Istória iha Deuteronómio 22:25-27 nia objetivu laʼós atu prova katak mane neʼe sala ka lae, tanba klaru katak mane neʼe halo sala duni. Maibé ukun-fuan neʼe nia objetivu mak atu ajuda juís sira buka-hatene se feto neʼe halo sala ka lae. Hanoin toʼok kona-ba eskritura neʼe nia kontestu.

Versíkulu sira antes neʼe koʼalia kona-ba mane ida neʼebé halo relasaun seksuál “iha sidade” ho feto neʼebé prenda ona. Hodi halo relasaun seksuál ho feto neʼe, mane neʼe halo adultériu tanba tuir ema nia haree feto neʼebé prenda ona mak kaben ona. Oinsá ho feto neʼe? “Nia la hakilar iha sidade neʼe.” Se nia hakilar duni, ita bele fiar katak ema seluk sei rona no bá atu salva nia. Maibé nia la hakilar. Nuneʼe, feto neʼe mós halo adultériu, no sira naʼin-rua mak sala.—Deut 22:23, 24.

Tuirmai, Moisés nia Ukun-Fuan fó sai situasaun neʼebé la hanesan, hodi dehan: “Maibé se mane neʼe hasoru feto ida iha rai-luan no feto neʼe prenda ona, no mane neʼe obriga nia hodi toba ho nia, mane neʼe deʼit mak tenke mate, no imi labele halo buat ida ba feto neʼe. Feto neʼe la iha sala ida no nia la merese mate. Kazu neʼe mak hanesan deʼit ho bainhira mane ida ataka ninia maluk no oho nia. Tanba mane neʼe hasoru nia iha rai-luan, no feto neʼebé prenda ona neʼe hakilar, maibé la iha ema ida atu salva nia.”—Deut 22:25-27.

Iha situasaun neʼe, juís sira fiar katak feto neʼe “hakilar, maibé la iha ema ida atu salva nia”. Tan neʼe nia la halo adultériu. Maibé juís rekoñese katak mane neʼe estraga feto neʼe no halo ona adultériu tanba mane neʼe obriga feto neʼebé prenda ona atu toba ho nia.

Tanba ukun-fuan neʼe tau fokus kona-ba feto neʼe la halo sala, entaun istória neʼe fó sai ho klaru katak mane neʼe halo sala hodi estraga feto neʼe no halo adultériu. Ita bele iha konfiansa katak juís sira “buka-hatene didiʼak problema neʼe” no foti desizaun neʼebé bazeia ba Maromak nia matadalan neʼebé fó sai dala barak ho klaru.—Deut 13:14; 17:4; Éx 20:14.