“Bainhira haʼu no haʼu-nia primu komesa diskute malu, haʼu kaer metin ninia kakorok no komesa buti ninia kakorok. Haʼu hakarak oho nia.”—Paul.

“Haʼu sai hirus lalais iha uma, maski la iha razaun. Haʼu baku rahun sasán hotu neʼebé haʼu haree iha uma-laran.”—Marco.

Karik ita la hatudu hahalok violénsia hanesan ema naʼin-rua neʼe. Maibé dala ruma ita hotu sente susar atu kontrola an tanba sala neʼebé Adão hatutan mai ita. (Rom 5:12) Hanesan Paul no Marco, ema balu sente susar atu kontrola sira-nia hirus. Ema seluk sente susar atu kontrola sira-nia hanoin. Porezemplu, sira hanoin beibeik kona-ba buat neʼebé halo sira taʼuk ka laran-kraik. Ema seluk tan sente susar atu kontrola sira-nia hakarak atu halo sala seksuál, hemu demais, ka uza sala droga.

Ema bele estraga sira-nia moris se sira la kontrola sira-nia hanoin, hakarak ka hahalok. Maibé ita bele hasees an husi ida-neʼe. Oinsá? Hodi haburas hahalok kontrola an. Atu ajuda ita halo nuneʼe, mai ita koʼalia kona-ba pergunta tolu: (1) Saida mak kontrola an? (2) Tanbasá kontrola an importante? (3) Oinsá ita bele haburas hahalok kontrola an neʼebé “mai husi Maromak nia espíritu”? (Gal 5:22, 23) Ita mós sei koʼalia kona-ba saida mak ita bele halo se dala ruma ita la kontrola an.

Ema neʼebé kontrola an la halo tuir deʼit ninia hakarak hotu. Nia la koʼalia ka hatudu hahalok neʼebé hakanek Maromak nia laran.

Jesus hatudu mai ita oinsá atu kontrola an. Bíblia hatete: “Kuandu ema koʼalia liafuan kroʼat ba nia, nia la koʼalia fali liafuan kroʼat ba sira. Kuandu nia hetan terus, nia la ameasa sira neʼebé fó-terus ba nia, maibé nia entrega ninia an ba Ida neʼebé tesi-lia tuir justisa.” (1 Ped 2:23) Jesus kontrola an bainhira ninia inimigu goza nia no prega nia iha ai-riin terus nian. (Mt 27:39-44) Antes neʼe, nia mós kontrola an bainhira ulun-naʼin relijiaun husu pergunta barak hodi lasu nia atu koʼalia sala. (Mt 22:15-22) No nia hatudu ezemplu diʼak bainhira ema Judeu neʼebé hirus foti fatuk atu tuda nia. Duké trata aat sira, “Jesus subar no sai husi templu”.—João 8:57-59.

Ita bele banati-tuir Jesus nia ezemplu ka lae? Bele. Apóstolu Pedro hakerek: “Kristu rasik terus ba imi, no nia husik ezemplu ba imi atu laʼo tuir ninia ain-fatin ho didiʼak.” (1 Ped 2:21) Maski ita la perfeitu, maibé ita bele halo tuir Jesus nia ezemplu kona-ba kontrola an. Tanbasá importante atu halo nuneʼe?

Atu halo Jeová kontente ita presiza kontrola an. Maski ita serbí ona Jeová ho laran-metin  ba tempu kleur, maibé se ita la kontrola ita-nia hahalok no liafuan, ita bele lakon ita-nia relasaun diʼak ho nia.

Hanoin toʼok kona-ba Moisés, nia mak “ema neʼebé laran-maus liu fali ema seluk hotu iha mundu tomak” iha tempu neʼebá. (Núm 12:3) Durante tinan barak, nia hatudu pasiénsia ba ema Izraél neʼebé muramura. Maibé loron ida, nia la kontrola an. Moisés sai hirus bainhira ema Izraél muramura tanba la iha bee. Moisés koʼalia ho hirus ba sira: “Agora rona bá, imi kontradór sira! Imi obriga ami atu fó bee ba imi husi fatuk boot neʼe ka?”—Núm 20:2-11.

Moisés la kontrola ninia an. Nia la fó hahiʼi ba Jeová neʼebé halo milagre hodi fó bee ba sira. (Sal 106:32, 33) Tan neʼe, Jeová la husik Moisés tama ba rai neʼebé Maromak promete. (Núm 20:12) Karik Moisés arrepende toʼo loron neʼebé nia mate tanba nia la kontrola an.—Deut 3:23-27.

Ita bele aprende saida? Maski ita iha lia-loos kleur ona, maibé se ema ruma halo ita hirus ka presiza simu konsellu, ita labele koʼalia iha dalan neʼebé la respeitu. (Éf 4:32; Kol 3:12) Bainhira ita sai idade, dala ruma susar atu hatudu pasiénsia. Maibé hanoin-hetan Moisés nia ezemplu. Ita lakohi estraga ita-nia naran diʼak ho Jeová tanba la kontrola an. Oinsá mak ita bele haburas hahalok importante neʼe?

Halo orasaun hodi husu espíritu santu. Tanbasá? Tanba hahalok neʼe mai husi Maromak nia espíritu, no nia bele haraik ninia espíritu santu ba ema neʼebé husu ba nia. (Lc 11:13) Jeová bele fó ba ita kbiit atu kontrola an liuhusi ninia espíritu santu. (Flp 4:13) Nia mós bele ajuda ita haburas hahalok seluk tan neʼebé mai husi ninia espíritu hanesan domin no neʼe sei ajuda ita atu kontrola an.—1 Kor 13:5.

Hadook an husi buat neʼebé halo susar ba ita atu kontrola an. Porezemplu hadook an husi website sira no atividade halimar seluk neʼebé hatudu hahalok aat. (Éf 5:3, 4) Tuir loloos, ita tenke hadook an husi buat naran deʼit neʼebé bele tenta ita atu halo sala. (Prov 22:3; 1 Kor 6:12) Porezemplu, se ema ida lalais atu monu ba tentasaun atu halo hahalok la morál, entaun karik nia presiza hadook an husi livru no filme romántiku.

 Dala ruma susar atu halo tuir konsellu neʼe. Maibé se ita hakaʼas an, Jeová sei fó ba ita kbiit atu kontrola an. (2 Ped 1:5-8) Nia sei ajuda ita atu kontrola ita-nia hanoin, liafuan no hahalok. Paul no Marco nia ezemplu hatudu katak neʼe loos duni, sira naʼin-rua aprende oinsá atu kontrola an hodi la hatudu hahalok violénsia. Hanoin mós kona-ba irmaun ida nia ezemplu. Dala barak bainhira nia lori karreta, nia sai hirus ho ema seluk iha dalan, dala ruma toʼo diskute malu ho sira. Oinsá nia hadiʼa ida-neʼe? Irmaun neʼe hatete: “Loroloron haʼu harohan ba Jeová. Haʼu estuda informasaun kona-ba kontrola an no dekór eskritura sira neʼebé bele ajuda haʼu. Haʼu hakaʼas an atu kontrola an ba tinan barak ona, maibé dadeer-dadeer haʼu nafatin fó-hanoin ba haʼu-nia an katak haʼu hakarak kalma nafatin. No kuandu haʼu presiza bá fatin ruma, haʼu sai sedu atu nuneʼe haʼu la ansi no sai hirus.”

Dala ruma, ita hotu la kontrola an. Bainhira neʼe akontese karik ita sente moe atu halo orasaun ba Jeová. Maibé loloos, ita presiza tebes atu halo orasaun ba Jeová iha tempu hanesan neʼe. Tan neʼe halo orasaun kedas ba Jeová. Husu nia atu perdua ita, husu nia atu ajuda ita no hakaʼas an atu la halo tan sala neʼebé hanesan. (Sal 51:9-11) Keta hanoin katak Jeová sei la rona ita-nia orasaun neʼebé ita hatoʼo atu husu ninia laran-sadiʼa. (Sal 102:17) Apóstolu João fó-hanoin ita katak Maromak nia Oan-Mane nia raan “hamoos ita-nia sala hotu”. (1 João 1:7; 2:1; Sal 86:5) Jeová haruka ninia atan sira atu perdua malu beibeik. Tan neʼe, ita bele iha konfiansa katak nia mós sei perdua ita beibeik.—Mt 18:21, 22; Kol 3:13.

Jeová la kontente bainhira Moisés la kontrola an ba tempu uitoan iha rai-fuik maran. Maski nuneʼe, Jeová fó perdua ba Moisés. No Bíblia esplika katak Moisés mak ema neʼebé laran-metin tebes no ita presiza banati-tuir nia. (Deut 34:10; Ebr 11:24-28) Jeová la husik Moisés tama ba rai neʼebé Maromak promete, maibé Jeová sei husik Moisés atu tama ba mundu foun no sei fó ba nia oportunidade atu moris ba nafatin. Ita mós bele hetan moris ba nafatin se ita kontinua hakaʼas an atu haburas hahalok kontrola an.—1 Kor 9:25.