Ita bele ka lae hatán ba pergunta sira tuirmai neʼebé bazeia ba Livru Haklaken 2019?

Maromak nia promesa kona-ba “armas naran deʼit neʼebé ema halo hodi kontra ó sei la hetan susesu” katak sá? (Isa 54:17)

Ita bele iha konfiansa katak Jeová sei proteje ita husi buat oioin hanesan bainhira “ukun-naʼin aat sira sai hirus”. (Isa 25:4, 5) Ita-nia inimigu sei nunka susesu atu halakon ita-nia moris ba nafatin.—w19.01, p. 6-7.

Oinsá mak Maromak nia hahalok ba ema Kanaan no ema Izraél neʼebé la halo tuir nia, hatudu sai ninia justisa?

Maromak tesi-lia ba sira neʼebé hafoʼer sira-nia an ho hahalok seksuál no sira neʼebé trata aat feto no labarik sira neʼebé kbiit-laek. Nia haraik bensaun ba ninia povu neʼebé halo tuir nia no hatudu justisa.—w19.02, p. 22-23.

Ita presiza halo saida se ema ruma neʼebé laʼós Testemuña halo orasaun?

Ita bele nonook deʼit no hatudu respeitu, maibé ita la dehan “amen” ka kaer liman durante orasaun. Ita bele halo orasaun iha laran.—w19.03, p. 31.

Abuzu seksuál ba labarik mak sériu ka lae?

Abuzu seksuál ba labarik mak sala hasoru vítima, kongregasaun, autoridade sira no Maromak. Iha nasaun neʼebé iha lei kona-ba kesar ema neʼebé abuza labarik iha dalan seksuál, katuas sira tenke halo tuir.—w19.05, p. 9-10.

Oinsá mak Ita bele troka ka hadiʼa Ita-nia dalan atu hanoin?

Koʼalia ba Jeová liuhusi orasaun, hanoin kleʼan hodi buka-hatene Ita-nia hanoin no hili didiʼak Ita-nia belun.—w19.06, p. 11.

Saida mak ita bele halo agora atu prepara an ba tempu neʼebé ema fó-terus ba ita?

Hametin ita-nia relasaun ho Jeová. Fiar metin katak Jeová hadomi ita no nunka husik ita. Lee Bíblia loroloron no halo orasaun beibeik. Fiar metin katak Maromak nia Ukun sei lori bensaun. Dekór eskritura no knananuk neʼebé ita gosta.—w19.07, p. 2-4.

Oinsá ita bele ajuda ita-nia família hetan salvasaun?

Importante atu hanoin sira-nia sentimentu. Fó sasin diʼak liuhusi ita-nia ezemplu. No hatudu pasiénsia no laran-diʼak.—w19.08, p. 15-17.

Oinsá mak ita bele hetan kmaan hanesan Jesus promete iha Mateus 11:28?

Ita iha katuas kongregasaun neʼebé hatudu domin, belun neʼebé diʼak no serbisu neʼebé diʼak liu.—w19.09, p. 23.

Oinsá mak Maromak bele fó ba ita hakarak no kbiit atu halo buat ruma? (Flp 2:13)

Bainhira ita lee Bíblia no medita kona-ba neʼe, Maromak bele fó forsa mai ita no neʼe fó ita hakarak no kbiit atu halo tuir ninia hakarak. Ninia espíritu santu bele aumenta abilidade neʼebé ita iha ona.—w19.10, p. 21.

Ita presiza halo hakat saida deʼit antes halo desizaun neʼebé importante?

Halo riset, halo orasaun hodi husu matenek, buka-hatene ita-nia motivu, iha planu neʼebé espesífiku no iha hanoin neʼebé loos.—w19.11, p. 27-29.

Hanorin kona-ba mate-klamar hahú husi tempu neʼebé Satanás koʼalia ba Eva ka lae?

Tuir loloos, lae. Satanás hatete ba Eva katak nia sei la mate, Satanás la dehan katak Eva iha klamar. Hanorin falsu hotu lakon durante Rai-Nabeen. Karik hanorin kona-ba mate-klamar hahú iha tempu neʼebé Maromak halo ema namkari ba fatin oioin tanba sira harii uma aas Babel.—w19.12, p. 15.