1-2. Situasaun saida deʼit mak Jeová nia atan sira hasoru? Neʼe lori rezultadu saida?

HANOIN toʼok ezemplu tolu tuirmai neʼe: Doutór hatete ba irmaun joven ida katak nia iha moras ida neʼebé sei halo nia sai fraku ba beibeik. Irmaun ida neʼebé idade 50 liu lakon ninia serbisu, no maski nia hakaʼas an maibé la hetan serbisu seluk. Irmán ferik ida labele ona halo buat barak ba Jeová hanesan uluk.

² Se Ita mós hasoru problema hanesan neʼe, karik Ita sente katak Jeová labele uza tan Ita. Situasaun sira-neʼe bele halakon Ita-nia ksolok, halo Ita sente la iha folin, no hanetik Ita atu iha relasaun diʼak ho ema seluk.

3. Oinsá Satanás no ema sira neʼebé banati-tuir nia, hanoin kona-ba ema nia moris?

³ Mundu neʼe haleno Satanás nia hanoin kona-ba ema nia moris. Horiuluk kedas Satanás la hafolin ema. Nia ho laran-aat dehan ba Eva katak Eva bele sai livre se kontra Maromak, maski nia hatene rezultadu mak mate. Horiuluk kedas Satanás kontrola sistema ekonomia, polítika, no relijiaun iha mundu neʼe. Tan neʼe ita la hakfodak bainhira negósiu-naʼin, polítiku-naʼin, no ulun-naʼin relijiaun barak haleno ninia hahalok neʼebé la respeitu ema nia moris no dignidade.

4. Saida deʼit mak ita sei aprende iha lisaun neʼe?

⁴ Maibé Jeová hakarak ita atu hatene katak ita iha folin,  no nia apoia ita bainhira ita hasoru situasaun neʼebé bele halo ita sente folin-laek. (Sal 136:23; Rom 12:3) Iha lisaun neʼe, ita sei koʼalia kona-ba oinsá Jeová ajuda ita iha situasaun tuirmai neʼe: (1) Bainhira ita moras, (2) bainhira hasoru problema ekonomia, no (3) bainhira ita-nia idade halo ita sente katak ita la iha ona folin atu halo serbisu ba Jeová. Maibé ulukliu mai ita aprende kona-ba tanbasá ita bele fiar katak ita ida-idak mak folin-boot ba Jeová.

5. Saida mak hatudu katak Jeová hafolin Ita?

⁵ Maski Maromak kria ita husi rai-rahun, maibé ita folin-boot liu fali rai-rahun. (Gén 2:7) Hanoin toʼok razaun balu tanbasá ita hatene katak Jeová hafolin ita. Nia kria ema ho kbiit atu haleno ninia hahalok. (Gén 1:27) Tan neʼe mak ita diʼak liu fali ninia kriasaun seluk iha rai, no ita iha knaar atu tau matan ba rai no animál sira.​—Sal 8:4-8.

6. Saida tan mak hatudu katak Jeová hafolin ema neʼebé la perfeitu?

⁶ Maski Adão halo sala, maibé Jeová kontinua hafolin ema. Nia hafolin tebes ita toʼo fó ninia Oan-Mane Jesus nuʼudar sakrifísiu atu taka ita-nia sala. (1 João 4:9, 10) Liuhusi Jesus nia sakrifísiu, Jeová sei fó moris-hiʼas ba ema neʼebé mate ona tanba Adão nia sala, katak “ema neʼebé hatudu hahalok loos no mós ema neʼebé hatudu hahalok la loos”. (Após 24:15) Bíblia hatudu katak ita mak folin-boot ba Maromak maski ita moras, kiak, ka idade ona.—Após 10:34, 35.

7. Tanbasá Jeová nia atan sira fiar katak nia hafolin sira?

⁷ Ita iha razaun seluk tan atu fiar katak Jeová hafolin ita. Nia dada ita ba nia no nia haree oinsá ita simu liafuan diʼak. (João 6:44) Bainhira ita hakbesik liután ba Jeová, nia mós hakbesik liután ba ita. (Tgo 4:8) Jeová mós uza tempu no forsa atu hanorin ita, neʼe hatudu katak ita folin-boot ba nia. Nia hatene ita ida-idak mak ema hanesan saida no mós hatene ita bele sai ema diʼak liután iha futuru. No nia dixiplina ita tanba hadomi ita. (Prov 3:11, 12) Neʼe hatudu ho klaru katak Jeová hafolin ita.

8. Oinsá Salmo 18:27-29 bele kona dalan neʼebé ita hanoin kona-ba ita-nia problema?

⁸ Ema balu haree Liurai David nuʼudar folin-laek, maibé David hatene katak Jeová hadomi no apoia nia. Neʼe ajuda nia atu tahan susar sira ho hanoin neʼebé loos. (2 Sam 16:5-7) Bainhira ita sente laran-kraik ka hasoru problema, Jeová bele ajuda ita iha hanoin neʼebé loos kona-ba ita-nia situasaun no nia mós bele ajuda ita atu manán susar naran deʼit. (Lee Salmo 18:27-29.) Bainhira Jeová apoia ita, la iha buat ida mak bele hapara ita atu adora nia ho kontente. (Rom 8:31) Mai ita koʼalia kona-ba situasaun tolu neʼebé ita presiza duni atu hanoin-hetan katak Jeová hadomi no hafolin ita.

9. Oinsá mak moras bele kona dalan neʼebé ita hanoin kona-ba ita-nia an?

⁹ Moras bele kona ita-nia emosaun no halo ita sente katak ita la iha folin. Karik ita sente moe bainhira ema haree katak ita iha limitasaun ka ita presiza ema seluk nia ajuda. Maski ema seluk la hatene katak ita moras, maibé karik ita nafatin luta hasoru sentimentu moe tanba ita la  iha kbiit atu halo buat ruma hanesan uluk. Iha situasaun susar hanesan neʼe, Jeová bele anima ita. Oinsá?

10. Tuir Provérbios 12:25, saida mak bele ajuda ita bainhira moras?

¹⁰ Bainhira ita moras, ita bele hetan anima liuhusi “liafuan neʼebé diʼak”. (Lee Provérbios 12:25.) Iha Bíblia, Jeová rai liafuan neʼebé diʼak atu fó-hanoin ita katak nia hafolin ita maski ita moras. (Sal 31:19; 41:3) Se ita lee ona liafuan sira-neʼe no lee fila-fila, Jeová sei ajuda ita atu manán hanoin negativu neʼebé mosu tanba ita moras.

11. Oinsá mak Jeová ajuda irmaun ida?

¹¹ Hanoin toʼok Jorge nia esperiénsia. Nuʼudar mane joven ida, Jorge hetan moras neʼebé halo nia sai fraku ba beibeik no neʼe halo nia sente la iha folin. Jorge hatete: “Moras neʼe kona mós haʼu-nia sentimentu no halo haʼu sai fraku. Haʼu moe tanba moras neʼe halo ema hateke ba haʼu. Bainhira haʼu-nia situasaun sai aat liu, haʼu imajina oinsá ida-neʼe sei troka haʼu-nia moris. Haʼu sai triste tebes, no haʼu harohan ba Jeová atu ajuda haʼu.” Oinsá mak Jeová ajuda Jorge? Jorge hatete: “Tanba haʼu sente susar atu fokus, haʼu lee versíkulu balu husi Salmo neʼebé hatudu katak Jeová hanoin ninia atan sira. Loroloron haʼu lee fila-fila eskritura sira-neʼe, no neʼe fó kmaan no anima haʼu. Liutiha tempu balu, ema seluk bele haree katak haʼu oin-midar liu. Sira mós hatete katak haʼu-nia hanoin pozitivu anima sira. Haʼu rekoñese katak Jeová hatán ona haʼu-nia orasaun. Nia ajuda haʼu atu troka dalan neʼebé haʼu hanoin kona-ba haʼu-nia an. Haʼu tau fokus ba ninia Liafuan neʼebé fó  sai ninia hanoin katak nia hafolin haʼu maski haʼu moras.”

12. Se agora Ita moras, saida mak Ita bele halo atu hetan ajuda husi Jeová?

¹² Se agora Ita moras, fiar metin bá katak Jeová hatene Ita-nia susar. Husu nia atu ajuda Ita haburas hanoin neʼebé loos kona-ba Ita-nia situasaun. Tuirmai uza Bíblia atu buka liafuan diʼak neʼebé Jeová rai ba Ita. Tau fokus ba eskritura sira neʼebé hatudu oinsá Jeová hafolin ninia atan sira. Se Ita halo nuneʼe, Ita sei haree katak Jeová hatudu laran-diʼak ba ema hotu neʼebé serbí nia ho laran-metin.​—Sal 84:11.

13. Família nia ulun sente oinsá se lakon serbisu?

¹³ Família ida-idak nia ulun hakarak atu tau matan ba ninia família nia presiza. Maibé oinsá se irmaun ida lakon ninia serbisu maski la halo sala. Nia badinas buka serbisu seluk maibé la hetan. Bainhira hasoru situasaun hanesan neʼe, karik nia sente katak nia la iha folin. Oinsá mak tau fokus ba Jeová nia promesa bele ajuda nia?

14. Tanbasá Jeová kumpre ninia promesa?

¹⁴ Jeová sempre kumpre ninia promesa. (Jos 21:45; 23:14) Nia halo nuneʼe tanba razaun oioin. Primeiru tanba neʼe kona ninia naran ka reputasaun. Jeová promete katak nia sei tau matan ba ninia atan sira neʼebé laran-metin, no nia sente katak nia iha obrigasaun atu kumpre promesa neʼe. (Sal 31:1-3) Segundu, Jeová hatene katak ita sei triste no laran-kraik se nia la tau matan ba ita neʼebé sai parte ba ninia família. Nia promete atu fó buat neʼebé ita presiza no  mós buat espirituál. La iha buat ida mak bele hanetik nia atu kumpre ninia promesa neʼe.​—Mt 6:30-33; 24:45.

15. (a) Ema Kristaun iha apóstolu sira-nia tempu hasoru susar saida? (b) Salmo 37:18, 19 fó konfiansa saida mai ita?

¹⁵ Bainhira ita hanoin-hetan tanbasá Jeová kumpre ninia promesa, ita bele iha konfiansa katak Jeová sei ajuda ita bainhira ita hasoru problema ekonomia. Hanoin toʼok ezemplu husi ema Kristaun iha apóstolu sira-nia tempu. Bainhira ema kontra kongregasaun iha Jeruzalein, “dixípulu sira hotu halai namkari ba área Judeia no Samaria, só apóstolu sira deʼit mak hela iha Jeruzalein”. (Após 8:1) Ita bele fiar katak sira hasoru problema ekonomia. Ema Kristaun sira-neʼe karik lakon sira-nia uma no negósiu. Maibé Jeová la husik sira no sira mós la lakon sira-nia ksolok. (Após 8:4; Ebr 13:5, 6; Tgo 1:2, 3) Jeová apoia ema Kristaun laran-metin sira-neʼe, no nia mós sei apoia ita.​—Lee Salmo 37:18, 19.

16. Saida mak bele halo ita sente katak Jeová la hafolin ita-nia adorasaun?

¹⁶ Bainhira ita idade ona, karik ita komesa sente katak Jeová labele uza tan ita. Liurai David mós karik sente hanesan neʼe bainhira nia sai idade. (Sal 71:9) Oinsá Jeová bele ajuda ita?

17. Saida mak ita bele aprende husi irmán Jheri nia esperiénsia?

¹⁷ Hanoin toʼok kona-ba irmán Jheri nia esperiénsia. Nia hetan konvite atu tuir treinamentu manutensaun nian iha Reuniaun-Fatin, maibé nia lakohi tuir. Nia hatete: “Haʼu ferik ona no faluk, no haʼu la iha matenek neʼebé Jeová bele  uza. Haʼu la iha folin.” Kalan antes treinamentu neʼe, nia fakar sai ninia laran tomak ba Jeová liuhusi orasaun. Loron tuirmai bainhira nia toʼo iha Reuniaun-Fatin, nia nafatin duvida kona-ba tuir treinamentu neʼe. Durante programa, oradór ida esplika katak ita-nia matenek neʼebé importante liu mak ita-nia hakarak atu simu hanorin husi Jeová. Irmán Jheri hatete: “Haʼu hanoin: ‘Haʼu iha matenek neʼe!’ Haʼu komesa tanis tanba haʼu komprende katak Jeová hatán haʼu-nia orasaun. Nia halo haʼu iha konfiansa katak haʼu iha buat ruma neʼebé folin-boot atu fó ba nia no nia prontu atu hanorin haʼu!” Kuandu hanoin fali situasaun neʼe, irmán Jheri hatete: “Bainhira tuir treinamentu neʼe, haʼu sente taʼuk, laran-kraik no sente la iha folin. Maibé bainhira remata, haʼu sente fiar an, hetan anima, no sente iha folin-boot!”

18. Oinsá mak Bíblia hatudu katak Jeová kontinua hafolin ita-nia adorasaun maski ita idade ona?

¹⁸ Maski ita idade ona, maibé ita bele fiar katak Jeová sei uza ita atu halo serbisu balu. (Sal 92:12-15) Jesus hanorin ita katak Jeová hafolin buat hotu neʼebé ita bele halo iha ninia serbisu, maski ita sente buat neʼebé ita bele halo ladún iha folin. (Lc 21:2-4) Tan neʼe, tau fokus ba buat neʼebé Ita bele halo. Porezemplu, Ita bele koʼalia kona-ba Jeová, halo orasaun kona-ba irmaun-irmán sira, no anima ema seluk atu laran-metin nafatin. Jeová haree Ita nuʼudar ninia maluk serbisu-naʼin, laʼós tanba buat neʼebé Ita bele halo, maibé tanba Ita prontu atu halo tuir nia.​—1 Kor 3:5-9.

19. Roma 8:38, 39 fó konfiansa saida mai ita?

¹⁹ Ita agradese tebes tanba adora Maromak Jeová neʼebé hafolin tebes ninia atan sira! Nia kria ita atu halo ninia hakarak, no adorasaun neʼebé loos halo ita-nia moris kontente liu. (Apok 4:11) Maski mundu haree ita nuʼudar buat neʼebé folin-laek, maibé Jeová hafolin ita. (Ebr 11:16, 38) Bainhira ita sente laran-kraik tanba moras, problema ekonomia, ka idade ona, mai ita hanoin-hetan katak la iha buat ida mak bele haketak ita husi ita-nia Aman lalehan nia domin.​—Lee Roma 8:38, 39.