1-2. Jesus nia liafuan iha João 4:35, 36 katak sá?

JESUS laʼo liu ona toʼos sira, karik toʼos sira-neʼe nakonu ho sevada neʼebé matak. (João 4:3-6) Fulan haat tan mak sevada sira-neʼe sei prontu atu koʼa. Tan neʼe, karik dixípulu sira hakfodak bainhira Jesus dehan: “Foti imi-nia matan bá no haree toʼos sira-neʼe, sira hotu prontu ona atu koʼa.” (Lee João 4:35, 36.) Jesus nia liafuan sira-neʼe katak sá?

² Tuir loloos, Jesus koʼalia kona-ba halibur ema, laʼós sevada. Hanoin toʼok buat neʼebé akontese antes neʼe. Maski ema Judeu sira odi ema Samaria, maibé Jesus foin haklaken ba feto Samaria ida, no feto neʼe rona ba Jesus. Tuir loloos, bainhira Jesus koʼalia hela kona-ba toʼos neʼebé “prontu ona atu koʼa”, ema Samaria lubun neʼebé rona ona kona-ba Jesus mai hasoru Jesus atu aprende liután. (João 4:9, 39-42) Matenek-naʼin ida kona-ba Bíblia esplika: “Tanba ema sira-neʼe mai lalais hasoru Jesus no rona ba nia, neʼe hatudu katak sira hanesan toʼos neʼebé prontu ona atu koʼa.”

3. Se Ita iha hanoin hanesan Jesus, oinsá neʼe kona dalan neʼebé Ita haklaken?

³ Ita hanoin oinsá kona-ba ema iha Ita-nia haklaken-fatin? Ita haree sira nuʼudar toʼos neʼebé prontu ona atu koʼa ka lae? Se nuneʼe, Ita sei halo buat tolu. (1) Ita sei haklaken ho urjente. Tuir loloos tempu koʼa nian mak badak deʼit, tan neʼe Ita labele soe tempu. (2) Ita sei sente kontente bainhira Ita haree ema simu liafuan diʼak. Bíblia hatete: “Ema haksolok iha tempu koʼa nian.” (Isa 9:3) (3) Ita sei iha hanoin pozitivu katak iha futuru ema bele sai Jesus nia dixípulu. Tan neʼe Ita sei troka dalan neʼebé Ita koʼalia hodi book sira-nia laran.

4. Saida deʼit mak ita sei aprende husi apóstolu Paulo?

 ⁴ Jesus nia dixípulu balu karik hanoin katak ema Samaria nunka bele sai dixípulu, maibé Jesus la hanoin hanesan neʼe. Nia iha hanoin pozitivu katak ema Samaria mós bele sai ninia dixípulu. Ita mós presiza iha hanoin pozitivu katak ema iha ita-nia haklaken-fatin bele sai Kristu nia dixípulu. Apóstolu Paulo hatudu ezemplu diʼak mai ita. Saida mak ita bele aprende husi nia? Iha lisaun neʼe, ita sei koʼalia kona-ba oinsá nia (1) buka-hatene kona-ba ema nia fiar, (2) komprende buat neʼebé ema gosta, no (3) iha hanoin pozitivu katak ema mós bele sai Jesus nia dixípulu.

5. Tanbasá Paulo bele komprende ninia rona-naʼin sira iha sinagoga?

⁵ Dala barak Paulo haklaken iha ema Judeu nia sinagoga. Porezemplu, nia tama ba sinagoga iha Tesalónika durante “loron Sábadu tolu tuituir malu hodi hanorin [ema Judeu] kona-ba Eskritura”. (Após 17:1, 2) Karik Paulo sente kalma iha sinagoga. Nia sai boot nuʼudar ema Judeu. (Após 26:4, 5) Tanba Paulo komprende ema Judeu, nia bele haklaken ba sira ho fiar an.—Flp 3:4, 5.

6. Tanbasá ema iha merkadu Atenas la hanesan ho ema iha sinagoga?

⁶ Bainhira ema duni sai Paulo husi Tesalónika no Bereia, nia bá Atenas. Dala ida tan “nia tama iha sinagoga no hahú hanorin ema Judeu sira no ema seluk neʼebé adora Maromak”. (Após 17:17) Maibé bainhira Paulo haklaken iha merkadu, ninia rona-naʼin sira mak la hanesan. Ninia rona-naʼin balu mak matenek-naʼin kona-ba filozofia, no mós ema jentiu seluk neʼebé haree Paulo nia mensajen nuʼudar “hanorin foun”. Sira hatete ba nia: “Ó koʼalia kona-ba buat neʼebé foun ba ami.”—Após 17:18-20.

7. Tuir Apóstolu 17:22, 23, oinsá Paulo troka dalan neʼebé nia haklaken?

⁷ Lee Apóstolu 17:22, 23. Paulo nia dalan atu haklaken ba ema jentiu iha Atenas la hanesan ho dalan neʼebé nia haklaken ba ema Judeu iha sinagoga. Karik Paulo hanoin kona-ba ema Atenas nia fiar. Nia haree didiʼak buat neʼebé haleʼu nia no nota ema nia toman atu adora maromak. Tuirmai Paulo buka-hatene buat neʼebé ninia rona-naʼin sira fiar ona no atu hanesan ho lia-loos iha Eskritura. Matenek-naʼin ida esplika kona-ba Paulo: “Nuʼudar ema Judeu neʼebé sai ona ema  Kristaun, nia rekoñese katak ema Gregu la adora Maromak loos neʼebé ema Judeu no ema Kristaun adora. Maibé nia koko atu hatudu katak nia la haklaken kona-ba Maromak neʼebé foun ba ema Atenas.” Entaun Paulo prontu troka ninia dalan atu haklaken. Nia hatete ba ema Atenas sira katak ninia mensajen mai husi ‘Maromak neʼebé sira la hatene’ neʼebé sira koko adora. Maski ema jentiu sira la hatene Eskritura, maibé Paulo la rende an atu ajuda sira. Nia haree sira hanesan toʼos neʼebé prontu ona atu koʼa, no nia troka dalan neʼebé nia haklaken liafuan diʼak.

8. (a) Saida mak bele ajuda Ita atu hatene ema nia fiar? (b) Se ema ruma dehan katak nia iha ona relijiaun, oinsá Ita bele hatán?

⁸ Hanesan Paulo, Ita mós presiza matan-moris. Hateke haleʼu hodi haree buat neʼebé bele ajuda Ita atu komprende buat neʼebé ema fiar. Saida mak uma-naʼin tau ka tara iha ninia uma? Ninia naran, dalan neʼebé nia hatais no hadiʼa an ka ninia dalan atu koʼalia bele ajuda Ita hatene ninia relijiaun ka lae? Karik nia fó sai ninia relijiaun ba Ita. Bainhira ema ruma fó sai ninia relijiaun ba pioneiru tempu-tomak ida, nia sei hatete: “Haʼu mai laʼós atu obriga Ita troka Ita-nia fiar, maibé atu koʼalia kona-ba tópiku ida-neʼe . . . “

9. Tópiku saida mak Ita bele uza kuandu koʼalia ho ema neʼebé fiar ba Maromak?

⁹ Tópiku saida mak Ita bele fahe ba ema neʼebé fiar ba Maromak? Buka-hatene tópiku neʼebé ema neʼe fiar ona no atu hanesan ho lia-loos. Karik nia adora Maromak ida deʼit, karik nia rekoñese Jesus nuʼudar Salvadór, ka karik nia fiar katak lakleur tan ema aat sira sei lakon. Ita bele uza tópiku sira hanesan neʼe hodi fahe Bíblia nia mensajen ba nia iha dalan neʼebé book ninia laran.

10. Ita presiza hakaʼas an atu halo saida, no tanbasá?

¹⁰ Hanoin-hetan katak karik ema la fiar hanorin hotu husi sira-nia relijiaun. Tan neʼe maski Ita hatene ona ema ida nia relijiaun, diʼak atu koko buka-hatene liután saida mak ema neʼe fiar. Pioneiru tempu-tomak ida iha rai-Austrália naran David hatete: “Agora ema barak kahur filozofia ho sira-nia fiar.” Irmán Donalta iha rai-Albánia hatete: “Ema balu neʼebé ami hasoru hatete katak sira iha relijiaun, maibé ikusmai sira fó sai katak sira ladún fiar ba Maromak.” Irmaun misionáriu ida iha rai-Arjentina nota katak ema balu dehan sira fiar trindade, maibé karik sira la fiar katak Aman, Oan no espíritu santu mak  ida deʼit. Misionáriu neʼe dehan: “Hodi hatene ida-neʼe, fasil liu atu buka-hatene buat neʼebé sira fiar no atu hanesan ho lia-loos.” Tan neʼe, hakaʼas an atu buka-hatene saida mak ema fiar. Tuirmai, hanesan Paulo, Ita bele “sai buat hotu ba ema oioin”.—1 Kor 9:19-23.

11. Tuir Apóstolu 14:14-17, oinsá Paulo haklaken iha dalan neʼebé book rona-naʼin nia laran?

¹¹ Lee Apóstolu 14:14-17. Paulo haree saida mak ninia rona-naʼin gosta, no tuirmai nia troka dalan neʼebé nia haklaken. Porezemplu, Paulo haklaken ba ema-lubun iha Listra neʼebé la hatene ka hatene uitoan deʼit kona-ba Eskritura. Tan neʼe, nia uza tópiku neʼebé sira bele komprende. Nia koʼalia kona-ba toʼos neʼebé fó rezultadu diʼak no kbiit atu goza moris. Nia uza liafuan no ezemplu neʼebé ninia rona-naʼin bele komprende.

12. Oinsá mak Ita bele hatene buat neʼebé ema gosta no troka dalan neʼebé Ita haklaken?

¹² Buka-hatene saida mak ema gosta no troka dalan neʼebé Ita haklaken. Oinsá mak Ita bele hatene saida mak uma-naʼin gosta bainhira Ita hakbesik ba nia ka ninia uma? Dala ida tan, matan-moris. Karik nia tau matan hela jardín, lee livru, hadiʼa karreta, ka halo atividade seluk. Karik Ita bele komesa koʼalia kona-ba neʼe. (João 4:7) Ema nia roupa mós bele hatudu sai buat ruma kona-ba nia, karik neʼe hatudu ninia nasionalidade, serbisu, ka desportu neʼebé nia gosta. Irmaun Gustavo hatete: “Haʼu komesa koʼalia ho joven mane ida neʼebé tinan 19 no nia hatais faru neʼebé iha kantadór famozu ida nia foto. Haʼu husu kona-ba neʼe, no joven neʼe esplika tanbasá nia gosta kantadór neʼe. Rezultadu mak ami komesa estuda Bíblia, no agora nia mak irmaun ida.”

13. Oinsá mak Ita bele book ema nia laran bainhira husu sira atu estuda Bíblia?

¹³ Bainhira Ita husu ema atu estuda Bíblia, Ita presiza halo ida-neʼe iha dalan neʼebé book sira-nia laran. Hatudu ba sira oinsá estuda Bíblia bele ajuda sira.  (João 4:13-15) Porezemplu feto ida neʼebé gosta Bíblia nia mensajen, konvida irmán Poppy atu tama ba ninia uma. Bainhira irmán Poppy haree sertifikadu iha didin neʼebé hatudu katak feto neʼe mak profesora ida, irmán Poppy esplika katak ita mós hanorin ema kona-ba Bíblia liuhusi programa estuda Bíblia no reuniaun sira. Entaun feto neʼe hakarak atu estuda Bíblia, nia tuir kedas reuniaun, no mós tuir reuniaun boot ba loron ida. Liutiha tinan ida, nia hetan batizmu. Husu ba Ita-nia an: ‘Saida mak haʼu-nia vizita fali gosta? Haʼu bele esplika programa estuda Bíblia iha dalan neʼebé book sira-nia laran ka lae?’

14. Oinsá mak Ita bele troka Ita-nia estudante Bíblia nia hanoin?

¹⁴ Bainhira Ita komesa estuda Bíblia ho ema ida, diʼak atu prepara ba estuda ida-idak no hanoin kona-ba ninia situasaun no buat neʼebé nia gosta. Bainhira prepara, deside eskritura saida mak Ita sei lee, vídeo saida mak Ita sei hatudu, no ilustrasaun saida mak Ita sei uza atu esplika lia-loos husi Bíblia. Husu ba Ita-nia an: ‘Saida mak estudante neʼe sei gosta no book ninia laran?’ (Prov 16:23) Iha rai-Albánia, feto ida neʼebé estuda ho pioneiru ida naran Flora hatete: “Haʼu lakohi simu hanorin kona-ba moris-hiʼas.” Irmán Flora la obriga feto neʼe. Irmán Flora dehan: “Haʼu sente katak nia presiza hatene uluk kona-ba Maromak neʼebé fó sai promesa kona-ba moris-hiʼas.” Hahú husi tempu neʼebá, durante estuda ida-idak, irmán Flora tau énfaze ba Jeová nia domin, matenek, no kbiit. Ikusmai ninia estudante prontu atu tau fiar ba moris-hiʼas. Agora estudante neʼe mak Testemuña neʼebé laran-manas.

15. Tuir Apóstolu 17:16-18, ema Atenas nia hahalok saida deʼit mak bele halo Paulo laran-triste? Maibé tanbasá nia kontinua haklaken ba sira?

¹⁵ Lee Apóstolu 17:16-18. Paulo la rende an atu ajuda ema Atenas, maski sidade neʼe nakonu ho estátua, sala seksuál no filozofia. Paulo mós la para atu haklaken ba sira maski sira koʼalia aat nia. Paulo rasik sai ema Kristaun, maski uluk nia ‘koʼalia aat Maromak no fó-terus ba Maromak nia povu no foti an’. (1 Tim 1:13) Jesus iha hanoin pozitivu kona-ba Paulo, nuneʼe mós Paulo iha hanoin pozitivu katak ema Atenas bele sai Jesus nia dixípulu. No ninia hanoin neʼe lori duni rezultadu diʼak.—Após 9:13-15; 17:34.

16-17. Saida mak hatudu katak ema husi situasaun oioin bele sai Kristu nia dixípulu? Konta toʼok ezemplu ida.

¹⁶ Iha apóstolu sira-nia tempu, ema husi situasaun oioin sai Jesus nia dixípulu. Bainhira Paulo hakerek karta ba ema Kristaun iha sidade Korinto, nia hatete katak uluk ema balu iha kongregasaun neʼe mak kriminozu no la iha morál. Tuirmai nia hatutan: “Uluk imi balu mós halo hanesan neʼe. Maibé agora Maromak fase moos ona imi.” (1 Kor 6:9-11) Se Ita iha neʼebá, Ita sei hanoin pozitivu katak ema sira-neʼe bele halo mudansa no sai Jesus nia dixípulu ka lae?

¹⁷ Ohin loron, ema barak prontu atu halo mudansa no sai Jesus nia dixípulu. Porezemplu, iha rai-Austrália, pioneiru tempu-tomak ida naran Yukina komprende katak ema oioin bele simu Bíblia nia mensajen. Loron ida, bainhira haklaken iha eskritóriu ida, nia haree feto joven ida neʼebé iha tato barak. Irmán Yukina hatete: “Foufoun haʼu dada an uitoan, maibé tuirmai haʼu komesa koʼalia ho nia.  Ikusmai haʼu hatene katak nia gosta tebes Bíblia, no ninia tato balu mak eskritura sira husi Salmo.” Feto neʼe komesa estuda Bíblia no tuir reuniaun sira. *

18. Tanbasá ita labele tesi-lia ba ema?

¹⁸ Jesus hatete katak toʼos prontu ona atu koʼa tanba nia hanoin katak ema hotu sei sai ninia dixípulu ka lae? Lae. Eskritura sira fó-hatene nanis ona katak ema uitoan deʼit mak sei tau fiar ba nia. (João 12:37, 38) No Jesus iha kbiit atu hatene ema nia laran, tan neʼe nia hatene katak ema barak sei la tau fiar ba nia. (Mt 9:4) Maski nuneʼe, nia tau fokus ba ema uitoan neʼebé sei tau fiar ba nia, no nia haklaken ho laran-manas ba ema hotu. Ita labele hatene ema nia laran, tan neʼe ita labele tesi-lia kona-ba ita-nia haklaken-fatin ka kona-ba ema. Diʼak liu atu iha hanoin pozitivu kona-ba ema. Misionáriu ida naran Marc iha rai-Burkina Faso, hatete: “Dala barak ema neʼebé haʼu hanoin katak sei laʼo ba oin, ema neʼe para estuda. Maibé ema neʼebé haʼu hanoin katak sei la laʼo ba oin mak sai dixípulu. Tan neʼe haʼu aprende katak diʼak liu atu husik Jeová nia espíritu mak dirije ita.”

19. Ita presiza iha hanoin oinsá kona-ba ema iha ita-nia haklaken-fatin?

¹⁹ Dala ruma Ita sente katak la iha ema barak iha Ita-nia haklaken-fatin mak hanesan toʼos neʼebé prontu ona atu koʼa. Maibé hanoin-hetan buat neʼebé Jesus hatete ba ninia dixípulu sira: Toʼos prontu ona atu koʼa. Ema bele halo mudansa no sai Kristu nia dixípulu. Jeová iha konfiansa katak ema iha ita-nia haklaken-fatin bele sai dixípulu no nia haree sira nuʼudar “buat folin-boot”. (Ageu 2:7) Se ita banati-tuir Jeová no Jesus nia dalan atu haree ema, ita sei koko komprende sira-nia situasaun no buat neʼebé sira gosta. Ita sei la tesi-lia ba sira, maibé haree sira nuʼudar ema neʼebé bele sai ita-nia irmaun-irmán sira.