1. Filipe 2:3 fó konsellu saida? Ita sei hetan benefísiu saida hodi aplika konsellu neʼe?

ITA halo tuir Jeová nia matadalan ho haraik an tanba ita rekoñese katak Jeová sempre hatene buat neʼebé diʼak liu ba ita. (Éf 4:22-24) Hahalok haraik an sei book ita atu tau uluk Jeová nia hakarak duké ita-nian no haree ema seluk boot liu fali ita. Rezultadu mak ita iha relasaun diʼak ho Jeová no mós maluk Kristaun seluk.​—Lee Filipe 2:3.

2. Paulo rekoñese saida? Iha lisaun neʼe, ita sei aprende saida?

² Maibé se ita la kuidadu, ema iha Satanás nia mundu neʼebé foti an no hanoin an deʼit, * bele fó influénsia ba ita. Karik ema Kristaun balu iha apóstolu sira-nia tempu hetan influénsia husi Satanás nia mundu, tan neʼe apóstolu Paulo hakerek ba ema Roma: “Haʼu koʼalia ba ema hotu iha imi-nia leet atu la hanoin nia an diʼak liu fali buat neʼebé loos, maibé atu hanoin ho neon neʼebé loos.” (Rom 12:3) Paulo rekoñese katak ita presiza hafolin ita-nia an. No hahalok haraik an sei ajuda ita atu iha hanoin neʼebé loos kona-ba ita-nia an. Iha lisaun neʼe, ita sei aprende oinsá hahalok haraik an ajuda ita atu la sai foti an iha situasaun tolu. Situasaun sira-neʼe mak (1) moris kaben nian, (2) priviléjiu iha organizasaun, no (3) dalan neʼebé ita uza média sosiál.

3. Tanbasá problema mosu iha moris kaben nian? Ema balu halo saida bainhira problema mosu?

³ Jeová hakarak atu feen-laʼen moris hamutuk ho kontente. Maibé tanba ita hotu la perfeitu, problema bele mosu iha moris kaben nian. Tuir loloos, Paulo hakerek katak ema neʼebé kaben sei hasoru problema balu. (1 Kor 7:28) Feen-laʼen balu diskute malu beibeik no sira sente katak diʼak liu uluk sira la kaben. Se sira hetan ona influénsia husi Satanás nia mundu, sira sei hakarak atu soe malu deʼit. Sira sei hanoin an deʼit no sente katak sira sei kontente liu se sira soe malu.

4. Ita labele halo saida?

⁴ Labele hanoin katak ita-nia moris kaben nian la susesu ona. Ita hatene katak Bíblia fó lisensa atu soe malu só deʼit se feen ka laʼen halo sala seksuál. (Mt 5:32) Maibé kuandu mosu problema iha moris kaben nian, ita labele sai foti an no hanoin: ‘Haʼu-nia kaben la hanoin haʼu. Haʼu-nia kaben la hadomi haʼu. Karik haʼu sei kontente liu se haʼu ho ema seluk.’ Se Ita hanoin hanesan neʼe, Ita hanoin an deʼit no la hanoin Ita-nia kaben. Mundu nia matenek hanorin Ita atu halo tuir deʼit Ita-nia sentimentu no halo buat neʼebé lori kontente mai Ita, maski neʼe katak Ita sei soe malu. Matenek husi Maromak hatete katak ita labele ‘buka diʼak deʼit ba ita-nia an rasik, maibé buka mós ema seluk nia diʼak’. (Flp 2:4) Jeová hakarak ita atu laran-metin ba ita-nia kaben, laʼós soe malu. (Mt 19:6) Nia hakarak Ita atu hanoin uluk kona-ba nia, laʼós Ita-nia an.

5. Tuir Éfeso 5:33, feen-laʼen presiza hatudu hahalok saida ba malu?

⁵ Feen-laʼen presiza hatudu domin no respeitu ba malu. (Lee Éfeso 5:33.) Bíblia hanorin ita atu tau fokus ba fó duké  simu. (Após 20:35) Hahalok saida mak bele ajuda feen-laʼen atu hatudu domin no respeitu ba malu? Resposta mak haraik an. Feen ka laʼen neʼebé hatudu haraik an sei buka uluk ninia kaben nia diʼak duké ninian rasik.—1 Kor 10:24.

6. Ita aprende saida husi Steven no Stephanie?

⁶ Haraik an ajuda ona feen-laʼen Kristaun barak atu iha moris kaben nian neʼebé kontente liu. Porezemplu, laʼen ida naran Steven hatete: “Ita no ita-nia kaben presiza serbisu hamutuk, liuliu kuandu mosu problema. Duké hanoin ‘saida mak diʼak ba haʼu?’ Ita sei hanoin ‘saida mak diʼak ba ami?’” Ninia feen Stephanie mós sente nuneʼe. Stephanie hatete: “Ita lakohi hela ho ema neʼebé gosta diskute malu. Bainhira problema mosu, ami buka-hatene hun ba problema neʼe. Tuirmai ami halo orasaun, halo riset, no koʼalia hamutuk kona-ba problema neʼe. Ami hakaʼas an atu rezolve problema neʼe no la diskute malu.” Feen-laʼen bele sente kontente liu se sira la hanoin katak sira mak importante liu fali sira-nia kaben.

7. Irmaun ida presiza hatudu hahalok saida bainhira simu priviléjiu ruma?

⁷ Serbí Jeová iha dalan oioin mak priviléjiu ida. (Sal 27:4; 84:10) Diʼak tebes se irmaun ida prontu atu halo buat barak tan iha Jeová nia organizasaun. Loloos Bíblia hatete: “Se mane ida hakaʼas an atu simu knaar nuʼudar katuas, nia hakarak halo serbisu neʼebé diʼak.” (1 Tim 3:1) Maibé, bainhira simu knaar ruma, nia labele hanoin katak agora nia mak ema importante. (Lc 17:7-10) Ninia objetivu mak atu serbí ema seluk ho haraik an.​—2 Kor 12:15.

8. Ita aprende saida husi Diótrefes, Uzias no Absalão nia ezemplu?

⁸ Bíblia temi ema balu neʼebé hanoin katak sira mak ema importante liu. Diótrefes la hatudu haraik an no koko atu “hetan pozisaun primeiru” iha kongregasaun. (3 João 9) Uzias ho foti an koko atu halo knaar neʼebé Jeová la haruka nia atu halo. (2 Krón 26:16-21) Absalão hakarak sai liurai, tan neʼe nia finje hadomi povu atu nuneʼe sira sei apoia nia. (2 Sam 15:2-6) Istória sira-neʼe hatudu ho klaru katak Jeová la kontente ho ema neʼebé buka glória ba ninia an rasik. (Prov 25:27) Ema neʼebé foti an no hakarak ema admira sira, ikusmai sei hasoru problema.​—Prov 16:18.

9. Jesus hatudu ezemplu saida?

⁹ Maibé Jesus la hanesan ho ema foti an sira-neʼe. Bíblia koʼalia kona-ba Jesus, hodi dehan: “Maski nia mak Maromak nia ilas, nia la hanoin atu hadau Maromak nia pozisaun hodi sai hanesan ho Maromak.” (Flp 2:6) Jeová deʼit mak boot liu Jesus, maski nuneʼe Jesus nunka hanoin katak nia mak importante liu. Nia hatete ba ninia dixípulu sira: “Ema neʼebé haraik an iha imi hotu nia leet, nia mak ema neʼebé boot liu.” (Lc 9:48) Ita kontente tebes atu serbí hamutuk ho pioneiru, atan ba kongregasaun, katuas no katuas área sira neʼebé banati-tuir Jesus hodi hatudu hahalok haraik an. Se ita haraik an, ita sei hadomi ema seluk. No Jesus hatete katak Maromak nia atan neʼebé loos sei hadomi malu.​—João 13:35.

10. Saida mak Ita presiza halo se Ita sente katak katuas sira seidauk rezolve problema ruma?

¹⁰ Oinsá se mosu problema iha kongregasaun no Ita sente katak katuas sira seidauk rezolve problema neʼe? Duké muramura,  Ita bele hatudu haraik an liuhusi apoia katuas sira. (Ebr 13:17) Atu bele halo nuneʼe, husu ba Ita-nia an: ‘Problema neʼe boot duni toʼo presiza rezolve ka lae? Agora mak tempu loos atu rezolve problema neʼe ka lae? Haʼu iha direitu atu mete ka lae? Haʼu koko haburas unidade ka haʼu koko atu hatudu katak haʼu mak ema neʼebé importante?’

11. Tuir Éfeso 4:2, 3, ita bele hetan rezultadu saida se ita serbí Jeová ho haraik an?

¹¹ Jeová hafolin liu hahalok haraik an duké abilidade, no hafolin liu unidade duké hanoin deʼit atu kumpre serbisu barak. Tan neʼe, hakaʼas an atu serbí Jeová ho haraik an. Hodi halo nuneʼe, Ita sei haburas unidade iha kongregasaun. (Lee Éfeso 4:2, 3.) Haklaken ho laran-manas. Buka dalan oioin atu halo buat diʼak ba ema. Hatudu laran-luak ba ema hotu, inklui mós ba sira neʼebé la iha knaar importante iha kongregasaun. (Mt 6:1-4; Lc 14:12-14) Bainhira Ita serbisu ho haraik an iha kongregasaun, irmaun-irmán sei nota Ita-nia hahalok haraik an no mós Ita-nia abilidade.

12. Bíblia esplika saida kona-ba iha belun?

¹² Jeová hakarak ita sente kontente hodi ransu hamutuk ho família no belun sira. (Sal 133:1) Jesus mós iha belun sira. (João 15:15) Bíblia esplika katak ita bele hetan benefísiu hodi iha belun diʼak. (Prov 17:17; 18:24) Bíblia mós hatete katak la diʼak atu mesamesak. (Prov 18:1) Ema barak hanoin katak liuhusi média sosiál sira bele iha belun barak no la sente  mesamesak. Maibé, ita presiza kuidadu bainhira uza média sosiál.

13. Tanbasá ema balu neʼebé uza média sosiál sente mesamesak no depresaun?

¹³ Peskiza oioin fó sai katak ema neʼebé gasta tempu barak atu lee komentáriu no haree foto sira iha média sosiál, bele sente mesamesak no depresaun. Tanbasá? Karik razaun ida mak iha média sosiál dala barak ema tau deʼit foto kona-ba buat diʼak iha sira-nia moris, sira-nia an, sira-nia belun, no fatin furak neʼebé sira vizita. Ema neʼebé haree foto sira-neʼe karik hanoin katak sira-nia moris la jeitu se kompara ho ema sira-neʼe. Irmán ida neʼebé tinan 19 hatete: “Haʼu sente laran-moras bainhira haʼu haree ema seluk goza moris iha findesemana maibé haʼu iha uma deʼit.”

14. Oinsá 1 Pedro 3:8 ajuda ita atu uza média sosiál ho matenek?

¹⁴ Klaru katak média sosiál bele lori benefísiu ruma, porezemplu, ita bele kontaktu malu ho família no belun sira. Maibé, buat balu neʼebé ema tau iha média sosiál mak atu dada atensaun ba sira-nia an. Sira hakarak ema atu admira sira. Ema balu tan hakerek komentáriu neʼebé la hatudu respeitu ka foʼer kona-ba sira-nia foto ka ema seluk nia foto. Ema Kristaun hetan anima atu hatudu hahalok haraik an no hanoin malu, tan neʼe sira sei la uza média sosiál iha dalan hanesan neʼe.—Lee 1 Pedro 3:8.

15. Oinsá Bíblia ajuda ita atu la sente katak ita mak ema importante liu?

¹⁵ Se Ita uza média sosiál, husu ba Ita-nia an: ‘Liafuan, foto ka vídeo neʼebé haʼu tau iha média sosiál halo ema hanoin katak haʼu gaba an ka lae? Haʼu halo ema seluk sente laran-moras ka lae?’ Bíblia hatete: “Buat hotu iha mundu neʼe, hanesan hakarak isin nian, hakarak matan nian no foti an kona-ba rikusoin, buat sira-neʼe la mai husi Aman, maibé mai husi mundu neʼe.” (1 João 2:16) Bíblia seluk tradús liafuan “foti an kona-ba rikusoin” nuʼudar “hakarak atu haree hanesan ema importante liu”. Ema Kristaun la presiza sente katak sira mak ema importante  liu. Sira halo tuir Bíblia nia konsellu: “Ita labele sai foti an, labele buka atu manán deʼit, no labele laran-moras ba malu.” (Gal 5:26) Se ita haraik an, ita sei la sai hanesan ho ema iha mundu neʼe neʼebé foti an ka hakarak sai ema importante liu.

16. Tanbasá ita labele sai foti an?

¹⁶ Ita presiza haburas haraik an tanba ema neʼebé foti an la iha ‘hanoin neʼebé loos’. (Rom 12:3) Ema neʼebé foti an buka problema no hanoin an deʼit. Dala barak sira-nia hanoin no hahalok hakanek sira-nia an no mós ema seluk. Se sira la troka sira-nia hanoin, Satanás sei fó influénsia ba sira-nia neon no estraga sira-nia neon. (2 Kor 4:4; 11:3) Maibé ema neʼebé haraik an, iha hanoin neʼebé loos kona-ba sira-nia an no rekoñese katak ema seluk diʼak liu fali sira. (Flp 2:3) No sira mós hatene katak “Maromak kontra ema neʼebé loko an, maibé nia hatudu ninia laran-diʼak neʼebé boot ba ema neʼebé haraik an”. (1 Ped 5:5) Ema neʼebé iha hanoin loos, lakohi Jeová sai sira-nia inimigu.

17. Ita tenke halo saida atu kontinua haraik an?

¹⁷ Atu bele kontinua haraik an, ita tenke halo tuir Bíblia nia konsellu atu ‘hasai tiha hahalok tuan nian no husik tiha buat sira neʼebé uluk ita halo, no tau fali hahalok foun nuʼudar ita-nia roupa’. Atu halo nuneʼe, ita presiza hakaʼas an. Ita presiza estuda Jesus nia ezemplu no hakaʼas an atu banati-tuir nia. (Kol 3:9, 10; 1 Ped 2:21) Maibé ita-nia hakaʼas an la saugati deʼit. Bainhira ita haburas hahalok haraik an, ita-nia moris família nian sei kontente liu, ita sei haburas unidade iha kongregasaun, no ita sei la uza média sosiál atu gaba an. Importante liu mak Jeová sei kontente ho ita no haraik bensaun ba ita.