1. Tanbasá ita tenke hakruʼuk ba Jeová?

ITA tenke hakruʼuk * ba Jeová tanba nia mak ita-nia Kriadór. Tan neʼe, nia iha direitu atu fó matadalan ba ninia kriasaun sira. (Apok 4:11) Maibé razaun seluk atu halo tuir nia mak tanba ninia dalan atu ukun mak diʼak liu hotu. Ukun-naʼin barak iha podér no ukun ema seluk. Se kompara ho sira, Jeová mak Ukun-Naʼin neʼebé matenek liu, iha domin boot, laran-sadiʼa, no laran-diʼak.—Éx 34:6; Rom 16:27; 1 João 4:8.

2. Ebreu 12:9-11 fó ita razaun saida deʼit atu hakruʼuk ba Jeová?

² Jeová hakarak ita halo tuir nia laʼós deʼit tanba ita taʼuk nia, maibé tanba ita hadomi nia no haree nia nuʼudar Aman neʼebé domin. Paulo hakerek ba ema Ebreu no dehan, “ita tenke hakruʼuk liután ba Aman” tanba nia treinu ita “ba ita-nia diʼak”.​—Lee Ebreu 12:9-11.

3. (a) Oinsá ita bele hatudu katak ita hakruʼuk ba Jeová? (b) Ita sei hetan resposta ba pergunta saida deʼit?

³ Ita hakruʼuk ba Jeová liuhusi hakaʼas an atu halo tuir nia iha buat hotu no hakaʼas an atu luta hasoru ita-nia hakarak atu sadere ba ita-nia matenek rasik. (Prov 3:5) Se ita aprende liután kona-ba Jeová nia hahalok furak sira, fasil liu ba ita atu hakruʼuk ba nia. Tanbasá? Nia halo buat hotu tanba ninia hahalok furak sira. (Sal 145:9) Bainhira ita aprende liután kona-ba Jeová, ita mós sei hadomi nia liután. No bainhira ita hadomi Jeová, ita la presiza  ukun-fuan barabarak kona-ba buat neʼebé ita tenke halo ka la halo. Ita hakaʼas an atu halo tuir Jeová hodi hadomi buat neʼebé diʼak no odi buat neʼebé aat. (Sal 97:10) Maibé tanbasá dala ruma susar atu halo tuir Jeová? Katuas kongregasaun, aman no inan sira bele aprende saida husi Governadór Neemias, Liurai David, no Jesus nia inan Maria? Lisaun neʼe sei hatán ba pergunta sira-neʼe.

4-5. Tuir Roma 7:21-23, tanbasá susar atu hakruʼuk ba Jeová?

⁴ Razaun ida tanbasá susar atu hakruʼuk ba Jeová mak tanba ita hotu sala-naʼin no la perfeitu. Tan neʼe, dala ruma ita iha hakarak atu kontra Maromak. Bainhira Adão no Eva kontra Maromak hodi han ai-fuan neʼebé Maromak bandu, sira deside ba sira-nia an rasik saida mak diʼak no aat. (Gén 3:22) Ohin loron, ema barak hili atu la halo tuir Jeová no hakarak deside rasik saida mak diʼak no aat.

⁵ Maibé dala ruma, ema sira neʼebé hatene no hadomi Jeová mós sente susar atu sempre hakruʼuk ba nia. Apóstolu Paulo mós sente hanesan. (Lee Roma 7:21-23.) Hanesan Paulo, ita hakarak halo buat neʼebé loos iha Maromak nia oin. Maibé ita tenke kontinua luta hasoru ita-nia hakarak atu halo sala.

6-7. Saida mak razaun seluk tanbasá susar atu hakruʼuk ba Jeová? Konta toʼok ezemplu ida.

⁶ Razaun seluk tanbasá susar atu hakruʼuk ba Jeová mak tanba hetan influénsia husi ita-nia kultura. Ema barak nia hanoin mak kontra Jeová nia hakarak. Tan neʼe, ita tenke hakaʼas an atu labele iha hanoin hanesan sira. Hanoin toʼok ezemplu ida.

⁷ Iha fatin balu, joven barak hetan presaun atu buka osan barak. Irmán ida naran Mary * hasoru susar neʼe. Antes nia aprende kona-ba Jeová, nia tama universidade ida neʼebé iha naran-boot. Mary nia família obriga nia atu buka serbisu neʼebé manán osan barak no ema seluk bele respeitu nia. Mary mós hakarak ida-neʼe. Maibé, bainhira nia aprende tiha kona-ba Jeová no hadomi nia, Mary troka ninia planu. Maski nuneʼe, Mary dehan: “Dala ruma haʼu hetan oportunidade atu manán osan barak, maibé haʼu hatene katak neʼe sei hanetik haʼu atu serbí Jeová hanesan haʼu halo agora. Haʼu-nia inan-aman nia dalan atu haboot haʼu, halo susar ba haʼu atu la simu oportunidade sira-neʼe. Haʼu tenke harohan ba Jeová atu ajuda haʼu la simu serbisu neʼebé bele hanetik haʼu atu serbí Jeová ho laran tomak.”​—Mt 6:24.

8. Agora ita sei koʼalia kona-ba saida?

⁸ Hakruʼuk ba Jeová lori benefísiu ba ita. Maibé bainhira ema sira neʼebé kaer responsabilidade ruma hanesan katuas kongregasaun, aman, no inan, hakruʼuk ba Jeová, sira bele ajuda ema seluk. Mai ita koʼalia kona-ba ezemplu balu husi Bíblia neʼebé bele hanorin ita oinsá atu halaʼo ita-nia responsabilidade iha dalan neʼebé halo Jeová kontente.

9. Susar saida deʼit mak Neemias hasoru?

⁹ Jeová fó responsabilidade importante ba katuas sira atu tau matan ba ninia povu. (1 Ped 5:2) Katuas sira bele  aprende buat barak hodi estuda dalan neʼebé Neemias tau matan ba Jeová nia povu. Nuʼudar governadór iha Judá, Neemias iha podér barak. (Neem 1:11; 2:7, 8; 5:14) Hanoin toʼok susar balu neʼebé Neemias hasoru. Nia haree katak povu hafoʼer ona templu no la fó apoia ba ema Levi hodi tuir Ukun-Fuan. Ema Judeu sira kontra ukun-fuan kona-ba loron Sábadu, no mane balu kaben ho feto estranjeiru. Governadór Neemias presiza rezolve situasaun neʼe.​—Neem 13:4-30.

10. Neemias halo saida bainhira hasoru susar?

¹⁰ Neemias la uza sala ninia podér hodi obriga Maromak nia povu atu halo tuir ninia hanoin. Maibé Neemias buka matadalan husi Jeová liuhusi orasaun, no hanorin Jeová nia Ukun-Fuan ba povu. (Neem 1:4-10; 13:1-3) Neemias mós ho haraik an serbisu hamutuk ho ninia maluk sira hodi ajuda sira atu harii fali moru Jeruzalein.​—Neem 4:15.

11. Tuir 1 Tesalónika 2:7, 8, katuas sira presiza hatudu hahalok saida ba irmaun-irmán sira?

¹¹ Karik katuas sira la hasoru problema hanesan Neemias nian, maibé sira bele banati-tuir nia iha dalan oioin. Porezemplu, sira hakaʼas an atu ajuda irmaun-irmán sira. No sira mós la sente katak sira diʼak liu fali ema seluk tanba sira-nia responsabilidade. Maibé, sira tau matan ba kongregasaun ho laran-diʼak. (Lee 1 Tesalónika 2:7, 8.) Tanba sira haraik an no hadomi ema seluk, sira koʼalia ho laran-diʼak. Andrew neʼebé serbí nuʼudar katuas ba tinan barak ona dehan: “Haʼu haree katak se katuas ida hatudu domin no laran-diʼak, neʼe book duni irmaun-irmán. Hahalok sira-neʼe book kongregasaun atu apoia katuas sira.” Tony neʼebé mós serbí nuʼudar katuas ba tinan barak ona dehan: “Haʼu koko atu aplika konsellu iha Filipe 2:3 no kontinua hakaʼas an atu haree ema seluk  boot liu fali haʼu. Neʼe ajuda haʼu la obriga ema atu halo tuir haʼu.”

12. Tanbasá katuas sira presiza haraik an?

¹² Katuas sira tenke hatudu haraik an hanesan Jeová. Maski Jeová mak Ukun-Naʼin Boot Liu iha lalehan no rai, nia “hakruʼuk” atu ajuda “ema kiʼik hamriik husi rai-rahun”. (Sal 18:35; 113:6, 7) Tuir loloos, Jeová hakribi ema sira neʼebé foti an.—Prov 16:5.

13. Tanbasá katuas presiza “kontrola ninia nanál”?

¹³ Katuas neʼebé hakruʼuk ba Jeová presiza “kontrola ninia nanál”. Se lae, karik nia sei koʼalia iha dalan neʼebé la diʼak se ema ida la respeitu nia. (Tgo 1:26; Gal 5:14, 15) Andrew neʼebé temi ohin dehan: “Dala ruma, haʼu hakarak atu koʼalia iha dalan neʼebé la diʼak ba irmaun ka irmán neʼebé haʼu sente la respeitu haʼu. Maibé haʼu medita kona-ba fiar-naʼin sira-nia ezemplu diʼak husi Bíblia, no neʼe ajuda haʼu atu komprende tanbasá importante atu hatudu haraik an no laran-maus.” Katuas hatudu katak sira hakruʼuk ba Jeová hodi hatudu domin no laran-diʼak bainhira koʼalia ho irmaun-irmán sira, inklui sira-nia maluk katuas sira.​—Kol 4:6.

14. Jeová fó responsabilidade saida ba aman sira, no nia hakarak sira atu halo saida?

¹⁴ Jeová fó responsabilidade ba aman sira nuʼudar família nia ulun, no Maromak hakarak sira atu treinu no dixiplina sira-nia oan. (1 Kor 11:3; Éf 6:4) Maibé aman sira labele halaʼo sira-nia responsabilidade tuir deʼit sira-nia hakarak tanba sira tenke hatán ba Jeová, ida neʼebé kria família hotu. (Éf 3:14, 15) Aman sira hatudu katak sira hakruʼuk ba Jeová hodi halaʼo sira-nia responsabilidade iha dalan neʼebé halo Maromak kontente. Sira bele aprende buat barak hodi estuda kona-ba Liurai David nia moris.

15. Tanbasá David nia ezemplu diʼak ba aman sira?

¹⁵ Jeová hili David nuʼudar ulun ba ninia família no mós ba nasaun Izraél tomak. Nuʼudar liurai, David iha podér boot. Dala ruma, nia uza sala podér neʼe no halo sala boot. (2 Sam 11:14, 15) Maibé, nia hatudu katak nia hakruʼuk ba Jeová hodi simu dixiplina. Nia fakar sai ninia laran tomak ba Jeová liuhusi orasaun. No nia koko makaʼas atu halo tuir Jeová nia konsellu. (Sal 51:1-4) Liután neʼe, nia mós hatudu haraik an hodi simu konsellu diʼak husi mane no mós feto  sira. (1 Sam 19:11, 12; 25:32, 33) David aprende husi ninia sala no hakaʼas an atu tau uluk Jeová iha ninia moris.

16. Lisaun saida deʼit mak aman sira bele aprende husi Liurai David?

¹⁶ Hanoin kona-ba lisaun balu neʼebé aman sira bele aprende husi Liurai David. (1) Labele uza sala podér neʼebé Jeová fó ba Ita. (2) Rekoñese Ita-nia sala, no simu ema seluk nia konsellu neʼebé bazeia ba Bíblia. Se Ita halo nuneʼe, Ita-nia família sei respeitu Ita tanba Ita haraik an. (3) Bainhira halo orasaun ho Ita-nia família, fakar sai Ita-nia laran ba Jeová, atu nuneʼe sira bele rona oinsá Ita sadere ba Jeová. (4) Tau uluk Ita-nia serbisu ba Jeová. (Deut 6:6-9) Ita-nia ezemplu diʼak mak prezente folin-boot neʼebé Ita bele fó ba Ita-nia família.

17. Jeová fó responsabilidade saida ba inan sira?

¹⁷ Jeová fó knaar furak ba inan sira, no fó responsabilidade balu ba sira atu tau matan ba sira-nia oan. (Prov 6:20) Tuir loloos, buat neʼebé inan ida halo ka koʼalia bele afeta oan sira-nia moris tomak. (Prov 22:6) Haree toʼok saida mak inan sira bele aprende husi Jesus nia inan Maria.

18-19. Inan sira bele aprende saida husi Maria?

¹⁸ Maria hatene Eskritura sira ho didiʼak. Nia hatudu respeitu kleʼan ba Jeová no iha relasaun neʼebé metin ho Jeová. Nia prontu atu halo tuir Jeová nia hakarak, maski neʼe troka ninia moris tomak.​—Lc 1:35-38, 46-55.

¹⁹ Inan sira bele banati-tuir Maria nia ezemplu iha dalan oioin. Primeiru, hametin Ita-nia relasaun ho Jeová liuhusi estuda Bíblia no halo orasaun mesak. Segundu, sai prontu atu halo mudansa ba Ita-nia moris hodi halo Jeová kontente. Porezemplu, kuandu Ita sei kiʼik karik Ita-nia inan-aman hirus beibeik no koʼalia liafuan kroʼat. Tan neʼe, karik Ita hanoin katak normál atu trata oan iha dalan hanesan neʼe. Maski Ita aprende ona kona-ba Jeová nia matadalan sira, maibé karik Ita sente susar atu kalma nafatin no hatudu pasiénsia ba Ita-nia oan kuandu sira nakar, liuliu se Ita kole. (Éf 4:31) Iha tempu hanesan neʼe, importante atu sadere liután ba Jeová liuhusi orasaun. Inan ida naran Lydia hatete: “Dala ruma haʼu tenke harohan atu nuneʼe haʼu labele koʼalia ho hirus bainhira haʼu-nia oan kontra haʼu. Kuandu haʼu koʼalia hela, dala ruma haʼu para ba tempu uitoan atu bele halo orasaun iha laran  hodi husu Jeová nia ajuda. Orasaun halo haʼu kalma nafatin.”​—Sal 37:5.

20. Susar saida mak inan balu hasoru? Oinsá mak sira bele manán susar neʼe?

²⁰ Inan seluk karik sente susar atu hatudu domin ba sira-nia oan. (Tito 2:3, 4) Razaun ida mak tanba sira la hetan domin husi sira-nia inan-aman. Se Ita sai boot iha família hanesan neʼe, Ita la presiza hatudu hahalok hanesan Ita-nia inan-aman. Inan neʼebé hakruʼuk ba Jeová karik presiza aprende oinsá atu hatudu domin ba ninia oan. Karik susar ba nia atu troka ninia hanoin, sentimentu, no hahalok. Maibé nia bele halo mudansa, no neʼe sei lori benefísiu ba nia no mós ba ninia família.

21-22. Tuir Isaias 65:13, 14, benefísiu saida deʼit mak ita hetan se ita hakruʼuk ba Jeová?

²¹ Liurai David hatene katak hakruʼuk ba Jeová lori benefísiu mai ita. Nia hakerek: “Jeová nia orden mak loos, halo ema nia laran haksolok; Jeová nia mandamentu mak moos, halo ema nia matan nabilan. Ita-nia atan simu avizu liuhusi desizaun sira-neʼe; no sira neʼebé halo tuir desizaun sira-neʼe sei simu kolen boot.” (Sal 19:8, 11) Ohin loron, ita bele haree diferensa entre ema neʼebé hakruʼuk ba Jeová no ema neʼebé lakohi simu ninia konsellu. Ema neʼebé hakruʼuk ba Jeová “haklalak ho haksolok tanba laran-kontente”.​—Lee Isaias 65:13, 14.

²² Bainhira katuas sira, aman no inan sira hakruʼuk ba Jeová, sira-nia moris sei sai diʼak liu, sira-nia família sei kontente liu, no kongregasaun tomak sei iha unidade. Importante liu mak sira halo Jeová kontente. (Prov 27:11) La iha buat seluk neʼebé halo ita kontente liu fali ida-neʼe, loos ka lae?