1-2. Tanbasá Jeová loke dalan ba ita atu sai parte ba ninia família no oinsá?

JEOVÁ konvida ona ita atu sai parte ba ninia família neʼebé adora nia. Neʼe konvite neʼebé espesiál tebes. Ema sira neʼebé dedika an ona ba Maromak no hatudu fiar ba ninia Oan-Mane nia sakrifísiu mak sai parte ba família neʼe. Ita mak família ida neʼebé kontente. Ita-nia moris iha objetivu, no ita haksolok tanba iha esperansa atu moris ba nafatin iha lalehan ka iha Paraízu iha rai.

² Jeová loke dalan ba ita atu sai parte ba ninia família tanba nia hadomi tebes ita. Maibé atu halo nuneʼe, Jeová tenke halo sakrifísiu boot. (João 3:16) Jeová sosa ita “ho folin karun”. (1 Kor 6:20) Liuhusi Jesus nia sakrifísiu, Jeová loke dalan ba ita atu iha relasaun diʼak ho nia. Ita bele bolu Ukun-Naʼin Boot Liu Hotu nuʼudar ita-nia Aman. No hanesan ita aprende iha lisaun antes neʼe, Jeová mak Aman neʼebé diʼak liu.

3. Karik ita husu pergunta saida? (Haree mós kaixa “ Jeová haree haʼu ka lae?”)

³ Karik ita mós husu pergunta hanesan ho ema neʼebé hakerek salmo ida: “Saida mak haʼu sei fó hodi selu fali Jeová tanba buat diʼak hotu neʼebé nia halo ona ba haʼu?” (Sal 116:12) Resposta mak ita nunka bele selu fali ita-nia Aman iha lalehan. Maibé, ninia domin ba ita book ita atu hadomi fali nia. Apóstolu João hakerek: “Ita hatudu domin tanba nia hadomi uluk ita.” (1 João 4:19) Iha dalan saida deʼit mak ita bele hatudu domin ba ita-nia Aman iha lalehan?

4. Tuir Tiago 4:8, tanbasá diʼak atu hakbesik ba Jeová?

⁴ Jeová hakarak ita atu hakbesik ba nia no koʼalia ba nia. (Lee Tiago 4:8.) Nia anima ita atu la “kole atu halo orasaun”, no nia sempre rona ba ita. (Rom 12:12) Nia nunka okupadu demais ka kole atu rona ba ita. No ita rona ba nia liuhusi lee ninia Liafuan Bíblia no ita-nia publikasaun sira neʼebé ajuda ita atu komprende Bíblia. Ita mós rona ba nia liuhusi tau atensaun didiʼak ba reuniaun sira. Bainhira oan sira no inan-aman koʼalia ba malu beibeik, sira sei hakbesik liután ba malu, nuneʼe mós se ita no Jeová koʼalia ba malu beibeik, neʼe sei ajuda ita atu hakbesik nafatin ba nia.

5. Ita presiza halo saida atu Jeová gosta liután ita-nia orasaun?

⁵ Hanoin toʼok kona-ba Ita-nia orasaun ba Jeová. Jeová hakarak ita atu fakar sai ita-nia laran tomak ba nia liuhusi orasaun. (Sal 62:8) Diʼak atu husu ba ita-nia an: ‘Haʼu-nia orasaun mak hanesan karta neʼebé kopia deʼit no la mai husi laran, ka haʼu-nia orasaun mak hanesan karta neʼebé haʼu hakerek rasik no mai husi laran?’ Klaru katak Ita hadomi tebes Jeová, no Ita hakarak atu iha relasaun neʼebé metin ho nia. Atu halo nuneʼe, Ita presiza koʼalia ba nia beibeik. Fó sai Ita-nia sentimentu ba nia. Fahe Ita-nia ksolok no Ita-nia laran-kanek ba nia. Iha konfiansa katak Ita bele hakbesik ba nia atu husu ajuda.

6. Ita presiza halo saida atu hakbesik nafatin ba ita-nia Aman iha lalehan?

⁶ Atu bele hakbesik nafatin ba ita-nia Aman iha lalehan, ita tenke kontinua hatudu agradese ba nia. Ita konkorda ho ema neʼebé hakerek salmo ida: “Oh Jeová, haʼu-nia Maromak, Ita halo ona buat barak, Ita-nia hahalok kmanek no Ita-nia hanoin diʼak ba ami mak barak. La iha ida mak hanesan ho Ita; se haʼu koko atu konta fali no koʼalia kona-ba buat sira-neʼe, neʼe hotu barak liu toʼo sura labele!” (Sal 40:5) Ita la sente deʼit agradese, maibé ita mós hatudu sai ita-nia agradese ba Jeová liuhusi liafuan no hahalok. Tan neʼe ita la hanesan ho ema barak ohin loron. Sira la hatudu agradese ba buat hotu neʼebé Jeová halo ba sira. Tuir loloos, sinál ida neʼebé hatudu katak ita moris iha “loron ikus sira” mak ema la hatene atu fó agradese. (2 Tim 3:1, 2) Ita lakohi sai hanesan neʼe.

7. Jeová hakarak ita atu halo saida, no tanbasá?

⁷ Inan-aman sira lakohi sira-nia oan atu istori malu maibé hakarak oan sira sai belun diʼak. Nuneʼe mós Jeová hakarak ninia oan hotu sai belun diʼak. Tuir loloos, domin neʼebé ita hatudu ba malu mak sinál katak ita mak ema Kristaun loos. (João 13:35) Ita konkorda ho ema neʼebé hakerek salmo ida: “Diʼak tebes no kmanek loos bainhira maun-alin sira hela hamutuk ho unidade!” (Sal 133:1) Bainhira ita hadomi irmaun-irmán sira, ita hatudu katak ita hadomi Jeová. (1 João 4:20) Ita kontente atu sai parte ba família ida neʼebé ema hotu “hatudu laran-diʼak ba malu, [no] hanoin malu”.—Éf 4:32.

8. Tuir 1 João 5:3, saida mak razaun importante liu atu halo tuir Jeová?

⁸ Jeová hakarak oan sira atu halo tuir sira-nia inan-aman, no mós hakarak ita hotu atu halo tuir nia. (Éf 6:1) Ita presiza halo tuir nia tanba nia mak ita-nia  Kriadór, nia ajuda ita atu kontinua moris, no mós nia matenek liu fali aman hotu. Maibé, razaun importante liu atu halo tuir Jeová mak tanba ita hadomi nia. (Lee 1 João 5:3.) Maski iha razaun barak ba ita atu halo tuir Jeová, maibé nia la obriga ita atu halo tuir nia. Jeová fó ita liberdade atu hili, tan neʼe nia kontente bainhira ita hili atu halo tuir nia tanba domin.

9-10. Tanbasá importante atu hatene Jeová nia lei sira no halo tuir?

⁹ Inan-aman sira hakarak sira-nia oan sente seguru. Tan neʼe sira halo regra oioin atu proteje sira-nia oan. Bainhira oan sira halo tuir regra sira-neʼe, sira hatudu katak sira tau fiar no respeitu sira-nia inan-aman. Entaun importante liután atu hatene no halo tuir ita-nia Aman iha lalehan nia lei sira. Hodi halo nuneʼe, ita hatudu katak ita hadomi no respeitu Jeová no ita mós hetan benefísiu. (Isa 48:17, 18) Maibé, ema neʼebé la halo tuir Jeová no ninia lei sira, ikusmai hetan susar oioin.—Gal 6:7, 8.

¹⁰ Bainhira ita halaʼo ita-nia moris iha dalan neʼebé halo Jeová kontente, neʼe proteje ita husi buat neʼebé bele estraga ita iha dalan fíziku, emosaun no ita-nia relasaun ho Jeová. Jeová hatene buat neʼebé diʼak liu ba ita. Irmán Aurora neʼebé hela iha Estadus Unidus hatete: “Haʼu iha konfiansa katak halo tuir Jeová sempre lori rezultadu diʼak ba ita-nia moris.” Neʼe loos duni. Ita hetan ona  benefísiu hodi halo tuir Jeová nia lei sira ka lae?

11. Oinsá mak orasaun ajuda ita?

¹¹ Orasaun ajuda ita atu halo tuir maski susar. Dala ruma susar atu halo tuir Jeová tanba ita sala-naʼin, maibé ita presiza kontinua hakaʼas an atu halo tuir Jeová. Ema neʼebé hakerek salmo ida husu ba Maromak: “Book haʼu-nia fuan-laran hodi prontu atu halo tuir Ita.” (Sal 51:12) Irmán Denise neʼebé serbí nuʼudar pioneiru regulár dehan: “Se haʼu sente susar atu halo tuir Jeová nia mandamentu ida, haʼu halo orasaun atu hetan kbiit hodi halo buat neʼebé loos.” Ita bele iha konfiansa katak Jeová sempre hatán ba orasaun sira hanesan neʼe.—Lc 11:9-13.

12. Tuir Éfeso 5:1, ita presiza halo saida?

¹² Lee Éfeso 5:1. Tanba ita mak Jeová nia “oan doben”, ita hakaʼas an atu banati-tuir nia. Ita banati-tuir ninia hahalok sira hodi hatudu domin, laran-diʼak no prontu atu perdua ema seluk. Karik ema sira neʼebé la hatene Jeová sei hakarak atu aprende liután kona-ba nia tanba sira haree ita-nia hahalok diʼak sira. (1 Ped 2:12) Inan-aman Kristaun sira iha razaun diʼak atu banati-tuir Jeová bainhira sira tau matan ba sira-nia oan. Kuandu sira halo nuneʼe, ida-neʼe karik sei book sira-nia oan atu haburas relasaun diʼak ho Aman Jeová.

13. Ita tenke tau fokus ba saida?

 ¹³ Baibain labarik sira orgullu no gosta atu koʼalia kona-ba sira-nia aman. Nuneʼe mós ita sente orgullu ho ita-nia Aman Jeová, no hakarak atu ema seluk hatene kona-ba nia. Ita mós sente hanesan Liurai David neʼebé dehan: “Haʼu sei koʼalia kona-ba Jeová ho orgullu.” (Sal 34:2) Maibé oinsá se ita mak moedór? Oinsá ita bele sai aten-brani? Ita sei hetan aten-brani se ita tau fokus ba oinsá ita-nia haklaken halo Jeová kontente no lori benefísiu ba ema neʼebé aprende kona-ba Jeová. Jeová sei fó ita aten-brani neʼebé ita presiza. Nia ajuda irmaun-irmán sira iha apóstolu sira-nia tempu atu sai aten-brani, no nia mós sei ajuda ita.—1 Tes 2:2.

14. Tanbasá importante atu hanorin ema sai dixípulu?

¹⁴ Jeová la todan ba sorin, no nia kontente bainhira haree ita hatudu domin ba malu maski ita mai husi fatin neʼebé la hanesan. (Após 10:34, 35) Dalan diʼak liu atu bele hatudu domin ba ema seluk mak hodi fahe liafuan diʼak ba sira. (Mt 28:19, 20) Serbisu neʼe lori rezultadu saida? Ema sira neʼebé rona ba ita bele iha moris neʼebé diʼak agora no sei iha oportunidade atu moris ba nafatin iha futuru.—1 Tim 4:16.

15-16. Ita iha razaun saida deʼit atu sente kontente?

¹⁵ Jeová mak Aman neʼebé domin, tan neʼe nia hakarak ninia família atu sente kontente. (Isa 65:14) Iha razaun barak atu bele sente kontente agora maski ita hasoru susar oioin. Porezemplu, ita iha konfiansa katak ita-nia Aman iha lalehan hadomi tebes ita. Ita iha koñesimentu loos kona-ba Bíblia. (Jer 15:16) No ita sai parte ba família neʼebé hadomi Jeová, hadomi malu no hafolin ninia morál neʼebé aas.—Sal 106:4, 5.

¹⁶ Ita bele kontente nafatin tanba ita iha esperansa katak ita sei hetan moris diʼak liu iha futuru. Ita hatene katak lakleur tan Jeová sei halakon buat aat hotu, no rai sei sai Paraízu fali iha ninia Ukun okos. Ita mós iha esperansa katak ema sira neʼebé mate ona sei moris-hiʼas fali no hamutuk fali ho ita. (João 5:28, 29) Neʼe mak tempu neʼebé haksolok tebes! No importante liu mak ita fiar katak lakleur tan sira hotu neʼebé moris iha lalehan no rai sei fó hahiʼi no adora ita-nia Aman neʼebé domin.