mesak. Hanoin kona-ba apóstolu Paulo nia ezemplu, no mós ninia liafuan furak tuirmai neʼe: “Haʼu haksolok iha haʼu-nia fraku . . . Kuandu haʼu fraku, haʼu iha kbiit.”—2 Kor 12:10.

18. Ema balu hasoru susar saida? Tanbasá situasaun neʼe susar tebes?

¹⁸ Ema balu hasoru susar seluk nuʼudar sira halai-taru atu manán moris. Sira tahan hasoru susar neʼebé karik ema seluk labele haree ka komprende. Porezemplu, sira presiza tahan hasoru depresaun ka laran-taridu demais. Tanbasá mak sira-nia situasaun neʼe susar tebes? Tanba se ema ida liman tohar ka tuur iha kadeira-roda, ema seluk bele haree kedas ninia problema no karik sei fó ajuda. Maibé, se ema iha problema mentál ka emosaun, karik susar ba ema seluk atu nota sira-nia problema. Tuir loloos sira-nia situasaun mós susar hanesan ho ema neʼebé liman ka ain tohar. Maibé tanba ema labele haree sira-nia susar, entaun karik sira la hetan ajuda no domin husi ema seluk.

19. Ita aprende saida husi Mefiboset nia ezemplu?

¹⁹ Se Ita iha limitasaun no sente katak ema la komprende Ita, Ita bele hetan anima husi Mefiboset nia ezemplu. (2 Sam 4:4) Nia tahan susar tanba aleijadu, no Liurai David hanoin sala kona-ba nia. Susar sira-neʼe kona Mefiboset laʼós tanba nia halo sala. Maibé, nia la sai hirus ka laran-kraik. Nia hatudu agradese ba buat diʼak neʼebé nia hetan. Nia agradese tanba uluk David hatudu laran-diʼak ba nia. (2 Sam 9:6-10) Tan neʼe bainhira David hanoin sala kona-ba nia, nia hanoin kona-ba buat neʼebé importante liu. Nia la husik David nia sala atu halo nia hirus. No nia la fó sala ba Jeová kona-ba buat neʼebé David halo. Mefiboset tau fokus ba buat neʼebé nia bele halo atu apoia liurai neʼebé Jeová hili ona. (2 Sam 16:1-4; 19:24-30) Jeová dirije ema atu hakerek Mefiboset  nia ezemplu furak iha Bíblia atu bele ajuda ita.—Rom 15:4.

20. Oinsá mak laran-taridu bele afeta ema balu? Maibé sira bele iha konfiansa kona-ba saida?

²⁰ Tanba laran-taridu demais, irmaun-irmán balu sente taʼuk no la fiar an bainhira hamutuk ho ema seluk. Sira sente susar atu hamutuk ho ema barak, maski nuneʼe sira kontinua tuir reuniaun no reuniaun boot sira. Sira sente susar atu koʼalia ho ema oin-foun, maski nuneʼe sira haklaken ba ema seluk. Se Ita hasoru situasaun sira-neʼe, fiar metin bá katak Ita la mesak. Ema barak mós hasoru situasaun hanesan. Hanoin-hetan katak Jeová kontente tanba Ita serbí nia ho laran tomak. Tanba Ita la rende an, neʼe hatudu katak Jeová haraik bensaun ba Ita no fó ba Ita kbiit neʼebé Ita presiza. * (Flp 4:6, 7; 1 Ped 5:7) Se Ita kontinua serbí Jeová maski iha limitasaun fíziku no emosaun, Ita bele iha konfiansa katak Jeová kontente ho Ita.

21. Ita bele halo saida ho Jeová nia ajuda?

²¹ Ita agradese tanba halai-taru neʼebé Paulo temi la hanesan duni ho kompetisaun halai-taru seluk. Iha Bíblia nia tempu, bainhira ema halai-taru, ema ida deʼit mak sei manán prémiu. Maibé ema Kristaun hotu neʼebé kontinua halai toʼo rohan sei hetan prémiu moris rohan-laek. (João 3:16) Ema neʼebé halai-taru, tenke iha saúde diʼak, se lae sira labele manán. Maibé, ita barak iha limitasaun fíziku, maski nuneʼe ita tahan nafatin. (2 Kor 4:16) Ho Jeová nia ajuda, ita bele halai toʼo rohan.