1-2. (a) Lakleur tan nasaun sira sei deklara saida? (b) Ita sei hetan resposta ba pergunta saida deʼit?

IMAJINA toʼok katak nasaun sira foin deklara “dame no hakmatek” neʼebé Bíblia fó-hatene nanis ona. Karik sira gaba an katak agora mundu seguru liu. Nasaun sira hakarak ita atu fiar katak sira konsege rezolve problema iha mundu. Maibé sira labele duni hapara buat neʼebé akontese tuirmai. Tanbasá? Profesia iha Bíblia dehan katak “sira sei lakon derrepente deʼit . . . no sira labele halai sees”.​—1 Tes 5:3.

² Ita presiza hetan resposta ba pergunta importante sira tuirmai neʼe: Saida mak sei akontese durante “terus boot”? Jeová hakarak ita atu halo saida durante “terus boot”? No oinsá mak ita bele prepara an agora hodi bele laran-metin nafatin durante terus boot?​—Mt 24:21.

3. Tuir Apokalipse 17:5, 15-18, oinsá mak Maromak halakon “Babilónia Boot”?

³ Lee Apokalipse 17:5, 15-18. “Babilónia Boot” sei lakon. Hanesan temi ona, nasaun sira la iha kbiit atu hanetik buat neʼebé akontese durante tempu neʼe. Tanbasá? Tanba “Maromak tau ninia hanoin iha sira-nia laran atu kumpre Maromak nia hakarak”. Jeová nia hanoin neʼe mak saida? Neʼe mak atu halakon relijiaun falsu hotu inklui relijiaun Kristaun falsu. * Maromak sei tau ninia hanoin  iha “dikur sanulu” husi ‘animál fuik kór-mean’ nia laran. Dikur sanulu reprezenta nasaun hotu neʼebé apoia “animál fuik”. No “animál fuik” reprezenta Nasoins Unidas. (Apok 17:3, 11-13; 18:8) Bainhira nasaun sira-neʼe ataka relijiaun falsu, neʼe mak sinál katak terus boot komesa ona. Neʼe mak akontesimentu neʼebé mosu derrepente deʼit no kona ema hotu iha mundu tomak.

4. (a) Karik nasaun sira sei fó razaun saida atu ataka relijiaun falsu? (b) Relijiaun falsu nia membru sira karik sei halo saida?

⁴ Ita la hatene ho loloos nasaun sira sei fó sai razaun saida bainhira ataka Babilónia Boot. Karik sira sei dehan katak relijiaun sira hanetik dame no sempre mete ho polítiku. Ka karik sira sei dehan katak relijiaun sira halibur rikusoin no rai barak liu. (Apok 18:3, 7) Bainhira nasaun sira ataka relijiaun falsu, karik sira sei la halakon ema hotu neʼebé sai membru ba relijiaun sira-neʼe. Maibé karik halakon deʼit relijiaun sira. Bainhira relijiaun sira-neʼe lakon ona, ninia membru sira karik sei rekoñese katak ulun-naʼin relijiaun sira lohi ona sira. No membru sira-neʼe mós karik sei dehan katak sira la iha ligasaun tan ho relijiaun sira-neʼe.

5. Saida mak Jeová promete ona kona-ba terus boot? Tanbasá?

⁵ Bíblia la fó sai kona-ba tempu hira mak nasaun sira sei uza atu halakon Babilónia Boot, maibé ita hatene katak neʼe sei akontese ba tempu badak deʼit. (Apok 18:10, 21) Jeová promete atu “habadak tempu” terus boot atu nuneʼe “ema sira neʼebé nia hili ona” no relijiaun loos sei la lakon. (Mc 13:19, 20) Maibé Jeová hakarak ita atu halo saida bainhira terus boot komesa no antes funu Armagedon?

6. Ita tenke halo saida tan hodi la sai parte ba relijiaun falsu?

⁶ Hanesan ita estuda ona iha lisaun antes neʼe, Jeová hakarak ninia atan  sira atu hasees an husi Babilónia Boot. Maibé neʼe seidauk toʼo. Ita mós tenke hakaʼas an atu kaer metin ba adorasaun neʼebé loos, no serbí Jeová mesak deʼit. Hanoin toʼok dalan rua atu halo nuneʼe.

7. (a) Oinsá mak ita bele kaer metin Jeová nia matadalan kona-ba morál? (b) Oinsá mak Ebreu 10:24, 25, hatudu katak importante atu halibur hamutuk, liuliu agora?

⁷ Primeiru, ita tenke kaer metin Jeová nia matadalan kona-ba morál. Ita labele simu mundu nia hahalok la morál. Porezemplu, ita la simu sala seksuál hotu, inklui mane kaben ho mane ka feto kaben ho feto, no hahalok omoseksuál seluk. (Mt 19:4, 5; Rom 1:26, 27) Segundu, ita tenke kontinua adora Jeová hamutuk ho maluk Kristaun sira. Ita hakaʼas an atu halibur hamutuk iha Reuniaun-Fatin ka halibur iha ema nia uma ka subasubar se presiza. Ita hakarak atu halibur hamutuk nafatin maski hasoru situasaun oioin. Tuir loloos, ita presiza halibur hamutuk ‘liuliu bainhira ita haree loron neʼe besik daudaun ona’.​—Lee Ebreu 10:24, 25.

8. Iha futuru sei iha mudansa saida kona-ba mensajen neʼebé ita haklaken?

⁸ Durante terus boot, karik sei iha mudansa ba mensajen neʼebé ita haklaken. Ohin loron, ita haklaken liafuan diʼak kona-ba Maromak nia Ukun no hakaʼas an ajuda ema sai Jesus nia dixípulu. Maibé iha tempu neʼebá, karik ita sei haklaken mensajen tesi-lia nian neʼebé todan hanesan jelu-fatuk. (Apok 16:21) Karik ita haklaken katak lakleur tan Satanás nia mundu sei lakon mohu. Iha futuru ita sei hatene ho loloos mensajen saida mak ita sei fó sai no oinsá atu fó sai ida-neʼe. Ita sei uza dalan neʼebé ita uza ona ba tinan atus ida liu atu haklaken ka ita sei uza dalan seluk? Hein deʼit. Maibé, ita bele fiar katak ita sei hetan priviléjiu atu haklaken ho aten-brani mensajen kona-ba Jeová nia tesi-lia.​—Eze 2:3-5.

9. Ita-nia mensajen sei book nasaun sira atu halo saida? Maibé ita bele fiar saida?

⁹ Karik ita-nia mensajen sei book nasaun sira atu koko hapara ita atu haklaken. Ohin loron ita sadere ba Jeová atu apoia ita haklaken, nuneʼe mós ita presiza ninia apoia iha tempu neʼebá. Ita bele fiar katak Jeová sei fó ita kbiit atu kumpre ninia hakarak.​—Miq 3:8.

10. Tuir Lucas 21:25-28, buat neʼebé akontese durante terus boot sei halo ema barak sente oinsá?

¹⁰ Lee Lucas 21:25-28. Durante terus boot, ema sei hakfodak bainhira sira haree buat hotu neʼebé uluk sira hanoin katak dura ba nafatin komesa lakon. Sira sei “laran-susar tebetebes”, no taʼuk mate tanba sira tama iha tempu neʼebé susar liu hotu iha ema nia istória. (Sof 1:14, 15) Iha momentu neʼebá, moris sei sai susar liu no neʼe kona mós Jeová nia povu. Karik ita mós sei hasoru susar oioin tanba ita la sai parte ba mundu neʼe. Karik ita sei falta buat balu neʼebé ita presiza.

11. (a) Tanbasá ema hotu sei fokus deʼit ba Testemuña ba Jeová iha futuru? (b) Tanbasá ita la presiza taʼuk terus boot?

¹¹ Iha tempu neʼebá, karik ema sei sai hirus ba ita tanba sira-nia relijiaun lakon maibé relijiaun Testemuña ba Jeová la lakon. Karik sira sei fó sai sira-nia hirus iha dalan oioin inklui liuhusi média sosiál. Nasaun sira no sira-nia ukun-naʼin  Satanás sei odi ita tanba ita-nia relijiaun deʼit mak seidauk lakon. Sira seidauk kumpre sira-nia planu atu halakon relijiaun hotu. Tan neʼe sira sei fokus ba ita. Iha momentu neʼe, nasaun sira sei sai Gog husi rai-Magog. * Sira sei apoia malu atu ataka Jeová nia povu ho sira-nia kbiit tomak. (Eze 38:2, 14-16) Karik ita bele komesa laran-taridu kona-ba buat neʼebé sei akontese durante terus boot, liuliu tanba ita la hatene informasaun hotu kona-ba neʼe. Maibé, ita bele fiar katak ita la presiza taʼuk terus boot. Jeová sei fó ita matadalan neʼebé bele salva ita-nia moris. (Sal 34:19) Ita sei ‘hamriik loos no foti ita-nia ulun’ tanba ita hatene katak ita-nia “salvasaun mai besik daudaun ona”. *

12. Oinsá “atan laran-metin no matenek” prepara daudaun ita ba terus boot?

¹² “Atan laran-metin no matenek” prepara daudaun ita atu bele laran-metin nafatin durante terus boot. (Mt 24:45) Atan neʼe ajuda ita liuhusi dalan oioin, ezemplu ida mak ita-nia reuniaun boot ba loron tolu hahú husi tinan 2016 toʼo 2018. Programa sira-neʼe anima ita atu hametin hahalok sira neʼebé ita presiza nuʼudar Jeová nia loron besik daudaun. Mai ita hanoin fali hahalok sira-neʼe.

13. Oinsá mak ita bele hametin ita-nia laran-metin ba Jeová? Saida mak ita tenke halo agora?

¹³ Laran-metin: Tema ba reuniaun boot ba loron tolu iha tinan 2016 mak “Laran-metin nafatin ba Maromak Jeová!” Programa neʼe hanorin ita katak se ita iha relasaun neʼebé metin ho Jeová, ita sei laran-metin ba nia. Programa neʼe mós fó-hanoin ita katak ita bele hakbesik ba Maromak liuhusi orasaun no estuda Bíblia ho badinas. Neʼe sei hametin ita atu tahan hasoru problema boot. Nuʼudar Satanás nia sistema besik ona atu remata, ita hatene katak ita sei hetan terus barak liután neʼebé koko ita-nia laran-metin ba Maromak no ninia Ukun. Karik ema sei kontinua goza ita. (2 Ped 3:3, 4) Karik neʼe akontese tanba ita neutrál iha Satanás nia mundu neʼe. Ita tenke hametin ita-nia laran-metin agora atu nuneʼe ita bele laran-metin nafatin durante terus boot.

14. (a) Sei iha mudansa saida kona-ba irmaun sira neʼebé dirije ita iha mundu? (b) Tanbasá ita presiza laran-metin iha tempu neʼebá?

¹⁴ Durante terus boot, sei iha mudansa kona-ba irmaun sira neʼebé dirije ita iha mundu. Iha tempu neʼebá, Jesus nia alin hotu neʼebé sei iha rai sei saʼe ba lalehan atu hola parte iha funu Armagedon. (Mt 24:31; Apok 2:26, 27) Neʼe katak la iha tan Grupu Administradór hamutuk ho ita iha rai. Maibé, ema-lubun boot sei nafatin organiza an ho didiʼak. Irmaun sira neʼebé iha esperiénsia husi bibi-malae seluk mak sei dirije ita. Ita presiza hatudu laran-metin hodi apoia irmaun sira-neʼe no halo tuir matadalan neʼebé sira simu husi Maromak. Ita-nia salvasaun depende ba ida-neʼe!

15. Oinsá mak ita bele hametin ita-nia kbiit atu tahan? Tanbasá importante atu halo neʼe agora?

 ¹⁵ Kbiit atu tahan: Tema ba reuniaun boot ba loron tolu iha tinan 2017 mak “Keta rende an!” Programa neʼe ajuda ita atu hametin ita-nia kbiit atu tahan susar sira. Ita aprende katak ita-nia kbiit atu tahan la depende ba situasaun. Ita bele hametin ita-nia kbiit atu tahan hodi sadere ba Jeová. (Rom 12:12) Ita labele haluha Jesus nia promesa: “Ema neʼebé tahan toʼo rohan mak sei hetan salvasaun.” (Mt 24:13) Promesa neʼe fó-hanoin ita katak ita tenke laran-metin nafatin maski hasoru susar oioin. Hodi tahan susar ida-idak agora, ita bele hametin ita-nia fiar antes terus boot komesa.

16. Ita-nia aten-brani depende ba saida? Oinsá mak ita hametin ita-nia aten-brani agora?

¹⁶ Aten-brani: Tema ba reuniaun boot ba loron tolu iha tinan 2018 mak “Sai aten-brani bá!” Programa neʼe fó-hanoin ita katak ita-nia aten-brani la depende ba ita-nia kbiit rasik. Ita presiza sadere ba Jeová hodi iha kbiit atu tahan, nuneʼe mós ita presiza sadere ba Jeová atu iha aten-brani. Oinsá ita bele sadere liután ba Jeová? Hodi lee Bíblia loroloron no medita kona-ba oinsá Jeová salva ona ninia povu iha tempu uluk. (Sal 68:20; 2 Ped 2:9) Bainhira nasaun sira ataka ita durante terus boot, ita presiza aten-brani no tau fiar ba Jeová liu fali tempu seluk. (Sal 112:7, 8; Ebr 13:6) Se ita sadere ba Jeová agora, ita sei sai aten-brani bainhira Gog ataka. *

17. Tanbasá ita la presiza taʼuk Armagedon? (Haree dezeñu iha livru oin.)

¹⁷ Hanesan temi ona iha lisaun antes neʼe, ita barak sai boot durante loron ikus sira. Maibé ita mós iha esperansa atu liu terus boot. Funu Armagedon mak sei halakon sistema aat neʼe. Maibé, ita la presiza taʼuk. Tanbasá? Tanba neʼe mak Maromak nia funu. (Prov 1:33; Eze 38:18-20; Zac 14:3) Bainhira Jeová fó orden, Jesus Kristu sei lori Maromak  nia tropa ba funu. Ninia alin sira neʼebé moris-hiʼas ona no mós anju rihun ba rihun sei akompaña nia. Sira hotu sei funu hasoru Satanás, anju aat sira, no tropa sira iha rai.​—Dan 12:1; Apok 6:2; 17:14.

18. (a) Jeová promete saida? (b) Oinsá mak Apokalipse 7:9, 13-17 fó ita razaun atu iha konfiansa kona-ba futuru?

¹⁸ Jeová promete ona katak ‘armas naran deʼit neʼebé ema halo hodi kontra ita sei la hetan susesu’. (Isa 54:17) Jeová nia atan sira neʼebé laran-metin ba nia mak “ema-lubun boot” neʼebé sei “liu terus boot”. Tuirmai sira sei kontinua serbí nia. (Lee Apokalipse 7:9, 13-17.) Bíblia fó ita razaun barak atu iha konfiansa katak ita sei hetan salvasaun iha futuru! Ita hatene katak “Jeová sei proteje sira neʼebé laran-metin ba nia”. (Sal 31:23) Ema hotu neʼebé hadomi no hahiʼi Jeová sei kontente atu haree Jeová nia naran sai santu.​—Eze 38:23.

19. Ita iha esperansa furak saida kona-ba futuru?

¹⁹ Hanoin toʼok se 2 Timóteo 3:2-5 koʼalia kona-ba ema neʼebé moris iha mundu foun neʼebé Satanás la kontrola ona. (Haree kaixa “ Ema nia hahalok iha tempu neʼebá”.) Irmaun George Gangas, * neʼebé uluk serbí nuʼudar membru ba Grupu Administradór, dehan nuneʼe: “Mundu sei sai fatin neʼebé furak tebes bainhira ema hotu adora Jeová. Lakleur tan Ita sei hetan priviléjiu atu moris iha mundu foun. Ita sei moris ba nafatin.” Neʼe mak esperansa neʼebé furak tebes!