1. Bíblia fó sai lia-loos furak saida kona-ba Jeová? No tanbasá neʼe fó kmaan ba ita?

ITA gosta ka lae bainhira ema tesi-lia ba Ita tuir deʼit Ita-nia kulit nia kór, Ita-nia oin ka isin? Karik Ita la gosta. Maibé ita sente kontente tebes tanba Jeová la tesi-lia ba ita tuir buat neʼebé nia bele haree husi liʼur. Porezemplu, bainhira Samuel haree Jessé nia oan-mane sira, nia la haree buat neʼebé Jeová haree. Jeová hatete ona ba Samuel katak Jessé nia oan-mane ida sei sai liurai iha Izraél. Maibé oan ida-neʼebé? Bainhira Samuel haree Jessé nia oan-mane boot naran Eliab, Samuel hatete: “Nia mak ema neʼebé Jeová hili ona.” Karik neʼe tanba Eliab nia oin-kapás. “Maibé Jeová hatete ba Samuel: ‘Keta haree deʼit ba ninia oin ka ain-aas, tanba haʼu la simu nia.’” Ita aprende saida? Jeová hatutan tan: “Ema haree deʼit buat neʼebé iha liʼur, maibé Jeová haree ema nia laran.”—1 Sam 16:1, 6, 7.

2. João 7:24 hatete katak ita labele tesi-lia ba ema tuir deʼit buat neʼebé ita haree. Tanbasá? Fó toʼok ezemplu.

² Tanba ita la perfeitu, dala barak ita lalais atu tesi-lia ba ema tuir deʼit buat neʼebé ita haree. (Lee João 7:24.) Maibé bainhira ita haree ema, ita hatene uitoan deʼit kona-ba ema neʼe. Porezemplu, maski doutór ida matenek no iha esperiénsia, maibé nia labele hatene didiʼak pasiente nia moras se nia hateke deʼit ba pasiente. Nia presiza rona didiʼak atu bele hatene pasiente nia kondisaun, emosaun, ka sintoma sira neʼebé pasiente sente. Karik doutór mós haruka nia atu hasai raiu-xís atu haree moras iha laran. Se doutór la halo nuneʼe, karik nia sei fó tratamentu sala. Nuneʼe mós, ita labele komprende didiʼak ita-nia irmaun-irmán sira hodi haree deʼit ba sira-nia  oin ka jeitu. Ita tenke hakaʼas an atu komprende sira-nia laran. Tuir loloos, ita labele hatene ema nia laran, tan neʼe ita sei nunka komprende didiʼak ema hanesan Jeová komprende sira. Maibé ita bele hakaʼas an atu banati-tuir Jeová. Oinsá?

3. Oinsá mak istória husi Bíblia neʼebé ita sei aprende iha lisaun neʼe bele ajuda ita atu banati-tuir Jeová?

³ Oinsá Jeová haree ninia atan sira? Nia rona ba sira, komprende sira-nia situasaun moris, no nia hatudu laran-sadiʼa ba sira. Nuʼudar ita estuda kona-ba oinsá Jeová halo buat sira-neʼe ba Jonas, Elias, Agar no Lot, mai ita hanoin kona-ba oinsá ita bele banati-tuir Jeová nia dalan atu haree irmaun-irmán sira.

4. Tanbasá ita bele iha hanoin neʼebé sala kona-ba Jonas?

⁴ Tanba ita la hatene buat hotu kona-ba Jonas nia situasaun, karik ita bele tesi-lia katak Jonas la laran-metin no labele konfia. Nia simu matadalan neʼebé klaru husi Jeová atu fó sai mensajen tesi-lia nian ba Nínive. Maibé duké halo tuir, Jonas saʼe ró ba fatin seluk no “halai husi Jeová”. (Jonas 1:1-3) Se Ita iha situasaun neʼe, Ita sei fó oportunidade ida tan ba Jonas atu kumpre knaar neʼe ka lae? Karik lae. Maibé Jeová iha razaun atu halo nuneʼe.—Jonas 3:1, 2.

5. Saida mak Ita aprende husi Jonas nia liafuan iha Jonas 2:1, 2, 9?

⁵ Klaru katak Jonas halo orasaun dala barak. Liuhusi ninia orasaun ida, ita bele komprende nia mak ema hanesan saida. (Lee Jonas 2:1, 2, 9.) Orasaun neʼe ajuda ita komprende katak nia mak ema diʼak. Maski nia halai husi ninia knaar, maibé ninia orasaun hatudu katak nia haraik an, hatudu agradese no halo desizaun metin atu halo tuir Jeová. Karik tan neʼe mak Jeová la haree deʼit ba Jonas nia hahalok sala, Jeová hatán Jonas nia orasaun, no Jeová kontinua uza nia nuʼudar profeta.

6. Tanbasá ita presiza hakaʼas an atu rona didiʼak?

⁶ Atu bele rona didiʼak ba ema, ita presiza haraik an no pasiénsia. Iha razaun tolu tanbasá ita presiza hakaʼas an atu halo nuneʼe. Primeiru, neʼe sei ajuda ita atu la hanoin sala kona-ba ema. Segundu, ita bele komprende irmaun-irmán sira-nia sentimentu no motivu, no neʼe bele ajuda ita atu hatudu laran-sadiʼa ba sira. Terseiru, karik ita bele ajuda ema  neʼe komprende liután ninia sentimentu rasik. Dala ruma ita rasik la komprende ita-nia sentimentu toʼo ita fó sai ida-neʼe. (Prov 20:5) Katuas kongregasaun ida iha Ázia dehan: “Haʼu hanoin-hetan tempu ida haʼu koʼalia antes rona didiʼak. Haʼu fó-hatene irmán ida katak nia presiza hakaʼas an atu hatoʼo komentáriu diʼak liután. Maibé liutiha tempu balu, haʼu rekoñese katak nia ladún hatene lee no nia presiza esforsu an atu fó komentáriu.” Importante tebes atu katuas ida-idak rona uluk buat hotu antes fó konsellu.—Prov 18:13.

7. Saida mak Ita aprende husi dalan neʼebé Jeová ajuda Elias?

⁷ Susar ba irmaun-irmán balu atu fó sai sira-nia sentimentu tanba sira-nia situasaun moris, kultura, ka toman. Saida mak ita bele halo atu ajuda sira fó sai sira-nia sentimentu? Hanoin-hetan buat neʼebé Jeová halo ba Elias bainhira Elias halai husi Jezabel. Presiza loron barak antes Elias fó sai ninia sentimentu ba ninia Aman iha lalehan. No Jeová rona didiʼak. Tuirmai Jeová anima Elias no fó serbisu importante ba nia atu halo. (1 Reis 19:1-18) Dala ruma irmaun-irmán sira presiza tempu atu sente kmaan hodi koʼalia ho ita, no bainhira sira fó sai ona sira-nia sentimentu mak ita foin bele komprende sira. Se ita banati-tuir Jeová hodi hatudu pasiénsia, sira bele tau konfiansa mai ita. Tuirmai bainhira sira prontu ona atu fó sai sira-nia sentimentu, ita presiza rona didiʼak.

8. Tuir Génesis 16:7-13, oinsá Jeová ajuda Agar?

⁸ Sarai nia atan Agar hatudu hahalok aat bainhira nia sai tiha Abram nia feen. Agar sai isin-rua no komesa la respeitu Sarai neʼebé la iha oan. Sarai hamoe Agar, tan neʼe Agar halai sai. (Gén 16:4-6) Tanba ita la perfeitu, karik ita hanoin katak Agar mak feto neʼebé foti an no merese hetan kastigu. Maibé Jeová la sente hanesan neʼe kona-ba Agar. Nia haruka ninia anju ba Agar. No bainhira anju neʼe hetan Agar, anju neʼe ajuda Agar hadiʼa ninia hahalok no haraik bensaun ba Agar. Agar rekoñese katak Jeová haree nia no komprende ninia situasaun. Neʼe book nia atu bolu Jeová nuʼudar ‘Maromak neʼebé haree buat hotu . . . no ida neʼebé haree nia’.—Lee Génesis 16:7-13.

9. Tanbasá Jeová hatudu laran-diʼak ba Agar?

⁹ Saida mak Jeová nota kona-ba Agar? Jeová hatene Agar nia situasaun moris no susar hotu neʼebé Agar hasoru. (Prov 15:3) Agar mak ema Ejitu neʼebé hela iha ema Ebreu nia umakain. Karik dala ruma nia sente mesamesak. Karik nia mós hanoin ninia família no ninia rai. No laʼós nia deʼit mak sai Abram nia feen. Iha tempu neʼebá, mane laran-metin balu iha feen rua ka liu. Maibé neʼe laʼós Jeová nia hakarak. (Mt 19:4-6) Tanba ema iha feen rua ka liu, neʼe hamosu problema iha família laran hanesan laran-moras no odi malu. Jeová rekoñese katak Agar halo sala tanba la respeitu Sarai. Maibé Jeová mós komprende Agar nia sentimentu no situasaun, tan neʼe Jeová hatudu laran-diʼak ba Agar.

10. Oinsá mak ita bele koñese liután irmaun-irmán sira?

¹⁰ Ita bele banati-tuir Jeová hodi hakaʼas an atu komprende malu. Koñese liután irmaun-irmán sira. Koʼalia ho  sira antes no depois reuniaun, haklaken hamutuk, no se bele konvida sira atu han hamutuk. Bainhira Ita halo buat sira-neʼe, karik Ita sei komprende katak irmán neʼebé haree hanesan la gosta habelun ho ema mak moedór, irmaun neʼebé Ita hanoin katak gosta atu buka riku mak ema laran-luak, ka família ida neʼebé sempre mai tarde afinál tahan hasoru daudaun susar husi ema. (Job 6:29) Klaru katak, ita labele “mete iha ema seluk nia moris”. (1 Tim 5:13) Maibé, diʼak atu koñese irmaun-irmán sira no hatene sira-nia situasaun. Neʼe bele ajuda ita komprende liután sira.

11. Tanbasá importante ba katuas sira atu hatene didiʼak bibi sira?

¹¹ Importante liu ba katuas kongregasaun sira atu hatene didiʼak irmaun-irmán sira. Hanoin toʼok ezemplu husi irmaun Artur neʼebé serbí nuʼudar katuas área. Nia no katuas ida vizita irmán ida neʼebé haree hanesan moedór. Irmaun Artur hatete: “Kuandu ami koʼalia hamutuk, ami aprende katak irmán neʼe nia laʼen mate tinan balu depois sira kaben. Maski hasoru susar oioin, nia hanorin ninia oan-feto naʼin-rua atu hadomi no laran-metin ba Jeová. Maski agora ninia matan aat no nia hetan depresaun, maibé ninia domin no fiar ba Jeová mak metin nafatin. Ami rekoñese katak ami bele aprende buat barak husi ninia ezemplu diʼak.” (Flp 2:3) Katuas área neʼe halo tuir Jeová nia ezemplu. Jeová hatene ninia bibi sira no mós hatene sira-nia susar. (Éx 3:7) Katuas sira neʼebé hatene didiʼak bibi sira, hatene oinsá atu ajuda bibi sira neʼebé hetan susar.

12. Oinsá mak irmán Yip Yee hetan benefísiu hodi koñese liután irmán ida iha kongregasaun?

¹² Karik Ita la gosta irmaun ka irmán ida, maibé bainhira Ita hatene didiʼak ninia situasaun, karik neʼe sei ajuda Ita atu hatudu laran-sadiʼa. Hanoin toʼok ezemplu tuirmai. Irmán Yip Yee neʼebé hela iha Ázia hatete: “Irmán ida iha haʼu-nia kongregasaun sempre koʼalia ho lian makaʼas. Haʼu sente katak nia ladún hatudu respeitu. Maibé bainhira haʼu haklaken hamutuk ho nia, haʼu aprende katak uluk nia ajuda ninia inan-aman atu faʼan ikan iha merkadu. Nia tenke hakilar atu bolu kliente.” Yip Yee hatutan tan: “Haʼu aprende katak atu bele komprende haʼu-nia irmaun-irmán sira, haʼu tenke hatene sira-nia situasaun moris.” Ita presiza hakaʼas an atu koñese diʼak liután  irmaun-irmán sira. Maibé, bainhira Ita halo tuir Bíblia nia konsellu atu loke luan Ita-nia laran, Ita banati-tuir Jeová neʼebé hadomi “ema hotu”.—1 Tim 2:3, 4; 2 Kor 6:11-13.

13. Tuir Génesis 19:15, 16, saida mak anju sira halo bainhira Lot kontinua demora, no tanbasá?

¹³ Iha tempu ida neʼebé urjente, Lot demora atu halo tuir Jeová nia matadalan. Anju rua vizita Lot no haruka nia atu lori ninia família sai husi Sodoma. Tanbasá? Sira hatete: “Ami sei harahun fatin neʼe.” (Gén 19:12, 13) Iha dadeer-saan, Lot no ninia família seidauk sai husi uma. Tan neʼe, anju sira-neʼe fó avizu tan ba Lot. Maibé Lot kontinua “demora”. Karik ita hanoin katak Lot la interese ho Jeová nia mandamentu no lakohi halo tuir. Maibé Jeová la rende an atu ajuda Lot. “Jeová hatudu laran-sadiʼa” ba Lot, tan neʼe anju sira kaer Lot no ninia família nia liman no lori sira ba sidade nia liʼur.—Lee Génesis 19:15, 16.

14. Tanbasá Jeová hatudu laran-sadiʼa ba Lot?

¹⁴ Karik Jeová iha razaun barak atu hatudu laran-sadiʼa ba Lot. Karik Lot demora atu sai husi ninia uma tanba nia taʼuk ba ema iha sidade nia liʼur. Iha mós perigu sira seluk. Karik Lot hatene kona-ba liurai naʼin-rua neʼebé monu tama ba alkatraun kuak iha foho-leet besik sidade neʼe. (Gén 14:8-12) Nuʼudar laʼen no aman ida, karik Lot hanoin barak kona-ba ninia família. Liután neʼe, Lot mós riku, tan neʼe karik nia iha uma diʼak iha Sodoma. (Gén 13:5, 6) Buat sira-neʼe laʼós razaun diʼak atu la halo tuir kedas Jeová nia mandamentu, maibé Jeová la haree deʼit ba Lot nia sala. Jeová haree Lot nuʼudar “ema laran-loos”.—2 Ped 2:7, 8.

15. Duké tesi-lia ba ema ida, diʼak liu atu halo saida?

¹⁵ Duké tesi-lia ba ema nia hahalok, diʼak atu hakaʼas an komprende sira-nia sentimentu. Irmán Veronica neʼebé hela iha Europa koko atu halo nuneʼe. Nia dehan: “Irmán ida sempre hatudu oin-boot.  Nia lakohi ransu ho ema seluk. Dala ruma, haʼu taʼuk atu hakbesik ba nia. Maibé haʼu hanoin: ‘Se haʼu iha ninia situasaun, haʼu presiza belun ida.’ Tan neʼe haʼu husu nia fó sai ninia sentimentu. No nia komesa koʼalia nakloke mai haʼu. Agora haʼu komprende nia diʼak liután.”

16. Tanbasá ita presiza husu Jeová nia ajuda atu haburas laran-sadiʼa?

¹⁶ Jeová deʼit mak bele komprende ita ho didiʼak. (Prov 15:11) Tan neʼe husu Jeová atu ajuda Ita haree ema seluk hanesan nia haree sira no atu hatene oinsá hatudu laran-sadiʼa ba sira. Orasaun ajuda irmán Anzhela atu hatudu laran-sadiʼa liután. Irmán Anzhela sente susar atu iha relasaun diʼak ho irmán ida iha ninia kongregasaun. Nia hatete: “Fasil deʼit atu monu ba lasu hodi kritika irmán neʼe no hadook an husi nia. Maibé haʼu husu Jeová atu ajuda haʼu hatudu laran-sadiʼa ba irmán neʼe.” Jeová hatán Anzhela nia orasaun ka lae? Nia hatutan tan: “Ami bá haklaken hamutuk no depois neʼe koʼalia ba oras barak. Haʼu rona didiʼak ba nia. Agora haʼu hadomi liután nia, no prontu atu ajuda nia.”

17. Ita hakarak hakaʼas an atu halo saida?

¹⁷ Ita labele hili irmaun ka irmán ida-neʼebé mak Ita hakarak atu hatudu laran-sadiʼa. Sira hotu hasoru problema hanesan Jonas, Elias, Agar no Lot. Iha situasaun barak, irmaun ka irmán balu hetan problema tanba sira-nia desizaun rasik. Tuir loloos, ita hotu mós karik uluk hetan problema tanba ita-nia desizaun rasik. Tan neʼe mak Jeová husu ita atu hanoin malu. (1 Ped 3:8) Bainhira ita halo tuir Jeová, ita sei haburas unidade iha família Kristaun iha mundu tomak. Tan neʼe mai ita hakaʼas an atu rona didiʼak ba irmaun-irmán sira, koñese sira diʼak liután, no hatudu laran-sadiʼa ba sira.