Haʼu moris iha tinan 1954 iha St. Paul, Minnesota, Estadus Unidus. Haʼu-nia família laʼós ema riku, no ami ema Katólika Roma. Haʼu iha maun ida, alin-mane ida, no alin-feto rua. Bainhira kiʼik, haʼu tuir eskola Katólika, no baibain haʼu mós ajuda misa. Haʼu iha koñesimentu uitoan kona-ba Bíblia. Haʼu fiar katak Maromak mak kria buat hotu, maibé haʼu lakon fiar ba igreja.

Iha tinan primeiru neʼebé haʼu estuda kona-ba lei iha universidade, Testemuña ba Jeová mai haʼu-nia uma. Haʼu fase hela roupa, tan neʼe feen-laʼen Testemuña neʼe kontente atu mai fali tempu seluk. Kuandu sira mai fali, haʼu husu: “Tanbasá ema aat moris diʼak liu fali ema neʼebé diʼak?” no “Ema presiza halo saida atu sente kontente?” Haʼu simu livru Lia-loos neʼebé Lori Moris Rohan-Laek no Bíblia Sagrada Tradusaun Mundu Foun iha lian Inglés neʼebé kór-matak. Haʼu mós konkorda atu estuda Bíblia. Neʼe ajuda haʼu aprende buat foun. Haʼu kontente atu aprende katak Maromak nia Ukun  mak governu neʼebé sei ukun mundu tomak. Haʼu bele haree katak ema nia governu la lori susesu no halo mundu nakonu ho susar, hahalok aat oioin no hahalok la justisa.

Haʼu dedika an ba Jeová iha tinan 1982 no hetan batizmu iha tinan neʼe iha Reuniaun Boot ho tema “Kingdom Truth” neʼebé halaʼo iha salaun boot ida iha sidade St. Paul. Semana tuirmai, haʼu bá fali salaun neʼe atu tuir ezame advogadu. Iha fulan-Outubru, haʼu rona katak haʼu liu ezame neʼe, no simu lisensa atu sai advogadu.

Iha Reuniaun Boot neʼe, haʼu hasoru irmaun Mike Richardson husi Betel iha Brooklyn, no nia esplika katak sede-jerál harii departamentu legál. Haʼu hanoin-hetan liafuan husi ema-boot Etiópia iha Apóstolu 8:36 no haʼu husu ba haʼu-nia an: ‘Saida mak hanetik haʼu atu ajuda iha departamentu legál?’ Entaun haʼu prenxe formuláriu atu serbí iha Betel.

Haʼu-nia inan-aman la kontente tanba haʼu sai Testemuña. Haʼu-nia apá husu haʼu kona-ba oinsá serbisu ho Watchtower bele ajuda haʼu nuʼudar advogadu. Haʼu esplika katak haʼu sei halo serbisu voluntáriu no fulan-fulan haʼu sei simu osan uitoan hanesan ema seluk iha Betel simu.

Tanba haʼu konkorda ona atu serbisu iha tribunál, entaun haʼu labele tama kedas Betel. Haʼu komesa serbí iha Betel iha Brooklyn, Novaiorke, iha tinan 1984. Haʼu simu knaar atu serbí iha departamentu legál. Esperiénsia neʼebé haʼu hetan bainhira serbisu iha tribunál prepara haʼu ba buat neʼebé sei akontese tuirmai.

Organizasaun sosa Stanley Theater iha sidade Jersey, New Jersey, iha fulan-Novembru 1983. Irmaun sira husu lisensa ba governu lokál atu hadiʼa eletrisidade no torneira sira iha salaun neʼe. Bainhira irmaun sira hasoru funsionáriu lokál sira, irmaun sira esplika katak sira sei uza salaun neʼe atu halaʼo reuniaun boot husi Testemuña ba Jeová. Maibé neʼe hamosu problema. Lei iha sidade Jersey hatete katak ema bele uza fatin ida nuʼudar fatin adorasaun nian, se ida-neʼe iha área neʼebé povu sira hela. Stanley Theater mak iha área negósiu nian, tan neʼe funsionáriu sira la fó lisensa ba irmaun sira. Irmaun sira husu funsionáriu sira atu hanoin fali sira-nia desizaun, maibé sira lakohi.

Durante haʼu-nia semana primeiru iha Betel, organizasaun lori kazu neʼe ba tribunál  federál nian. Tanba haʼu foin remata haʼu-nia treinu iha tribunál federál nian, haʼu iha ona esperiénsia kona-ba kazu sira hanesan neʼe. Ita-nia advogadu ida fó razaun katak salaun Stanley Theater uza ona ba eventu públiku oioin hanesan filme no konsertu múzika rock. Entaun tanbasá la legál atu uza salaun neʼe ba eventu relijiaun nian? Tribunál federál tetu kazu neʼe no fó sai desizaun katak governu lokál iha sidade Jersey kontra ita-nia liberdade relijiaun. Tribunál haruka governu lokál iha sidade Jersey atu fó lisensa. Haʼu komesa haree oinsá Jeová haraik bensaun ba ninia organizasaun kona-ba buat legál atu ninia serbisu bele kontinua laʼo ba oin. Haʼu kontente tebes tanba bele hola parte.

Irmaun sira komesa halo renovasaun boot, no ikusmai salaun neʼe sai nuʼudar Fatin ba Reuniaun Boot, no graduasaun ba eskola Gilead klase 79 halaʼo iha neʼebá iha data 8 Setembru 1985, neʼe mak tinan ida deʼit depois irmaun sira komesa serbisu renovasaun. Haʼu kontente tebes atu ajuda iha departamentu legál. Neʼe halo haʼu kontente liu duké serbisu neʼebé haʼu halo nuʼudar advogadu antes tama Betel. Iha tempu neʼebá haʼu la hatene katak Jeová sei uza haʼu atu tau matan ba kazu barak seluk.

Husi tinan 1980 toʼo 1989, dala barak doutór no ospitál sira la respeitu Testemuña ida nia desizaun atu simu tratamentu neʼebé la uza raan. Dala barak juís sira hanoin katak feto neʼebé isin-rua la iha duni direitu atu halo desizaun kona-ba la simu transfuzaun raan. Doutór sira hatete katak se inan la simu raan, nia bele mate no bebé sei la iha inan.

Iha loron 29 Dezembru 1988, irmán Denise Nicoleau lakon raan barak depois nia partus ninia oan-mane. Ninia emoglobina tun liu fali 5.0. Tanba ninia moris iha perigu laran, doutór hakarak nia atu simu transfuzaun raan. Irmán Denise lakohi. Dadeer tuirmai, ospitál husu juís atu fó lisensa ba sira atu halo transfuzaun raan ba irmán Denise. Juís la fó oportunidade ba irmán Denise no ninia laʼen atu esplika sira-nia fiar, no mós la fó-hatene sira katak nia fó ona lisensa ba ospitál atu halo transfuzaun raan.

Iha loron-sesta 30 Dezembru, doutór sira halo transfuzaun raan ba irmán Denise maski ninia laʼen no família seluk la konkorda ho ida-neʼe. Iha kalan neʼe, polísia kaer irmán nia família balu no mós katuas kongregasaun balu no duun irmaun-irmán sira-neʼe taka dalan ba doutór sira atu fó transfuzaun raan ba irmán Denise. Iha sábadu dadeer 31 Dezembru, jornál sira iha sidade Novaiorke no área neʼebé besik fó sai akontesimentu neʼe.

 Iha loron-segunda dadeer, haʼu koʼalia ho juís naran Milton Mollen husi tribunál aas. Haʼu fó sai faktu kona-ba kazu neʼe, no halo klaru katak juís seluk asina ona autorizasaun atu halo transfuzaun maski la iha julgamentu. Juís Milton husu haʼu bá fali ninia eskritóriu iha lokraik atu koʼalia kona-ba faktu no lei neʼebé liga ho kazu neʼe. Irmaun Philip Brumley neʼebé tau matan ba ami mós akompaña haʼu atu hasoru juís Milton. Juís mós konvida advogadu ospitál nian atu mai. Ami diskute malu makaʼas. Entaun, irmaun Philip hakerek nota ida iha ninia livru hodi fó-hatene haʼu katak haʼu presiza “kalma”. Neʼe mak konsellu diʼak tanba haʼu sai hirus loos bainhira koko atu prova katak advogadu ospitál nian mak sala.

Oras ida liutiha, juís Milton hatete katak kazu neʼe sei julga iha dadeer tuirmai. Bainhira ami atu sai, juís Milton hatete katak ospitál nia advogadu sei halo serbisu todan aban. Neʼe katak susar ba advogadu neʼe atu prova katak ospitál iha direitu atu obriga irmán Denise atu simu raan. Haʼu sente Jeová ajuda haʼu atu iha konfiansa katak karik ami sei manán kazu neʼe. Haʼu kontente tebes atu haree Jeová uza ami atu kumpre ninia hakarak.

Ami serbisu toʼo kalan-boot hodi prepara buat neʼebé ami sei koʼalia iha dadeer tuirmai. Tribunál la dook husi Betel iha Brooklyn, tan neʼe maioria ema hotu iha ami-nia departamentu laʼo ain deʼit bá neʼebá. Depois juís naʼin-haat rona tiha ami-nia argumentu, sira deside atu kansela orden kona-ba transfuzaun raan. Tribunál aas apoia irmán Denise nia desizaun no hatete katak hodi asina orden ruma maski seidauk rona ba pasiente nia hanoin, neʼe kontra direitu umanus.

Tribunál aas iha Novaiorke konfirma katak irmán Denise iha direitu atu hetan tratamentu neʼebé la uza raan. Neʼe mak kazu primeiru husi kazu haat neʼebé haʼu hola parte atu defende no kazu sira-neʼe liga ho desizaun neʼebé tribunál aas iha fatin oioin iha Estadus Unidus foti kona-ba raan. (Haree kaixa “ Manán kazu iha tribunál aas”.) Haʼu mós serbisu hamutuk ho advogadu seluk iha Betel hodi tau matan ba kazu sira neʼebé envolve direitu atu tau matan ba oan, soe malu no propriedade.

Bainhira haʼu hasoru haʼu-nia feen Dawn ba dala primeiru, nia soe malu ona ho ninia laʼen no haboot oan naʼin-tolu. Nia serbisu no mós serbí nuʼudar pioneiru. Nia hasoru susar barak, no haʼu admira tebes ninia hakaʼas an atu serbí Jeová. Iha tinan 1992, ami tuir Reuniaun Boot ba loron tolu iha Novaiorke ho tema “Light Bearers”, no haʼu husu atu namora ho nia. Tinan ida tuirmai ami kaben. Feen neʼebé hanoin buat espirituál no sempre kontente mak prezente husi Jeová. Dawn mak hanesan bensaun ba haʼu durante ami-nia moris hamutuk.—Prov 31:12.

Bainhira ami kaben, ninia oan sira-nia idade mak 11, 13 no 16. Haʼu hakarak sai aman neʼebé diʼak ba sira, tan neʼe haʼu lee no aplika buat hotu neʼebé haʼu hetan iha ita-nia publikasaun kona-ba padrastu. Maski hasoru susar balu, maibé haʼu kontente tanba labarik sira simu haʼu no tau fiar ba haʼu nuʼudar belun no aman neʼebé hadomi sira. Ami sempre simu ami-nia oan nia kolega sira iha uma, no ami kontente bainhira uma nakonu ho joven sira.

Iha tinan 2013, Dawn no haʼu muda ba Wisconsin atu tau matan ba ami-nia inan-aman neʼebé idade ona. Buat neʼebé halo haʼu hakfodak mak haʼu-nia serbisu iha Betel seidauk remata. Haʼu simu konvite atu fó apoia legál ba ita-nia organizasaun nuʼudar voluntáriu temporáriu.

Iha fulan-Setembru 2018, haʼu nota katak haʼu meʼar beibeik. Haʼu bá konsulta iha doutór lokál, maibé nia labele hetan problema nia hun. Tuirmai, haʼu konsulta ho doutór seluk no nia fó sujestaun ba haʼu atu hasoru doutór espesialista ida. Iha fulan-Janeiru 2019, doutór espesialista neʼe dehan katak karik haʼu iha moras ida neʼebé sei afeta haʼu-nia isin-lolon tomak.

Loron tolu depois neʼe bainhira haʼu halo hela haʼu-nia desportu favoritu, haʼu monu no liman tohar. Haʼu halo ona desportu neʼe iha haʼu-nia moris tomak no haʼu matenek atu halo ida-neʼe. Entaun haʼu rekoñese katak haʼu ladún iha ona kbiit atu kontrola haʼu-nia múskulu sira. Haʼu hakfodak oinsá moras neʼe lalais atu sai grave. Neʼe kontinua halo susar liu ba haʼu atu koʼalia, book an, no tolan buat ruma.

Haʼu iha priviléjiu boot atu uza haʼu-nia esperiénsia nuʼudar advogadu atu ajuda Jeová nia organizasaun. No haʼu iha priviléjiu atu hakerek informasaun barak ba revista sira neʼebé doutór, advogadu, no juís sira lee. Haʼu mós hatoʼo informasaun iha mundu tomak hodi defende Jeová nia povu nia direitu atu hili operasaun no tratamentu médiku neʼebé la uza raan. Maski nuneʼe, haʼu koʼalia tuir liafuan iha Lucas 17:10: ‘Haʼu mak atan neʼebé folin-laek. Serbisu neʼebé haʼu halo mak haʼu-nia knaar deʼit.’