▪ Evidénsia hatudu katak Jesus sai Amlulik Boot bainhira nia hetan batizmu iha tinan 29 EC. Oinsá ita hatene ida-neʼe? Bainhira Jesus hetan batizmu, nia hatudu katak nia prontu atu fó ninia moris nuʼudar sakrifísiu iha altár simbóliku neʼebé reprezenta Maromak nia “hakarak”. (Gal 1:4; Ebr 10:5-10) Tanba altár mak parte importante husi templu, karik templu espirituál mós komesa eziste husi tempu neʼebé Jesus hetan batizmu. Jeová nia templu espirituál reprezenta arranju hotu neʼebé Maromak halo liuhusi Jesus nia sakrifísiu atu ita bele halaʼo adorasaun loos.—Mt 3:16, 17; Ebr 5:4-6.

Presiza amlulik boot atu halaʼo knaar iha templu espirituál. Tan neʼe Jeová hili Jesus “liuhusi espíritu santu no kbiit” hodi sai nuʼudar amlulik boot. (Após 10:37, 38; Mc 1:9-11) Maibé, tanbasá ita bele fiar katak Jeová hili Jesus atu sai Amlulik Boot antes Jesus mate no moris-hiʼas? Ezemplu husi Arão no amlulik boot sira seluk sei ajuda ita atu hatán ba pergunta neʼe.

Tuir Moisés nia Ukun-Fuan, amlulik boot deʼit mak bele tama ba Fatin Santu Liu Hotu iha tenda santu no iha templu. Kortina ida mak haketak Fatin Santu no Fatin Santu Liu Hotu. Só deʼit iha Loron Hamoos Sala nian mak amlulik boot bele tama ba Fatin Santu Liu Hotu. (Ebr 9:1-3, 6, 7) Arão no ema sira seluk presiza simu uluk knaar nuʼudar amlulik boot antes sira bele tama ba Fatin Santu Liu Hotu. Tan neʼe, Jesus mós presiza simu uluk knaar nuʼudar Amlulik Boot antes nia mate no tuirmai “tama liuhusi kortina, neʼe katak, ninia isin” hodi moris iha lalehan. (Ebr 10:20) Tan razaun neʼe, apóstolu Paulo hatete katak Jesus “mai nuʼudar amlulik boot” no tuirmai “nia tama liuhusi tenda santu neʼebé importante no perfeitu liu, neʼebé laʼós ema nia liman mak halo”, no tama “iha lalehan”.—Ebr 9:11, 24.

Iha diferensa entre bainhira mak aliansa foun sai vale no bainhira mak inaugura aliansa neʼe ka lae?

▪ La iha. Tanbasá? Bainhira Jesus saʼe ba lalehan no fó nia moris neʼebé perfeitu ba ita-nia diʼak, nia halo hakat rua primeiru husi hakat tolu atu halo vale ka legaliza aliansa foun. Jesus mós halo hakat sira-neʼe atu inaugura aliansa foun, ka halo ida-neʼe sai vale. Saida mak hakat sira-neʼe?

Primeiru, Jesus hamriik iha Jeová nia oin; tuirmai, Jesus entrega folin husi ninia sakrifísiu ba Jeová; no ikusliu, Jeová simu folin husi Jesus nia raan neʼebé fakar ona. Se Jesus seidauk kumpre hakat tolu neʼe, aliansa foun seidauk vale.

Bíblia la fó-hatene bainhira loos mak Jeová simu folin husi Jesus nia sakrifísiu. Tan neʼe, ita labele dehan ho klaru bainhira loos mak aliansa foun komesa vale. Maski nuneʼe, ita hatene katak Jesus saʼe ba lalehan loron sanulu antes Pentekostes. (Após 1:3) Durante tempu badak neʼe mak karik nia entrega folin husi ninia sakrifísiu ba Jeová, no Jeová simu ida-neʼe. (Ebr 9:12) Iha loron Pentekostes tinan 33 EC, ema bele haree evidénsia neʼebé hatudu katak aliansa foun hahú ona. (Após 2:1-4, 32, 33) Entaun, klaru katak iha tempu neʼebá aliansa foun sai vale ona.