1. David hatete saida kona-ba Jeová nia haraik an?

ITA bele dehan katak Jeová mak haraik an ka lae? Sin. David hakerek: “Ita fó Ita-nia eskudu salvasaun nian ba haʼu, no Ita-nia haraik an halo haʼu sai boot.” (2 Sam 22:36; Sal 18:35) Karik David hanoin kona-ba loron neʼebé profeta Samuel bá David nia aman nia uma atu hili liurai foun ba Izraél. David mak oan-mane ikun husi oan-mane naʼin-ualu, maski nuneʼe, Jeová hili nia atu troka Liurai Saul.​—1 Sam 16:1, 10-13.

2. Iha lisaun neʼe, ita sei aprende kona-ba saida?

² Ita bele fiar katak David sente hanesan ho ema neʼebé hakerek Salmo 113 neʼebé dehan: “[Jeová] hakruʼuk atu haree ba lalehan no rai, nia halo ema kiʼik hamriik husi rai-rahun. Nia hiʼit saʼe ema kiak . . . atu halo ema neʼe tuur hamutuk ho ema-boot sira.” (Sal 113:6-8) Iha lisaun neʼe, primeiru ita sei aprende lisaun importante balu kona-ba haraik an hodi estuda Jeová nia ezemplu. Segundu, ita sei koʼalia kona-ba buat neʼebé ita bele aprende kona-ba haraik an husi Liurai Saul, profeta Daniel no Jesus.

3. Oinsá Jeová nia haree kona-ba ita, no neʼe hatudu saida?

³ Jeová hatudu katak nia haraik an liuhusi dalan neʼebé nia haree ninia atan sira neʼebé la perfeitu. Nia simu ita-nia adorasaun no haree ita nuʼudar belun. (Sal 25:14) Jeová loke dalan ba ita atu sai ninia belun liuhusi fó ninia Oan-Mane nuʼudar sakrifísiu atu kasu ita-nia sala. Neʼe hatudu katak Jeová mak laran-sadiʼa no laran-diʼak.

4. Jeová fó saida mai ita, no tanbasá?

 ⁴ Hanoin kona-ba dalan seluk neʼebé Jeová hatudu haraik an. Nuʼudar Kriadór, Jeová la presiza kria ita ho kbiit atu halo desizaun rasik. Maski nuneʼe nia kria ita tuir ninia ilas no fó ita liberdade atu halo desizaun. Maski ita ema mak kiʼik no fraku, maibé Jeová hakarak ita atu serbí nia tanba ita hadomi nia no rekoñese katak halo tuir nia lori benefísiu mai ita. (Deut 10:12; Isa 48:17, 18) Ita agradese tebes tanba Jeová hatudu haraik an.

5. Oinsá Jeová hanorin ita atu hatudu haraik an? (Haree dezeñu iha livru oin.)

⁵ Jeová hanorin ita oinsá atu hatudu haraik an liuhusi dalan neʼebé nia hatudu laran-diʼak ba ita. Jeová mak Ida neʼebé matenek liu iha universu. Maski nuneʼe, nia prontu atu simu sujestaun husi ninia kriatura sira. Porezemplu, Jeová hili ninia Oan-Mane atu ajuda nia kria buat hotu. (Prov 8:27-30; Kol 1:15, 16) Jeová iha kbiit boot liu hotu, maibé nia fó responsabilidade balu ba ninia kriatura seluk. Porezemplu, nia hili Jesus atu sai Liurai ba ninia Ukun, no Jeová mós sei fó responsabilidade balu ba ema naʼin-144.000 neʼebé sei ukun hamutuk ho Jesus. (Lc 12:32) Klaru katak Jeová treinu Jesus atu sai Liurai no Amlulik Boot. (Ebr 5:8, 9) Jeová mós treinu ema neʼebé sei ukun hamutuk ho Jesus. Maibé bainhira nia fó knaar ba sira, nia la kontrola buat hotu neʼebé liga ho sira-nia knaar. Duké halo nuneʼe, nia tau fiar ba sira katak sira sei halo tuir ninia hakarak.​—Apok 5:10.

6-7. Ita bele aprende saida husi ita-nia Aman iha lalehan kona-ba fó responsabilidade ba ema seluk?

⁶ Ita-nia Aman iha lalehan la presiza  simu ajuda husi ema seluk, maski nuneʼe nia fó responsabilidade ba ema seluk. Ita mós tenke halo buat neʼebé hanesan. Ita mak família nia ulun ka katuas ba kongregasaun ka lae? Se nuneʼe, halo tuir Jeová nia ezemplu hodi fó responsabilidade ba ema seluk no labele kontrola buat hotu neʼebé liga ho sira-nia knaar. Bainhira ita banati-tuir Jeová, ita sei kumpre serbisu oioin no mós sei treinu ema seluk no ajuda sira sai fiar an liután. (Isa 41:10) Ema neʼebé iha responsabilidade bele aprende saida tan husi Jeová?

⁷ Bíblia hatudu katak Jeová hakarak rona anju sira-nia sujestaun. (1 Reis 22:19-22) Oinsá inan-aman sira bele banati-tuir Jeová nia ezemplu? Se situasaun permite, husu imi-nia oan nia sujestaun kona-ba oinsá atu halaʼo serbisu ruma. Se bele, halo tuir sira-nia sujestaun.

8. Oinsá Jeová hatudu pasiénsia ba Abraão no Sara?

⁸ Jeová mós hatudu haraik an hodi hatudu pasiénsia. Porezemplu, Jeová hatudu pasiénsia bainhira ninia atan sira husu pergunta kona-ba ninia desizaun. Jeová rona bainhira Abraão fó sai katak nia hanoin barak kona-ba Jeová nia desizaun atu halakon Sodoma no Gomorra. (Gén 18:22-33) Hanoin-hetan mós oinsá Jeová hatudu laran-diʼak ba Abraão nia feen Sara. Loron ida Sara hamnasa kuandu rona Jeová promete katak Sara sei sai isin-rua maski idade ona. Maski nuneʼe, Jeová la laran-kanek ka hirus. (Gén 18:10-14) Jeová hatudu respeitu ba Sara.

9. Inan-aman no katuas kongregasaun bele aprende saida husi Jeová nia ezemplu?

⁹ Inan-aman no katuas kongregasaun bele aprende saida husi Jeová nia ezemplu? Ita halo saida bainhira Ita-nia oan ka ema iha kongregasaun la konkorda ho Ita-nia desizaun? Ita defende an kedas ka lae? Ka Ita koko atu komprende sira-nia hanoin? Kuandu ema neʼebé iha responsabilidade banati-tuir Jeová, neʼe sei lori benefísiu ba sira-nia família no kongregasaun. Ita koʼalia ona kona-ba oinsá ita bele aprende hahalok haraik an husi Jeová nia ezemplu. Agora mai ita haree saida mak ita bele aprende kona-ba hahalok haraik an husi ezemplu neʼebé hakerek iha Bíblia.

10. Oinsá Jeová uza ema seluk nia ezemplu atu hanorin ita?

¹⁰ Jeová mak ita-nia “Mestre Boot”, no nia fó ninia Liafuan atu hanorin ita. (Isa 30:20, 21) Bainhira ita medita kona-ba ezemplu sira neʼebé hakerek iha Bíblia, neʼe hanorin ita oinsá atu hatudu hahalok diʼak sira hanesan hahalok haraik an. Ita mós bele aprende husi ema sira neʼebé la hatudu hahalok diʼak.​—Sal 37:37; 1 Kor 10:11.

11. Ita bele aprende saida husi Saul nia ezemplu aat?

¹¹ Hanoin toʼok kona-ba buat neʼebé akontese ba Liurai Saul. Nuʼudar mane joven, nia mak ema haraik an, rekoñese ninia limitasaun, no mós la ansi atu simu responsabilidade liután. (1 Sam 9:21; 10:20-22) Maibé ikusmai nia sai foti an no halo buat neʼebé nia la iha direitu atu halo. Nia komesa halo nuneʼe lakleur depois nia sai liurai. Loron ida, nia la hatudu pasiénsia bainhira nia hein profeta Samuel. Duké tau fiar ba Jeová atu ajuda ninia povu, Saul hasaʼe sakrifísiu sunu nian maski nia la iha direitu atu halo nuneʼe.  Rezultadu mak Jeová la kontente ho nia no la simu tan nia nuʼudar liurai. (1 Sam 13:8-14) Diʼak atu aprende husi ezemplu neʼe no labele halo buat neʼebé ita la iha direitu atu halo.

12. Oinsá mak Daniel hatudu haraik an?

¹² La hanesan Saul, profeta Daniel hatudu ezemplu diʼak. Durante Daniel nia moris tomak, nia nafatin haraik an no sempre buka matadalan husi Jeová. Porezemplu, Jeová uza Daniel atu esplika Liurai Nabukodonozór nia mehi, maibé Daniel la gaba an katak ida-neʼe mai husi ninia matenek rasik. Duké halo nuneʼe, nia fó glória hotu ba Jeová. (Dan 2:26-28) Ita bele aprende saida? Se irmaun-irmán sira gaba ita-nia diskursu ka ita hetan susesu iha serbisu haklaken, ita presiza fó glória hotu ba Jeová. Ita presiza rekoñese katak Jeová mak ajuda ita atu hetan susesu. (Flp 4:13) Bainhira ita halo nuneʼe, ita mós banati-tuir Jesus nia ezemplu diʼak. Oinsá?

13. Jesus nia liafuan iha João 5:19, 30 hanorin saida mai ita kona-ba haraik an?

¹³ Maski Jesus mak Maromak nia Oan-Mane neʼebé perfeitu, maibé nia sadere ba Jeová. (Lee João 5:19, 30.) Nia nunka koko atu hadau ninia Aman nia podér. Bíblia hatete katak Jesus “la hanoin atu hadau Maromak nia pozisaun hodi sai hanesan ho Maromak”. (Flp 2:6) Jesus hakruʼuk ba Maromak no nia komprende ninia limitasaun no hatudu respeitu ba ninia Aman nia podér.

14. Saida mak Jesus halo bainhira ema husu nia atu fó buat neʼebé nia la iha direitu atu fó?

¹⁴ Hanoin kona-ba saida mak Jesus halo bainhira Tiago, João ho sira-nia inan husu Jesus atu fó buat ruma neʼebé Jesus la iha direitu atu fó. Jesus hatán kedas katak ninia Aman iha lalehan deʼit mak bele deside kona-ba sé mak bele tuur iha Jesus nia liman-loos no liman-karuk iha ninia Ukun. (Mt 20:20-23) Jesus hatudu katak nia rekoñese ninia limitasaun. Nia haraik an. Nia nunka halo liu fali buat neʼebé Jeová haruka nia atu halo. (João 12:49) Oinsá ita bele banati-tuir Jesus nia ezemplu?

15-16. Oinsá ita bele halo tuir konsellu iha 1 Korinto 4:6?

¹⁵ Ita banati-tuir Jesus nia ezemplu hodi aplika Bíblia nia konsellu iha  1 Korinto 4:6 neʼebé dehan: “Keta halo liu fali buat neʼebé hakerek tiha ona.” Entaun kuandu ema husu matadalan husi ita, ita lakohi fó sai deʼit ita-nia hanoin rasik ka koʼalia hodi la hanoin uluk. Maibé ita presiza fó matadalan husi Bíblia no ita-nia publikasaun sira. Hodi halo nuneʼe, ita rekoñese ita-nia limitasaun. Ita hatudu haraik an hodi rekoñese katak Jeová nia konsellu mak sempre diʼak liu fali ita-nian.​—Apok 15:3, 4.

¹⁶ Ita hatudu haraik an tanba hakarak fó glória ba Jeová, maibé iha mós razaun seluk. Agora ita sei aprende oinsá hahalok haraik an no rekoñese ita-nia limitasaun bele lori ksolok ba ita no mós ajuda ita atu iha relasaun diʼak ho ema seluk.

17. Tanbasá ema haraik an bele sente kontente?

¹⁷ Baibain ita sente kontente liu se ita hatudu haraik an no rekoñese ita-nia limitasaun. Tanbasá? Tanba bainhira ita rekoñese katak ita iha limitasaun, ita agradese hodi simu ajuda husi ema seluk. Porezemplu, hanoin toʼok tempu neʼebé Jesus kura mane naʼin-sanulu neʼebé moras-lepra. Maibé mane ida deʼit mak fila fali atu fó obrigadu ba Jesus. Mane haraik an neʼe rekoñese katak nia rasik labele kura ninia an. Tan neʼe nia agradese tanba simu ajuda husi Jesus, no nia fó glória ba Maromak.​—Lc 17:11-19.

18. Oinsá hahalok haraik an ajuda ita atu iha relasaun diʼak ho ema seluk? (Roma 12:10)

¹⁸ Baibain ema haraik an iha relasaun diʼak ho ema seluk no bele iha belun diʼak. Tanbasá? Tanba sira prontu atu rekoñese katak ema seluk iha hahalok diʼak no mós bele tau fiar ba sira. Ema neʼebé haraik an sente kontente bainhira ema seluk hetan susesu no prontu atu gaba no respeitu sira.​—Lee Roma 12:10.

19. Tanbasá ita presiza hasees an husi hahalok foti an?

 ¹⁹ Baibain ema neʼebé foti an sente susar atu gaba ema seluk no hakarak ema seluk gaba sira. Dala barak sira kompara sira-nia an ho ema seluk no hakarak kompete malu. Duké treinu ema seluk no fó sira responsabilidade, dala barak ema neʼebé foti an sei dehan: “Atu bele hetan susesu, diʼak liu haʼu mak halo rasik.” Ema neʼebé foti an hakarak sai ema neʼebé importante liu no laran-moras ba ema seluk. (Gal 5:26) Ema hanesan neʼe ladún iha belun diʼak. Se ita nota katak ita foti an, ita tenke harohan ba Jeová atu husu ajuda hodi ‘hafoun ita-nia hanoin’ atu nuneʼe hahalok aat neʼe la sai abut iha ita-nia laran.​—Rom 12:2.

20. Tanbasá ita presiza hatudu hahalok haraik an?

²⁰ Ita agradese tebes tanba Jeová hatudu ezemplu diʼak mai ita. Nia hatudu hahalok haraik an ba ninia atan sira, no ita hakarak atu banati-tuir nia. Ita mós hakarak banati-tuir ema neʼebé serbí Jeová ho haraik an. Mai ita kontinua fó hahiʼi no glória ba Jeová tanba nia merese simu ida-neʼe. (Apok 4:11) Hodi halo buat sira-neʼe, ita bele laʼo hamutuk ho ita-nia Aman iha lalehan neʼebé hadomi ema haraik an.