1. Ita iha priviléjiu saida?

ITA iha priviléjiu boot atu sai parte ba Jeová nia kongregasaun. Ita sai parte iha paraízu espirituál neʼebé nakonu ho ema neʼebé hadomi dame no kontente. Ita iha knaar saida iha kongregasaun?

2. Ai-knanoik saida mak Paulo temi iha ninia karta balu iha Bíblia?

² Ita bele aprende buat oioin kona-ba tópiku neʼe liuhusi estuda ai-knanoik neʼebé apóstolu Paulo temi iha ninia karta balu iha Bíblia. Iha karta sira-neʼe, Paulo kompara kongregasaun ho ema nia isin-lolon. Nia mós kompara ema ida-idak iha kongregasaun ho parte oioin husi isin-lolon.​—Rom 12:4-8; 1 Kor 12:12-27; Éf 4:16.

3. Iha lisaun neʼe, ita sei aprende pontu tolu saida?

³ Iha lisaun neʼe, ita sei aprende pontu importante tolu husi Paulo nia ai-knanoik. Primeiru, ita sei aprende katak ita ida-idak iha knaar * iha kongregasaun. Segundu, ita sei aprende kona-ba saida mak ita bele halo kuandu ita sente la iha folin iha Jeová nia kongregasaun. Terseiru, ita sei aprende kona-ba tanbasá ita presiza kontinua halaʼo ita-nia knaar iha kongregasaun ho badinas.

4. Roma 12:4, 5 hanorin saida mai ita?

⁴ Lisaun primeiru neʼebé ita bele aprende husi Paulo nia ai-knanoik mak ita ida-idak iha knaar neʼebé importante iha Jeová nia kongregasaun. Paulo hatete: “Hanesan  isin-lolon iha parte barak no parte ida-idak iha knaar neʼebé la hanesan, entaun, maski ita barak, maibé ita isin-lolon ida deʼit ho Kristu, no ita mak parte ida-idak neʼebé liga malu.” (Rom 12:4, 5) Paulo nia liafuan sira-neʼe katak sá? Maski ita ida-idak iha knaar la hanesan iha kongregasaun, maibé ita ida-idak mak importante.

5. Jeová fó prezente saida ba kongregasaun?

⁵ Bainhira ita koʼalia kona-ba ema neʼebé iha knaar iha kongregasaun, karik ita hanoin kedas kona-ba ema neʼebé dirije kongregasaun. (1 Tes 5:12; Ebr 13:17) Liuhusi Kristu, Jeová “fó mane sira nuʼudar prezente” ba ninia kongregasaun. (Éf 4:8) Mane sira-neʼe inklui membru ba Grupu Administradór, ajuda-naʼin ba Grupu Administradór, membru husi Komisaun ba Sukursál, katuas área, mestre ba eskola Bíblia, katuas kongregasaun no mós atan ba kongregasaun. Irmaun sira-neʼe hotu simu knaar liuhusi espíritu santu atu tau matan ba Jeová nia bibi sira no hametin kongregasaun.​—1 Ped 5:2, 3.

6. Tuir 1 Tesalónika 2:6-8, irmaun sira neʼebé simu knaar liuhusi espíritu santu hakaʼas an atu halo saida?

⁶ Irmaun sira simu knaar husi espíritu santu atu halaʼo responsabilidade oioin. Parte oioin husi isin-lolon, hanesan liman no ain, ajuda malu atu apoia isin-lolon tomak. Nuneʼe mós irmaun sira neʼebé simu knaar liuhusi espíritu santu serbisu makaʼas atu apoia kongregasaun tomak. Sira la buka glória ba sira-nia an rasik. Maibé sira hakaʼas an atu hametin irmaun-irmán sira. (Lee 1 Tesalónika 2:6-8.) Ita agradese ba Jeová tanba fó irmaun sira neʼebé tau uluk ema seluk nia diʼak.

7. Ema neʼebé serbí Maromak tempu-tomak hetan bensaun saida?

⁷ Ema balu iha kongregasaun karik simu knaar atu serbí nuʼudar misionáriu, pioneiru tempu-tomak, ka pioneiru regulár. Tuir loloos, irmaun-irmán barak iha mundu tomak deside atu uza sira-nia tempu tomak atu haklaken no hanorin ema sai dixípulu. Tanba sira-nia desizaun neʼe, sira ajuda ema barak atu sai Jesus Kristu nia dixípulu. Maski sira la iha rikusoin barak, maibé Jeová haraik bensaun barak ba sira. (Mc 10:29, 30) Ita hafolin irmaun-irmán sira-neʼe, no agradese tanba sira mak parte ba ita-nia kongregasaun.

8. Tanbasá haklaken-naʼin hotu mak folin-boot ba Jeová?

⁸ Irmaun sira neʼebé dirije kongregasaun no mós sira neʼebé serbí tempu-tomak deʼit mak iha folin iha kongregasaun ka lae? Lae. Maromak no mós kongregasaun hafolin haklaken-naʼin hotu. (Rom 10:15; 1 Kor 3:6-9) Tuir loloos, kongregasaun nia objetivu importante mak atu hanorin ema sai Jesus Kristu nia dixípulu. (Mt 28:19, 20; 1 Tim 2:4) Haklaken-naʼin hotu neʼebé hetan ona batizmu ka seidauk hetan batizmu, hakaʼas an atu tau uluk serbisu neʼe iha sira-nia moris.​—Mt 24:14.

9. Tanbasá ita hafolin irmán sira?

⁹ Jeová hafolin irmán sira no fó ba sira serbisu importante iha kongregasaun laran. Nia hafolin feen, inan, feto-faluk no irmán klosan sira neʼebé serbí nia ho laran-metin. Dala barak Bíblia temi kona-ba feto sira neʼebé halo Maromak kontente. Sira simu gaba tanba sira-nia ezemplu diʼak kona-ba matenek, fiar, laran-manas, aten-brani, laran-luak no  hahalok diʼak. (Lc 8:2, 3; Após 16:14, 15; Rom 16:3, 6; Flp 4:3; Ebr 11:11, 31, 35) Ita agradese tebes ba Jeová tanba iha ita-nia kongregasaun iha irmán sira neʼebé hatudu hahalok furak oioin.

10. Tanbasá ita hafolin irmaun-irmán sira neʼebé idade ona?

¹⁰ Ita mós kontente tanba iha irmaun-irmán neʼebé idade ona iha ita-nia kongregasaun. Iha kongregasaun balu, sira neʼebé idade ona serbí Jeová ho laran-metin durante sira-nia moris tomak. No iha mós sira balu neʼebé foin aprende lia-loos. Tuir loloos, irmaun-irmán neʼebé idade ona iha problema saúde oioin. Problema sira-neʼe karik hanetik sira atu halo buat barak iha kongregasaun no iha serbisu haklaken. Maski nuneʼe, sira hakaʼas an atu hola parte iha serbisu haklaken tuir sira-nia kbiit, no uza sira-nia forsa tomak atu hametin no treinu ema seluk. Ita bele aprende buat barak husi sira-nia esperiénsia. Ita no mós Jeová hafolin tebes sira.​—Prov 16:31.

11-12. Oinsá joven sira-nia ezemplu fó laran-manas mai ita?

¹¹ Hanoin mós kona-ba irmaun-irmán joven sira. Sira hasoru susar oioin tanba sai boot iha mundu neʼebé nakonu ho ideia aat oioin no Diabu Satanás mak kontrola. (1 João 5:19) Maski nuneʼe, ita hetan laran-manas bainhira haree joven sira fó resposta iha reuniaun, hola parte atu haklaken no defende sira-nia fiar ho aten-brani. Joven sira mak folin-boot iha Jeová nia kongregasaun.​—Sal 8:2.

¹² Maibé, irmaun-irmán balu sente susar atu fiar katak sira mak folin-boot iha kongregasaun. Saida mak bele ajuda ita atu sente katak ita ida-idak iha folin-boot iha kongregasaun? Mai ita haree.

13-14. Tanbasá ema balu sente katak sira la iha folin iha kongregasaun?

¹³ Lisaun segundu husi Paulo nia ai-knanoik halo ita hanoin kona-ba problema  neʼebé ema barak hasoru ohin loron. Ema barak sente susar atu fiar katak sira mak folin-boot iha kongregasaun. Paulo hakerek: “Se ain dehan: ‘Tanba haʼu laʼós liman, haʼu laʼós parte ba isin-lolon’, neʼe la dehan katak nia laʼós parte ba isin-lolon. No se tilun dehan: ‘Tanba haʼu laʼós matan, haʼu laʼós parte ba isin-lolon’, neʼe la dehan katak nia laʼós parte ba isin-lolon.” (1 Kor 12:15, 16) Paulo nia liafuan sira-neʼe katak sá?

¹⁴ Se Ita kompara Ita-nia an ho ema seluk iha kongregasaun, karik Ita sei komesa hanoin katak Ita la iha folin. Ema balu karik matenek atu hanorin, matenek atu organiza ka matenek atu fó kmaan no hametin ema seluk. Karik Ita sente katak Ita ladún iha matenek hanesan sira. Neʼe hatudu katak Ita mak haraik an no hatene Ita-nia limitasaun. (Flp 2:3) Maibé Ita presiza kuidadu. Se Ita sempre kompara Ita-nia an ho ema seluk neʼebé iha abilidade, neʼe sei halo Ita sai laran-kraik. Hanesan Paulo nia liafuan, karik Ita sei hanoin katak Ita laʼós parte importante ba kongregasaun. Saida mak bele ajuda Ita atu manán hasoru sentimentu neʼe?

15. Tuir 1 Korinto 12:4-11, ita tenke rekoñese saida kona-ba ita-nia abilidade?

¹⁵ Hanoin toʼok ida-neʼe: Iha apóstolu sira-nia tempu, liuhusi espíritu santu Jeová fó prezente ka kbiit ba ema Kristaun balu. Maibé kbiit neʼebé sira simu la hanesan. (Lee 1 Korinto 12:4-11.) Jeová fó sira abilidade neʼebé la hanesan, maibé sira ida-idak iha folin-boot. Ohin loron, ita la simu kbiit espesiál liuhusi espíritu santu. Maibé ita bele aplika prinsípiu husi eskritura neʼe. Maski ita-nia abilidade la hanesan, maibé Jeová hafolin ita hotu.

16. Ita presiza aplika apóstolu Paulo nia konsellu saida?

¹⁶ Duké kompara ita-nia an ho ema Kristaun seluk, ita presiza aplika apóstolu Paulo nia konsellu neʼebé dehan: “Ema ida-idak tenke buka-hatene ninia  hahalok rasik, no tuirmai nia sei iha razaun atu haksolok kona-ba ninia an rasik, laʼós hodi kompara nia an ho ema seluk.”​—Gal 6:4.

17. Ita sei hetan benefísiu saida se ita halo tuir Paulo nia konsellu?

¹⁷ Se ita halo tuir Paulo nia konsellu no buka-hatene ita-nia hahalok rasik, karik ita komesa nota ita rasik iha abilidade espesiál. Porezemplu, karik katuas ida ladún matenek atu hanorin husi plataforma, maibé nia iha abilidade atu hanorin ema sai dixípulu. Ka karik nia ladún matenek atu organiza hanesan katuas sira seluk, maibé ema koñese nia nuʼudar katuas neʼebé laran-diʼak no fasil ba irmaun-irmán sira atu hakbesik hodi husu matadalan husi Eskritura. Ka karik ema koñese nia nuʼudar ema neʼebé laran-luak. (Ebr 13:2, 16) Bainhira ita nota ita-nia kbiit no abilidade, ita sei sente kontente tanba bele ajuda kongregasaun. No ita mós sei la laran-moras ba irmaun-irmán sira neʼebé iha abilidade la hanesan ho ita.

18. Oinsá ita bele aumenta ita-nia matenek no abilidade?

¹⁸ Maski ita ida-idak halo serbisu neʼebé la hanesan iha kongregasaun, maibé ita hotu presiza hakaʼas an atu aumenta ita-nia matenek no abilidade atu haklaken no hanorin. Atu ajuda ita, Jeová treinu ita liuhusi ninia organizasaun. Porezemplu, iha reuniaun loron baileet ita simu treinu atu aumenta ita-nia matenek kona-ba haklaken. Ita aproveita treinu sira-neʼe ka lae?

19. Oinsá mak Ita bele kumpre Ita-nia planu atu tuir Eskola ba Haklaken-Naʼin Tempu-Tomak?

¹⁹ Dalan seluk tan Jeová treinu ita mak liuhusi Eskola ba Haklaken-Naʼin Tempu-Tomak. Irmaun-irmán sira neʼebé serbí Maromak tempu-tomak ho idade 23 toʼo 65 bele tuir eskola neʼe. Karik Ita hanoin Ita sei nunka bele tuir eskola neʼe. Maibé duké halo lista kona-ba razaun oioin tanbasá Ita labele tuir, diʼak liu halo lista kona-ba razaun tanbasá Ita hakarak tuir eskola neʼe. Tuirmai halo planu neʼebé bele ajuda Ita atu kumpre kritéria hodi bele tuir eskola neʼe. Ho Jeová nia ajuda no Ita-nia hakaʼas an, Ita bele kumpre buat neʼebé Ita hanoin katak Ita la iha kbiit atu halo.

20. Saida mak ita bele aprende husi Roma 12:6-8?

²⁰ Lisaun terseiru neʼebé ita bele aprende husi Paulo nia ai-knanoik mak iha Roma 12:6-8. (Lee.) Dala ida tan, Paulo esplika katak ema iha kongregasaun iha abilidade neʼebé la hanesan. Maibé iha eskritura neʼe, nia esplika katak ita presiza uza ita-nia abilidade atu hametin kongregasaun.

21-22. Lisaun saida mak ita bele aprende husi irmaun Robert no Felice?

²¹ Hanoin toʼok kona-ba irmaun Robert * nia ezemplu. Depois serbí tiha iha rai seluk, nia simu knaar atu serbí iha Betel iha ninia rai. Maski irmaun sira esplika katak mudansa ba ninia knaar laʼós tanba nia halo sala ruma, maibé nia hatete: “Durante fulan barak, haʼu la kontente tanba haʼu hanoin katak haʼu la halo haʼu-nia knaar uluk nian ho didiʼak. No haʼu hanoin atu sai husi Betel.” Oinsá mak nia hetan fali ksolok? Ninia maluk katuas ida fó-hanoin nia katak treinu neʼebé nia simu iha knaar uluk nian,  ajuda nia atu kumpre knaar neʼebé nia halo agora daudaun. Robert rekoñese katak nia presiza tau fokus ba buat neʼebé nia halo agora daudaun duké hanoin kona-ba pasadu.

²² Irmaun Felice Episcopo hasoru susar neʼebé hanesan. Nia no ninia feen tuir Eskola Gilead iha tinan 1956 no sira simu knaar atu serbí nuʼudar katuas área iha rai-Bolívia. Maibé iha tinan 1964 sira iha oan. Irmaun Felice hatete: “Ami sente susar atu husik knaar neʼebé ami hafolin tebes. Durante tinan ida haʼu sente laran-kraik. Maibé ho Jeová nia ajuda, haʼu troka haʼu-nia hanoin no tau fokus ba haʼu-nia responsabilidade foun nuʼudar aman.” Ita mós sente hanesan irmaun Robert no Felice ka lae? Ita sente laran-kraik tanba Ita la iha priviléjiu hanesan uluk ka lae? Se nuneʼe, tau fokus ba buat neʼebé Ita bele halo agora daudaun atu serbí Jeová no ajuda irmaun-irmán sira. Hodi halo nuneʼe, Ita sei sente kontente liu. Sai badinas nafatin hodi uza Ita-nia abilidade atu ajuda ema seluk no Ita sei hetan ksolok hodi hametin kongregasaun.

23. Ita presiza uza tempu atu halo saida? Iha lisaun tuirmai, ita sei hetan resposta ba pergunta saida deʼit?

²³ Ita ida-idak folin-boot ba Jeová. Nia hakarak ita atu sai parte ba ninia família. Uza tempu atu medita kona-ba oinsá ita bele hametin ita-nia irmaun-irmán sira no tuirmai hakaʼas an atu halo ida-neʼe. Hodi halo nuneʼe, ita sei sente katak ita folin-boot ba kongregasaun. Maibé oinsá ita haree ema seluk iha kongregasaun? No oinsá ita hatudu katak ita hafolin sira? Iha lisaun tuirmai, ita sei hetan resposta ba pergunta sira-neʼe.