HANOIN toʼok, iha ema ida neʼebé hatene didiʼak kona-ba klima. Nia haree katak sei akontese anin-boot neʼebé sei lori perigu ba ema barak iha ninia área. Tanba nia lakohi ema seluk hetan perigu, nia la kole atu fó kedas avizu ba ema.

Iha dalan neʼebé hanesan, ohin loron Jeová fó avizu ba ema hotu iha mundu tomak kona-ba susar neʼebé hanesan “anin-boot” neʼebé perigu liu hotu. Oinsá mak nia fó sai avizu neʼe? No oinsá ita bele fiar katak nia fó tempu neʼebé toʼo ba ema atu halo tuir avizu neʼe? Atu hatán pergunta sira-neʼe, mai ita haree toʼok avizu balu neʼebé Jeová fó sai iha tempu uluk.

Iha Bíblia nia tempu, Jeová fó sai avizu oioin kona-ba saida mak nia sei halo ba ema neʼebé lakohi halo tuir ninia mandamentu sira. (Prov 10:25; Jer 30:23) Iha tempu ida-idak, kleur antes nia halaʼo ninia tesi-lia ba ema, nia fó sai nanis avizu ba sira katak sira presiza halo tuir nia. (2 Reis 17:12-15; Neem 9:29, 30) Atu ajuda ema komprende katak sira presiza halo mudansa lalais iha sira-nia moris, baibain Maromak uza ninia atan neʼebé laran-metin iha rai atu fó sai avizu no ajuda ema komprende katak sira presiza halo kedas buat ruma.​—Amós 3:7.

Noé mak ezemplu ida husi ema laran-metin neʼebé Maromak uza. Ba tinan barak, Noé ho aten-brani fó avizu kona-ba Rai-Nabeen ba ema neʼebé hatudu hahalok aat. (Gén 6:9-13, 17) Nia mós fó-hatene beibeik ba sira kona-ba saida mak sira presiza halo atu hetan salvasaun, tan neʼe mak Bíblia bolu nia nuʼudar “haklaken-naʼin kona-ba justisa”.​—2 Ped 2:5.

Maski Noé hakaʼas an, ema iha tempu neʼebá lakohi rona kona-ba mensajen neʼebé mai husi Maromak. Sira hatudu katak sira la iha fiar. Rezultadu mak sira mate kuandu Rai-Nabeen “halakon sira hotu”. (Mt 24:39; Ebr 11:7) La iha razaun atu dehan katak Maromak la fó avizu neʼebé klaru ba sira.

Iha situasaun seluk, Jeová fó avizu loron balu antes nia halo buat ruma. Maibé, tempu neʼebé nia fó sempre natoon ba sira. Porezemplu nia fó uluk avizu antes hamosu susar sanulu ba ema Ejitu. Ezemplu ida mak kuandu Jeová haruka Moisés no Arão atu fó-hanoin Faraó no ninia atan sira kona-ba susar númeru hitu, neʼe mak udan ho jelu-fatuk. Tanba neʼe sei akontese iha loron tuirmai, neʼe katak Jeová fó tempu neʼebé natoon atu sira bele buka fatin protesaun no sees husi susar neʼe ka lae? Bíblia hatete katak: “Faraó nia atan sira neʼebé hamtaʼuk Jeová nia liafuan lori kedas sira-nia atan rasik no sira-nia animál-hakiak ba uma laran, maibé ema neʼebé la simu Jeová nia liafuan husik deʼit sira-nia atan no sira-nia animál iha toʼos.” (Éx 9:18-21) Klaru, Jeová fó tempu neʼebé natoon atu nuneʼe sira neʼebé lalais halo tuir avizu neʼe sei la hetan rezultadu aat husi susar neʼebé akontese.

Antes susar númeru sanulu kona Faraó no ninia atan sira, sira mós simu ona avizu. Maski nuneʼe, sira lakohi rona ba avizu neʼe. (Éx 4:22, 23) Rezultadu mak sira-nia oan-mane primeiru mate. Aat tebes! (Éx 11:4-10; 12:29) Sira iha tempu atu halo tuir avizu sira-neʼe ka lae? Sin! Moisés fó sai kedas avizu neʼe ba ema Izraél no fó-hatene saida mak sira tenke halo atu la kona susar neʼe. (Éx 12:21-28) Ema naʼin-hira mak halo tuir avizu neʼe? Maizumenus ema naʼin millaun tolu,  inklui ema Izraél no “ema barak neʼebé laʼós ema Izraél”, no ema Ejitu mak la kona susar sira-neʼe no sai husi rai-Ejitu.​—Éx 12:38.

Hanesan ezemplu sira neʼebé hatudu ona, Jeová sempre fó tempu neʼebé natoon ba ema atu halo tuir ninia avizu sira. (Deut 32:4) Saida mak motiva Jeová atu halo nuneʼe? Apóstolu Pedro esplika katak Jeová “lakohi ema ida lakon maibé nia hakarak ema hotu atu arrepende sala”. (2 Ped 3:9) Sin, Maromak hadomi ema. Nia hakarak ema atu arrepende an no halo tuir ninia hakarak antes nia halaʼo ninia tesi-lia.​—Isa 48:17, 18; Rom 2:4.

Nuneʼe mós ohin loron, ema hotu tenke halo tuir avizu importante neʼebé fó sai daudaun iha mundu tomak. Bainhira Jesus iha rai, nia fó sai nanis katak mundu aat neʼebé agora daudaun iha sei lakon tiha durante “terus boot”. (Mt 24:21) Nia fó sai profesia kona-ba buat neʼebé ema sei hasoru bainhira tempu neʼe besik ona. Buat neʼebé Jesus fó sai, ita haree akontese daudaun ohin loron.​—Mt 24:3-12; Lc 21:10-13.

Tan neʼe, Maromak Jeová hakarak ema hotu hili hodi serbí no halo tuir ninia hakarak. Nia hakarak atu ema neʼebé halo tuir nia bele halaʼo moris neʼebé kontente ohin loron no simu bensaun barak iha mundu foun neʼebé iha justisa. (2 Ped 3:13) Atu iha fiar neʼebé metin kona-ba promesa sira-neʼe, Jeová fó sai nanis ona “liafuan diʼak kona-ba [ninia] Ukun” neʼebé bele salva ema nia moris, no Jesus dehan katak ema sei haklaken liafuan diʼak neʼe “iha mundu tomak nuʼudar sasin ba nasaun hotu, depois neʼe, mundu nia rohan sei mai”. (Mt 24:14) Maromak organiza ona ninia atan sira neʼebé laran-metin iha mundu atu fó sai sasin neʼe, ka haklaken Maromak nia mensajen, maizumenus iha rai 240. Jeová hakarak ema barak liu atu rona no hetan salvasaun bainhira nia halaʼo ninia tesi-lia.​—Sof 1:14, 15; 2:2, 3.

Evidénsia sira-neʼe hatudu mai ita katak Jeová sempre fó tempu neʼebé natoon ba ema atu halo tuir ninia avizu sira. Maibé pergunta importante mak: Ema sei aproveita tempu neʼe atu rona no halo tuir Maromak nia mensajen tesi-lia nian neʼebé ninia atan sira fó sai ohin loron ka lae? Mai ita hotu nuʼudar Maromak nia sasin-naʼin, kontinua ajuda ema barak liután atu bele hetan salvasaun kuandu mundu nia rohan toʼo ona mai.