1. Tanbasá Jeová kompara ninia an ho inan ida?

“INAN ida bele haluha ninia oan neʼebé susu hela ka lae?” Jeová husu pergunta neʼe ba ninia povu iha profeta Isaias nia tempu. Maromak hatete: “Maski [inan sira-neʼe] haluha karik, maibé haʼu sei nunka haluha ó.” (Isa 49:15) Dala ruma deʼit mak Maromak kompara nia an ho inan ida. Maibé nia halo hanesan neʼe iha eskritura neʼe. Jeová kompara ninia domin ba ninia atan sira hanesan domin neʼebé inan ida hatudu ba ninia oan. Jeová halo nuneʼe tanba nia hakarak ninia atan sira hatene katak nia hadomi tebes sira. Inan barak sente hanesan irmán ida naran Jasmin. Nia dehan: “Bainhira ita koʼus ita-nia oan, ita forma relasaun espesiál neʼebé dura ba nafatin.”

2. Jeová sente oinsá bainhira ninia oan ida la serbí tan nia?

² Jeová haree bainhira ninia oan ida para atu tuir reuniaun no mós la bá haklaken. Tinan-tinan bainhira Jeová nia atan barak la ativu * tan, neʼe halo nia laran-triste.

3. Jeová hakarak ema neʼebé la ativu atu halo saida?

³ Irmaun-irmán barak neʼebé la ativu fila fali ba kongregasaun, no neʼe halo ita sente kontente. Jeová hakarak sira fila fali, no ita mós sente hanesan neʼe. (1 Ped 2:25) Oinsá ita bele ajuda sira? Antes hatán ba pergunta neʼe, diʼak atu buka-hatene tanbasá sira balu para atu tuir reuniaun no la bá haklaken.

4. Oinsá serbisu fó impaktu ba ema balu?

⁴ Ema balu sai okupadu liu ho serbisu atu manán osan. Irmaun Hung * iha Ázia hatete: “Haʼu gasta tempu no enerjia barak liu atu halo serbisu. Haʼu la hatudu matenek no hanoin katak se haʼu iha osan barak liu, haʼu bele serbí Jeová ho diʼak liután. Tan neʼe haʼu uza oras barak atu halo serbisu. Haʼu komesa falta reuniaun dala barak toʼo ikusmai para atu tuir reuniaun. Satanás uza mundu neʼe atu dada ema nia atensaun hodi nuneʼe neineik-neineik sira la serbí tan Jeová.”

5. Oinsá problema neʼebé mosu tuituir malu fó impaktu ba irmán ida?

⁵ Irmaun-irmán balu hasoru problema barak neʼebé halo sira laran-kraik. Irmán Anne iha rai-Inglaterra iha oan naʼin-lima. Nia hatete: “Haʼu-nia oan-mane ida defisiente, oan-mane seluk hetan moras mentál no kongregasaun hasai haʼu-nia oan-feto ida. Tanba problema sira-neʼe, haʼu sai depresaun makaʼas no para tuir reuniaun no la bá haklaken. Ikusmai, haʼu la ativu.” Ita hanoin tebes Anne no ninia família no mós ema seluk neʼebé hasoru problema hanesan.

6. Tanbasá la halo tuir konsellu iha Koloso 3:13 bele book ema ida atu hadook an husi Jeová nia povu?

⁶ Lee Koloso 3:13. Jeová nia atan balu sai laran-kanek tanba irmaun ka irmán ida nia hahalok. Apóstolu Paulo rekoñese katak dala ruma irmaun ka irmán ida ‘halo buat ruma neʼebé hakanek ita-nia laran’. Karik ita hasoru ona situasaun neʼebé la justu. Se ita la kuidadu, ita bele rai odi. Ikusmai neʼe bele halo ita hadook an husi Jeová nia povu. Hanoin toʼok ezemplu husi irmaun Pablo husi Amérika Súl. Ema duun matak nia kona-ba sala ida, no rezultadu mak nia lakon ninia priviléjiu iha kongregasaun. Oinsá ninia reasaun? Pablo hatete: “Haʼu sai hirus, no neineik-neineik hadook an husi kongregasaun.”

7. Bainhira ema ida nia konxiénsia fó-sala ba nia, neʼe fó impaktu saida?

⁷ Se uluk ema ida halo sala sériu, karik ninia konxiénsia fó-sala ba nia ba tempu kleur. Karik nia sente katak Maromak la hadomi tan nia. Maski nia arrepende an no simu ona Jeová nia laran-sadiʼa, maibé karik nia sente nia la merese ona atu sai parte ba Maromak nia povu. Irmaun Francisco sente hanesan neʼe. Nia hatete: “Haʼu simu dixiplina tanba halo sala seksuál. Maski foufoun haʼu kontinua tuir reuniaun, maibé haʼu sente estrese no sente la merese ona atu sai parte ba Jeová nia povu. Haʼu-nia konxiénsia fó-sala mai haʼu, no haʼu hanoin katak Jeová seidauk fó perdua ba haʼu. Ikusmai haʼu para atu tuir reuniaun no la bá haklaken.” Ita sente oinsá ho irmaun-irmán neʼebé hasoru situasaun sira hanesan temi ona iha lisaun neʼe? Importante liu mak Jeová sente oinsá kona-ba sira?

8. Jeová haluha ema neʼebé uluk serbí nia ka lae? Esplika toʼok.

⁸ Jeová la haluha ninia atan neʼebé la ativu ona ba tempu balu. Nia mós la haluha serbisu neʼebé sira halo ba nia. (Ebr 6:10) Profeta Isaias hakerek ai-knanoik furak ida atu hatudu oinsá Jeová tau matan ba ninia povu. Isaias  dehan: “Hanesan bibi-atan ida, nia sei tau matan ba ninia bibi-lubun. Nia sei halibur bibi-oan sira ho ninia liman, no nia sei koʼus sira iha ninia hirus-matan.” (Isa 40:11) Nuʼudar Bibi-Atan Boot, Jeová sente oinsá bainhira ninia atan ida para atu serbí nia? Jesus hatudu sai Jeová nia sentimentu bainhira nia husu ninia dixípulu sira: “Imi hanoin oinsá? Se ema ida iha bibi-malae 100 no bibi ida lakon, nia sei husik bibi 99 iha foho no bá buka ida neʼebé lakon, loos ka lae? Haʼu hatete loloos ba imi katak se nia hetan bibi neʼe, nia sei haksolok tebes ho bibi neʼe liu fali ho bibi 99 neʼebé la lakon.”—Mt 18:12, 13.

9. Iha Bíblia nia tempu, saida mak bibi-atan neʼebé diʼak halo? (Haree dezeñu iha oin.)

⁹ Tanbasá ita bele kompara Jeová ho bibi-atan? Tanba iha Bíblia nia tempu, bibi-atan neʼebé diʼak hanoin no tau matan ba ninia bibi sira. Porezemplu, David luta ho leaun no ursu atu proteje ninia bibi. (1 Sam 17:34, 35) Bibi-atan neʼebé diʼak hatene kuandu ninia bibi ida lakon. (João 10:3, 14) Bibi-atan hanesan neʼe sei husik ninia bibi 99 iha fatin seguru, hanesan hatama bibi sira ba luhan ka husu bibi-atan seluk atu tau matan no tuirmai nia bá buka bibi ida neʼebé lakon. Jesus uza ai-knanoik neʼe atu hanorin ita lia-loos importante ida: “Haʼu-nia Aman iha lalehan lakohi kiʼikoan sira-neʼe ida lakon.”—Mt 18:14.

10. Tuir Ezequiel 34:11-16, Jeová promete atu halo saida ba ninia bibi neʼebé lakon?

¹⁰ Jeová hadomi ita ida-idak, inklui mós “kiʼikoan sira” neʼebé laʼo dook husi kongregasaun. Liuhusi profeta Ezequiel, Maromak promete katak nia sei buka ninia bibi sira neʼebé lakon no ajuda sira atu iha fali relasaun diʼak ho nia. Jeová fó sai hakat sira neʼebé nia halo atu salva ninia bibi sira. Buat neʼebé nia halo mak atu hanesan ho hakat neʼebé bibi-atan iha Izraél halo bainhira bibi  ida lakon. (Lee Ezequiel 34:11-16.) Primeiru, bibi-atan sei buka tuir bibi neʼebé lakon, no atu halo nuneʼe, nia presiza uza tempu no forsa barak. Tuirmai, bainhira nia hetan bibi neʼe, nia lori fali bibi neʼe ba bibi-lubun. No se bibi neʼe kanek ka hamlaha, bibi-atan sei ajuda bibi neʼe hodi kurativu ninia kanek, koʼus bibi neʼe, no fó-han. Katuas kongregasaun mak bibi-atan neʼebé tau matan ba “Maromak nia bibi-lubun”, no sira presiza halo tuir hakat sira-neʼe bainhira ajuda ema neʼebé hadook an husi kongregasaun. (1 Ped 5:2, 3) Katuas sira presiza buka tuir ema neʼebé hadook an husi kongregasaun, ajuda sira fila fali, no hatudu domin ba sira hodi ajuda sira atu sai fali Jeová nia belun. *

11. Bibi-atan neʼebé diʼak komprende saida?

¹¹ Bibi-atan neʼebé diʼak komprende katak dala ruma bibi ida sei lakon dalan. Se bibi ida laʼo dook husi bibi-lubun, bibi-atan sei la trata aat bibi neʼe. Hanoin kona-ba ezemplu neʼebé Maromak hatudu bainhira nia ajuda ninia atan balu neʼebé laʼo sees husi nia ba tempu balu.

12. Jeová halo saida bainhira Jonas husik hela ninia knaar?

¹² Profeta Jonas halai husi ninia knaar. Maski nuneʼe, Jeová la rende an atu ajuda Jonas. Hanesan bibi-atan neʼebé diʼak, Jeová salva Jonas no ajuda nia hetan fali kbiit atu kumpre ninia knaar. (Jonas 2:7; 3:1, 2) Iha tempu ida, Maromak uza lakeru-hun atu ajuda Jonas komprende katak ema nia moris mak folin-boot. (Jonas 4:10, 11) Ita bele aprende saida? Katuas sira labele rende an atu ajuda ema neʼebé la ativu ona. Maibé, katuas sira hakaʼas an atu komprende tanbasá ema neʼe hadook an husi kongregasaun. Bainhira ema neʼe fila fali ba Jeová, katuas sira kontinua hatudu domin no interese ba ema neʼe.

13. Saida mak ita aprende husi buat neʼebé Jeová halo ba ema neʼebé hakerek Salmo 73?

 ¹³ Ema neʼebé hakerek Salmo 73 sai laran-kraik tanba haree ema aat hetan susesu. Nia duvida katak halo tuir Maromak nia hakarak lori duni benefísiu. (Sal 73:12, 13, 16) Jeová halo saida? Nia la tesi-lia ba ema neʼe. Tuir loloos, Maromak rai ema neʼe nia liafuan iha Bíblia laran. Ikusmai ema neʼe rekoñese katak iha relasaun diʼak ho Jeová mak folin-boot liu fali buat seluk hotu. (Sal 73:23, 24, 26, 28) Ita bele aprende saida? Katuas sira labele tesi-lia kedas ba ema neʼebé komesa duvida katak serbí Maromak lori duni benefísiu. Duké tesi-lia, katuas sira presiza hakaʼas an atu komprende tanbasá ema neʼe koʼalia ka halo nuneʼe. Tuirmai, katuas sira bele uza Bíblia atu anima ema neʼe.

14. Tanbasá Elias presiza ajuda? Oinsá Jeová ajuda nia?

¹⁴ Profeta Elias halai husi Liurai-Feto Jezabel. (1 Reis 19:1-3) Nia hanoin katak la iha tan ema seluk neʼebé serbí Jeová nuʼudar profeta, no nia sente katak ninia serbisu mak saugati deʼit. Elias sai laran-kraik tebes toʼo hakarak mate deʼit. (1 Reis 19:4, 10) Duké tesi-lia ba Elias, Jeová fó-hanoin ba nia katak nia la mesak, nia bele tau fiar ba Maromak nia kbiit, no sei iha serbisu barak neʼebé nia presiza halo. Jeová rona didiʼak ba Elias nia neon-susar no Jeová fó nia knaar foun. (1 Reis 19:11-16, 18) Ita bele aprende saida? Ita hotu, liuliu katuas sira, presiza  hatudu laran-diʼak ba Jeová nia bibi. Katuas sira sei rona didiʼak kuandu ema ida fakar sai ninia laran, maski nia koʼalia sai ninia sentimentu hirus ka fó sai katak nia sente Jeová sei nunka perdua nia. Tuirmai sira sei fó-hanoin ba ema neʼe katak Jeová hafolin nia.

15. Tuir João 6:39, Jesus hanoin oinsá kona-ba ninia Aman nia bibi?

¹⁵ Jeová hakarak ita hanoin oinsá kona-ba ninia bibi neʼebé lakon? Ita bele aprende husi Jesus nia ezemplu. Nia hatene katak Jeová hafolin ninia bibi hotu, tan neʼe Jesus hakaʼas an atu ajuda “bibi-malae neʼebé lakon husi umakain Izraél” atu fila fali ba Jeová. (Mt 15:24; Lc 19:9, 10) Nuʼudar bibi-atan diʼak, Jesus mós hakaʼas an atu Jeová nia bibi ida la lakon.​—Lee João 6:39.

16-17. Katuas sira presiza hanoin oinsá kona-ba ajuda ema neʼebé la ativu? (Haree kaixa “ Ema neʼebé la ativu sente oinsá?”)

¹⁶ Apóstolu Paulo anima katuas kongregasaun sira iha Éfeso atu banati-tuir Jesus nia ezemplu. Nia hatete: “Imi tenke tau matan ba sira neʼebé fraku. No imi tenke hanoin-hetan Naʼi Jesus nia liafuan kuandu nia rasik dehan: ‘Kontente liu atu fó duké simu.’” (Após 20:17, 35) Eskritura neʼe hatudu katak ohin loron katuas sira mós iha responsabilidade importante atu tau matan ba Jeová nia povu. Katuas ida naran Salvador iha rai-España hatete: “Bainhira haʼu hanoin kona-ba oinsá Jeová hadomi bibi neʼebé lakon, neʼe book haʼu hakaʼas an atu ajuda sira. Haʼu hatene katak Jeová hakarak haʼu atu tau matan ba sira.”

¹⁷ Ema hotu neʼebé temi iha lisaun neʼe, la ativu ba tempu balu, maibé ikusmai fila fali ba Jeová. Agora daudaun, ema barak tan neʼebé la ativu mós hakarak atu fila fali ba Jeová. Iha lisaun tuirmai, ita sei aprende oinsá ita bele ajuda sira fila fali ba Jeová.