ITA fiar katak Jeová mak dirije ninia povu no fó sira buat neʼebé sira presiza atu hametin sira-nia relasaun ho nia durante “loron ikus” sira-neʼe. (2 Tim 3:1) Maibé ita ida-idak presiza deside atu halo tuir Jeová. Ita bele kompara ita-nia situasaun ho ema Izraél nia situasaun iha rai-fuik maran. Sira tenke halo buat ruma bainhira rona trombeta nia lian.

Jeová haruka Moisés atu tuku osan-mutin hodi halo trombeta rua no uza trombeta sira-neʼe atu ‘bolu povu no fó sinál atu sobu tenda sira’. (Núm 10:2) Amlulik sira tenke huu trombeta sira-neʼe iha dalan oioin atu fó-hatene povu kona-ba saida mak sira tenkesér halo. (Núm 10:3-8) Ohin loron, Maromak nia povu simu matadalan liuhusi dalan oioin. Ita sei koʼalia kona-ba dalan tolu neʼebé ita simu matadalan no kompara dalan sira-neʼe ho trombeta nia lian iha Izraél antigu. Dalan tolu neʼe mak bainhira ita simu konvite atu halibur hamutuk nuʼudar grupu boot, bainhira katuas sira simu treinu, no bainhira iha mudansa ba matadalan ba kongregasaun hotu.

Amlulik tenke huu trombeta rua neʼe hotu bainhira Jeová hakarak “povu tomak” atu halibur iha tenda santu nia odamatan iha parte leste. (Núm 10:3) Suku hotu neʼebé fahe ba grupu haat no hela haleʼu tenda santu sei rona lian neʼe. Sira hotu neʼebé hela besik liu sei bá lalais atu halibur iha tenda santu nia odamatan. Maibé sira seluk neʼebé hela dook presiza uza tempu no forsa barak atu toʼo tenda santu. Maski sira hela dook ka besik, maibé Jeová hakarak sira hotu atu halibur hamutuk no rona ba ninia matadalan.

Maski ohin loron ita la halibur iha tenda santu, maibé ita simu konvite atu halibur hamutuk nuʼudar Maromak nia povu. Neʼe inklui reuniaun boot ba loron tolu no mós reuniaun sira seluk. Ita simu informasaun no matadalan neʼebé importante husi reuniaun sira-neʼe. Iha mundu tomak, Jeová nia povu simu informasaun no matadalan neʼebé hanesan. Tan neʼe, ema hotu neʼebé simu konvite atu tuir reuniaun sira-neʼe sai parte ba Maromak nia povu grupu boot neʼebé kontente. Ema balu tenke halo viajen neʼebé dook liu fali ema seluk. Maski nuneʼe, sira hotu neʼebé simu konvite neʼe la sente katak sira-nia sakrifísiu mak saugati deʼit.

Oinsá ho ema sira neʼebé hela dook husi Jeová nia povu neʼebé halaʼo reuniaun boot? Tanba teknolojia neʼebé modernu, ema barak iha fatin izoladu bele simu informasaun no matadalan neʼebé hanesan no mós bele sente katak sira sai parte ba Jeová nia povu grupu boot. Porezemplu, bainhira reprezentante husi sede-jerál vizita sukursál Benín, knua ida naran Arlit iha rai-maran Saara  iha Nijéria mós rona ba programa liuhusi streaming. Iha neʼebá iha irmaun naʼin-tolu, irmán naʼin-rua, no mós ema naʼin-16. Maski sira hela iha fatin izoladu, maibé sira sente unidade ho Maromak nia povu naʼin-44.131 neʼebé halibur hamutuk. Irmaun ida hakerek: “Obrigadu barak tanba ami bele haree programa neʼe liuhusi streaming. Ami bele haree katak imi hadomi tebes ami.”

Bainhira amlulik Izraél huu trombeta ida, “xefe sira deʼit, katak ulun-naʼin ba ema rihun ba rihun” mak tenke bá tenda santu. (Núm 10:4) Sira bá tenda santu atu simu informasaun no treinamentu husi Moisés. Neʼe bele ajuda sira atu halaʼo sira-nia responsabilidade atu tau matan ba sira-nia suku. Se Ita mak xefe ida, klaru katak Ita sei hakaʼas an atu bá tenda santu no simu informasaun no treinamentu.

Ohin loron, katuas kongregasaun sira laʼós “xefe”, no sira mós labele domina Maromak nia bibi neʼebé sira tau matan. (1 Ped 5:1-3) Maibé sira hakaʼas an duni atu tau matan ba bibi sira. Tan neʼe sira prontu atu simu konvite hodi hetan treinamentu liután, hanesan simu treinu iha Eskola ba Katuas no Atan ba Kongregasaun. Durante eskola neʼe, katuas sira aprende oinsá atu bele tau matan didiʼak ba kongregasaun. Rezultadu mak katuas sira no mós ema iha kongregasaun hakbesik liután ba Jeová. Maski Ita seidauk tuir eskola sira-neʼe ida, maibé klaru katak Ita hetan benefísiu husi ema sira neʼebé tuir ona eskola sira-neʼe.

Dala ruma amlulik Izraél sira huu trombeta ho lian tun-saʼe. Neʼe atu fó avizu katak Jeová hakarak ema Izraél hotu atu muda sira-nia hela-fatin. (Núm 10:5, 6) Bainhira povu muda hela-fatin, sira halo nuneʼe iha dalan neʼebé organiza ho didiʼak, maibé sira ida-idak mós presiza serbisu makaʼas. Dala ruma ema Izraél balu hanoin barak atu muda ba fatin seluk. Tanbasá?

Sira balu karik sente katak avizu kona-ba muda sira-nia hela-fatin, akontese beibeik no derrepente deʼit. “Dala ruma kalohan neʼe kontinua iha tenda leten husi kalan toʼo dadeer.” Iha tempu seluk “kalohan neʼe kontinua iha tenda santu nia leten ba loron rua, fulan ida, ka ba tempu naruk”. (Núm 9:21, 22) Dala hira mak ema Izraél presiza muda? Livru Números kapítulu 33 temi fatin maizumenus 40 neʼebé sira hela bá.

Dala ruma, ema balu halo tenda iha fatin neʼebé mahon. No neʼe halo sira sente kontente maski hela iha “rai-fuik neʼebé luan no hamosu taʼuk”. (Deut 1:19) Tan neʼe, karik sira hanoin barak katak bainhira sira muda tan, sira sei la hela iha fatin neʼebé mahon.

Bainhira suku ida-idak komesa atu muda, ema balu presiza hein ho pasiénsia toʼo sira-nia tempu atu muda. Sira hotu rona trombeta nia lian tun-saʼe, maibé sira labele muda iha tempu hanesan. Trombeta nia lian tun-saʼe primeiru fó sinál katak suku sira neʼebé hela iha parte leste, katak suku Judá, Issacar, no Zebulão tenke muda uluk. (Núm 2:3-7; 10:5, 6) Depois neʼe, amlulik sira sei huu trombeta lian tun-saʼe ba dala segundu, no neʼe mak sinál ba suku tolu iha parte súl atu muda. Amlulik sira kontinua halo nuneʼe toʼo ema hotu muda.

Karik Ita sente susar atu simu mudansa balu iha organizasaun. Karik Ita hanoin katak iha mudansa barak demais. Ka karik Ita sente katak Ita gosta dalan tuan nian no Ita lakohi ida-neʼe atu troka. Karik Ita sente susar atu hatudu pasiénsia no presiza mós tempu atu sai toman ho mudansa sira. Maski nuneʼe, se Ita hakaʼas an atu simu mudansa sira, karik Ita sei haree katak mudansa sira-neʼe diʼak ba Ita no Jeová kontente ho Ita.

Iha Moisés nia tempu, Jeová dirije mane, feto no labarik millaun ba millaun atu liu rai-fuik maran. Tanba Jeová dirije no tau matan sira, sira bele liu rai-fuik maran ho susesu. Ohin loron, Jeová dirije ita atu liu loron ikus sira neʼebé perigu tebes. Nia ajuda ita atu hakbesik ba nia no iha fiar neʼebé metin nafatin. Tan neʼe, ita hakaʼas an atu halo tuir Jeová hanesan ema Izraél laran-metin iha tempu uluk neʼebé halo tuir trombeta nia lian.